Yɛroweɔn na Yɛrosɔr Aber Nyina (Alma 34:39; Moroni 6:4; Luke 21:36)
Daa daa ahwɛyie hia ma yɛdze esiw atseyie na enyibugudo su do.
Mobɔ mpaa enyiberdo dze serɛ Sunsum Krɔnkrɔn no mboa ma emi na hom ber a yɛbɔmu dzi dɛw na yɛsɔr yi.
Ebɔbira afe 1976 mu no, Elder Boyd K. Packer kasaa pɔtsee kyerɛɛ Asɔr no mu mbabun no. N’asɛm a ɔayɛ atsenkã a ɔtoo ne dzin “Sunsum mu Ndɛnkyɛm,” no, ɔkyerɛɛ mbrɛ ɔhwɛɛ ndɛnkyɛm a woehuntsa hɔnho dze rotweɔn atsɛw afonam a hɔn enyi nnda, ber a ɔbaa Ebibirman mu wɔ edwumayɛ ho. Ɔdze ndɛnkyɛm no too Satan ho a, ohuntsa bɔn no bɔr enyi , dze tsɛw mbabun a hɔn enyi nnda.
Ber a Elder Packer kãa dɛm asɛm no nna medzi mfe 23 [eduonu biasa], a nna emi na Susan hɛn enyi da hɛn abakan n’awoo kwan nda kakra ara ntamu. Ne kasaa no mu asɛm a ɔfa mbrɛ yebokwetsir bɔn na kwan a ɔfaa do dze mbowa hɔn ntɔyɛɛ dze kyerɛɛ sunsum mu adzesũa a ohia kɛse no tɔɔ hɛn do.
Emi na Susan so yeetu kwan akɔ Ebibiman mu mpɛn pii wɔ edwumayɛ ho. Na yeenya kwan pii ehu mbowa nwanwa a wɔwɔ dɛm asaasetɔw no do. Yɛrekaa Elder Packer ne kasaa no nsunsuando a onyaa wɔ hɛn abrabɔ mu no, yɛabɔ mbɔdzen dɛ yɛbɔhwɛ na yesũa adzesũadze efi Ebibiman haban mu mboa hɔn su.
Mepɛ dɛ mekã cheetah-sebɔ ebien bi a menye Susan hwɛɛ mbrɛ wosi tsɛw afonam hɔn su na nyansa kwan a wɔfa do, na medze ndzɛmba a yɛhyɛɛ no nsew no ato Jesus Christ asɛmpa no ne daa daa abrabɔ ho.
Cheetah-nsebɔ na Topi-nwansan
Cheetah-nsebɔ nye mbowa a hɔn ho yɛ har kɛse wɔ asaase do na wotum tu mbirika a ne haahar no bodu 75 mph. Mbowa fɛɛfɛw iyinom botum dɛ wogyina hanan do no, wɔrennkan pam, pam, pam ebiasa mpo na ne mbirika tu ne haahar edu 68 mph. Cheetah-nsebɔ yɛ mbowa abɔyafo a wosuma hɔn afonam no na wɔbɛn hɔn a, wotu mbirika taa hɔn do dze kye hɔn.
Emi na Susan dze dɔnhwer ebien hwɛɛ cheetah-sebɔ ebien a wɔrebɛn topi-wansankuw kɛse bi, wansan a wɔnnyɛ nã wɔ Ebibirman mu. Nna Ebibirman sar do efuw tsentsen no awow ma ayɛ kɔben ma ɔkataa mbowa abɔyafo a woritsiw wansankuw no do. Nna kwan a ɔda cheetah-sebɔ ebien no ntamu no yɛ bɛyɛ anamɔn 100 [ɔha] naaso wɔbɔɔ mu tsɛwee.
