Afafine Faapelepele

Saunia e Bonnie H. Cordon

Peresitene Aoao o Tamaitai Talavou

I le fatu o mea uma matou te faia i Tamaitai Talavou o lo matou naunau lea e fesoasoani atu ina ia outou maua le faatuatua mausali i le Alii o Iesu Keriso.

O’u uso pele e, o se fiafiaga le i ai faatasi ma outou! Ua tatou molimauina le anoanoai o faaaliga e le gata e tofotofoina ai le faaleagaga ae faagaeetiaina foi.

A o tatou amata, ou te fia faailoa atu outou i ni uo; o ni tamaitai talavou e tulaga ese i taleni, tu masani, ma tulaga faaletagata lava ia ma faaleaiga. E pei foi o outou uma, o i latou taitoatasi na ootia ai lo’u loto.

Muamua, feiloai ia Bella. E tu malosi o ia ona na o ia lava le tamaitai talavou i lana paranesi i Iselani.

Feiloai ia Josephine tuuto mai Aferika, o lē na toe tuuto atu e suesue le Tusi a Mamona i aso uma. Ua ia iloaina le mana ma faamanuiaga e oo mai i lenei faatinoga faigofie ma faamaoni.

Ma mulimuli, feiloai i la’u uo pele o Ashtyn, o se tamaitai talavou tulaga ese o lē na maliu i le mavae ai o se tauiviga ono-tausaga ma le kanesa. O lana molimau malosi i le Togiola a Iesu Keriso o loo lagonaina pea i lo’u loto.

O outou uma o ni tamaitai talavou ofoofogia. E tulaga ese outou, e tofu ma a outou lava meaalofa ma aafiaga ae e tutusa i se auala e sili ona taua ma faavavau.

O outou moni o afafine agaga a ni Matua Faalelagi, ma e leai se mea e mafai ona tuueseeseina outou mai lo La alofa ma le alofa o lo outou Faaola. A o outou faalatalata atili atu ia te Ia, e oo lava i le faia o ni tama’i laa i luma, o le a outou iloaina lava le filemu tumau e i ai i totonu o o outou agaga i le avea ai o se soo faamaoni a lo tatou Faaola, o Iesu Keriso.

Ua talosagaina a’u e Peresitene Russell M. Nelson, lo tatou perofeta pele, e faasoa atu nisi o suiga musuia o le a fesoasoani ia te oe e “atiae [lou] gafatia paia faaletagata lava ia” ma faateleina lau faatosinaga amiotonu. O le a ou talanoaina vaega e fa o le fetuunaiga i le po nei.

Autu a Tamaitai Talavou

Muamua, i le fatu o mea uma matou te faia i Tamaitai Talavou o lo matou naunau lea e fesoasoani atu ina ia outou maua le faatuatua mausali i le Alii o Iesu Keriso ma se malamalama mautinoa o lou faasinomaga paia o se afafine o le Atua.

I le po nei, ou te fia faasilasila atu se toe faafouga i le autu a Tamaitai Talavou. Ou te tatalo ina ia e lagona le molimau atu o le Agaga Paia i le moni o nei upu a o o’u fai atua le autu fou:

O a’u o se afafine faapelepele a ni matua faalelagi, e i ai se natura paia ma se taunuuga e faavavau.

I le avea ai ma se so’o o Iesu Keriso, ou te tauivi ina ia avea e faapei o Ia. Ou te saili atu ma faatino e tusa ma faaaliga faaletagata lava ia ma auauna atu i isi i Lona suafa paia.

O le a ou tu e avea ma se molimau a le Atua i taimi uma ma i mea uma ma i nofoaga uma.

A o ou tauivi e agavaa mo le faaeaga, ou te faatauaina le meaalofa o le salamo ma saili ia lelei atili i aso taitasi. I le faatuatua, o le a ou faamalosia ai lo’u aiga ma le auaiga, osia ma tausia feagaiga paia, ma maua ia sauniga ma faamanuiaga o le malumalu paia.

Ia matau le suiga mai le “matou” i le “a’u.” E faatatau upumoni nei ia te oe e toatasi. O oe o se afafine faapelepele a ni Matua Faalelagi. O oe o se so’o osifeagaiga a lo tatou Faaola, o Iesu Keriso. Ou te valaaulia oe ia suesue ma mafaufau loloto i nei upu. Ou te iloa a o e faia, o le a e maua se molimau i lo latou moni a’ia’i. O le malamalama i nei upumoni o le a suia ai le ala e te feagai ai ma luitau. O le iloaina o lou faasinomaga ma le faamoemoega o le a fesoasoani e te faaogatusa ai lou loto ma le finagalo o le Faaola.

