E mau tamāhine herehia

Nā te tuahine Bonnie H. Cordon

Peresideni rahi nō te Feiā ’Āpī Tamāhine

I te pū o te mau mea ato’a tā tātou e rave i te Feiā ’Āpī Tamāhine, ’o te hina’aro ïa e tauturu ia ’outou ’ia noa’a te fa’aro’o ’āueue ’ore i te Fatu Iesu Mesia.

E au mau tuahine here ē, e ’oa’oa iti rahi te putuputura’a i rotopū ia ’outou. Tē ’ite nei tātou i te mani’ira’a rahi o te heheura’a, e mea teimaha nō te vārua, e mea fa’a’ana’anatae rā.

Tē ha’amata nei tātou ’e tē hina’aro nei au e fa’a’ite ia ’outou i te tahi mau hoa ; e mau tamāhine ma te tārēni hō’ē roa ’e te peu hō’ē roa, ’e te vaira’a hō’ē roa ’ei ta’ata hō’ē ’e ’ei ’utuāfare. ’Ua poihere roa vau ia rātou tāta’itahi, mai tā’u i poihere ia ’outou pā’āto’a.

Nā mua, ’o Bella. E mea itoito roa ’oia, ’o ’oia ana’e te tamāhine i roto i tāna ’āma’a i ’Itirane.

Teie ’o Josephine nō Afirika, tei pūpū fa’ahou iāna i te tuatāpapara’a i te Buka a Moromona i te mau mahana ato’a. Tē ’ite nei ’oia i te mana ’e te mau ha’amaita’ira’a nō teie ’ohipa ’ōhie ’e te ha’apa’o maita’i.

’E teie tō’u hoa iti ’o Ashtyn, e tamāhine fa’ahiahia mau tei fa’aru’e mai i muri mai e ono matahiti ’arora’a i te ma’i mariri ’aita’ata. Tē pīna’ina’i noa nei tōna ’itera’a pāpū pūai nō te tāra’ehara a Iesu Mesia i roto i tō’u ’ā’au.

E mau tamāhine fa’ahiahia ana’e ’outou. E mea ta’a ’ē ’outou tāta’itahi, terā tamāhine ’e terā tamāhine tāna mau hōro’a ’e te mau ’ohipa i tupu, hō’ē ā rā huru ’outou ’ia hi’ohia te faufa’a rahi ’e te faufa’a mure ’ore.

E tamāhine vārua mau ’outou nō nā metua i te ra’i, ’aita ho’i e mea e nehenehe e fa’ata’a ’ē ia ’outou i tō rātou here ’e te here o te Fa’aora.¹ ’A ha’afātata ai ’outou iāna, noa atu ā e nu’ura’a na’ina’i roa mai te pēpe, e ’ite mai ’outou i te hau vai maoro i te pārahira’a i roto i tō ’outou vārua ’ei pipi ha’apa’o maita’i nā tō tātou Fa’aora, ’o Iesu Mesia.

’Ua ani mai te peresideni Russell M. Nelson, tō tātou peropheta here, ’iā’u ’ia fa’a’ite atu i te mau tauira’a fa’auru ’o tē tauturu ia ’outou ’ia « fa’atupu i [tō ’outou] fāito pūai mo’a »² ’e ia fa’arahi i tā ’outou fa’aurura’a nō te parau ti’a. E paraparau vau nō ni’a e maha vāhi e fa’atanora’a i teie pō.

Te parau tai’o a te Feiā ’Āpī Tamāhine

’A tahi, i te pū o te mau mea ato’a tā tātou e rave i te Feiā ’Āpī Tamāhine, ’o te hina’aro ïa e tauturu ia ’outou ’ia noa’a te fa’aro’o ’āueue ’ore i te Fatu Iesu Mesia³ nā reira ato’a te ’ite pāpū nō ni’a i tō ’outou hīro’a hanahana ’ei tamāhine nā te Atua.

