Hangupon ang Umaabut uban sa Hugot nga Pagtuo
Ang umaabut mahimayaon alang niadtong kinsa nakaandam ug kinsa magpadayon sa pagpangandam nga mahimong mga instrumento sa mga kamot sa Ginoo.
Kini usa ka dili makalimtan nga gabii. Minahal kong igsoong mga babaye, dungog ko nga ikauban kamo. Kamo diha sa akong hunahuna kanunay niining milabayng mga bulan. Kamo sobra sa walo ka milyon nga lig-on. Dili lang ang inyong gidaghanon apan ang espirituhanong gahum sa pag-usab sa kalibutan. Ako nagtan-aw kaninyo sa inyong gihimo atol niining pandemya.
Ang pipila ninyo sa kalit nangita sa nihit nga mga suplay o bag-o nga trabaho. Daghan ang mitudlo sa mga bata ug misusi sa mga silingan. Ang pipila miabi-abi sa mga misyonaryo nga miuli og sayo kay sa gipaabut, samtang ang uban mihimo sa inyong mga panimalay nga mga sentro sa pagbansay sa misyonaryo. Kamo migamit sa teknolohiya aron makakonektar sa pamilya ug mga higala, mangalagad niadtong mibati nga nahimulag, ug sa pagtuon sa Dali, Sunod Kanako kauban sa ubang tawo. Kamo nakakita og bag-ong mga paagi sa paghimo sa Igpapahulay nga usa ka kahimut-an. Ug kamo mihimo og pangproteksiyon nga mga mask—minilyon niini!
Uban sa kinasingkasing nga kapuangod ug gugma, ang akong kasingkasing miduyog sa daghang babaye sa tibuok kalibutan kansang mga minahal namatay. Kami nagbakho uban ninyo. Ug kami nag-ampo alang kaninyo. Kami nagdayeg ug nag-ampo alang sa tanan kinsa walay kutas nga nanalipod sa panglawas sa uban.
Kamo usab batan-ong mga babaye mga talagsaon. Bisan ang social media daghan kaayo og panagbingkil, daghan kaninyo nakakita og mga paagi sa pag-awhag sa uban ug pagpaambit sa kahayag sa atong Manluluwas.
Mga igsoong babaye, kamo mga bayani gayud! Ako natingala sa inyong kalig-on ug sa inyong hugot nga pagtuo. Kamo mipakita nga sa malisud nga mga sirkumstansya, maisugon kamong mipadayon. Gimahal ko kamo, ug ipaniguro nako nga ang Ginoo nagmahal kaninyo ug nakakita sa importanting buhat nga inyong gihimo. Salamat! Usbon ko, kamo nakapamatuod nga kamo tinuod nga paglaum sa Israel!
Kamo naglangkob sa mga paglaum nga gihatag ni Presidente Gordon B. Hinckley alang ninyo sa dihang iyang gipaila “Ang Pamilya: Usa ka Pamahayag ngadto sa Kalibutan,” 25 ka tuig na ang milabay niadtong Septyembre 1995 sa kinatibuk-ang miting sa Relief Society. 1 Halandumon nga iyang gipili ang pagpaila niining importante nga pamahayag ngadto sa igsoong mga babaye sa Simbahan. Sa pagbuhat sa ingon, si Presidente Hinckley mihatag og gibug-aton sa dili mapulihan nga impluwensya sa mga babaye diha sa plano sa Ginoo.
Karon, ganahan ko nga makahibalo unsay inyong nakat-unan niining tuiga. Nagkaduol ba kamo ngadto sa Ginoo, o mibati mo nga nahilayo gikan Kaniya? Ug sa unsang paagi nga ang panghitabo karon nakapahunahuna ninyo sa umaabut?
Kahibalo ko, ang Ginoo nakapamulong sa atong panahon sa ligdong nga paagi. Siya mipasidaan nga sa atong panahon “ang mga kasingkasing sa mga tawo [mopakyas] kanila” 2 ug nga bisan ang pinili peligro nga mailad. 3 Siya misulti ni Propeta Joseph Smith nga ang “kalinaw [paga]kuhaon gikan sa yuta” 4 ug ang mga katalagman moabut sa katawhan. 5
Apan ang Ginoo mihatag usab og panan-awon kon unsa ka talagsaon kini nga dispensasyon. Siya midasig ni Propeta Joseph Smith sa pagpahayag nga “ang buluhaton … niining katapusan nga mga adlaw, usa ka lapad nga luna. … Ang mga himaya niini dili mahulagway, ug ang kaanindot walay makatupong.” 6
Karon, ang kahalangdon dili tingali ang pulong nga inyong pilion sa paghulagway niining milabay nga pipila ka bulan! Unsaon nato sa pag-atubang ang masulub-ong mga panagna ug ang mahimayaong mga pahayag mahitungod sa atong panahon? Ang Ginoo misulti kanato kon unsaon uban sa yano, apan talagsaon, nga kasiguroan: ““Kon kamo andam dili kamo mahadlok.” 7
Pagkaanindot nga saad! Mao kini ang makausab gayud sa paagi sa atong pagtan-aw sa umaabut. Ako bag-ong nakadungog sa usa ka babaye nga lig-on og pagpamatuod nga miangkon nga ang pandemya, inubanan sa linog sa Walog sa Salt Lake, nakatabang niya nga makaamgo nga siya dili sama niana ka andam sa iyang pagtuo. Sa dihang gipangutana nako siya kon gipasabut ba niya ang iyang pagtipig og pagkaon o ang iyang pagpamatuod, siya mipahiyom ug miingon, “Oo!”
