Fa wo werɛ nyina hyɛ Ewuradze mu.
Dza yɛwɔ ho awerɛhyɛmu ara nye dɛ yɛdze hɛn werɛ nyina hyɛ Ewuradze na No dɔ ma Ne mba mu.
Mo nuanom na me nkyerɛbaa adɔfo, krataa bi menyae mfe kakra abasen kɔ no na oyi me kasaa no ne nsɛngyinado no enyim. Nna onyia ɔkyerɛwee no rususu ɔno na banyin bi a n’onnyiewiei yer ewu hɔn ntamu temple awar. Ɔbɛyɛ ɔyer a ɔtɔdo ebien. Obisaa asɛmbisa yi: ana obenya ɔnoara ankasa ne fie wɔ abrabɔ a ɔreba no mu a, anaa ɔwɔ dɛ onye no kun na ne yer a odzi kan no wɔtsena? Mekãa kyerɛɛ noara dɛ ɔmfa no werɛ nyina nhyɛ Ewuradze mu.
Medze sũahu bi a metsee fii onyia menye no yɛ edwuma a ɔsom me bo, na ɔama me kwan dɛ menkyɛ no bɔtoa do. Ne yer dɔfo na ne mba hɔn nã no wu ekyir no, egya no waree bio. Ne mba mpanyinfo mu binom ammpen awar bio no koraa na wokebisaa afotu wɔ busuanyi bi ɔyɛ Asɔr baanodzinyi nyimdzefo bi hɔ. Otsie siantsir a wotsĩa no wiei no, a nna otsim nkitahodzi a ɔbɛba wɔ sunsum wiadze anaa enyimnyam ahenman a obedzi Atsɛmbu a Odzi Ewiei ekyir no, baanodzinyi yi kãa dɛ: “Hom rehaw homho wɔ ndzɛmba a ɔnnsɛ ho. Dza ɔsɛ dɛ ɔhaw hom nye dɛ sɛ hom botum ekodu dɛm mbea horow no a. Hom mma hom adwen ngyina do. Sɛ hom kodu hɔ a, ne nyina bɛyɛ nwanwa akyɛn dza hom susui ho.”
Nkyerɛkyerɛ yi yɛ awerɛkyekyer papa! Fa wo werɛ nyina hyɛ Ewuradze mu!
Nkrataa horow a menya mu no, minyim dɛ binom haw wɔ nsɛmbisa a ɔfa sunsum wiadze a yɛbɛtsena wɔ hɛn wu ekyir na ansaana yɛbɔsoɛr ho. Binom fa no dɛ gyinabew na ndzɛmba a yedua mu wɔ ɔnnkyebo abrabɔ yi mu dodowara no bɔkɔ do wɔ sunsum wiadze. Ebɛnadze ankasa na yenyim fa sunsum wiadze tsebew ho? Megye dzi dɛ BYU nyamesom ho ɔbemfo bi dza ɔkyerɛwee faa asɛm yi ho no yɛ tɔɔtsen: “Sɛ yebisa hɛnho dza yenyim a ɔfa sunsum wiadze a ofi kyerɛwsɛm gyinapɛn no mu a, nyiano no nye ‘nnyɛ dodow biara dɛ mbrɛ yɛtaa dwen no.’”
Nyew, yenyim fi kyerɛwsɛm no mu dɛ hɛn honandua ewu no, yɛkɔ do tsena ase dɛ esunsum wɔ sunsum wiadze. Kyerɛwsɛm no kyerɛ so dɛ sunsum wiadze yi mu no nkyɛmu da hɔn a wɔyɛɛ “tsenenee” anaa “wɔtsen” na hɔn a wɔyɛɛ emumuyɛfo wɔ abrabɔ yi mu no ntamu. Ɔkã so mbrɛ esunsum nokwafo binom kyerɛkyerɛ hɔn a wɔyɛɛ emumuyɛdze anaa etuatsewfo no asɛmpa no (hwɛ 1 Peter 3:19; Nkyerɛkyerɛ na Ahyɛmudzi 138:19–20, 29, 32, 37). Tsitsir no, ndɛ mber yi mu nyikyerɛ da no edzi dɛ nkwagye edwuma kɔ do wɔ sunsum wiadze mu (hwɛ Nkyerɛkyerɛ na Ahyɛmudzi 138:30–34, 58), na ɔwɔ mu dɛ wotu hɛn fo dɛ mma yenntu hɛn nnuho nnhyɛ da wɔ ɔnnkyebo abrabɔ yi mu (hwɛ Alma 13:27), naaso wɔkyerɛ hɛn dɛ wotum nya nnuho bi wɔ hɔ (hwɛ Nkyerɛkyerɛ na Ahyɛmudzi 138:58).