I teie pō, tē hina’aro nei au e fa’aara i te hō’ē tauira’a i ni’a i te parau tai’o a te Feiā ’Āpī Tamāhine. Tē pure nei au ’ia putapū ’outou i te Vārua Maita’i i te fa’a’itera’a ia ’outou i te parau mau o teie mau parau tā’u e fa’ahiti atu nō te parau tai’o ’āpī :

E tamāhine herehia vau e nā metua i te ra’i ra,⁴ ma te nātura hanahana ’e te hope’a mure ’ore.⁵

’Ei pipi nā Iesu Mesia,⁶ tē tūtava nei au ’ia riro mai iāna ra te huru.⁷ Tē ’imi nei au ’e tē rave nei au mai te au i te heheura’a e tae mai iā’u nei⁸ ’e tē aupuru nei au ia vetahi ’ē nā roto i tōna i’oa mo’a.⁹

E ti’a atu vau ’ei ’ite nā te Atua i te mau taime ato’a ’e i roto i te mau mea ato’a ’e i te mau vāhi ato’a.¹⁰

’A tūtava ai au ’ia noa’a te fa’ate’iteira’a,¹¹ e poihere au i te hōro’a nō te tātarahapa¹² ’e e ’imi au i te ha’amaita’i iā’u i te mahana tāta’itahi.¹³ Ma te fa’aro’o,¹⁴ e ha’apūai au i tō’u ’utuāfare ’e tō’u mau fēti’i,¹⁵ e rave au i te mau fafaura’a mo’a ’e e ha’apa’o vau i te reira,¹⁶ ’e e fāri’i au i te mau ’ōro’a¹⁷ ’e i te mau ha’amaita’ira’a o te hiero mo’a.¹⁸

Tē ’ite nei tātou i te tauira’ahia te « mātou » ’ei « vau ». E tano teie mau parau mau i te ta’ata hō’ē. E tamāhine herehia ’outou nō nā metua i te ra’i. E pipi nō te fafaura’a ’outou nā tō tātou Fa’aora, ’o Iesu Mesia. Tē ani manihini nei au ia ’outou ’ia tuatāpapa ’e ’ia feruri i teie mau parau. ’Ua ’ite au ē, ’ia nā reira ’outou, e noa’a mai tō ’outou ’itera’a pāpū nō te parau mau o te reira. ’Ia māramarama ’outou i teie mau parau mau, e taui te huru ’outou e fa’aruru i te mau fifi. E tauturu te ’itera’a i tō ’outou hīro’a ’e te fā i te fa’atū’ati i tō ’outou hina’aro i ni’a i tō te Fa’aora.

E noa’a ia ’outou te hau ’e te arata’ira’a ’a pe’e ai ’outou ia Iesu Mesia.

Te mau piha Feiā ’Āpī Tamāhine

Te piti o te vāhi e tauihia, ’o te mau piha Feiā ’Āpī Tamāhine ïa. ’Ua parau Elder Neal A. Maxwell : « E mea pinepine roa te mea tā te ta’ata e hina’aro roa nei, ’o te ha’apūra’a nō te mau vero o te orara’a, i roto i te vāhi mo’a ra nō te tā’amura’a ».¹⁹ E mea tītauhia ’ia riro tō tātou mau piha tamāhine ’ei vāhi mo’a e pāruru ia rātou i te mau vero, e mau vāhi pāpū nō te here ’e te tā’amura’a. I roto i te tauto’ora’a e patu i te tāhō’ē rahi a’e, e ha’apūai i te hoara’a ’e e ha’amaita’i i terā mana’o tā’amura’a i roto i te Feiā ’Āpī Tamāhine, tē rave nei mātou i te tahi mau fa’atanora’a i ni’a i te fa’anahora’a o te piha tamāhine.