Ber a cheetah-sebɔ kor tsena tsentsen wɔ efuw no mu a ɔnnkekã no ho no, sebɔ kor no so bɔɔ no mu adze na ɔwɛawɛa nkakrakakra bɛn topi-nwansan a hɔn enyi nnda no. Nkyii cheetah-sebɔ kor no a nna ɔtsena tsentsen no yew a ber kor noara a cheetah-sebɔ kor no so tsena ase tsentsen mu. Nyɛbew yi a ɔsesã a cheetah-sebɔ kor bɔ no mu adze na ɔwɛawɛa kɔ kan, ber a kor no so tsena ase tsentsen wɔ efuw no mu, no kɔr do mber tsentsen. Nyansa kwan yi no nsumaa mu ndzeyɛɛ yɛ ma wɔdze rotwe topi-nwansan no hɔn adwen na wɔadaadaa hɔn efi esian a ɔrebɛn hɔn no. Abotar mu ara na nsumaa mu no, cheetah-nsebɔ ebien no bɔɔ mu yɛɛ edwuma a wɔdze benya hɔn edziban.
Nna topi-nwansankuw mu mpanyin pii a hɔnho yɛ dzen no wɔ mfɔtse siw do a wogyina dɛ aweɔmfo wɔ nsebɔ no a wɔrebɛn na topi-nwansankuw no hɔn finimfin. Koko kakra no a wogyina do no boa ma topis-nwansan aweɔmfo hu asaase no do esian a ɔrebɛn no ho sɛnkyerɛdze yie.
Nkyii awerɛfir mu ara, ber cheetah-nsebɔ no dur bea wobotum akye mbowa no, kuw no nyina danee na wotuu mbirika guanee kɔrɛɛ. Minnyim mbrɛ anaa kwan a topi-nwansan no faa do dze nkaabɔ no maa kuw kɛse no, naaso kwan bi do no wɔbɔɔ kɔkɔ, na topi-nwansan no nyina kɔr ahotɔ bea.
Na nkyii ebɛnadze na cheetah-nsebɔ no yɛe? Ntsɛmara, cheetah-sebɔ ebien no kɔr do a kor bɔ no mu adze wɛawɛa kɔ kan ber a kor no so tsena ase tsentsen wɔ efuw no mu. Nyɛbea a wɔdze tsew no kɔr do. Woenngyaa. Wɔanngye hɔn ahom anaa woenngyina kakra. Wɔdze enyimia dzii hɔn nyansa kwan a wɔdze beyi mbowa no adwen fi hɔn do adaadaa hɔn. Emi na Susan hwɛe kɛpeem dɛ cheetah-nsebɔ no yewee kɔr ekyirekyir, a ber biara na wɔrebɛn topi-nwansankuw no.
Dɛm anafua no emi na Susan yedzii dza yehunii na yesũae no ho nkɔmbɔ ara yie. Yɛnye hɛn mba na mbanana so pɛnsaampɛmsam sũahu yi mu na yenyaa adzesuadze pii a ɔsom bo. Afei mebɛkyerɛkyerɛ dɛm adzesuadze no mu ebiasa.
Adzesũadze #1 [a Odzi Kan]—Hom Nyɛ Ahwɛyie wɔ Bɔn ne Ndaadaa Horow a Ohuntsa no ho
Emidze, cheetah-nsebɔ yɛ mbowa abran, fɛɛfɛw a hɔnho yɛ enyikã. Cheeta-sebɔ no nwoma a n’enyi yɛ dɛ akokɔangoa na obir na nsisii tuntum wɔ mu yɛɛ enyidan fɛɛfɛw ma mbowa yinom huntsa ara yie a wonnhu hɔn wɔ Ebibiman efuw mu ber a wɔretsɛw hɔn afonam no.
