Yeruhu, Yɛrodɔ, na Yɛrinyin
Hom mma hɛn nyina yɛmbɛtse hɛn kyɛfa ase wɔ erosom edwuma kɛse yi mu ama yɛabɛyɛ tse dɛ Ɔno ara yie.
Afe 2016 mu no Tabernacle Adwontokuw No kɛseraa Netherlands na Belgium. Na osiandɛ nna meka enyigye a ɔtse dɛm ho no ntsi, menyaa kwan dze nyaa hɔn agodzi ho enyigye mpen ebien.
Hɔn agodzi ber no nna morodwen edwuma kɛse a wɔyɛ nye adwontokuw a wɔdɔɔ sõ dɛm no tu kwan. M’adwen kɛdaa gong kɛse no a nna ebia ɔyɛ kaw na ɔyɛ dzen dɛ wɔdze bɔkɔ no ho sɛ ɛdze totoo bɛntasanku, totorobɛnto, anaa edwindze nkaa no a ibotum dze ahyɛ wo nsa ase no ho. Naaso mohwɛɛ gong yi no dwuma a odzi ankasa no, muhun no dɛ wɔbɔ mu kakra ara, a edwindze nkakramba no dze wodzii akotsen wɔ agordzi no mu. Modween ho dɛ sɛ gong no ngyegyee nnyi mu a, agor no nnkowie pɛryɛ na dɛm ntsi nna ɔwɔ dɛ wɔbɔ mbɔdzen dɛ wɔdze gong kɛse yi no botwa po akɔ.
Ɔtɔfabi a nna ɔyɛ dɛ ma yɛtse dɛ gong no, a yeye ara nko na yenndzi akotsen kɛse biara wɔ agor no mu. Mbom hom ma menkã nkyerɛ hom dɛ hom ngyegyee no hia papaapa.
Yehia edwindze nyina. Hɛn mu binom adzesua yɛ mberɛw na yɛbɔmbɔdzen wɔ skuul, a binom so wɔ nsaano dwuma talent horow. Binom dwin na wɔhyehyɛ ndzɛmba anaa wɔyɛ anɛɛsfo, wɔbɔ ban, anaa wɔkyerɛkyerɛ binom adze. Wohia hɛn nyina ma wiadze no ayɛ fɛw na enyigye.
Hɔn a wɔdwen ho a wonnyi biribiara dze ma anaa wɔgye dzi dɛ hɔn ho nnyi mfaso anaa wɔnnsom bo mma obiara no, hɔn a wɔdwen dɛ biribiara rokɔ do yie wɔ hɔn abrabɔ mu no, na obiara a ɔhyɛ ntamu no, mepɛ dɛ mekã asɛntsir yi ho asɛm.
Bea biara a hom wɔ wɔ onnyiewiei nkwa anamɔn kwan do no, adzesoa bɛhyɛ hom mu bi do ara ma wonnkohu hɔnho dɛ wɔwɔ dɛm kwan no do. Mepɛ dɛ mefrɛ hom ma wopuei fi sum no mu ba kan no mu. Asɛmpa ne kan no bɛma ahotɔ na ayarsa na ɔbɔboa wo ma aatse wo myimpa ban a eyɛ ankasa na dza wo botae wɔ abrabɔ mu yɛ ase.
Hɛn mu binom amanman efi asɛmpa nkyerɛkyerɛ no ho rokɔ hwehwɛ enyigye.
Ɔsor Egya dɔfo refrɛ hɛn dɛ yɛnnantsew osuanyiyɛ anamɔn kwan no mu na yɛnsan nkɔ No hɔ. Ɔdze ɔdɔ a odzi mu dze dɔ hɛn.
Kwan no nye ebɛn? Kwan no nye dɛ yɛbɔboa hɛnho nkorkor ma yɛatse nyimpa ban a yɛyɛ ber a yɛrosom hɛnho nkorkor.
