Awerɛhyɛmu a Otsim na Ɔyɛ Dzen
Yerenya awerɛhyɛmu wɔ Ne mber mu no hia abotar na ntsimii kodu ewiei a ɔkyɛr sen abrabɔ no nkodzen no, ka yɛdze hɛn werɛ rehyɛ Ewuradze mu ho.
Hɛn babanyin Dan yaree papaaapa wɔ n’asɛmpakã dwuma mu wɔ Ebibir man mu na wɔnye no kɔɔr asopitsi a ndzɛmba pii nnyi hɔ. Ber a yɛkenkaan ne krataa a odzi kan wɔ ne yarba ekyir no, nna hɛn enyida kwan dɛ obenya abagura, mbom n’ananmu no ɔkyerɛɛw dɛ, “Mpo ber a nna meda ahohia dan mu no, menyaa asomdwee. Minnya enyigye a ɔsaa na ɔyɛ dzen wɔ m’brabɔ mu da.
Ber a me yer kenkaan nsɛm no, hɛn enyiwa tetɛwee. Enyigye a ɔsaa na ɔyɛ dzen. Yɛnntsee enyigye a ɔakã ho asɛm dɛm da, naaso nna ne nsɛm ne nsɛm no yɛ nokwar Nna yenyim dɛ enyigye a ɔakã ho asɛm no nnyɛ enyigye ara, anaa dɛwdzi atsenkã, mbom asomdwee na dɛwdzi a sɛ yɛdze hɛnho nyina ma Nyankopɔn na yɛdze hɛn werɛ hyɛ No mu wɔ ndzɛmba nyinamu a ɔba no. Hɛn so yeenya mber wɔ hɛn abrabɔ mu a Nyankopɔn kãa asomdwee nsɛm kyerɛɛ hɛn akra na ɔsee hɛn dɛ yenya enyidado wɔ Christ mu mpo mber a ɔbra ayɛ dzen na yennyim dza ɔreba no.
Lehi kyerɛkyerɛ dɛ sɛ Adam na Eve annhwe ase a “nkyɛ wɔbɛtsena tsenabew bi a ɔkyerɛ dɛ wonnyim hwee, wonnyi enyigye, osiandɛ wonnyim awerɛhow. …
“Mbom hwɛ, wɔayɛ adze nyina wɔ nyia onyim adze nyinano ne nyansaa do.
“Adam hwee ase ama adasa aabɛtsena ase; na adasa tse ase, ama woeenya enyigye.’’
Dza ɔyɛ dɛ ɔnye no bɔ ebira no, atseetsee na awerɛhow siesie hɛn ma yeenya enyigye sɛ yebenya awerɛhyɛmu wɔ Ewuradze na Ne nhyehyɛɛ ma hɛn no mu a. Mfe ɔha a otsĩa 13 awensɛm kyerɛwfo bi akyerɛ nokwar yi fɛfɛɛfɛw mu ara dɛ “Awerɛhow siesie wo ma enyigye. Ɔpra biribiara dzendzenndzen fi fie hɔ, ama enyigye eetum enya kwan ahɛn mu. Ɔpopo nhataw akoangua no fi w’akoma no nkorbata no mu, ama nhatawmon, ahaaebun etum enyin wɔ hɔn ananmu. Otutu ntsen a wɔaprow, ama ntsen afofor a woesuma ase no enya kwan enyin. Adzebiara a awerɛhow popo fi w’akoma mu no, ndzɛmba apapa koraa bɛhyɛ hɔn ananmu.’’
President Russell M. Nelson kyerɛkyerɛɛ dɛ, “Enyigye a Agyenkwa no dze ma [hɛn] … no saa a, ɔma hɛn awerɛhyɛmu dɛ hɛn ‘amandzehu na ɔnnkɛkyɛr’ [Nkyerɛkyerɛ na Ahyɛmudzi] ma eesi hɛn yie.’’ Hɛn nsɔhwɛ na hɛn amandzehu botum enya kwan ama enyigye.
Asɛmpa ne nsɛmpa no nnyɛ ɔbra a awerɛhow na amandzehu nnyi mu anohoba mbom abrabɔ a botae na nkyerɛase ahyɛ no mã—abrabɔ a hɛn awerɛhow na amandzehu no wobotum “ amen no wɔ Christ enyigye mu.’’ Agyenkwa no paa mu kãa dɛ; “Wiadze mu dze, hom wɔ ahohia: naaso hom nhyɛ dzen; medzi wiadze do konyim.’’ N’asɛmpa yɛ enyidado asɛm. Awerɛhow a enyidado wɔ Christ mu ka ho no na osuo enyigye a ɔmmbɔadze no mu.