O le a e mauaina le filemu ma le taitaiga pe a e mulimuli ia Iesu Keriso.

Vasega a Tamaitai Talavou

O le vaega lona lua o le suiga e aafia ai vasega a Tamaitai Talavou. Na saunoa mai Elder Neal A. Maxwell, “I le tele o taimi, o mea e sili ona manaomia e tagata o le toomaga mai i afa o le olaga i le malutaga o le auai ai.” O a tatou vasega e tatau ona avea ma malutaga mai i afa, o nofoaga malupuipuia ia o le alofa ma le auai ai. I se taumafaiga e fausia le lotogatasi sili atu, faamalosia o faigauo, ma le faateleina o lena lagona o le auai i totonu o Tamaitai Talavou, ua matou faia ai nisi o fetuunaiga i le faatulagaga o vasega.

Mo le silia ma le selau tausaga, sa vaevaeina ai tamaitai talavou i ni vasega se tolu. Matou te valaaulia taitai o Tamaitai Talavou ma epikopo ia amata nei loa ona mafaufau ma le agaga tatalo i manaoga o tamaitai talavou taitoatasi ma faatulaga loa i latou e tusa ai ma tulaga faapitoa o le uarota. O nisi nei o faataitaiga e ono foliga mai ai lenei mea:

• Afai e toalaiti au tamaitai talavou, e mafai ona tasi lau vasega o Tamaitai Talavou e fono faatasi ai tagata uma.

• Masalo o loo i ai sau vaega toatele o tamaitai talavou e 12 tausaga ma se vaega toalaiti o tamaitai talavou matutua atu. E mafai ona e filifili e fai ni vasega se lua: Tamaitai Talavou 12 ma Tamaitai Talavou 13–18.

• Pe afai foi e toatele le tou uarota e 60 tamaitai talavou e auai ai, e mafai ona i ai ni tou vasega se ono, e tasi mo vaitausaga taitasi, e faatulaga i tausaga.

Po o le a lava le faatulagaga o tou vasega, e taua outou tamaitai talavou i le fausiaina o le lotogatasi. Ia avea ma se malamalama ia i latou o siomia oe. Ia avea ma puna o le alofa ma le tausiga o loo e faamoemoe e maua mai i isi. Faatasi ai ma se tatalo i lou loto, ia faaauau pea ona aapa atu ma avea ma lena faatosinaga mo le lelei. A o e faia lea mea, o le a faatumulia lou olaga i le agalelei. O le a e maua se lagona lelei atu i isi ma o le a amata ona vaai i lo latou lelei e faaali mai.

Igoa o Vasega a Tamaitai Talavou

Tolu, faatasi ai ma lenei faatulagaga fou o vasega, o le a ta’ua vasega uma i le igoa laugatasia o “Tamaitai Talavou.” O le a tatou faamutaina le faaaogaina o igoa “Ofagapi,” “Maea Meite,” ma le “Lora.”

Faamalosia o Au Peresitene o Vasega

O le vaega mulimuli ou te fia tautalagia o le taua o au peresitene o vasega. E tusa lava pe o le a le faatulagaga o vasega a Tamaitai Talavou, e tatau i vasega taitasi ona i ai se au peresitene o le vasega! E ala i le mamanu paia ua valaauina ai tamaitai talavou e taitai i lo latou talavou.

O le matafaioi ma le faamoemoega o se au peresitene o se vasega ua faamalosia ma manino atili lona faauigaga. O le galuega o le faaolataga o se tasi lea o nei tiutetauave taua, aemaise lava i vaega o le auaunaga, galuega faafaifeautalai, toefaatoagaina mai, ma galuega o le malumalu ma talafaasolopito o aiga. Ioe, o le ala lenei tatou te faapotopoto ai Isaraelu—o se galuega mamalu mo tamaitai talavou uma o ni tagata o le autau talavou a le Alii.