Emi dze, erosom yɛ erekyerɛ ɔdɔ krɔnkrɔn. Na dɛm kwan no yɛyɛ ma nyia a ɔdze rema na nyia a ɔregye beenu no nya pɛ dze nu hɔnho Dza ɔkyerɛ so nye dɛ, yɛsesã hɛn akwan na yɛbɛn yie na yɛbɛyɛ tse dɛ hɛn Agyenkwa, Jesus Christ yie.
Mfatoho, onnhia dɛ aber nyina yɛwɔw do kã kyerɛ hɛn ɔhokafo anaa hɛn mba mbrɛ wobesi botum etu mpon; wonyim dada. Yɛrema ɔdɔ atahye yi na ɔbɛma hɔn tum ma wɔayɛ nsesã a ohia wɔ hɔn abrabɔ mu na wɔabɛyɛ apapafo.
Kwan yi mu no nnuhu bɛyɛ daa daa enyibue kwan, a yɛrepa suban bɔn ho kyɛw bɛka ho. Mekaa na meda ho nya gyinabew horow sũahu a maapɛ ntsɛm ebua atsɛn anaa maayɛ nyaa dze etsie. Na me ankorankor mpaabɔ mu, da n’ewiei no, metsee ɔdɔ afotu a ofir sor dɛ munnu moho na mebɛyɛ papa. Ɔdɔ a m’awofo, nuabanyin, na nkyerɛbaa kyerɛe na ekyir no me yer, me mba, na anyɛnkofo so aboa me ma maayɛ nyimpa papa.
Hɛn nyina yenyim bea a yebotum ayɛ no papa. Onnhia dɛ yesi do bɔ hɛn ho nkaa nkorkor, mbom ohia dɛ yɛbɔdɔ na yɛasom hɛn ho nkorkor na yɛreyɛ dɛm no ɔpɛ ho nsesã ba.
Kwan yi ara mu no nna yerusua hɛn nyimpa ban a yɛyɛ ankasa na dza hɛn asɛdze bɛyɛ wɔ nda a odzi ekyir yinom wiadze n’abakɔsɛm mu ansaana Agyenkwa no Ne Mbae a Otsĩa no aso.
Sɛ nnhu wo kyɛfa wɔ mu a, mepɛ dɛ mefrɛ wo ma ehwehwɛ bea bi a wo nko botum awɔ na ebisa Ɔsor Egya dɛ ɔnkyerɛ wo dza nyɛ. Sɛ yetsim dzendzenndzen wɔ ahyɛmudzi na erosom anamɔn kwan no do a ebia nyiano no bɛba nkakrankakra na afei pefee yie
Yerinya nkõdzen ahorow noara bi dɛ Joseph Smith hyiae ber a nna ogyina “kasatsia na basabasayɛ nye adwen [a] ɔnnsaa a rokɔ do ne finimfin.’’ Sɛ yɛkenkan ɔnoara n’asɛm a, obisaa noho mpɛn pii dɛ: “Ebɛnadze na ɔsɛ dɛ meyɛ? Ekuwekuw yinom nyina mu muana na nedze ye; anaadɛ, ne nyinara nntsen? Sɛ no mu kor na oye a, nna no mu [muana], na mibesi dɛn na mehu?’’
Ɔdze nyimdzee a onyaa no James no Nwoma mu no, a ɔkãa dɛ. “na sɛ hom mu biara ne nyansaa tɔ sin a, ombisa Nyankopɔn aɔdze ma nyimpa kwa na ɔnnkã enyim no; na ɔdze bɛma no,’’ ekyir no Joseph sii n’adwen pi dɛ “mimbisa Nyame.’’
Yɛkɔ do kenkan dɛ “Iyi nye aber a odzi kan wɔ [ne] bra mu a [ɔabɔ] mbɔdzen [ayɛ] dɛm adze no, osiandɛ wɔ ne dadwen yi nyinara mu no nna ommbuee n’ano mmbɔɔ mpaa da.’’
Ntsi no obotum ayɛ hɛn so hɛn mber a odzi kan a yɛkasa kyerɛ hɛn Bɔfo wɔ kwan a yɛnnyɛ bi da mu.
