Wɔasɔ Hɛn Gyedzi Ahwɛ Ekyir no
Ber a yedzi Nyankopɔn ne ndze na N’ahyɛmudzi anamɔn kwan do no, Ɔbɛhyɛ hɛn dzen wɔ hɛn nsɔhwɛ mu.
Mber a nna meyɛ abofra no, Asɔrba bi, Frank Talley, yɛɛ dɛ ɔbɔboa m’ebusua ma yɛafow wimuhɛn efi Puerto Rico dze akɔ Salt Lake City ama yeetum akɔsɔɔw hɛn ano wɔ temple, naaso annkyɛr na akwansidze horow hyɛɛ ase yiyii hɔn etsir. Me nkyerɛɛbaa mu kor, Marivid, yaree. Wonnhu dza wɔnnyɛ no, m’awofo bɔɔ mpaa wɔ dza ɔwɔ dɛ wɔyɛ ho naaso wɔkɔɔr do nyaa nkenyan dɛ wontu kwan no Wonyaa awerɛhyɛmu dɛ ber a nokwar mu ara wodzi Ewuradze ne nkenyan do no, wɔbɔweɔn hɛn ebusua na woehyira hɛn—na wɔyɛe maa hɛn.
Akwansidze a yehyia no abrabɔ mu biara no, yebotum enya awerɛhyɛmu dɛ Jesus Christ besiesie kwan akɔ kan ber a yɛdze gyedzi nantsew. Nyankopɔn abɔ anohoba dɛ hɔn a wɔbɔ bra tse dɛ ahyɛmudzi horow a wɔnye No edzi tse no, benya N’anohoba nhyira horow nyinara, wɔ Ne mber mu. Elder Jeffrey R. Holland kyerɛkyerɛɛ dɛ, “Nhyira binom ba ntsɛmara, binom kã ekyir, na binom mmba kesi dɛ heaven bɛba; naaso hɔn a wofua Jesus Christ asɛmpa no, wɔba
Moroni kyerɛkyerɛɛ dɛ “gyedzi nye adze a enyi da do na enyi nnhunii; dɛm ntsi, mma hom nngye kyim osiandɛ hom nnhunii ntsi na hom rinnya dasegye biara kesi dɛ wɔasɔ hom gyedzi ahwɛ ekyir no.’’
Hɛn asɛmbisa nye dɛ: “Ebɛnadze na ɔwɔ dɛ yɛyɛ no yie koraa dze hyia nsɔhwɛ a wɔba hɛn akwan mu no?
Ne baguamu kasa a odzi kan mu dɛ ɔyɛ Asɔr no ne President no, President Russell M. Nelson kyerɛkyerɛɛ dɛ: “Dɛ yɛyɛ Presidency fofor no yɛpɛ dɛ yɛhyɛ ndzɛmba a yɛreyɛ no ase a ewiei botae no da hɛn adwen do. Ɔnam dɛm ntsi, yɛrekasa fi temple mu kyerɛ hom ndɛ. Ewiei no a hɛn nyina rohwehwɛ nye dɛ yebenya Ewuradze fie mu tum akyɛdze, wɔasɔw hɛn ano dɛ ebusua ebusua, yedzi nokwar ama ahyɛmu a yɛayɛ no temple mu ama yɛafata Nyankopɔn akyedze a ɔso kyɛn akyedze biara—ɔyɛ onnyiewiei nkwa no. Temple ayɛdze horow na ahyɛmu a hom dzi no hɔ no yɛ adze tsitsir a ɔhyɛ hom abrabɔ, hom awar na hom ebusua dzen, na ɔboa ma hom tum a hom dze besiw ɔsɛɛfo no a ɔkõ tsĩa hom no kwan. Temple a hom sɔr wɔ mu na hom som ma hom ewuakɔr wɔ hɔ no dze ankorankor nyikyerɛ na asomdwee mbordo behyira hom na wɔahyɛ hom enyimpi no dzen dɛ hom bɛnantsew ahyɛmudzi anamɔn kwan no do.’’
