![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F60%2Ff1%2F60f1c26279ba171262e69f91121532ca5ecd90f4%2F60f1c26279ba171262e69f91121532ca5ecd90f4.jpeg/full/!250,/0/default)
Tumau ia Tatou Folafolaga ma Feagaiga
Ou te valaaulia outou ia mafaufau i folafolaga ma feagaiga ua outou osia ma le Alii, ma faatasi ai ma isi, ma le amiosa’o tele, ma le iloaina o le a outou savavali i a outou upu.
Uso e ma tuafafine pele, a o tatou tapunia ai lenei sauniga, tau ina ia tatou taofimau i o tatou loto le molimau na fanau i le asō e uiga i upumoni o le talalelei a Iesu Keriso. Ua faamanuiaina i tatou i le mauaina o lenei taimi paia e faatasi ai e toe faamalosia la tatou folafolaga i le Alii o Iesu Keriso o i tatou o Ana auauna ma o Ia o lo tatou Faaola.
Ua mamafa lava i lo’u mafaufau le osia ma le tausia o folafolaga ma feagaiga. O le a se taua ia te oe o le tausia o lau upu? ina ia faatuatuaina? ia faia le mea na e fai mai o le a e faia? ia tauivi e faamamalu au feagaiga paia? ia i ai le amiosa’o? E ala i le ola faamaoni ia tatou folafolaga i le Alii ma isi, tatou te savavali ai i le ala o feagaiga e toefoi atu i lo tatou Tama i le Lagi ma tatou lagona ai Lona alofa i o tatou olaga.
O lo tatou Faaola o Iesu Keriso o lo tatou Faataitaiga sili lea pe a oo mai i le osia ma le tausia o folafolaga ma feagaiga. Na afio mai o Ia i le lalolagi ma le folafolaga e fai le finagalo o le Tama. Sa Ia aoao mai mataupu faavae o le talalelei i upu ma galuega. Na togiola e Ia a tatou agasala ina ia mafai ona tatou toe ola. Na Ia faamamaluina Ana folafolaga uma taitasi.
Mata e mafai ona faia lea tala e tasi mo i tatou uma taitoatasi? O a ni tulaga lamatia pe afai tatou te faimamago teisi, sina sasi laitiiti, pe le tausisia foi a tatou tautinoga? Ae a pe afai tatou te savavali ese mai ia tatou feagaiga? Pe o le a o mai ia Keriso isi ona o a tatou faataitaiga? Pe o le a e savali i lau upu? O le tausiga o folafolaga e le o se mausa; ae o se uiga o le avea ai ma soo o Iesu Keriso.
O le manatua pea o o tatou vaivaiga i le olaga faaletino, sa folafola mai ai e le Alii, “Ia fiafia, ma aua le fefefe, aua o Aʼu o le Alii ua Ou faatasi ma outou, ma o le a tu i tafatafa o outou.”1 Ua ou lagonaina Lona afio ai pe a manaomia se faamautinoaga, mafanafana, po o le malamalamaaga po o se malosiaga sili atu faaleagaga, ma ua faalotomaualaloina tele a’u ma le lotofaafetai mo Lana mafutaga paia.
Ua fetalai mai le Alii, “O tagata taitoatasi e lafoai ana agasala ma sau ia te aʼu, ma valaau mai i loʼu igoa, ma usiusitai i loʼu leo, ma tausi i aʼu poloaiga, o le a vaai i oʼu mata ma iloa o i ai aʼu.”2 Masalo o Lana folafolaga silisili lena.
Sa ou aoaoina le taua o le tausia o la’u upu i lo’u talavou. O se tasi o ia faataitaiga o le taimi sa ou tu faasasa’o ai e tauloto le Tautoga a le Sikauti. O la tatou fegalegaleaiga ma Tama Sikauti a Amerika, lea ua faamutaina nei, o le a avea pea ma se talatuu taua ia te a’u ma lenei Ekalesia. I le faalapotopotoga o Sikauti, i le anoanoai o alii ma tamaitai sa auauna atu ma le filiga o ni taitai Sikauti, i tina—o faamamaluga moni e avatu iina—ma i alii talavou na auai i le Sikauti, matou te faapea atu, “Faafetai lava.”
