O Le A Faia e le Atua se Mea E Le’i Mafaufauina

Konafesi Aoao ia Oketopa 2020

15:17

O Le A Faia e le Atua se Mea E Le’i Mafaufauina

Saunia e Elder Dieter F. Uchtdorf

O Le Korama a Aposetolo e Toasefululua

Ua saunia e le Atua Lana fanau ma Lana Ekalesia mo lenei taimi.

E le’i umi ona taunuu i le Vanu o Sate Leki, ae amata fausia e le Au Paia o Aso e Gata Ai se malumalu paia. Sa latou lagona ua i’u ina latou maua se nofoaga na mafai ona latou tapuai ai i le Atua i le filemu ma saoloto mai sauaga.

Ae peitai, na toeitiiti lava a mae’a le faavae o le malumalu, ae oo atu loa ni fitafita o le vaega’au a le Iunaite Setete e faatu faamalosi se kovana fou.

Ona sa le’i silafia e taitai o le Ekalesia pe o le a faape’i le saua o vaega’au, o lea na faatonuina ai e Polika Iaga le Au Paia e o ese mai ae tanu le faavae o le malumalu.

Ou te mautinoa na tuufesili nisi o tagata o le Ekalesia pe aisea na faalavelaveina soo ai a latou taumafaiga e fausia le malo o le Atua.

Mulimuli ane, na te’a ese lamatiaga, ma na toe laga a’e faavae o le malumalu ma asiasia. O le taimi lena na iloa ai e le au faufale paionia, o le tele o maa asuemu sa i ai muamua na ta’eta’ei, na faapea ona le talafeagai ai e fai ma faavae.

O le mea lea, na suitulaga ai i latou e Polika i alā tetele o foaga, ma lava le malosi e lagolago ai¹ puipui mata’ina o le Malumalu o Sate Leki.² Mulimuli ane, na mafai e le Au Paia ona pepese i le viiga “Le Faavae Malosi”³ ma le iloa sa fausia lo latou malumalu paia i luga o se faavae mausali o le a tumau mo ni augatupulaga se tele.

O lenei tala e mafai ona aoao ai i tatou i le ala e faaaoga ai e le Atua ia faigata e faataunuu ai Ona faamoemoega.

O Se Faama’i Pipisi i le Lalolagi Atoa

Afai ua masani i lenei mea ona o tulaga ua tatou oo i ai i nei aso, ia o lena lava.

Ou te masalo e leai se tagata o lagona mai lo’u leo pe faitau i a’u upu e le’i aafia i le faama’i ua pipisi i le lalolagi atoa.

Ia i latou o faanoanoa ona o le maliliu ai o aiga ma uo, matou te faanoanoa faatasi ma outou. Matou te aioi atu i le Tama Faalelagi e faamafanafana ma faala’ei’au ia te outou.

O taunuuga umi o lenei vairasi e tele atu mea e aafia ai nai lo na’o le soifua maloloina faaletino. E tele aiga ua leai ni tupemaua ma ua faamata’uina i le fia’a’ai, lē mautonu, ma le atuatuvale. Matou te faamemelo i taumafaiga lē manatu faapito a le toatele ia puipuia le salalau atu o lenei faama’i. E faalotomaulaloina i matou i osigataulaga lē leoa ma taumafaiga faatamalii a i latou o ē ua lamatia o latou lava saogalemu e fesoasoani, faamalolo, ma lagolago ai tagata o loo manaomia le fesoasoani. Ua tutumu o matou loto i le faafetai mo lo outou agalelei ma le agaalofa.

Matou te tatalo malosi ia tatala e le Atua ia pupuni o le lagi ma faatutumu o outou olaga i faamanuiaga e faavavau a le Atua.

O i Tatou O Fatu Laau

O loo tele pea mea e le o mailoa e uiga i lenei vairasi. Ae afai e i ai se mea se tasi ou te iloa, o lenei vairasi e le’i faate’ia ai le Tama Faalelagi. E le’i tau faapotopotoa ai e Ia ni autau faaopoopo o agelu, valaau se fonotaga faatopetope, pe lilliu punaoa mai le vaega o le foafoaga o le lalolagi e taulima ai se manaoga sa le’i faamoemoeina.