Ber a yedzi Nyankopɔn ne ndze na N’ahyɛmudzi anamɔn kwan do no, Ɔbɛhyɛ hɛn dzen wɔ hɛn nsɔhwɛ mu.
Nna m’ebusua hɔn akwantu dze kɔ temple mfe pii a abɛsen kɔ no yɛ dzen ,naaso ber a ewiei no yɛbɛɛn Salt Lake City, Utah no, me maame, a gyedzi na enyigye ahyɛ no mã, kãa dɛ, “Yebenya ahotɔ; Ewuradze bɔbɔ hɛn ho ban.’’ Wɔasɔw hɛn ano dɛ ebusua, na m’akyerɛbaa tsee apɔw. Iyi sii nko wɔ wɔasɔ m’awofo hɔ gyedzi ahwɛ ekyir no na wodzii Ewuradze ne nkenyan do.
M’awofo hɔn fasusu da ho nya nhyɛdo wɔ hɛn abrabɔ do ndɛ. Hɔn fasusu no kyerɛkyerɛɛ hɛn asɛmpa nkyerɛkyerɛ ne siantsir na wɔboaa hɛn ma yɛtsee nkyerɛase, botae, na nhyira a asɛmpa no dze brɛ hɛn ase. Yɛretse Jesus Christ n’asɛmpa ne siantsir ase no botum aboa hɛn ma yɛdze gyedzi ehyia hɛn nsɔhwɛ.
Ewiei no, adzebiara a Nyankopɔn frɛ na ɔhyɛ hɛn ho mbra dɛ yɛnyɛ no kyerɛ No dɔ ma hɛn na Ne pɛ dɛ ɔdze nhyira a ɔdze esie ama anokwafo no ma hɛn. Yennkotum adwen dɛ hɛn mba no hɔnara bosũa na wɔadɔ asɛmpa no; ɔyɛ hɛn asodzii yɛkyerɛkyerɛ hɔn. Ber a yɛboa hɛn mba ma wosua mbrɛ wobesi bosua dze hɔn pɛ edzi dwuma nyansa mu no, hɛn fasusu botum ekenyan hɔn ma wɔayɛ hɔnara hɔn tsenenee nsanmuyi horow. Ekyir no hɔn nokwar abrabɔ no bɔboa hɔn mba ma woehu asɛmpa no nokwar ama hɔnho.
Mberantsɛ na nkataasia, hom ntsie nkɔnhyɛnyi no ndɛ a ɔrekasa kyerɛ hom. Hom nsũa nhwehwɛ nokwar krɔnkrɔn na hom nhwehwɛ dɛ wɔbɛtse asɛmpa no ase ama homho. President Nelson tuu fo ndaansa yi dɛ: “Ebɛn nyansa na hom hia? … Hom ndzi Nkɔnhyɛnyi Joseph ne fasusu do. Hom nhwehwɛ bea a hɔ komm. … Hom mbrɛ homho adze wɔ Nyankopɔn enyim. Hom nhue hom akoma ngu hom Ɔsor Egya do. Kɔ No hɔ kɛgye nyiano.’’ Ber a hom ritsie nkɔnhyɛfo atseasefo afotu no, na hom rohwɛ awofo atseneneefo hɔn fasusu do, dze rohwehwɛ akwankyerɛ efi hom Ɔsor Egya dɔfo hɔ no, hom so botum abɛyɛ gyedzi ho nkabɔmudze dzendzen wɔ hom ebusua mu.
Awofo a wɔwɔ mba a woefi ahyɛmudzi anamɔn kwan no do no, hom nsan bɔkɔɔ. Hom mboa hɔn ma wɔntse asɛmpa no nokwar ase Hyɛ ase sesei; ɔnnka ekyir koraa da.
Hɛn tsenenee fasusu ɔbra botum ayɛ nsesa kɛse. President Nelson akã dɛ: “Dɛ yɛyɛ Latter-day Saintfo no, wɔaka hɛn hɔ dɛ yɛdwen ‘asɔr’ ho dɛ adze bi a osi wɔ hɛn nhyiamu-adan mu, a dza osi wɔ fie no boa. Yehia nsesa wɔ nhwɛdo yi ho. Mber aso ma Asɔr tsim fie, a dza ɔkɔdo wɔ hɛn nkorbata, ward, na stake adan mu no boa.’’