Dɛm kwan yi ara do, na sunsum mu adwenkyerɛ bɔn na ndzeyɛɛ botum ayɛ fɛw, akɔndɔ, anaa enyikãdze. Dɛm ntsi, hɛn wiadze yi mu no, ohia dɛ hɛn mu kor biara hu dɛ ndzebɔn ndaadaadze a wopetuw dɛ ɔyɛ papa no wɔ hɔ. Dɛ mbrɛ Isaiah bɔɔ kɔkɔ no, “Wondue, hɔn a wɔfrɛ bɔn dɛ papa, na papa dɛ bɔn; hɔn a wɔdze sum yɛ kan, na wɔdze kan yɛ sum; hɔn a wɔdze wenwen yɛ fenemfenem, na fenemfenem yɛ wenwen!”
Ekyingye mber yi mu, a wɔkamfo nyinsɛn-tu gu dɛ ɔyɛ hɔn kyɛfa na begyabegyayɛ dɛ ahotɔ no, ɔyɛ nhyira ma hɛn a yɛtse ase wɔ mberano a odzi ekyir yi mu a, asɛmpa nsan-ananmu ne kan hyirɛn yie wɔ hɛn abrabɔ mu na ɔboa hɛn a yehu otsĩafo no ne ndaadaa na akwansidze.
“Na hɔn a wɔyɛ enyansafo na wɔgyee nokwar no, na wɔfaa Sunsum Krɔnkrɔn no dze yɛɛ hɔn kwankyerɛfo, na wɔamma wɔaanndaadaa hɔn nonokwar, mese hom dɛ worunntwa hɔn nnto famu na wɔnntow hɔn nnkyen ogya mu, mbom, wobotum egyina wɔ da no mu.”
Adzesũadze #2 [a Otsĩa Ebien]—Mma Nnda na Ma w’Enyi Nda Hɔ
Topi-wansan n’afã no, sɛ ɔyɛ enyibugudo mber kumabaa mpo a, obotum ama cheetah-sebɔ no etu ahyɛ no do. Dɛmara, sunsum mu atse yie na enyibugudo botum ama otsĩafo no ne nsa akã hɛn. Yɛnnyɛ sunsum mu ahwɛyie a, yɛ ma esian kɛse kwan ma ɔba hɛn abrabɔ mu.
iStock.com/Angelika
Nephi kyerɛɛ mbrɛ nda a odzi ekyir mu no Satan bɔbɔ mbɔdzen dɛ ɔbɛma Nyame ne mba hɔn akoma atɔ hɔn yamu na wɔadaadaa hɔn ma wɔdze hɔn “werɛ atwer wiadze, ama wɔakã dɛ: Zion ayɛ yie; nyew, Zion ayɛ prɔmprɔm, biribiara ye —na dɛm na abɔnsam dze sisi hɔn akra, na ogya hɔn brɛbrɛ kɔ hɛl.”
Daa daa ahwɛyie hia ma yɛdze esiw atseyie na enyibugudo su. Ereyɛ ahwɛyie yɛ ndzɛyɛɛ dɛ eroweɔn ahwɛyie mu ara wɔ esian anaa nkõdzen a obotum bɛba Na eroweɔn kyerɛ ndzeyɛɛ dɛ erennda dze aweɔn na ama bambɔ. Yɛrekã no sunsum mu a, yehia dɛ yɛnnkɛda na yɛbɛyɛ aso pɛɛn ama Sunsum Krɔnkrɔn ne nkenyan na Ewuradze aweɔmfo a wɔwɔ abantsenten do no hɔn sɛnkyerɛdze no.
“Nyew, na … mutu hom fo dɛ hom nweɔn na hom nsɔr aber nyina, amma abɔnsam enndua nsɔhwɛ mu anntwe hom annkɔ, … na hwɛ ɔremma hom adzepa biara.”
Yɛdze hɛn abrabɔ ritsim Agyenkwa no na N’asɛmpa no do no boa hɛn ma yedzi honammunyi su dɛ yɛnnkɛyɛ krado wɔ sunsum mu na yɛbɛyɛ enyihaw. Dɛ mbrɛ wɔdze enyiwa a wohu na aso a wɔtse dze ehyira hɛn yi, Sunsum Krɔnkrɔn no botum ama yetum ahwɛ adze na yetsie yie ber a yennkɛtaa adwen dɛ ohia dɛ yɛbɔhwɛ anaa yebetsie anaa ber a yɛbɔdwen dɛ biribiara nnyi hɔ a wobohu anaa wobɛtse.