I lenei lava sauniga, na faasilasila mai ai e lo tatou perofeta pele, o Peresitene Russell M. Nelson, ma Elder Quentin L. Cook ni fetuunaiga ia o le a toe faataulai atu ai la tatou gauaiga i talavou ma faaogatusa ma a tatou faalapotopotoga faatasi ma upumoni faaalia. Ma le isi, i le Aso Sa na se’i te’a atu nei, sa faamalamalama mai ai e Peresitene Nelson ma Peresitene M. Russell Ballard le polokalama fou mo Tamaiti ma le Autalavou a Le Ekalesia a Iesu Keriso o le Au Paia o Aso e Gata Ai mo le Ekalesia atoa. O se ta’imua i le lalolagi atoa ua taulai atu i lo tatou Alii ma le Faaola, o Iesu Keriso. Ua autasi le Au Peresitene Sili ma le Korama a Aposetolo e Toasefululua i lenei taitaiga fou, ma ou te tuu atu la’u molimau patino na taialaina e le Alii i matou i laasaga uma o le ala. Ua ou fiafia lava mo tamaiti ma le autalavou o le Ekalesia o le a maua aafiaga i lenei taulaiga tuufaatasi ia i latou i le aiga ma i le lotu—e ala i le aoaoina o le talalelei, auaunaga ma gaoioiga, ma le atinaega patino.
O le autu a le autalavou mo le tausaga a sau, 2020, o loo ta’ua ai le folafolaga mataina a Nifae e “alu ma fai.” Sa ia tusia, “Ma sa oo ina fai atu o a’u o Nifae, i lo’u tamā: O le a ou alu ma fai mea ua poloaiina e le Alii, aua ua ou iloa e lē tuuina mai e le Alii ni poloaiga i le fanauga a tagata, vagana o le a saunia e ia se ala mo i latou ina ia mafai ai ona latou faataunuuina o le mea ua ia poloaiina ai i latou.”3 E ui sa tautalagia i se taimi ua leva, ae o i tatou i le Ekalesia e tausia lena folafolaga i le asō.
O le “alu ma fai” o lona uiga o le ō ese mai i ala o le lalolagi, mauaina ma le faatinoina o faaaliga faaletagata lava ia, ola amiotonu faatasi ma le faamoemoe ma le faatuatua i le lumanai, osia ma le tausia o feagaiga e mulimuli ia Iesu Keriso, ma o le a faateleina ai lo tatou alolofa mo Ia, le Faaola o le lalolagi.
O se feagaiga o se folafolaga e lua ona itu i lo tatou va ma le Alii. I le avea ai ma ni tagata o le Ekalesia, tatou te osi feagaiga i le papatisoga e ave i o tatou lava luga le suafa o Iesu Keriso, ma ola e pei ona sa soifua ai o Ia. E pei o i latou na papatisoina i Vai o Mamona, ua tatou osifeagaiga foi ia avea ma Ona nuu, “e tauave avega a le tasi [ma le isi], ina ia māmā; … [ia] faanoanoa faatasi ma e e faanoanoa; … faamafanafana atu ia te i latou o e e manaomia le faamafanafanaga, ma tutu o ni molimau a le Atua i taimi uma ma i mea uma, ma i nofoaga uma.”4 O la tatou auaunaga i le tasi ma le isi i le Ekalesia e atagia mai i la tatou tautinoga e faamamalu na folafolaga.