Jaredfo hɔn akwantu dze kɔ anohoba asaase do ho asɛm botum ayɛ tse dɛ hɛn ɔnnkyebo abrabɔ mu akwantu ne sɛfo. Ewuradze bɔɔ Jared no nuabanyin na no nkorɔfo anohoba dɛ Obedzi “[hɔn] enyim kan nye hɔn akɔ asaase bi a ɔbɔ asaase nyina a ɔwɔ wiadze mu no do.’’ Ɔhyɛɛ hɔn dɛ wɔmmpam ahɛn, na setsie muara wɔyɛɛ edwuma dze pamee dɛ mbrɛ Ewuradze ne nkyerɛkyerɛ tse. Naaso, ber a edwuma no rokɔ kan no, Jared no nuabanyin no kyerɛɛ ɔhaw dɛ Ewuradze ne nhyehyɛɛ wɔ ahɛn no ho nndzi mu nwie. Osui dɛ:
“O Ewuradze, m’edzi dwuma a ehyɛɛ me dɛ mindzi no, na mapam ahɛn no dɛ mbrɛ ekyerɛɛ me dɛ mempam no.
“Na hwɛ, O Ewuradze kan nnyi mu.’’
“O Ewuradze, ana ebɛma yetwa nsu kɛse yi wɔ sum mu?’’
Ana ehuei wo kra ama Nyankopɔn wɔ kwan a ɔtse dɛm mu da? Mber a ereper abɔ bra dɛ mbrɛ Ewuradze ahyɛ no na wo nsa nka tsenenee enyidoadze no, ana ebobow ho da sɛ otwar dɛ edua abrabɔ yi mu wɔ sum mu a?
Jared no nuabanyin no kyerɛɛ ɔhaw kɛsenara wɔ ahom dɛ wɔdze bɛtsena ase wɔ ahɛmbaa no mu ho. Osui dɛ, “Na yɛbɔhwer hɛn nkwa so, osiandɛ yerunntum nngye ahom wɔ mu, gyedɛ mframa a ɔwɔ mu no ara.’’ Ana ɔbra mu nkõdzen horow no ama wɔayɛ dzen ama wo dɛ ibɛgye ahom na wɔama ebobow mbrɛ ibesi etwa da mu no nyina da, akanntam dɛ ibɛsan akɔ wo ɔsor fie a?
Ewuradze nye Jared no nuabanyin no yɛɛ edwuma dze nyaa ne ɔhaw ne nyiano nkorkor ekyir no, Ɔfei ɔkyerɛkyerɛɛ mu dɛ, “Hom runntum ntwa bun kɛse yi gyedɛ misiesie [kwan bi] ma hom dze ma po asorɛkye, nye mframa a obedzi hom kan no, nye nsuyirii a ɔbɛba no.’’
Ewuradze kyerɛɛ no pefee dɛ no koraakoraa no Jaredfo no nnkotum akɔ anohoba asaase no do a Ɔno nnkã ho. Nna ɔnnhyɛ hɔn nsa, na kwan kor pɛr a wobotum dze etwa bun kɛse no nye dɛ wɔdze hɔn werɛ bɛhyɛ No mu. Sũahu yinom na nkyerɛkyerɛ a ofi Ewuradze hɔ yɛɛ dɛ ɔrema Jared no nuabanyin ne gyedzi no mu adɔ na ɔahyɛ n’awerɛhyɛmu wɔ Ewuradze mu no dzen.
Hom nhwɛ mbrɛ ne gyedzi sii sesae fii nsɛmbisa na ɔhaw ho dze kyerɛ gyedzi na awerɛhyɛmu:
“Minyim, O Ewuradze, dɛ ɔwo wɔ tum nyina, na itum yɛ biribiara a epɛ dze ma adasa wɔ ne yieyɛ ntsi, …
“Hwɛ, O Ewuradze, ɔwo ibotum ayɛ iyi. Yenyim dɛ ɔwo itum yɛ etumdze akɛse a ɔyɛ dɛ adze kakraba ma adasa hɔn ntseasee.’’
Wɔakyerɛw dɛ afei Jaredfo no “wɔkɔr hɔn ahɛmbaa no mu, na wosii mu wɔ po no do wɔdze hɔnho hyɛɛ Ewuradze hɔn Nyankopɔn nsa.’’ Dze hyɛɛ nsa n’asekyerɛ nye dɛ enya awerɛhyɛmu anaa igyaa ne nyina mu. Jaredfo no annkɔ ahɛmbaa no mu osiandɛ nna wonyim mbrɛ ndzɛmba besi bɛyɛ edwuma wɔ hɔn akwantu no mu pɛpɛɛpɛ. Wɔkɔr mu osiandɛ nna woesua dɛ wɔdze hɔn werɛ hyɛ Ewuradze no tum, ne papayɛ, na ne ehumbɔbɔr mu, na dɛm ntsi nna woenya pɛ dɛ wobegyaa hɔnho na ekyingye biara anaa suro a annyɛ a wɔwɔ mu ama Ewuradze.
Ɔnnkyɛree na hɛn nanababanyin Abe suro dɛ obotwuw agodze mboa no a wɔkɔ sor ba ase no kor. Nna ɔpɛ dza osi faakor. Ewiei no ne nanabasia dzɛfɛwdzɛfɛw no dɛ hwee nnkɛyɛ no ntsi, n’awerɛhyɛmu wɔ no mu no, ɔfowee. Afei ɔyerɛɛw n’ano kɛse kãa dɛ, “mobo nndwe, naaso mowɔ ahotɔ.’’ Ebia dɛm so na Jaredfo no tseei. Yerenya awerɛhyɛmu wɔ Nyankopɔn mu no nnkɛyɛ abodwee ahyɛase no, naaso enyigye dzi ekyir.
