Mbrasɛm Kɛse no mu Dza Otsĩa Ebien no
Hɛn enyigye kɛsenara ba ber a yɛroboa hɛn nuanom na nkyerɛbaa.
Mo nuanom na me nkyerɛbaa adɔfo, yɛda hom ase wɔ dza hom reyɛ nyina dze roboaboa Israel ano wɔ ntwamutam n’afã ebien nyina no, rehyɛ hom ebusua ebusua dzen, na hom rehyira hɔn a wohia mboa hɔn abrabɔ. Yɛda hom ase dɛ hom robɔ bra dɛ Jesus Christ n’akãdofo nokwafo. Hom nyim na hom dɔ dɛ hom yɛ setsie ma Ne mbrasɛm mu dza ɔso ebien no, dɛ dɔ Nyankopɔn na dɔ wo nyɛnko no.
Bosoom esia a abɛsen no, emi na Akyerɛbaa Nelson ehyia Ahotseweefo mpempem ber a yetuu kwan kɔɔr America Finimfin na Anaafo, Pacific esupruw no, nye nkoropɔn horow mu wɔ America Nkabɔmu Man no mu. Sɛ yerutu kwan a, hɛn enyidado nye dɛ yɛbɔtow hom gyedzi mu. Naaso yɛbɛsan aba ber biara no nna asɔrmba na anyɛnkofo a yehyiae no ahyɛ hɛn gyedzi dzen. Menye hom nkyɛ mber ebiasa mapã mfi hɛn ndaansa yi sũahu mu.
Esusow Aketseaba mu no, emi na Akyerɛbaa Nelson yɛnye Elder Gerrit W. na Akyerɛbaa Susan Gong kɔr Pacific Anaafo no. Yɛwɔ Auckland, New Zealand no, ɔyɛɛ hɛn adom dɛ yehyiaa mosque ebien mu imamfo wɔ Christchuch, New Zealand, bea a abosoom ebien a abɛsen no, wɔbɔɔ hɔn a wɔrosom a wonnyim hwee no etur dze kum hɔn wɔ ewurkadze yaayaw mu.
Yɛsee enuanom yinom a wɔwɔ som binom mu dɛ wondue na amandzehu, na yesii hɛn beenu no hɛn gyedzi wɔ nyamesom ho fahodzi ho no pi.
Yɛmaa hɔn edwuma ho etuhuakyɛfo na sika kakra a ɔbɔboa ma woesi hɔn mosque no bio. Onuayɛ ho nsɛm a ɔtɔ akoma do nna ɔhyɛɛ hɛn nhyiamu a yɛnye Muslimi baanodzifo no mã.
Dzifuu bosoom mu no, yɛnye Elder Quentin L. na Akyerɛbaa Mary Cook, emi na Akyerɛbaa Nelson hyiaa ankorankor binom wɔ Buenos Aires, Argentina—a hɔn mu dodow ara nnyi hɛn som mu—a hɔn abrabɔ asesã ɔnam wheelchairpii a yɛdze dua hɛn Latter-day Saint Charities mu dze maa hɔn no. Yenyaa nkenyan ber a wɔkãa hɔn ndaase enyigye mu dɛ afei wotum wɔkɔ ba.
Ber a otsĩa ebiasa a ɔsombo sii adapɛn kakra abasen kɔ no wɔ Salt Lake Kuropɔn ha yi ara. Ɔyɛ krataa soronko a menyaa no m’awoda a ofi young woman bi mɛbɛfrɛ no Mary—a oedzi mfe 14 [duanan] hɔ.
Mary kyerɛɛw ndzɛmba horow a menye no yɛ kor wɔ mu: “Iwɔ mba 10. Yɛwɔ mba 10 Ekã Mandarin kasa. Hɛn ebusua mu mbofra beesuon, a mekã ho, wɔpaa hɛn abanyɛn fii China, ntsi hɛn nã ne kasaa so nye Mandarin. Iyɛ akoma datser. M’akyerɛbaa ayɛ akoma mu operahyɛn ebien. Epɛ dɔnhwer ebien asɔr. Yɛpɛ dɔnhwer ebien asɔr. Wo ndze yɛ dɛw papaapa. Mo nuabanyin so ne ndze yɛ dɛw papaapa. Ɔyɛ furafo tse dɛ emi.”
Mary ne nsɛm no kitsaa me ara yia, ɔrekyerɛ nnyɛ no sunsum mapã no nko na mbom ne maame na ne papa hɔn etuhoakyɛ su no so.
Latter-day Saintfo, tse dɛ Jesus Christ akãdofo nkaa no, aber biara wɔhwehwɛ akwan horow a wɔdze bɔboa, epegya, na wɔadɔ nkaafo. Hɔn a wɔpɛ dɛ wɔfrɛ hɔn Ewuradze no nkorɔfo no “pɛ dɛ [wɔ]soasoa kor biara n’adzesoa, … nye hɔn a hɔn werɛ ahow dzi hɔn yaw; … na wɔkyekye hɔn a wohia awerɛkyekyer no hɔn werɛ.”