O la’u savali i le asō, e ui lava o lenei faama’i pipisi i le lalolagi e le o le mea lea sa tatou mananao i ai pe faamoemoeina, ae ua saunia e le Atua Lana fanau ma Lana Ekalesia mo lenei taimi.

Ioe, o le a tatou onosaia lenei mea. Ae o le a tele atu ni mea tatou te faia nai lo o le atigū o o tatou nifo, nofonofo pea, ma faatalitali seia toe foi ia mea i le mea tuai na masani ai. O le a tatou agai i luma, ma o se taunuuga, o le a sili atu ona tatou manuia.

I se itu, o i tatou o ni fatu laau. Ma ina ia oo fatu laau i lo latou tulaga gafatia, e tatau ona tatanu muamua a o le’i mafai ona tatupu i latou. O la’u molimau, e ui lava e i ai taimi e pei tatou te lagona ai le tanumiaina i tofotofoga o le olaga pe siomia i le pogisa faalelagona, ae o le alofa o le Atua ma faamanuiaga o le talalelei toefuataiina a Iesu Keriso o le a aumaia se mea e le’i mafaufauina ia fotu mai.

O Faamanuiaga e Oo Mai mai Faigata

Na feagai tisipenisione uma lava ma ona taimi o tofotofoga ma faigata.

O Enoka ma lona nuu sa ola i se vaitaimi o le amioleaga, taua, ma le faamasaa toto. “Ae sa afio mai le Alii ma mau faatasi ma lona nuu.” Sa ia te Ia se mea sa le’i mafaufauina mo i latou. Sa Ia fesoasoani ia i latou e faatu Siona—o se nuu, “sa tasi o latou loto ma tasi le mafaufau” o ē “sa mau i le amiotonu.”⁴

O le taulealea o Iosefa, le atalii o Iakopo, sa lafoina i se lua, faatau atu e fai ma pologa, faalataina, ma tuulafoaiina.⁵ Atonu sa tomanatu Iosefa pe na faagalo e le Atua o ia. Sa i ai i le Atua se mea sa le’i mafaufauina mo Iosefa. Sa Ia faaaogaina lenei vaitaimi o tofotofoga e faamalosia ai le natura o Iosefa ma tuu o ia i se tulaga e laveai ai lona aiga.⁶

O Iosefa Samita i le Falepuipui o Liperate

Mafaufau ia Iosefa Samita le Perofeta a o faafalepuipuiina i le Falepuipui i Liperate, i le ala sa ia aioi atu ai mo le toomaga mo le Au Paia puapuagatia. Atonu sa tomanatu o ia pe ono faapefea ona faatuina Siona i na tulaga. Ae sa fetalai atu e le Alii le filemu ia te ia, ma o le faaaliga mamalu na sosoo mai ai na aumaia ai le filemu i le Au Paia—ma o loo faaauau ai pea ona aumaia le filemu ia te oe ma a’u.⁷

E faafia i tausaga popofou o Le Ekalesia a Iesu Keriso o le Au Paia o Aso e Gata Ai ona faanoanoa le Au Paia ma tomanatu pe na faagaloina i latou e le Atua? Ae e ala mai i sauaga, faigata, ma faamata’uga o le fasiotiga, sa i ai i le mafaufau o le Alii le Atua o Isaraelu se isi mea mo Lana lafu itiiti. O se mea e le’i mafaufauina.

O a ni mea tatou te aoao mai i nei faataitaiga—ma le fia selau o isi faataitaiga i tusitusiga paia?

Muamua, e lē tuuina mai i ē amiotonu ni pasi mauafua e mafai ai ona latou aloese ma vanu o tofotofoga. E tatau ia i tatou uma ona ui atu i taimi faigata, aua o nei taimi o faigata tatou te aoaoina ai mataupu faavae e faamalolosia ai o tatou tagata ma mafua ai ona tatou latalata atili atu i le Atua.

Lua, ua silafia e lo tatou Tama Faalelagi tatou te puapuagatia, ma ona o i tatou o Ana fanau, o le a Ia le tuulafoaia ai i tatou.⁸

Mafaufau i le tagata agaalofa, o le Faaola, o lē na faaalu le taimi tele o Lona soifuaga e auauna atu ai i ē mama’i, i ē tuuatoatasi, i ē masalosalo ma leai ni faamoemoe.⁹ E te manatu la ua itiiti ai Lona popole mo oe i aso nei?