A tatou aai i le faamanatuga, ua tatou faafouina lena feagaiga e tauave i o tatou luga Lona suafa ma faia nisi folafolaga faaopoopo ia lelei atili. O o tatou mafaufauga ma amioga i aso taitasi, pe tetele pe itiiti, e atagia mai ai a tatou tautinoga ia te Ia. O Lana folafolaga paia ia i tatou, “afai tou te manatua pea a’u o le a outou maua lo’u Agaga e faatasi ma outou.”5
O la’u fesili i le asō e faapea, o tatou tumau i a tatou folafolaga ma feagaiga pe o nisi taimi ua na o ni tautinoga faa’afa’afa, e faia faasamasamanoa ma o lea e faigofie ai lava ona soli? Pe a tatou fai atu i se tasi, “O le a ou tatalo mo oe,” o tatou tatalo la? Pe a tatou tautino atu, “O le a ou i ai iina e fesoasoani,” tatou te i ai ea? Pe a tatou tautino atu e totogi se aitalafu, o totogia ea? Pe a sii o tatou lima e lagolago se tagata i se valaauga fou, o lona uiga o le tuu atu o le lagolago, o tatou lagolago ea?
I se tasi afiafi a o o’u talavou, sa ma saofafa’i ma lo’u tina i le vae o le moega ma talanoa ma le faamaoni e uiga i le taua o le ola i le Upu o le Poto. “Ou te iloa mai aafiaga o isi, mai tausaga ua alu,” sa ia fai mai ai, “o le leai o se faaleagaga ma se nofouta e sau mai le lē tausia o le Upu o le Poto.” Sa ia pulato’a i o’u mata, ma sa ou lagonaina ana upu o tuia ai lo’u loto: “Folafola mai ia te a’u, Ronnie, i le aso nei [sa ia valaauina a’u ia Ronnie], o le a e ola i aso uma i le Upu o le Poto.” Sa ou faia ma le faamaoni lena folafolaga ia te ia, ma sa ou tausia i nei tausaga uma.
Sa tautuaina lelei a’u e lena tautinoga a o o’u talavou ma i tausaga mulimuli ane a o ou i ai i mafutaga faapisinisi ia sa faia ai inuga ava. Sa ou muai faia se faaiuga e mulimuli i tulafono a le Atua, ma ou te lei toe tau mafaufau faalua i ai. Ua fetalai mai le Alii, “Ua noatia au le Alii, pe a outou faia mea ou te fai atu ai; a e pe a outou le faia mea ou te fai atu ai, e leai sa outou folafolaga.”6 O le a Lana fetalaiga ia i latou o e tausia le Upu o le Poto? O le a tatou maua le folafolaga o le soifua maloloina, malosi, poto, malamalama, ma agelu e puipuia i tatou.7
I nai tausaga talu ai, sa ma i ai ma Sister Rasband i le Malumalu i Sate Leki mo le faamauina o se tasi o ō ma afafine. A o matou tutu ai i fafo o le malumalu ma se afafine laitiiti e le’i lava le matua e auai ai i le sauniga, sa matou talanoa e uiga i le taua o le faamauina i totonu o le malumalu paia o le Atua. E pei ona aoao ai a’u e lo’u tina i tausaga ua alu, sa ma fai atu ai i le ma afafine, “Ma te mananao ia e faamau ma le saogalemu i totonu o le malumalu, ma e ma te mananao ia te oe e te folafola mai ia i ma’ua, afai e te mauaina sau soa e faavavau, o le a e faia se aso ma ia ina ia faamauina ai i totonu o le malumalu.” Sa ia tautino mai ia i maua.
Sa ia ta’u mai talu mai lena taimi o le matou talanoaga ma lana folafolaga na puipuia o ia ma faamanatu atu ia te ia le “mea sa sili ona taua.” Sa mulimuli ane sa ia osia ni feagaiga ina ua faamauina o ia i lana tane i le malumalu.