Wɔhwehwɛ dɛ wɔdze mbrasɛm mu kɛse a odzi kan na dza otsĩa ebien bɔ bra nokwar mu. Sɛ yɛdze hɛn akoma nyina dɔ Nyankopɔn a, Ɔdan hɛn akoma ma yɛhwɛ binom hɔn yieyɛ wɔ ahotsew kɔntɔnkrɔn fɛɛfɛw mu.
Yennkotum ebubu som dodow a Latter-day Saintfo nyina a wɔwɔ wiadze nyina mu no dze ma da biara wɔ afe no mu, naaso yebotum ebubu papayɛ a Asɔr no, dɛ ɔyɛ kuw no, yɛ dze hyira mbanyin na mbaa—mbanyimba na mbabaawa—a wohia mboa abasa bi no.
Asɔr ne nyimpa ho mboa dwumadzi no wɔdze puee guado wɔ afe 1984 mu. Aber no Asɔrtɔw ne nyina bɔɔ mu kyeen kɔm dze hwehwɛɛ sika a wɔdze rokɔboa hɔn a wɔwɔ Ebibir boka afamu a nsu nã ama asaase no etwee. Asɔrmba no maa $6.4 [dɔla ɔpepe esia n’ekyir pɔw anan] wɔ dɛm akɔnkye da kor mu no.
Wɔsomaa aber no Elder M Russell Ballard na Onuabanyin Glenn L Pace dɛ wɔnkɔ Ethiopia nnkɔhwɛ mbrɛ wɔdze dɛm fotow krɔnkrɔn no bedzi dwuma. Mbɔdzembɔ yi na ɔbɛyɛɛ dza ekyir no wɔfrɛ no Latter-day Saint Charities no n’ahyɛase.
Ofi dɛm mber no, Latter-day Saint Charities ama mboa bɔbor dɔla ɔpepeepe ebien a wɔdze boa hɔn a wohia wɔ wiadze nyina mu. Wɔdze mboa yi ma a wɔnnhwɛ w’asɔr, ɔman, ebusuakuw, nkitahodzi nkã-tse, ɔbanyin anaa ɔbaa, anaa amanyɛ kuw ho adwenkyerɛ.
Nnyɛ ne nyina nye no koraa. Ama yɛaboa Ewuradze N’Asɔrmba a wɔwɔ atseetsee mu no, yɛdɔ na yedzi tsetse akɔnkye ho mbra no do. Yenndzidzi ama yɛaboa hɔn a ɔkɔm dze hɔn. Dakor wo bosoom biara mu no, yendzidzi na yɛdze dɛm edziban no no bo (na no mboree) no ma hɔn a wɔwɔ ohia mu.
Mowerɛ nnkefir ber a odzi kan a mekɛseraa Ebibir Anee wɔ afe 1986 mu no. Ahotseweefo dɔmtutuw na wɔbaa hɛn nhyiamu horow no ase. Nna wonnyi wiadze mu egyapadze pii biara, naaso hɔn mu dodow na wɔhyɛɛ ntar fitaa a nnkekãa biara nnyi mu.
Mibisaa stake president mbrɛ osi hwɛ asɔrmba no a wonnyi ahonyadze kɛse yi do. Obuaa dɛ bishopfo no nyim hɔn nkorɔfo no yie. Sɛ asɔrmba botum edzidzi mpɛn ebien dakor a, nna wonnhia mboa. Mbom sɛ edziban kor pɛr anaa sɛ ɔnnsõ a—ber a ebusafo mpo aboa a—ɔno bishopfo ma edziban a, sika no fi akɔnkye afɔrbɔ no mu. Nkyii ɔdze sɔɔw do dɛ, hɔn akɔnkye afɔrbɔ ntoboa no taa bor dza wɔhwer no do. Akɔnkye afɔrbɔ a wɔabor do no, wɔdze kɔ nkorɔfo a wɔwɔ beebi a hɔn ehiadze kyɛn hɔn dze no. Dɛm Ebibiman Ahotseweefo akɔbran no kyerɛɛ me adzesuadze kɛse a ɔfa akɔnkye mbra no na tum na no sunsum no.
Dɛ yɛyɛ Asɔrmba no, yɛtse ma hɔn a woruhu amandze wɔ kwan biara mu. Dɛ yɛyɛ Nyame ne mbabanyin na ne mbabaa no, hɛn nyina yɛyɛ enuanom na nkyerɛbaa. Yedzi Ahyɛmu Dadaw no n’afotu no do dɛ: “Obue na bue wo nsa ma wo nua, wo kɔhweaban, nye wo hianyi.”