Nna akwantu no nnda famu ma Jaredfo no. Mpɛn pii no wɔdɔɔ esukɔ kɔr po no bun ase, “osian asorɛkye akɛse a obui faa hɔn do no ntsi.’’ Naaso wɔakyerɛw dɛ “mframa no enngyaa dɛ ɔbɔ [hɔn] kɔ anohoba asaase no do.’’ Dɛ mbrɛ ɔyɛ dzen dɛ ibɛtse ase no, tsitsir ara wɔ hɛn abrabɔ mu ber a otsĩafo no ho yɛ dzen na hɛn abrabɔ ayɛ basabasa no, yebotum enya awerɛkyekyer wɔ yeruhu dɛ Nyankopɔn wɔ Ne papayɛ a ɔmmbɔadze da mu no robɔ hɛn daa nyina akɔ fie.
Asɛm no kɔdo dɛ, “Na dɛm na wɔdze hɔn twae; na po mu abowa biara enntum ennsiw hɔn kwan, anaadɛ bonsu biara enndzi hɔn dzɛm; na wonyaa kan aber biara, dɛ ɔyɛ nsu no sor anaadɛ nsu no n’ase.’’ Yɛtse wiadze mu a owu abowa n’asorɛkye, honandua na adwen yarba, nsɔhwɛ na amandzehu biara hyɛ hɛn do. Naaso, ɔnam gyedzi wɔ Jesus Christ do na yɛresan mu eyi dze hɛn werɛ ahyɛ No mu so no, yebotum akɔdo enya kan sɛ wɔ nsu no sor o anaa nsu n’ase o. Yebotum enya awerɛhyɛmu dɛ Nyankopɔn nngyaa dɛ Ohuw hɛn kɔ hɛn ɔsor fie.
Ber a nna wɔrototow hɔn wɔ ahɛmbaa no mu no, Jaredfo no “toow ayɛyi ndwom maa Ewuradze; … na [wɔdaa] ase, na wɔtoow ayɛyi ndwom maa Ewuradze adzekyee no nyina; na ber a adzesaa bae no, woenngyaa dɛ wobeyi Ewuradze ayɛw.’’ Wɔtsee enyigye na ndaase nkã mpo wɔ hɔn amandzehu no mu. Nna wonndu anohoba asaase no do, naaso nna woridzi ehurusi wɔ anohoba nhyira no mu osian hɔn awerɛhyɛmu a ɔsaa na ɔyɛ dzen wɔ No mu ntsi.
Jaredfo no dze nda 344 twae nsu no. Ana ibotum esusu dɛm? Yerenya awerɛhyɛmu wɔ Ne mber mu no hia abotar na ntsimii kodu ewiei a ɔkyɛr sen abrabɔ no nkodzen no, ka yɛdze hɛn werɛ rehyɛ Ewuradze mu ho.
Ewiei no, Jaredfo no “bodwiir anohoba asaase no no mpoano. Na ber a wɔdze hɔn anan sii anohoba asaase no no mpoano hɔ no, wɔbɔɔ hɔn mu adze wɔ asaase n’enyi do, na wɔbrɛɛ hɔnho adze wɔ Ewuradze enyim, na wodzii dɛw mbordo wɔ Ewuradze enyim, osian n’ehumbɔbɔr kɛse a ɔwɔ hɔn do ntsi.’’
Sɛ yɛyɛ anokwafo wɔ hɛn ahyɛmudzi ne nsie ho a, da kor bi hɛn so yebodu fie dwudwodwoo na yɛabɔ hɛn mu adze wɔ Ewuradze n’enyim na yeekyi enyigye enyinsuwa wɔ N’adɔyɛ mbɔbɔrhu a ɔdɔɔso wɔ hɛn abrabɔ mu a, awerɛhow a ɔma kwan ma enyigye mbordo ka ho.
Megye dase dɛ ber a yɛdze hɛnho hyɛ Ewuradze nsa na hɛn awerɛhyɛmu wɔ Jesus Christ na Ne botae Krɔnkrɔn wɔ hɛn abrabɔ mu resaa na ɔreyɛ dzen no, Ɔdze awerɛhyɛmu bɛba abasera hɛn, ɔakã asomdwee nsɛm akyerɛ hɛn akra, na ɔayɛ ma yeenya “enyidado wɔ no mu dɛ ɔbɛgye hɛn.’’
Me dzi dase dɛ Jesus nye Christ no. Ɔno nye enyigye nyina ne farbaa. N’adom dɔɔso, na Ɔwɔ ahom dɛ ɔgye hɛn. Ɔno nye wiadze kan no, nkwa no, na enyidado no. Ɔremma yɛnnhera. Jesus Christ ne dzin mu, amen.