Sa aoao mai Peresitene Nelson: “Tatou te faateleina … le mana o le Faaola i o tatou olaga pe a tatou osia feagaiga paia ma tausia na feagaiga i le saolele. O a tatou feagaiga e fusia ai i tatou ia te Ia ma tatou maua ai le mana faaleatua.”8
A tatou tausia folafolaga i le tasi ma le isi, o le a tatou tausia foi folafolaga i le Alii. Manatua le fetalaiga a le Alii: “Aua na faia e outou i le tasi o e aupito itiiti o o’u uso nei, o a’u lea na outou faia i ai.”9
Tatou mafaufau ma a’u i ni faataitaiga o folafolaga i totonu o tusitusiga paia. Sa tautino Amona ma atalii o Mosaea i le Tusi a Mamona “e talai atu le afioga a le Atua.”10 Ina ua pu’eina Amona e le autau a sa Lamana, sa avatu o ia i luma o le Tupu sa Lamana o Lamonae. Sa ia tautino atu i le tupu, “o le a ou avea ma āu auauna.”11 Ina ua o mai le au osofai e gaoi mamoe a le tupu, sa tipi ese e Amona o latou lima. Sa maofa tele le tupu, sa ia faalogo atu i le savali a Amona e uiga i le talalelei ma sa liua ai.
O Ruta, i le Feagaiga Tuai, sa folafola atu i lona tina faaletulafono, “O le mea e te alu i ai, ou te alu ai foi.”12 Sa ia ola faamaoni i lana tautinoga. O le Samaria agalelei, i se faataoto i le Feagaiga Fou, sa folafola atu i le pule o le faletalimalo pe mafai ona ia tausia le tagata malaga ua manu’a, “Ai se mea e te toe faatau ai, ou te taui atu ia te oe pe a ou toe sau.”13 O Sorama i le Tusi a Mamona, sa folafola atu e alu i le vao faatasi ma Nifae ma ona uso. Sa ta’ua e Nifae, “Ina ua uma ona fai mai e Sorama se tautoga ia te i matou, sa uma lo matou popole e uiga ia te ia.”14
Ae a le folafolaga anamua “na faia i tama” e pei ona faamatalaina i tusitusiga paia e faapea “o le a liliu atu loto o fanau i o latou tama”?15 I le muai olaga ina ua tatou filifili le fuafuaga a le Atua, na tatou faia ai se folafolaga e fesoasoani atu ia faapotopoto Isaraelu i itu uma e lua o le veli. “Sa tatou faipaaga ma le Alii,” sa faamalamalama ai e Elder John A. Widtsoe i ni tausaga ua mavae. “O le faataunuuina o le fuafuaga sa le na o se galuega a le Tama, ma se galuega a le Faaola, ae o le tatou galuega foi.”16
“[O le] faapotopotoina o le mea aupito sili lea ona taua o loo tupu i le lalolagi i aso nei,” na saunoa ai Peresitene Nelson a o faimalaga atu ai o ia i le lalolagi. “Pe a tatou talanoa i le faapotopotoina, ua na ona tatou fai atu lava o lenei upumoni taua: o tagata uma o fanau a lo tatou Tama Faalelagi, i itu uma o le veli, e tatau ona faalogo i le savali o le talalelei toefuataiina a Iesu Keriso.”17
I le avea ai ma se Aposetolo a le Alii o Iesu Keriso, ou te faamaea atu i se valaaulia ma se folafolaga. Muamua, o le valaaulia: Ou te valaaulia outou ia mafaufau i folafolaga ma feagaiga ua outou osia ma le Alii, ma faatasi ai ma isi, ma le amiosa’o tele, ma le iloaina o le a outou savavali i a outou upu. Lua, ou te folafola atu ia te outou, a outou faia lenei mea, o le a faamautuina e le Alii a outou upu ma faapaiaina a outou galuega a o outou tauivi ai ma le filiga e le faavaivai e atiae o outou olaga, o outou aiga, ma Le Ekalesia a Iesu Keriso o le Au Paia o Aso e Gata Ai. O le a faatasi o Ia ma outou, o’u uso e ma tuafafine, ma e mafai ona outou vaai atu i luma, ma le talitonuga, o le a “talia [outou] i le lagi, ina ia mafai ona [outou] mau faatasi ma le Atua i se tulaga o le fiafia e le gata … ona ua fetalai mai ai le Alii le Atua.”18
Ou te molimau ma folafola atu ai nei mea, i le suafa o Iesu Keriso, amene.