A’u uo pele, o’u uso ma tuafafine peleina, o le a puipui ma leoleo oe e le Atua i nei taimi o le lē mautonu ma le mata’u. Na te silafia oe. Na te faafofoga i au aioiga. E faamaoni ma faatuatuaina o Ia. O le a Ia faataunuu Ana folafolaga.

O loo i ai i le Atua se mea e le’i mafaufauina mo oe lava ia ma le Ekalesia atoa—o se galuega ofoofogia ma le mea e ofo ai.

Ia Viia Oe, Le Atua

O o tatou aso e sili ona lelei, o loo i o tatou luma atu, e le o tua o i tatou. O le pogai lena ua tuuina mai ai e le Atua ia i tatou faaaliga i onapo nei! A aunoa ma lea, o le a pei le olaga e lele i se mamanu taofiofi, e faatalitali se’ia te’a le puaoa ina ia mafai ai ona tatou tulaueleele saogalemu. E maualuluga mamao atu faamoemoega a le Alii mo i tatou nai lo o lena mea. Ona o le Ekalesia lenei a le Keriso soifua, ma ona o loo Ia taitaia Ana perofeta, o loo tatou agai ai i luma ma luga, i nofoaga tatou te le’i oo muamua i ai, i maualuga e faigata ona tatou vaai faalemafaufau i ai!

Ia, e le faapea ai la o le a tatou le oo i ni faigata i la tatou malaga i le olaga faitino. E le faapea o le a le pepē faafuasei ai ni masini, leaga faafuasei ni masini, ma ni luitau ogaoga o le tau. O le mea moni, e ono sili atu ona leaga ia mea a o le’i oo ina lelei tele.

I le avea ai o se pailate o vaalele tau ma se kapeteni o vaalele la’upasese, na ou aoao ai, e ui e le mafai ona ou filifilia le faigata o le a ou fetaiai i le aluga o le malaga, ae e mafai ona ou filifili i le ala ou te saunia ai ma le ala ou te tali atu ai. O le mea e manaomia i taimi o faalavelave o le to’a ma le mafaufau manino o le faatuatuaina.

E faapefea ona tatou faia lea mea?

Tatou te faafesaga’i ma mea moni ma toe foi i mea autu, i mataupu faavae autu o le talalelei, i mea e sili ona taua. E te faamalosia au amioga patino faalelotu—e pei o le tatalo ma le suesue i tusitusiga paia ma le tausiga o poloaiga a le Atua. E te faia faai’uga e faavae i faiga sili ona lelei ua faamaoniaina.

Taulai atu i mea e mafai ona e faia, ae le o mea e lē mafai ona e faia.

E te aoina mai lou faatuatua. Ma e te faalogologo mo le afioga taiala a le Alii ma Lana perofeta e taitai ai oe i le saogalemu.

Manatua, o le Ekalesia lenei a Iesu Keriso—o loo tu o Ia i le foe.

Mafaufau i le tele o atina’ega musuia na tutupu i le sefulu tausaga lava ia ua tuanai atu. E fia ta’ua na’o ni nai mea:

O le faamanatuga sa toe faamamafaina o le totonugalemu lea o la tatou tapuaiga i le Sapati.
O leSau Mulimuli Mai ia te A’u sa tuuina mai o se meafaigaluega e faatotonugalemu i le aiga, e lagolagoina e le Ekalesia, e faamalolosia ai tagata taitoatasi ma aiga.
Na tatou amatalia se faiga maualuga atu, ma paia atu o auaunaga i tagata uma.
O le faaaogaina o le tekinolosi i le faasoaina atu o le talalelei ma le faia o le galuega a le Alii ua salalau atu i le Ekalesia atoa.

E oo lava foi i nei sauniga o le konafesi aoao, semanu e le mafai ona tupu e aunoa ma meafaigaluega matagofie o le tekinolosi.

Uso e ma tuafafine, faatasi ai ma Keriso o loo tu i le foe, o le a le gata ina lelei ai mea, ae o le a le mafaufauina.