Nkwagye edwuma a ɔwɔ sunsum wiadze no nye woriyi esunsum efi dza kyerɛwsɛm no taa frɛ no “nkowaasom” no mu. Hɔn nyina a wɔwɔ sunsum wiadze no wɔ nkowaasom bi mu. President Joseph F. Smith ne nyikyerɛ mapã no a wɔagye ato mu wɔ Nkyerɛkyerɛ na Ahyɛmudzi ɔfã 138, se dɛ atseneneefo ewufo no wɔ “asomdwee” mu (Nkyerɛkyerɛ na Ahyɛmudzi 138:22) ber a hɔn enyi da Wusoɛr no do (hwɛ Nkyerɛkyerɛ na Ahyɛmudzi 138:16), “ahwɛ kwan akyɛr, ofi ber a hɔn esunsum twee hɔnho fii hɔn honandua mu dɛ wɔwɔ nkowaasom mu.” Nkyerɛkyerɛ na Ahyɛmudzi 138:50).
Emumuyɛfo so hu amandze wɔ nkowaasom binom so mu. Osian bɔn a woennu hɔnho ntsi, wɔwɔ bea a Ɔsomafo Peter frɛ no sunsum “efiadze” (1 Peter 3:19 hwɛ Nkyerɛkyerɛ na Ahyɛmudzi 138:42 so). Esunsum yinom wɔkyerɛw dɛ “wɔakyekyer hɔn” anaa wɔyɛ “ndummumfo” (Nkyerɛkyerɛ na Ahyɛmudzi 138:31, 42 anaa dɛ “wɔbɔtow hɔn egu ekyirekyir sum mu” a wɔdze “osũ, nye nkekamu, nye asetwɛr” rotweɔn owusoɛr na atsɛmbu (Alma 40:13–14).
Jesus Christ no Wusoɛr no si wusoɛr tadua ma esusum nyina a wɔwɔ sunsum wiadze mu no (hwɛ 1 Corinthfo 15:22), naaso ɔba mber asorɔtow ma ekuw horow no. Kesi dɛ dɛ mber no wɔahyehyɛ bodu no, dza kyerɛwsɛm kã fa dwumadzi a ɔkɔ do wɔ sunsum wiadze tsitsir ara fa nkwagye edwuma ho. Kumabaa bio na woeyi akyerɛ. Wɔkã asɛmpa no kyerɛ hɔn wonnyim mbra, wonnu hɔnho, na etuatsewfo ama wɔaagye hɔn eefi hɔn nkowaasom mu na wɔakɔ kan akɛgye nhyira horow a Ɔsor Egya esie ama hɔn no.
Sunsum wiadze mu nkowaasom no a ɔfa akra tsenenee a wɔasakyer ho nye ntweɔnee a ɔsɛ dɛ wɔtweɔn—nye bia wɔma hɔn kwan ma wokenyan—hɔn ngyina-hɔmadze ayɛdze horow ne nyɛe wɔ asaase do ama woeetum eenuma hɔn na woeenya Sunsum Krɔnkrɔn ne nhyira no, (hwɛ Nkyerɛkyerɛ na Ahyɛmudzi 138:30–37, 57–58). Ngyina- hɔmadze ayɛdze a atseasefo yɛ no ma mbanyin tum ma wɔkɔ kan kɛkã atseneneefo dɔm ho ma wɔdɔɔ sõ, hɔn a wobotum akã asɛmpa no akyerɛ esunsum no a wɔwɔ efiadze no.
Sɛ yɛtra ahyɛsesɛm yinom a, nsɛm kakrabaa na ɔwɔ hɛn kyerɛwsɛm a wɔagye ato mu no a ɔfa sunsum wiadze no a odzi owu ekyir na Atsɛmbu a Odzi Ewiei ne kan no. Ntsi ebɛnadze bio na yenyim fa sunsum wiadze ho? Asɔrmba pii enya enyido-adzehu anaa nkenyan binom a ɔkã mbrɛ ndzɛmba si kɔ do anaa wɔahyehyɛ no wɔ sunsum wiadze, naaso ankorankor sunsum mu sũahu yinom nnyɛ dza wɔbɛtse ase anaa wɔkyerɛkyerɛ no dɛ Asɔr nkyerɛkyerɛ a wɔapen do. Na, nokwar, asɔrmba hɔn ndwendwenho pii nye mbuukuu a ɔfa hɔn a wɔbɛɛn owu hɔn sũahu ahorow a woetsintsim wɔ hɔ.