Yɛbɔ mbɔdzen so dɛ yebedzi Ewuradze Jesus Christ ne nkyerɛkyerɛ no a wɔakyerɛw no wɔ Matthew 25 no do:
“Osiandɛ ɔkɔm dzee me, na hom maa me edziban, nsukɔm dzee me, na hom maa me anondze, meyɛɛ hɔho, na hom faa me kɔr fie:
“Midzii adagyaw, na hom furaa me tam: meyaree, na hom bɔhwɛɛ me. …
“… Susuampa dɛ hom ayɛ ama mo nuanom nketseaba yi mu kor no, hom ayɛ ama me.”
Hom mma menkã mfatoho kakrabaa a ɔfa mbrɛ Asɔr no si na odzi Agyenkwa no ne nkyerɛkyerɛ iyinom do.
Ama yɛabrɛ ɔkɔm adze no, Asɔr no wɔ bishopfo adzekorabea 124 [ɔha eduonu anan] a wodzi dwuma wɔ wiadze nyina mu. Bɛyɛ 400,000 [mpem aha anan] edziban ebisadze na wɔdze ma ankorankor a wohia wɔ afe biara mu. Mbea a adzekorabea nnyi hɔ no, bishopfo na nkorbata presidentfo yi sika fi Asɔr no akɔnkye afɔrbɔ fotow no mu dze ma edziban na fie ndzɛmba ma asɔrmba a wohia no.
Naaso, ɔkɔm ho haw no tra Asɔr n’ahẽ do. Ɔrodɔɔ sõ wɔ wiadze yi mu. Ndaasa yi nhwehwɛmu a Amanaman Nkabɔmu Kuw yɛe kyerɛ dɛ nkorɔfo a hɔn edziban nnso hɔn no bɔbor ɔpepe 820 [aha awɔtwe eduonu].
Nkanee ho amandzɛɛbɔ yi yɛ hu! Hɛn enyisɔ hom ntoboa no ara yie. Yɛda hom ase wɔ hom akoma pa adɔyɛ, a wɔama ɔpepe wɔ wiadze nyina mu no benya edziban, efuradze, dabew mber kumaa, wheelchair horow, ndur, nsu pa, na ne nkekãho a wohia no papaapa.
Wiadze yi mu nyarba pii nsu a ɔnntsew na ɔdze ba. Besi ndɛ, Asɔr no nyimpa ho mboa dwumadzi no aboa ma wɔdze nsu a ɔtsew akɔ sɔn aha aha wɔ aman 76 [eduosuon esia] mu.
Mfatoho kɛse kor nye edwumadze bi wɔ Luputa a, ɔwɔ Democratic Republic of the Congo. Nyimpa dodow bɔbor 100,000 [mpem ɔha] no, hɔn kurow no nnyi pipe nsu. Kurowmanfo no nantsew akwan tsentsen ana woenya nsu pa. Wokopuei nsubura bi wɔ koko bi do bɛyɛ akwansin 18 [duawɔtwe] fi kurow no mu, naaso nna kurofo no nntum nntaa nnkɔ hɔ.
Ber a hɛn nyimpa ho mboa asɛmpasomafo tsee ɔhaw yi no, wɔnye Luputa baanodzifo no bɔɔ mu yɛɛ edwuma dze ndzɛmba nye ntsetsee a wobehia dze pipe bɔtwe nsu no aba kuropɔn no mu. Luputafo no dze mfe ebiasa tutuu ɔkã a no bun bɛyɛ abasa kor dze twa ɔbo na kwaa mu. Wɔbɔɔ mu yɛ edwuma no, enyigye da no baa ekyir no ber a hɔn nyina a wɔwɔ kurow mu no hɔn nsa kãa nsu pa a n’enyi tsew no.
Asɔr no so boa tukɔrfo, sɛ wofi ɔman atseetsee mu, ɔdomakoma esian, anaa nyamesom ho atsetsee mu. Sesei nyimpa dodow bɔbor ɔpepe 70 [eduosuon] na woetu hɔn efi hɔn efiefi mu.
Afe 2018 mu nko no, Asɔr maa mprɛnprɛ ndzɛmba a ɔboa dze ma tukɔrfo wɔ aman 56 [eduonum esia] mu. Dza ɔkã ho no, asɔrmba pii so tu hɔn mber si hɔ dze boa tukɔrfo ma wotum tsena hɔn sɔn fofor no mu. Yɛda hom mu kor biara a ɔroboa ma binom etum akyekyer fi afofor no ase.
Ɔnam adɔyɛ a wɔdze kyɛ Deseret Industries outlet horow a ɔwɔ United States no, efuradze pɔn ɔpepe na wɔgyegye na wɔtase mu afe biara. Bishopfo na wɔdze na wɔdze dɛm ndzɛmba dodow yi dzi dwuma dze boa asɔrmba abɔbɔfo, naaso ne fã kɛsenara wɔdze ma adɔyɛ ekuwekuw a wɔwɔ wiadze nyina mu ma wɔkyekyɛ.