Adzesuadze #3 [a Ɔtɔ do Ebiasa]—Tse Ɔtamfo no ne Nsusui Ase
Cheetah-sebɔ yɛ abowa bɔyɛfo a n’awosu nye ɔtsɛw mbowa nkaa no. Da no nyina mu, na dabiara no, Cheetah-sebɔ yɛ abowa bɔyɛfo.
Satan yɛ “tseneneeyɛ nye hɔn a wɔper dɛ wɔbɛyɛ Nyankopɔn ne pɛ tamfo.” Da no nyina mu, na dabiara no, no nsusui na no botae nko nye dɛ ɔbɛma Nyame ne mbabanyin na ne mbabaa hɔn mbɔbɔryɛ yɛ mbrɛ ɔnora so tse.
Egya n’enyigye ho nhyehyɛɛ no wɔawen no dɛ ɔbɛma Ne mba kwankyerɛ, dɛ ɔbɔboa hɔn ma woenya enyigye a otsim, na ɔdze hɔn aba Ne nkyɛn wɔ fie dwudwoodwo a wɔdze nyimpadua a ɔkrɔn a wɔasoɛr efi ewufo mu. Abɔnsam dzi dwuma dɛ ɔbɛma Nyame ne mbabanyin na ne mbabaa hɔn adwen mu bɛyɛ konsẽe na wonnkenya engyigye na oetwa hɔn onnyiewiei mpontu do. Abɔnsam dzi dwuma a onngyaa dɛ otu hyɛ Egya ne nhyehyɛɛ mu dza okyir no kɛse no do.
Satan nnyi nyimpadua, na oetwa n’onnyiewiei mpontu do. Tse dɛ ma nsu a ɔpem fa esutsen n’ase nsu mu ban siw no no, abɔnsam no sunsum mu mpontu no do etwa osiandɛ onnyi nyimpadua. Osian n’etuatsew ntsi, Lucifer esiw noho kwan dɛ obenya asaase do nhyira na sũahu a wotum dua honam na mbiew ntamadan mu dze nya. Nsɛmfua woebu no fɔ ne kyerɛwsɛm mu nkyerɛase a ɔyɛ ndam no kyerɛ dɛ onnkotum akɔdo etu mpon abɛyɛ tse dɛ hɛn Ɔsor Egya.
Osiandɛ nyimpadua hia tsitsir wɔ Egya n’enyigye ho nhyehyɛɛ na hɛn sunsum mu mpontu ho no ntsi, Lucifer hwehwɛ dɛ ɔbɔsɔ hɛn ahwɛ ma yɛdze hɛn nyimpadua ayɛ dza ɔnnsɛ ama ɔasɛɛ hɛn mpontu no. President Russell M. Nelson akyerɛkyerɛ dɛ ‘“yerunntu ndaadaa anamɔn no odzi kan dabiarada, nnkɔ bea a ɔnnsɛ dɛ yɛkɔ anaa yɛreyɛ dza ɔnnsɛ dɛ yɛyɛ’… na hɛn sunsum mu bambɔ wɔ.’ … Dɛ yɛyɛ nyimpa yi hɛn nyina yɛwɔ [honandua mu] akɔndɔdze a ohia ma hɛn nkwa. ‘Akɔndɔdze yinom hia tsitsir ma abrabɔ akɔ do. Ntsi, ebɛnadze na abɔnsam no yɛ? … Odua hɛn akɔndɔdze mu ne nsa kã hɛn. Ɔsɔ hɛn hwɛ dɛ yebedzi dza ɔnnsɛ dɛ yedzi, na yɛbɔnom dza ɔnnsɛ dɛ yɛnom, na yɛadɔ dza ɔnnsɛ dɛ yɛdɔ!’”