E pei ona tou silafia, i tulaga uma lava o le Ekalesia, e valaauina e le Alii au peresitene e taitai Lona nuu. Tamaitai Talavou, o le avea ma se sui o le au peresitene o se vasega atonu o lou avanoa muamua lea e auai ai i lenei mamanu musuia o le taitaiga. Taitai matutua, ia avea le valaauina o au peresitene o vasega ma se faamuamua ona taitai soosoo tauau lea faatasi ma i latou, faufautua ma taiala i latou ina ia latou manuia. Po o a lava tulaga o le atamai faaletaitaiga o i ai i se au peresitene o se vasega, ia amata i le mea o loo latou i ai ma fesoasoani ia i latou e atiae ni tomai ma le talitonuga o le a faamanuiaina ai i latou o ni taitai. Faalatalata atu ia i latou, ae ‘aua nei e puleaina. O le a taiala oe e le Agaga a o e taialaina i latou.

Ina ia faailoa atu le matafaioi taua a matua ma taitai i le avea ai ma ni faufautua, sei ou faamatala atu ia te outou se tala. Sa valaauina Chloe e auauna atu o se peresitene o le vasega. Sa uunaia o ia e lona taitai perisitua atamai e saili i le fesoasoaniga a le Alii i le fautuaina mai o ni igoa mo lona au peresitene. Sa tatalo Chloe ma vave ona maua musumusuga po o ai e fautua atu e avea ma ona fesoasoani. A o faaauau ona ia mafaufau loloto ma tatalo e uiga i se failautusi, sa faataulai atu pea e le Agaga lana taulaiga i se tamaitai talavou o le na faateia ai o ia—o se tasi na seāseā sau i le lotu po o gaoioiga.

I le lagona ai o le lē mautonu i le uunaiga, sa talanoa ai Chloe i lona tina, o lē na faamatala atu o se tasi o auala e mafai ona tatou maua ai faaaliga e ala lea i mafaufauga e oo mai pea. Faatasi ai ma se talitonuga ua toe faafouina, sa lagona ai e Chloe le mafai ona ia fautuaina atu lenei tamaitai talavou. Na tuuina atu e le epikopo le valaauga, ma sa taliaina e le tamaitai talavou. I le mavae ai o le vaetofiaina, na faapea mai lenei failautusi lelei, “Tou te iloa, ou te le’i lagona lava e pei na i ai so’u nofoaga pe sa manaomia a’u i soo se mea. Ou te le’i lagona lo’u fetaui i ai. Ae o lenei valaauga, ua ou lagona ai e pei o loo i ai i le Tama Faalelagi se faamoemoega ma se nofoaga mo a’u.” A o tuua e Chloe ma lona tina le sauniga, sa liliu atu Chloe i lona tina ma fai atu ma ona loimata, “E moni lava Faaaliga! E aoga moni lava faaaliga!”

Au peresitene o vasega, ua valaauina ma faatuatuaina outou e le Atua e taitai se vaega o Ona afafine. “E silafia outou e le Alii. … Na Ia filifilia outou.” Ua vaetofiaina outou e se tasi o loo i ai le pule o le perisitua; o lona uiga a o e faatinoina tiute o lou valaauga, o loo e faaaogaina le pule o le perisitua. Ua i ai se tou galuega taua e fai. Ia nofouta ma galue e tusa ma musumusuga a le Agaga Paia. A o outou faia, e mafai ona outou auauna atu ma le talitonuga, auā tou te le galulue na o outou!

Peresitene o vasega, matou te manaomia lo outou atamai, leo, ma le malosi i le aufono fou a le autalavou a le uarota lea na fofogaina e Elder Quentin L. Cook i le asō. O outou o se vaega taua o le vaifofo i le taulimaina o manaoga a ō outou tuagane ma uso.

O nei suiga i faatulagaga o vasega ma le taitaiga e mafai ona amata i le taimi lava e saunia ai uarota ma paranesi ae e tatau ona oo atu i le aso 1 o Ianuari, 2020 ua faatulagaina.

O’u uso pele, ou te molimau atu o nei fetuunaiga na ou ta’ua i le asō o faatonuga musuia ia mai le Alii. A o tatou faatinoina ma le filiga nei fetuunaiga, ‘aua ne’i see ese lo tatou taulaiga mai lo tatou faamoemoega: ina ia faamalosia ai lo tatou naunautaiga e mulimuli ia Iesu Keriso ma fesoasoani i isi ia o mai ia te Ia. Ou te molimau atu o Lana Ekalesia lenei. E maeu loʻu faafetai ona ua Ia faatagaina i tatou e avea o se vaega sili ona taua o Lana galuega paia.