Iyinom nyina ho no, ohia ara yie dɛ yɛkaa Elderfo D. Todd Christofferson na Neil L. Andersen hɔn nyansa mu kɔkɔbɔ horow wɔ wiadze mfɛndzanan ehyiadzi a abɛsen mu no. Elder Christofferson kyerɛkyerɛɛ dɛ: “Ɔsɛ dɛ yɛkaa dɛ nnyɛ asɛm biara a Asɔr baanodzinyi, nyia wɔabɛsen anaa ɔwɔ hɔ sesei, bɛkã biara nna ɔyɛ nkyerɛkyerɛ. Yenya no ntseasee wɔ Asɔr no mu dɛ asɛm a baanodzinyi kor akã no mpɛn kor no taa yɛ ankorankor adwenkyerɛ a, ɔadwen ho yie, naaso ɔno nnkyerɛ dɛ ɔyɛ Asɔr no pen do anaa ɔkyekyer Asɔr no nyina.”
Ehyiadzi no a odzi do no, Elder Andersen kyerɛɛ fapem yi: “Nkyerɛkyerɛ yɛ dza President a Odzi Kan na n’Apamfo nye Duebien no hɔn Quorum kuwba 15 [duenum] no nyinara kyerɛkyerɛ. Onnsuma wɔ nsumae ɔkasapɛn bi mu wɔ kasa kor mu.” Ebusua dawurbɔ, a nkɔnhyɛfo, adzehufo, na nyikyerɛfo 15 no nyina hɔn nsa hyɛ ase no, yɛ fapem yi n’edzikyerɛ nwanwa.
Yefi biribi tse dɛ ebusua dawurbɔ a hɔn nyina nsa hyɛ ase a, Asɔr no ne Presidentfo hɔn nkɔnhyɛ nkyerɛkyerɛ no a nkɔnhyɛfo na asomafo binom si no pi no, so yɛ iyi ho mfatoho. Sunsum wiadze mu tsebew no, nkɔnhyɛnyi Joseph Smith maa nkyerɛkyerɛ ebien ber a ɔka kakra ma ɔdze no somdwuma no aba ewiei no na n’edziekyirfo no ataa akyerɛkyerɛ. No mu kor nye ne nkyerɛkyerɛ wɔ King Follet asɛmpa nkyerɛkyerɛ no dɛ ebusua mu mba a wɔyɛɛ tsenenee no bɔbɔmu atsena wɔ sunsum wiadze mu Kor so nye asɛm a ɔkãa no funsie wɔ afe odzi ewiei wɔ n’abrabɔ mu no: “Hɔn a wɔtsen hɔn esunsum no nya nkwagye ntowdo kɔ enyimnyam edwuma a ɔkrɔn mu …[wɔ] esunsum wiadze. … Wonnyi ekyir fi hɛn nkyɛn, na wonyim na wɔtse hɛn adwendwen, nkã-tse na ndzeyɛɛ, na wɔtaa dzi ho yaw.”
Ntsi, asɛmbisa a medzii kan kãe a ɔfa bea a esunsum tse no ho asɛm ɛ? Sɛ dɛm asɛmbisa no yɛ wo nwanwa anaa ɔyɛ wo ketseabaa, susu ɔankasa wo nsɛmbisa, anaa ma ayɛ dɛ ebeyi ano ɔnam biribi a atse fi obi hɔ mber bi abɛsen. Nsɛmbisa nyina a ɔfa sunsum wiadze ho no, mususu nyiano ebien. Odzi kan, kaa dɛ Nyame dɔ Ne mba na Ɔbɛyɛ dza ohia papaapa ama hɛn mu kor biara. Otsĩa ebien, kaa Bible mu nkyerɛkyerɛ yi a yenyim yi a, ɔayɛ mboa kɛse ama me ɔfa nsɛmbisa pii a wonnyii ano no ho.
‘’Fa wo werɛ nyina hyɛ Ewuradze mu; na mma nntwer wankasa wo ntseasee.
“W’akwan nyina mu no kan no to mu, na ɔno na ɔbɛkyerɛ wo w’akwan” (Mbɛbusɛm 3:5–6).
Nephi dze nsɛm yinom wiee ne ndwom a okenyan no dɛ, ‘’O Ewuradze, medze mo werɛ atwer wo, na wo mu na medze mo werɛ bɔtwer afebɔɔ.’’ Meremmfa mo werɛ nntwer honam abasa” (2 Nephi 4:34).