’Ua hau i te hānere matahiti tō te feiā ’āpī tamāhine fa’ata’ara’ahia ’ei toru piha tamāhine. Mai teie taime atu, tē ani nei mātou i te feiā fa’atere Feiā ’Āpī Tamāhine, nā reira ato’a te mau ’episekōpo, ’ia feruri nā roto i te pure i te mau hina’aro o te tamāhine tāta’itahi ma te fa’anaho ia rātou mai te au i te vaira’a ta’a ’ē o te pāroita. Teie te tahi hi’ora’a nō te reira.

• Mai te mea ’aita i rahi te feiā ’āpī tamāhine, e nehenehe ’outou e fa’anaho i te hō’ē noa piha Feiā ’Āpī Tamāhine tei roto rātou pauroa.

• Penei a’e ’ua rahi roa te mau tamāhine 12 matahiti ’e e mea iti a’e te mau matahiti i ni’a atu. E nehenehe ’outou e fa’aoti e fa’anaho e piti piha tamāhine : te Feiā ’Āpī Tamāhine 12 matahiti ’e te Feiā ’Āpī Tamāhine 13–18 matahiti.

• ’Aore rā mai te mea e pāroita rahi tō ’outou ’e e 60 tamāhine e tae mai nei, e nehenehe ’outou e fa’anaho e ono piha tamāhine, hō’ē piha hō’ē fāito matahiti.

’Ātīrā ïa, ’ua nahonaho tā ’outou mau piha tamāhine, e mea faufa’a ’outou te feiā ’āpī tamāhine nō te ora ’e nō te patura’a i te tāhō’ē. ’Ia riro ’outou ’ei māramarama nō te feiā ’ati a’e ia ’outou. ’Ia riro ’outou nō vetahi ’ē ’ei puna here ’e te ’atu’atu ’o tā ’outou iho e hina’aro e fāri’i. Ma te pure i te ’ā’au, ’a tāmau noa i te toro i te rima ’e ’ia riro i terā pūai nō te maita’i. ’A nā reira ai ’outou, e ’ī roa tō ’outou orara’a i te hāmani maita’i. E noa’a mai tō ’outou mana’o maita’i nō vetahi ’ē ’e e ’ite ato’a mai ïa ’outou i tō rātou maita’i.

Te i’oa nō te piha Feiā ’Āpī Tamāhine

Te toru, nā roto i teie fa’anahora’a piha tamāhine ’āpī, e parauhia te mau piha tamāhine ato’a i te hō’ē noa i’oa, ’oia ho’i « Te Feiā ’Āpī Tamāhine ».²⁰ E tātarahia te mau i’oa Debure (Abeille), Roti (Eglantine) ’e Tarona (Lauréole).

Ha’apūai i te mau peresidenira’a piha tamāhine

Te vāhi hope’a tā’u i hina’aro e paraparau, ’o te faufa’a rahi ïa o te mau peresidenira’a piha tamāhine. Ta’a ’ē noa atu te fa’anahora’a e tāpe’ahia nō te mau piha Feiā ’Āpī Tamāhine, e pi’ihia te hō’ē peresidenira’a nō te piha tamāhine tāta’itahi !²¹ E ’ōpuara’a nā te Atua ’ia pi’ihia te feiā ’āpī tamāhine ’ia fa’atere i tō rātou ’āpīra’a.

’Ua ha’apūaihia te ’ohipa ’e te fā nō te mau peresidenira’a piha tamāhine, ’e ’ua ha’apāpūhia te reira. ’O te ’ohipa nō te fa’aorara’a te hō’ē o teie mau hōpoi’a rahi, i roto iho ā rā i te aupurura’a, te ’ohipa misiōnare, te fa’aitoitora’a ’e te ’ohipa hiero ’e te ’ā’amu ’utuāfare.²² ’Oia mau, e mea nā reira tātou e ha’aputuputu ai ia ’Īserā’ela²³—e ’ohipa hanahana te reira nō te tā’āto’ara’a o te feiā ’āpī tamāhine ’ei melo nō te nu’u feiā ’āpī a te Fatu.