Ou te tatalo i le Agaga lava e tasi na taialaina nei fetuunaiga o le a taialaina outou a o outou fetaomi atu i luma i luga o le ala o feagaiga. Ou te molimau atu ai i le suafa o Iesu Keriso, amene.

Faamatalaga

1. Tagai i le Roma 8:35–39.

2. Russell M. Nelson, “O Molimau, Korama a le Perisitua Arona, ma Vasega a Tamaitai Talavou,” Liahona, Nov. 2019, 39.

3. Tagai i le Faataoto 3:5–7; Iakopo 7:5.

4. Tagai i le Roma 8:16–17; Mataupu Faavae ma Feagaiga 76:24; “O Le Aiga: O Se Folafolaga i le Lalolagi,” Liahona, Me 2017, 145.

5. Tagai i le 2 Peteru 1:3–4; Alema 37:44; Mataupu Faavae ma Feagaiga 78:18; “O Le Aiga: O Se Folafolaga i le Lalolagi.”

6. Tagai i le Ioane 13:14–15, 35.

7. Tagai i le Mataio 22:37–39; 25:40; 3 Nifae 12:48.

8. Tagai i le Ioane 16:13; 3 Nifae 14:7–8; Moronae 7:13; 10:5; Mataupu Faavae ma Feagaiga 8:2; 9:8; 11:13.

9. Tagai i le Mataio 20:26–28; 22:37–39; 25:34–40; 3 Nifae 26:19.

10. Tagai i le Isaia 43:10; Mosaea 18:9; Mataupu Faavae ma Feagaiga 14:8.

11. Tagai i le Roma 8:17; 2 Nifae 9:18; 31:20; Mataupu Faavae ma Feagaiga 84:38; 132:49; Mose 1:39.

12. Tagai i le Helamana 12:23; Moronae 10:33; Mataupu Faavae ma Feagaiga 58:42.

13. Tagai i le Alema 34:33; Mataupu Faavae ma Feagaiga 82:18.

14. Tagai i le Eperu 11; 2 Nifae 31:19–20; Alema 32:21.

15. Tagai i le Iosua 24:15; Mataupu Faavae ma Feagaiga 109:8; 132:19.

16. Tagai i le Esoto 19:5; 1 Nifae 14:14; 2 Nifae 11:5; Mataupu Faavae ma Feagaiga 54:6; 66:2; 90:24.

17. Tagai i le Mosaea 13:30; Alema 30:3; Mataupu Faavae ma Feagaiga 84:20–22; Mataupu Faavae o le Faatuatua 1:3.

18. Tagai i le Salamo 24:3; Isaia 2:3; Esekielu 37:26.

19. Neal A. Maxwell, All These Things Shall Give Thee Experience (1979), 55.

20. E tatau ona faasino atu i vasega i le faalagiga laugatasia o “Tamaitai Talavou.” Ina ia faailoa se vasega faapitoa, e aofia ai le tausaga—mo se faataitaiga, “Tamaitai Talavou 12–14”; “Tamaitai Talavou 15–18” (tagai i le Tusitaulima 2: Taitaiina o le Ekalesia, 10.1.5, ChurchofJesusChrist.org).

21. E tatau ona valaauina se au peresitene o se vasega mo vasega taitasi a Tamaitai Talavou. I nofoaga e mafai ai, e tatau ona valaauina se au peresitene atoa, o se peresitene, fesoasoani e toalua, ma se failautusi. Afai e manaomia, e mafai ona valaauina se vaega o le au peresitene (tagai i le Tusitaulima 2, 10.3.5).

22. Tagai i le Tusitaulima 2, 10.3.5.

23. Tagai ia Russell M. Nelson “Faamoemoe o Isaraelu” (faigalotu a le autalavou i le lalolagi atoa, Iuni 3, 2018), HopeofIsrael.ChurchofJesusChrist.org.

24. O faatonuga faaopoopo o loo maua mo taitai matutua o Tamaitai Talavou i le Tusitaulima 2, mataupu e 10.

25. Henry B. Eyring, “Tulai i Lou Valaauga,” Liahona, Nov. 2002, 76.

26. Afai e na o le tasi la outou vasega ma e tasi le au peresitene o le vasega, e mafai e le au peresitene atoa ona auai i le aufono a le autalavou a le uarota faatasi ma peresitene o korama o le Perisitua Arona ina ia i ai le paleni o tamaitai talavou ma alii talavou (tagai i le Tusitaulima 2, 18.2.9).