Kyerɛwsɛm no kyerɛkyerɛ dɛ, “Tsetse abofra wɔ ɔkwan a ɔwɔ dɛ ɔfa do no do: na sɛ onyin mpo a, ɔnnkɛdan efi ho.’’
Wɔsan so se dɛ, ‘Na afei, sɛ wɔkã asɛm no a onya tum kɛse bi wɔ nkorɔfo no do ma ogya hɔn ma wɔyɛ dza ɔtsen—nyew, onya tum kɛse wɔ dɔm no hɔn adwen do sen nkrantsee, anaa adze biara a oesi hɔn do pɛn—dɛm ntsi Alma hun dɛ obeye dɛ wɔdze Nyame n’asɛm no nokwar no bedzi dwuma ahwɛ.’’
Wɔkã asɛm bi fa basia bi ho wɔ India a nna ɔyɛ no atseetsee dɛ ne babanyin dzi esikyire dodowdo. Mpɛn dodow a ɔkãa kyerɛɛ no dɛ ongyaa mmfa ho no, ɔkɔr do nyaa akɔndɔ dzii esikyire no. N’abagura koraa mu no, osii gyinae dɛ ɔdze ne babanyin no bɔkɔ ekohu banyin nyansafo bi a odzi no nyi.
Ɔbɛɛn no na ɔkãa dɛ, “Owura, me babanyin dzi tɔfe dodow. Meserɛ ana ibotum aka akyerɛ no ma oegyae dzi a?
Otsiee ɔbaa no yie ara, na afei ɔkãa kyerɛɛ ne babanyin no dɛ, “Kɔ fie na san bra adapɛn ebien ntamu.’’
Ɔbaa no dze ne babanyin no kɔr fie, yɛɛ basaa na nna onnhu siantsir kor a ɔannkã annkyerɛ ne babanyin no dɛ onngyae tɔfe dzi.
Adapɛn ebien no wɔsaan hɔn ekyir bae. Nyansafo no hwɛɛ banyinba no tsenn na ɔkãa dɛ, “Banyinba, ɔwɔ dɛ egyae tɔfe dodow no dzi. Ɔnnyɛ mma w’apɔwmudzen.
Banyimba no bɔɔ ne tsir adze na ɔbɔɔ anohoba dɛ obegyae.
Banyimba ne maame no bisaa dɛ, “Ebɛnadze ntsi na annkã annkyerɛ no adapɛn ebien no a abɛsen kɔ no?’’
Banyin nyansafo no yerɛɛw n’ano. “Adapɛn ebien a ɔabasen kɔ no nna marankasa meda ho dzi tɔfe dodow.’’
Banyin yi dze nokwardzi a ɔtse dɛm bɔɔ bra ma nna onyim dɛ n’afotu bɛyɛ mfaso nko sɛ oridzi ɔnoara n’afotu do a.
Tum mbordo wɔ nhyɛdo a yɛwɔ no wɔ hɛn mba do ber a wohu hɛn dɛ yɛnantsew nokwar mu ara wɔ ahyɛmudzi ananmɔn kwan no do. Mormon Nwoma nkɔnhyɛnyi Jacob yɛ tsenenee a ɔtse dɛm ho fasusu. Ne babanyin Enos kyerɛɛw n’egya ne nhyɛdo no nsunsuando:
“Emi, Enos, minyim dɛ m’egya yɛ nyimpa a odzi pɛrpɛr—na ɔkyerɛkyerɛɛ me wɔ ne kasaa mu, na hwɛ, ɔyɛn me wɔ Ewuradze so ho setsie nye kasa kyerɛ mu—na nhyira nkã me Nyame ne dzin wɔ ho. …
“… Nna nsɛm a daa metse dɛ m’egya rekã a ɔfa onnyiewiei nkwa ho, na ahotseweefo hɔn ndaamba dɛw a wobedzi ho adwen hyɛɛ m’akoma mã.’’