Osian Joseph no mbɔdzembɔ ntsi, Ɔsor Egya na Ne Ba, Jesus Christ, pueii no do, bɔɔ ne dzin, na no nsunsuando no yeenya ntseasee pefee a oye wɔ nyimpa ban a yɛyɛ ho na yɛsom bo.
Yɛkɔ do kenkan dɛ wɔ ne mbasir ber mu no, hɔn a nnkyɛ ɔwɔ dɛ wɔyɛ [n’anyɛnkofo] na [nnkyɛ ɔwɔ dɛ] wɔhwɛ [no] yie na wɔtseetsee no.’’ Dɛm ntsi yebotum ehyia etsiafo ber a yɛrobɔ osũanyiyɛ ho bra.
Sɛ sisiara hom hu dɛ hom nnkotum aka ndwontofokuw no ho na nnuhu anamɔn kwan no yɛdɛ ɔyɛ dzen a, meserɛ hom nhu dɛ sɛ yɛkɔdo bɔ mbɔdzen a wobeyi adzesoa no efi hɛn abatsir do na kan bɛba bio. Ɔsor Egya renngya hɛn da sɛ yɛkɔ No hɔ a. Yebotum ahwe ase na yɛasoɛr na Ɔbɔboa hɛn ma yɛapopo dɛtse no efi hɛn anankoroma ho.
Hɛn mu binom epira, mbom tamsin a ɔso ara yie dɛ ɔbɛhata hɛn epira kur nyina do wɔ Ewuradze ne eduryɛ mboa a odzi kan ndzɛmba mu.
Ntsi no ɔyɛ dɛm dɔ no, dza odzi mu no a hɛn so yɛfrɛ no ayamuyie anaa “Christ no dɔ mapã no’’, a yehia no wɔ hɛn efiefie, bea a awofo som hɔn mba na mba som awofo. Ɔnam dɛm ɔdɔ no do, akoma bɛsesã na ɔpɛ fofor bɛba a ɔbɛyɛ Ne pɛ.
Dɛm ɔdɔ yi a yehia no wɔ nkitahodzi a yɛnye hɛn ho nkorkor dzi mu dɛ Ɔsor Egya ne mba na dɛ N’Asɔr mba a obotum aboa hɛn ma yɛdze ndwontow edwindze no nyina akã hɛn ndwontofokuw no mu ama sɛ Agyenkwa no ba bio a yeetum nye sor abɔfo adwontokuw no aabɔmu atow ndwom enyimnyam mu ara.
Dɛm ɔdɔ yi, dɛm kan a ohia dɛ ɔhyerɛn na ɔyerɛw twa hɛnho ber a daadaa yɛrobɔ hɛn bra. Nkorɔfɔ bohu kan no na wɔatwe abɛn no. Asɛmpasomafo edwuma yi a ɔtse dɛm na ɔbɔtwe binom ma “wɔaba na wɔabɔhwɛ, wɔaba na wɔabɔ boa, na wɔaba na wɔabɛtsena’’ Meserɛ, sɛ hom nya hom daszedzi wɔ edwuma kɛse yi ho na hɛn kyɛfa wɔ mu a, hom mma yɛmbɔmu nye hɛn Nkɔnhyɛnyi Joseph Smith dɔfo ndzi dɛw, a ɔpaa mu kãa dɛ, “Menya enyido-adzehu; minyim dɛm, na minyim so dɛ Nyame nyim, na munnkotum apow.’’
Megye dase kyerɛ hom dɛ minyim me nyimpa ban na minyim hom nyimpa ban. Hɛn nyina yɛyɛ Ɔsor Egya ne mba, a Ɔdɔ hɛn. Na Ɔannye hɛn ammba ha dɛ yemmbedzi nkogu mbom dɛ yɛnsan enyimnyam mu ara nkɔ Ne nkyɛn. Ama hɛn nyina yɛabɛtse hɛn kyɛfa ase wɔ erosom edwuma kɛse yi mu ase ama yɛabɛyɛ tse dɛ Ɔno ara yie sɛ Ɔsan ba bio a, nye me mpaabɔ wɔ Jesus Christ dzin mu.