E Agai i Luma le Galuega o le Faapotopotoina o Isaraelu

O le taimi muamua na foliga mai, o se faama’i pipisi i le lalolagi atoa o le a avea ma puniala i le galuega a le Alii. Mo se faataitaiga, o auala masani o le faasoaina atu o le talalelei na le mafai ona faia. Peitai, o le faama’i pipisi i le lalolagi ua faaalia mai ai ni auala fou ma sili atu ona fatufatuai e aapa atu ai i ē loto faamaoni. O le galuega o le faapotopotoina o Isaraelu ua faateteleina le malosi ma le naunautai. E faitau fia selau ma fia afe tala ua faamaonia ai lenei mea.

Sa tusi mai ia i matou se uo lelei e nofo i Nouei matagofie e uiga i se faateleina lata mai nei o papatisoga. “I nofoaga e toaitiiti ai le Ekalesia,” sa ia tusi mai ai, “o fasilala o le a avea ma paranesi, ma o paranesi o le a avea ma uarota!!”

I Lativia, o se tamaitai sa mauaina le Ekalesia e ala i le kiliki i luga o se faasalalauga i le initoneti, sa matuai fiafia lava e aoao e uiga i le talalelei a Iesu Keriso na faapea ona itula atoa na vave taunuu atu ai i lana fonotaga atofaina, ma a’o lei faaumaina e faifeautalai le lesona muamua, sa ia fesili atu mo se aso e papatisoina ai.

I Europa i Sasa’e, o se tasi o tamaitai na mauaina se valaau mai i faifeautalai sa faapea atu, “Sisters, aisea na lua le vave valaau mai ai? Ua leva na ou faatalitali atu!”

E toatele a tatou faifeautalai ua sili atu ona pisi i le taimi nei. E toatele o loo aoaoina tagata e toatele atu i le taimi nei i lo se isi lava taimi muamua. Ua i ai se faateleina o le fesootaiga i le va o au paia ma faifeautalai.

I taimi ua mavae, atonu na tatou matele lava i auala masani, ua avea ai se faama’i pipisi i le lalolagi ma mea e pupula ai o tatou mata. Atonu sa tatou atia’e lava i asuemu ae ua leva ona i ai foaga. O le mea e tatau ona i ai, ua tatou aoao nei i ala e faaaoga ai metotia eseese, e aofia ai le tekinolosi, e valaaulia ai tagata—i auala masani ma natura—e o mai ma vaai, o mai ma fesoasoani, ma o mai ma avea ai.

I Lana Galuega, I Lana Ala

O le galuega lenei a le Alii. Ua Ia valaaulia i tatou e saili Ana ala e fai ai, ma atonu e ese mai i o tatou aafiaga ua tuanai.

Na tupu lenei mea ia Simona Peteru ma isi soo o ē na ō e fagogota i le sami o Tiperia.

“Ae lei maua se i’a e tasi i lea po.

“[Ina] ua oo i le taeao … ua tu Iesu i le auvai. …

“Ua fetalai atu o ia ia te i latou, Ina lafo ia le upega i le [isi] itu o le vaa, ona outou maua ai lea.”

Sa latou lafo a latou upega i le isi itu ma “ua le toe mafai e i latou ona toso ae, ona o taumafa o i’a.”¹⁰

Ua faaali mai e le Atua ma o le a faaauau pea ona faaali mai Lona aao silisiliese. O le a oo mai le aso o le a tatou toe tetepa atu ai i tua ma iloa, i le aluga o lenei vaitaimi o faigata, sa fesoasoani mai le Atua ia i tatou ia maua ni auala lelei atu—o Ana auala—e fausia ai Lona malo i luga o se faavae mausali.

Ou te molimau atu o le galuega lenei a le Atua ma o le a faaauau ona Ia faia le tele o mea e le’i mafaufauina i Lana fanau, o Lona nuu. O loo taofimau i tatou e le Atua i Ona aao agalelei ma agaalofa.

Ou te molimau atu o Peresitene Russell M. Nelson o le perofeta a le Atua mo o tatou aso.

I le avea ai o se Aposetolo a le Alii, ou te valaaulia ma faamanuia outou ia “faia ai ma le fiafia mea uma ua i ai i lo [outou] mana; ona mafai lea ona [outou] tutu, ma le mautinoa atoatoa, e vaai i le faaolataga a le Atua, ma mo lona aao e faaali mai.”¹¹ Ma ou te folafola atu o le a faaputuina e le Alii ni mea e le’i mafaufauina ia oo mai mai i a outou galuega amiotonu. I le suafa o Iesu Keriso, amene.