Mberantsɛ akokodurfo no hɔn nãnom dze asɛmpa no bɔɔ bra, na nokwardzi hyɛɛ hɔn mba no mã. Hɔn banodzifo bɔɔ amandzɛɛ dɛ:
“Hɔn nãnom akyerɛkyerɛ hɔn dɛ sɛ wonya gyedzi a, Nyankopɔn bɛgye hɔn.
“Na wɔkaa nsɛm a hɔn nãnom kãa kyerɛɛ me no na wɔsee me dɛ: Yenngye kyim dɛ hɛn nãnom no nyim dɛm.”
Enos na mberantsɛ akokodurfo no hɔn awofo hɔn gyedzi na ɔhyɛɛ hɔn dzen, a ɔboaa hɔn ma wonya hɔnara hɔn nsɔhwɛ ho mboa.
Wɔdze Jesus Christ asɛmpa nsan-ananmu no dze ehyira hɛn wɔ hɛn nda mu, a sɛ yenya abagura anaa ɔhaw a opegya hɛn. Wɔma hɛn awerɛhyɛmu dɛ hɛn mbɔdzenbɔ bɔsow aba wɔ Ewuradze noara ne mber mu sɛ yɛper kɔ kan wɔ hɛn gyedzi no nsɔhwɛ mu a.
Ndaansa yi menye me yer, na Apaamu President na n’apamfo wɔka ho, kãa Elder David A. Bednar ho kɔr Haiti Port-au-Prince Temple a worutu ahyɛ Nyame nsa dwumadzi no bi. Hɛn babanyin Jorge nye hɛn kɔree na ɔkãa ne sũahu ho asɛm dɛ: “Ɔyɛ Nwanwa, Paapa! Ntsɛmara a Elder Bednar hyɛɛ tu hyɛ Nyame nsa mpaabɔ no, nna mutum tse kan na hyew a ɔhyɛ dan no mu mã no. Mpaabɔ no dze ntseasee dodow kaa mo nhumu wɔ temple ne botae ho. Nokwar ara dɛ ɔyɛ Ewuradze ne fie.
Mormon Nwoma mu no, Nphi kyerɛkyerɛ dɛ ber a yɛpɛ dɛ yehu Nyankopɔn ne pɛ no, Ɔbɛhyɛ hɛn dzen. Ɔkyerɛɛw dɛ, “Emi, Nephi, nna musuar koraa … na eso minyaa pɛ kɛse bi dɛ mobohu Nyankopɔn n’esumasɛm, ntsi musũi frɛɛ Ewuradze; na hwɛ ɔbaa me nkyɛn, na ɔbɔdwedwee m’akoma ma megyee nsɛm nyinara a m’egya kãe no dzii; dɛm ntsi, manntsew no do etua dɛ ma mo nuanom no yɛe no.’’
Enuanom na nkyerɛbaa, homm mma yɛmboa hɛn mba na hɔn a woetwa hɛnho ehyia nyina ma wondzi Nyankopɔn n’ahyɛmudzi anamɔn kwan no do ama Sunsum no akyerɛkyerɛ hɔn na wɔagoow hɔn akoma dze enya pɛ dze edzi N’ekyir wɔ hɔn abrabɔ nyina mu.
Sɛ mohwɛ m’awofo hɔn fasusu a, muhu dɛ hɛn gyedzi wɔ Ewuradze Jesus Christ mu bɛkyerɛ hɛn kwan a ɔdze hɛn bɛsan akɔ hɛn ɔsor fie. Minyim dɛ anwanwadze ba wɔasɔ hɛn gyedzi ahwɛ ekyir no.
Megye dasegye wɔ Jesus Christ na No werdam afɔrbɔ no ho. Minyim dɛ Ɔyɛ hɛn Agyenkwa na Ɔgyefo. Ɔno na hɛn Ɔsor Egya baa aberantsɛba Joseph Smith hɔ dɛm anapa wɔ 1820 fefɛw ber mu, Nsanananmu ne nkɔnhyɛnyi. President Russell M. Nelson nye Ewuradze ne nkɔnhyɛnyi tseasefo. Jesus Christ ne dzin mu, amen.