Mai tā ’outou i ’ite, i roto i te mau tuha’a ato’a o te ’Ēkālesia, tē pi’i nei te Fatu i te mau peresidenira’a nō te fa’atere i tōna mau ta’ata. ’Outou te feiā ’āpī tamāhine, e nehenehe te ti’ara’a melo nō te hō’ē peresidenira’a piha tamāhine ’ia riro i tō ’outou taime mātāmua nō te ’āmui i roto i teie fa’anahora’a fa’aterera’a fa’auru. ’Outou te feiā fa’atere ta’ata pa’ari, ’a hi’o i te pi’ira’a i te mau peresidenira’a piha tamāhine ’ei ’ohipa mātāmua roa nō ’outou ’ei reira e fa’atere atu ai i pīha’i iho ia rātou, ma te fa’aa’o ’e ma te arata’i ia rātou i te manuiara’a.²⁴ Ta’a ’ē noa atu te ’aravihi fa’aterera’a o terā ’e terā peresidenira’a piha tamāhine, ’a ha’amata i te vāhi tei reira rātou ’e ’a tauturu ia rātou ’ia ha’amaita’i i tō rātou ’aravihi ’e te ti’aturi, ’o tē ha’amaita’i ia rātou ’ei feiā fa’atere. Tāpiri ia rātou, ’eiaha rā e haru mai i te fa’aterera’a. E arata’i te Vārua ia ’outou ’a arata’i ai ’outou ia rātou.

’Ei fa’ahōho’ara’a i te ’ohipa faufa’a rahi o te metua ’e te feiā fa’atere ’ei fa’aa’o (mentor), e fa’ati’a atu vau i te hō’ē ’ā’amu. ’Ua pi’ihia Chloe ’ei peresideni piha tamāhine. ’Ua fa’aitoito tōna ti’a fa’atere autahu’ara’a iāna ’ia ’imi i te tauturu a te Fatu nō te tu’u mai i te mau i’oa nō tāna peresidenira’a. ’Ua pure ’o Chloe ’e ’ua fāri’i ’oia i te fa’aurura’a nō te mau tamāhine e pi’i ’ei tauturu nōna, e mea huru vitiviti. ’Ua tāmau ’oia i te feruri ’e i te pure nō te hō’ē pāpa’i parau, ’e ’ua fa’aho’i fa’ahou ’e fa’ahou ā te Vārua i tōna mana’o i ni’a i te hō’ē tamāhine tāna i māere—e tamāhine e tae varavara nei i te purera’a ’e i te mau ’ohipa ri’i.

Nō tōna hepohepo ri’i i teie muhumuhu, ’ua paraparau ’o Chloe i tōna metua vahine tei fa’ata’a iāna ē, hō’ē rāve’a tātou e fāri’i nei i te heheura’a, ’o te mau mana’o ïa e ho’i noa mai. ’Ua noa’a fa’ahou mai tōna ti’aturi, ’e ’ua hau te mana’o o Chloe nō te tu’ura’a i te i’oa o terā tamāhine. ’Ua vauvau te ’episekōpo i te pi’ira’a i terā tamāhine, ’e ’ua fāri’i ’oia. I muri mai i te fa’ata’ara’a, ’ua nā ’ō teie pāpa’i parau iti ē : « ’Ua ’ite ’outou, ’aita vau i mana’o a’enei tē vai ra te pārahira’a nō’u ’e ’ua hina’arohia vau i te hō’ē vāhi. ’Aita a’enei tō’u mana’o tū’ati i te hō’ē vāhi. I teie rā pi’ira’a, ’ua tae mai te mana’o ē, e fā ’e e vāhi tā te Metua i te Ao ra nō’u ». I te fa’aru’era’a Chloe ’e tōna metua vahine i terā rurura’a, ’ua fāriu Chloe i ni’a i tōna metua vahine ma te roimata ’a nā ’ō ai : « E parau pāpū te heheura’a ! Tē vai nei te heheura’a ! »