Hɛn aber yi mu dza ɔyɛ nwanwa kɛse nye dɛ abɔnsam a, ɔayɛ mbɔbɔr osian pɔkyee dɛ onnyi honandua ntsi, ɔfrɛ hɛn na ɔdaadaa hɛn yɛndua hɛn honandua ne ndzeyɛɛ bɔn do nye no nkyɛ ne mbɔbɔrhu. Edwindadze kor noara onnyi na orunntum mfa ndzi dwuma no nye dza ɔfa do dze daadaa hɛn ba honandua na sunsum mu ɔsɛɛ mu.
Yɛretse ɔtamfo no no nsusui ase no hia mapã ama yɛaayɛ ahosiesie ehyia nyia obotum etu hɛn do sa no. Osiandɛ Ɔsahen Moroni nyim Lamanfo no hɔn nsusui pɔkyee no ntsi, osiesiee no dɔm dze hyiaa hɔn ber a wɔbaa hɔn do no na odzii konyim. Na dɛm nkyerɛkyerɛ na anohoba kor noara dzi wɔ hɛn mu kor biara.
“Sɛ hom ayɛ ahosiesie a, hom nnkosuro.
Nsato Anohoba na Dasegye
Tse dɛ ma yebotum esũa adzesuadze a ohia ber a yɛrohwɛ cheetah-nsebɔ na topi-nwansan hɔn su no, dɛmara na hɛn mu kor biara wɔdɛ ɔhwehwɛ adzesuadze na kɔkɔbɔ fi dza osisi wɔ daa daa abrabɔ mu no. Sɛ yɛdze adwen na akoma a woebue regye ɔsor kwankyerɛ a ɔnam Sunsum Krɔnkrɔn no tum do a, nkyerɛkyerɛ no a ɔkrɔn a yebotum enya na kɔkɔbɔ a ɔyɛ ndam a obotum abɔ hɛn ho ban befi hɛnanakasa hɛn daa daa sũahu mu aba. Abɛbusɛm a ɔyɛ ndam wɔ kyerɛwsɛm na hɛn daa daa abrabɔ mu.
Adzesuadze pii a wobotum ehu no wɔ emi na Susan hɛn Ebibiman nserɛ mu no, no mu ebiasa na mada no edzi no. Moto nsa frɛ wo na mehyɛ wo nkuran dɛ ndwendwen dza osii wɔ cheetah-nsebɔ na topi-nwansan no ntamu na fa hu adzesuadze binom so mma woho na w’ebusua. Meserɛ kaa dɛ wo fie nye asɛmpa adzesũa na abrabɔ ne fapem.
Ber a edze gyedzi suo nsato yi mu no, nkenyan adwendwen bɛba w’akoma mu, na sunsum mu atsenkã ehuhur wɔ w’akoma mu, na ibohu ndzeyɛɛ a ɔsɛ dɛ ihyɛ ase yɛ anaa iwɔw do yɛ ama “afa [Nyankopɔn] akodze nyina ama eetum egyina wɔ da bɔn no mu.”
Mobɔ ahosiesie yie mu anohoba nhyira na sunsum mu bambɔ bɛpem aba hom abrabɔ mu ber a hom weɔn na hom sɔr enyiberdo aber nyina.
Megye dase dɛ hom reper akɔ kan wɔ ahyɛmudzi anamɔn kwan do no bɛma sunsum mu bambɔ na woegya enyigye a otsim wɔ hom abrabɔ mu. Na medzi dase dɛ Agyenkwa tseasefo a Ɔasoɛr no bɛma hɛn abamba na Ɔahyɛ hɛn dzen wɔ mber pa na mber a omuo mu. Wɔ dɛm ndzɛmba yi ho na megye me dase wɔ Jesus Christ ne dzin mu, amen.