Na mfeda, Asɔr no maa enyiwa ho mboa maa nkorɔfo bɔbor 300,000 [mpem aha ebiasa] wɔ aman 35 mu, abodomaba ho nhwɛe dze maa abatan mpempem wɔ aman 39 mu, na wheelchair dodow maa nkorɔfo 50,000 na no mboree wɔ aman pii mu.
Wonyim Asɔr no yie dɛ yɛkã hɔn a wodzi kan kodu bia a esian esi no. Mpo ansaana ehum kɛse botu no, nna Asɔr baanodzifo na sɔn n’edwumayɛfo edzi kan ayɛ nhyehyɛɛ a wɔdze mboa ndzɛmba bɛma na etuhoakyɛfo a wɔbɔboa hɔn a ehum no bɛkã hɔn no.
Mfeda nko mu no, Asɔr no yɛɛ esian ho mboa edwuma bɔbor 100 wɔ wiadze yi mu nyina, roboa hɔn a ehum, ogya hyew, nsuyirii, asaase-wosow, na esian ahorow binom so ato hɔn no. Ber biara a wobotum no, hɛn Asɔrmba a wɔhyehyɛ Helping Hands akokɔangoa sor ntar no boa ano wɔ dɔm dodow mu dze kɔboa hɔn a abrɛbrɛsɛ ato hɔn no. Som yi, dza hom mu pii dze ma no, nye erosom ne fapem ankasa no.
Mo nuanom na me nkyerɛbaa adɔfo, dwumadzi horow a makã ho asɛm yi yɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo ne yieyɛ na nyimpa ho mboa ndzeyɛɛ mu ɔfã kumaabi. Na hom nye nkorɔfo a hom ma iyinom nyina tum ba mu. Osian hom abrabɔ pa, hom akoma mu adɔyɛ, na hom abasa a ɔboa no, ɔnnyɛ nwanwa dɛ sɔn na aman baanodzifo pii robɔ hom abaw do.
Fitsi ber a mebɛyɛɛ Asɔr no ne President no, ɔayɛ me nwanwa dɛ presidentfo, prime ministerfo, na ahembɔfo dodowara ada me ase wɔ hɛn nyimpa ho mboa a yɛdze ama hɔn nkorɔfo. Na wɔakyerɛ hɔn enyisɔ so wɔ ahoɔdzen a hɛn asɔrmba nokwafo no dze ba hɔn aman mu dɛ kurowmanfo nokwafo a wɔboa.
Ɔayɛ me nwanwa so dɛ wiadze mu baanodzifo a wɔabɛsera President a Odzi Kan na n’Apamfo wɔakã hɔn enyidado dɛ Asɔr no wɔbɛkyekyer bi wɔ hɔn aman mu. Dɛn ntsi a? Osiandɛ wonyim dɛ Latter-day Saintfo bɔboa ma wɔakyekyer ebusua ebusua na sɔn horow a ɔyɛ dzen, na wɔama abrabɔ akɔ yie ama nkaafo beebira a wɔtse no.
Ɔmmfaho bea biara a yɛfrɛ no fie, Asɔrmba no wɔ atsenkã a ɔyɛ dzen fa Nyame n’egyayɛ na adasa nyina onuayɛ. Dɛm ntsi, hɛn enyigye ne kɛsenara ba ber a yɛrosom hɛn nuanom na nkyerɛbaa, a bea biara a wɔtse wɔ asaase fɛɛfɛw do yi mmfa ho.
Yɛrema binom mboa—yɛdze ahwɛyie bɔ mbɔdzen dwen binom ho tse dɛ ma yɛdwen hɛnara hɛnho no anaa ɔkyɛn mpo—nye hɛn enyikãdze. Memfa nkã ho dɛ, nkankara, ber a ɔnnyɛ ber pa na ɔnnyɛ dza yɛpɛ no. Yɛdze mbrasɛm mu kɛse dza otsĩa ebien no robɔ bra no nye adze tsitsir a ɔma yɛbɛyɛ Jesus Christ osũanyi nokwafo.
Mo nuanom na me nkyerɛbaa adɔfo, hom yɛ fasusu atseasefo wɔ aba a ofi iridzi Jesus Christ nkyerɛkyerɛ no do no. Mɛda hom ase! Modɔ hom!
“Minyim dɛ Nyame tse ase. Jesus nye Christ no. N’Asɔr no wɔdze asan ananmu aba wɔ nda a odzi ekyir yinom mu ama wɔdze ahyɛ no krɔnkrɔn botae no mã. Megye ho dase wɔ Jesus Christ ne dzin mu, amen.