’Outou te mau peresidenira’a piha tamāhine, ’ua pi’ihia ’outou e te Atua ’e ’ua ti’aturihia ’outou nō te fa’atere i te hō’ē pupu o tāna mau tamāhine. « ’Ua ’ite te Fatu ia ’outou… Nāna i mā’iti ia ’outou ».²⁵ ’Ua fa’ata’ahia ’outou e te hō’ē ta’ata tei mau i te mana o te autahu’ara’a ; te aura’a ra, ’ia rave ’outou i te mau hōpoi’a o tā ’outou pi’ira’a, tē fa’a’ohipa nei ’outou i te mana o te autahu’ara’a. E ’ohipa faufa’a rahi e tīa’i ra ia ’outou. ’A vai ara i te Vārua Maita’i ’e ’a ’ohipa mai te au i tāna mau muhumuhu. ’A nā reira ai ’outou, ’a tāvini ma te ti’aturi inaha, ’aita ’outou e tāvini ’ōtahi nei.

E te mau peresideni piha tamāhine, tītauhia tō ’outou mana’o pa’ari, te reo ’e te ito i roto i te ’āpo’ora’a feiā ’āpī pāroita tā Elder Quentin L. Cook i fa’aara ’āpī i teie mahana. E tuha’a faufa’a rahi ’outou nō te pāhonora’a i te mau hina’aro o tō ’outou mau taea’e ’e mau tuahine.²⁶

E ha’amata teie mau tauira’a nō ni’a i te fa’anahora’a ’e te fa’aterera’a piha tamāhine i te taime ra iho ā e ineine te mau pāroita ’e te mau ’āma’a, ’eiaha rā ’ia ma’iri atu i te 1 nō Tēnuare 2020.

E au mau tuahine, tē hōro’a nei au i tō’u ’itera’a pāpū ē, e mau arata’ira’a fa’auruhia e te Fatu teie mau fa’atanora’a tā’u i paraparau i teie mahana. ’A rave itoito ai tātou i teie mau fa’atanora’a, ’eiaha roa atu ’ia mo’e ia tātou i tā tātou fā : e ha’apūai i tā tātou fa’aotira’a e pe’e ia Iesu Mesia ’e e tauturu ia vetahi ’ē ’ia haere iāna. ’Ua ’ite au ē ’o teie tāna ’Ēkālesia. ’Auē tō’u māuruuru rahi i te mea ē, tē fa’ati’a nei ’oia ia tātou ’ia riro ’ei tuha’a faufa’a rahi nō tāna ’ohipa mo’a.

Tē pure nei au ’ia arata’i ato’a te Vārua i arata’i i teie mau fa’atanora’a ia ’outou ’a haere ai ’outou i mua i ni’a i te ’ē’a nō te fafaura’a. Tē fa’a’ite pāpū nei au i te reira nā roto i te i’oa o Iesu Mesia, ’āmene.

Fa’ata’ara’a

1. Hi’o Roma 8:35–39.

2. Russell M. Nelson, « Mau ’ite, mau pupu Autahu’ara’a a Aarona, ’e mau piha Feiā ’Āpī Tamāhine », Liahona, Novema 2019, 39.

3. Hi’o Maseli 3:5–7 ; Iakoba 7:5.

4. Hi’o Roma 8:16–17 ; Te Parau Ha’api’ira’a ’e te mau Parau Fafau 76:24 ; « Te ’utuāfare : E Poro’i i tō te Ao nei », Liahona, Mē 2017, 145.

5. Hi’o 2 Petero 1:3–4 ; Alama 37:44 ; Te Parau Ha’api’ira’a ’e te mau Parau Fafau ; « Te ’utuāfare : E Poro’i i tō te Ao nei ».

6. Hi’o Ioane 13:14–15, 35.

7. Hi’o Mataio 22:37–39 ; 25:40 ; 3 Nephi 12:48.

8. Hi’o Ioane 16:13 ; 3 Nephi 14:7–8 ; Moroni 7:13 ; 10:5 ; Te Parau Ha’api’ira’a ’e te mau Parau Fafau 8:2 ; 9:8 ; 11:13.