Hɛn nyina yebotum adwendwen sunsum wiadze gyinabew yinom ho kokoa mu, anaa yɛapɛnsampɛnsam iyinom nye nsɛmbisa horow a wonnyii ano ho wɔ ebusua ebusua anaa hɔn a wɔbɛn hɛn mu. Mbom mma yɛmmfa nkyerɛkyerɛ anaa mmfa dza onnyi nkyerɛkyerɛ gyinapɛn a Asɔr agye ato mu no nndzi dwuma. Ereyɛ dɛm no mma Ewuradze n’edwuma no nnkɔ kan na obotum mpo egura binom abaw dɛ wɔbodua ankorankor nyikyerɛ do ahwehwɛ Ewuradze ne nhyehyɛɛ a Ɔdze ama hɛn mu kor biara wɔ hɔnankasa hɔn ahotɔ anaa ntowdo mu. Yɛredan ankorankor nkyerɛkyerɛ anaa adwendwenho mbordo botum atwe hɛn ekyir mpo efi yebetsim wɔ adzesũa na mbɔdzembɔ a ɔbɔtow hɛn ntseasee mu na wɔaboa hɛn ma yɛakɔ kan wɔ ahyɛmu anamɔn kwan no do.
Fa wo werɛ nyina hyɛ Ewuradze mu yɛ nokwar nkyerɛkyerɛ a yenyim wɔ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no mu. Dɛm na Joseph Smith kyerɛkyerɛɛ ber a asɔpɔkan Ahotseweefo no hyiaa atseetsee yaayaw nye akwansidze a wonntum nntra. Dɛm no da ho yɛ fapem pa a yebotum dze edzi dwuma ber a hɛn mbɔdzembɔ dɛ yesũa anaa hɛn mbɔdzembɔ dɛ yɛhwehwɛ ahotɔ no hyia akwansidze wɔ nsɛm a wonnyii nnkyerɛɛ anaa dza wɔnngyee nntoo mu dɛ ɔyɛ Asɔr nkyerɛkyerɛ no.
Dɛm fapem noara fa nsɔwano wɔ abrabɔ ɔreba no mu ho nsɛmbisa a wonnyii ano anaa nsakyeree a epɛ osian dza woesisi anaa mfomdo ɔwɔ abrabɔ yi mu no. Dodowara na yennyim, dɛm ntsi dza yɛwɔ ho awerɛhyɛmu ara nye dɛ yɛdze hɛn werɛ nyina hyɛ Ewuradze na No dɔ ma Ne mba mu.
Ewiei no, dza yenyim fa sunsum wiadze ho nye dɛ Egya no na Ɔba no nkwagye edwuma no kɔ do wɔ hɔ. Hɛn Agyenkwa na ɔhyɛɛ ahotɔ nsɛm a wɔkã kyerɛ ndɔmmumfo no (hwɛ 1 Peter 3:18–19; 4:6; Nkyerɛkyerɛ na Ahyɛmudzi 138:6–11, 18–21, 28–37, na edwuma no kɔ do ber a asomafo a wodzi mu na wɔfata no kɔ do kã asɛmpa no, a nnuho kã ho, ma hɔn wɔda ho hia n’ahotsewee nsunsuando no (hwɛ Nkyerɛkyerɛ na Ahyɛmudzi 138:57 Iyi nyina no botae no, a ndɛ nyikyerɛ da no edzi no, wɔakã no wɔ Asɔr no ne nkyerɛkyerɛ a wɔagye ato mu no mu.
“Ewufo a wonu hɔnho no, wɔnam Nyankopɔn ne fie mu yɛdze ho setsie do wɔbɔpon hɔn.
“Na sɛ wotua hɔn mbrato ho kaw no wie, na wɔhohor hɔn ma hɔn ho tsew a, hɔn nsa bɛkã hɔn akatua dɛ mbrɛ hɔn ndwuma tse, osiandɛ wɔyɛ nkwagye mu adzedzifo “(Nkyerɛkyerɛ na Ahyɛmudzi 138:58–59).
Hɛn mu kor biara no dwuma nye dɛ yɛkyerɛ asɛmpa nsan-ananmu nkyerɛkyerɛ no, yesie mbrasɛm no, yɛdɔ na yɛboa hɛnho nkorkor na yɛyɛ nkwagye edwuma wɔ temple krɔnkrɔn mu.
Megye dase wɔ dza makã no nokwar ho nye dza wɔbɛkyerɛkyerɛ no ehyiadzi yi ase ho nokwar. Osian Jesus Christ No Werdambɔ no ntsi na iyinom tum ba. Dɛ mbrɛ yenyim fi ndɛ nyikyerɛ mu no, Nyia “ɔhyɛ Egya no enyimnyam, na ɔgye ne nsaano ndwuma nyina nkwa” (Nkyerɛkyerɛ na Ahyɛmudzi 76:43; woetsĩmu akã ho). Jesus Christ ne dzin mu, amen.