9. Hi’o Mataio 20:26–28 ; 22:37–39 ; 25:34–40 ; 3 Nephi 26:19.

10. Hi’o Isaia 43:10 ; Mosia 18:9 ; Te Parau Ha’api’ira’a ’e te mau Parau Fafau 14:8.

11. Hi’o Roma 8:17 ; 2 Nephi 9:18 ; 31:20 ; Te Parau Ha’api’ira’a ’e te mau Parau Fafau 84:38 ; 132:49 ; Mose 1:39.

12. Hi’o Helamana 12:23 ; Moroni 10:33 ; Te Parau Ha’api’ira’a ’e te mau Parau Fafau 58:42.

13. Hi’o Alama 34:33 ; Te Parau Ha’api’ira’a ’e te mau Parau Fafau 82:18.

14. Hi’o Hebera 11 ; 2 Nephi 31:19–20 ; Alama 32:21.

15. Hi’o Iosua 24:15 ; Te Parau Ha’api’ira’a ’e te mau Parau Fafau 109:8 ; 132:19.

16. Hi’o Exodo 19:5 ; 1 Nephi 14:14 ; 2 Nephi 11:5 ; Te Parau Ha’api’ira’a ’e te mau Parau Fafau 54:6 ; 66:2 ; 90:24.

17. Hi’o Mosia 13:30 ; Alama 30:3 ; Te Parau Ha’api’ira’a ’e te mau Parau Fafau 84:20–22 ; Hīro’a fa’aro’o 1:3.

18. Hi’o Salamo 24:3 ; Isaia 2:3 ; Ezekiela 37:26.

19. Neal A. Maxwell, All These Things Shall Give Thee Experience (1979), 55.

20. E parauhia te mau piha tamāhine ato’a i te hō’ē noa i’oa, ’oia ho’i « Te Feiā ’Āpī Tamāhine ». Nō te fa’ata’a i te piha tamāhine, e tu’u i te matahiti—’ei hi’ora’a, « Feiā ’Āpī Tamāhine12–14 » ; « Feiā ’Āpī Tamāhine 15–18 » (hi’o Buka arata’i 2: Fa’atere i te ’Ēkālesia, 10.1.5, ChurchofJesusChrist.org).

21. E pi’ihia te hō’ē peresidenira’a piha tamāhine nō te piha Feiā ’Āpī Tamāhine tāta’itahi. Mai te mea e nehenehe, e pi’ihia te tā’āto’ara’a o te peresidenira’a, ma te hō’ē peresideni, e piti tauturu ’e hō’ē pāpa’i parau. Mai te mea e tītauhia e pi’ihia te hō’ē pae o te peresidenira’a (hi’o Buka arata’i 2, 10.3.5).

22. Hi’o Buka arata’i 2, 10.3.5.

23. Hi’o Russell M. Nelson « Ti’aturira’a nō Ziona » (purera’a nā te feiā ’āpī ’ati a’e i te ao nei, 3 nō Tiunu 2018), HopeofIsrael.ChurchofJesusChrist.org.

24. Tē vai nei te tahi atu ā arata’ira’a nō te feiā fa’atere ta’ata pa’ari o te Feiā ’Āpī Tamāhine i roto i te Buka arata’i 2, pene 10.

25. Henry B. Eyring, « Rise to Your Call », Liahona, Nov. 2002, 76.

26. Mai te mea hō’ē ana’e tā ’outou piha tamāhine ’e hō’ē peresidenira’a piha tamāhine, e nehenehe te tā’āto’ara’a o te peresidenira’a e haere mai i te ’āpo’ora’a feiā ’āpī pāroita ’e te mau peresideni pupu Autahu’ara’a a Aarona, e mea ’aifāito ïa te rahira’a feiā ’āpī tamāhine ’e te rahira’a feiā ’āpī tamāroa (Buka arata’i 2, 18.2.9).