Kon ang pagpangandam mao ang atong yawe sa paghangop niini nga dispensasyon ug sa atong umaabut uban sa hugot nga pagtuo, unsaon nga makaandam kita pag-ayo?
Sulod sa mga dekada, ang mga propeta sa Ginoo miawhag nato sa pagtipig og pagkaon, tubig, ug reserba nga kwarta alang sa panahon sa panginahanglan. Ang pandemya karon mipalig-on sa kaalam niana nga tambag. Ako moawhag ninyo sa paghimo og mga lakang nga mahimong andam sa temporal nga paagi. Apan mas nabalaka ako sa inyong espirituhanon ug emosyonal nga pagpangandam.
Mahitungod niana, kita makakat-on og daghan gikan ni Kapitan Moroni. Isip kumander sa mga kasundalohan nga Nephite, siya nag-atubang og kaatbang nga pwersa nga mas kusgan, mas daghan, ug mas isug. Mao nga, si Moroni miandam sa iyang katawhan sa tulo ka importante nga mga paagi.
Una, siya mitabang nila nga maghimo og mga dapit diin sila luwas—“mga dapit nga tagoanan” tawag niya niini. 8 Ikaduha, siya miandam “sa mga hunahuna sa mga katawhan nga magmatinud-anon ngadto sa Ginoo.” 9 Ug ikatulo, wala gayud siya mohunong sa pag-andam sa iyang katawhan—sa pisikal o sa espiritwal nga paagi. 10 Atong ikonsiderar kining tulo ka baruganan.
Unang Baruganan: Mihimo og mga Dapit nga Tagoanan
Si Moroni milig-on sa matag siyudad pinaagi sa pagbutang og mga bungdo, mga kota, ug mga paril. 11 Sa dihang ang mga Lamanite miabut batok kanila, sila “nahibulong sa hilabihan, tungod sa kaalam sa mga Nephite sa pag-andam sa ilang mga dapit nga tagoanan.” 12
Sa samang paagi, samtang ang kasamok modagsang libut kanato, kita kinahanglan nga mohimo og mga dapit diin kita luwas, sa temporal ug sa espiritwal nga paagi. Kon ang inyong panimalay mahimong personal nga santuwaryo sa hugot nga pagtuo—diin ang Espiritu makapuyo—ang inyong panimalay mahimong unang depensa.
Sa samang paagi, ang mga stake sa Zion mao ang “usa ka dangpanan gikan sa unos” 13 tungod kay kini gigiyahan niadtong kinsa naghupot sa mga yawe sa pagkapari ug naggamit sa awtoridad sa pagkapari. Samtang kamo mopadayon sa pagsunod sa tambag niadtong kinsa gitugutan sa Ginoo sa paggiya kaninyo, kamo mobati nga mas luwas.
Ang templo—ang balay sa Ginoo—mao ang dapit sa seguridad dili sama sa bisan unsa. Didto, kamo nga igsoong mga babaye gitugahan og gahum sa pagkapari pinaagi sa sagrado nga mga pakigsaad sa pagkapari nga inyong gihimo. 14 Didto, ang inyong mga pamilya gisilyo alang sa kahangturan. Bisan niining tuiga, ang pag-adto sa atong mga templo hilabihan ka limitado, ang inyong pagtuga nakahatag ninyo sa kanunay nga paggamit sa gahum sa Dios samtang inyong tahuron ang inyong mga pakigsaad uban Kaniya.
Sa yanong pagkasulti, ang usa ka dapit nga tagoanan anaa bisan asa nga inyong mabati ang presensya sa Espiritu Santo ug mahimong magiyahan Niya. 15 Kon ang Espiritu Santo anaa uban kaninyo, kamo makatudlo sa kamatuoran, bisan kon kini supak sa nag-unang mga opinyon. Ug kamo makapamalandong sa sinsero nga mga pangutana mahitungod sa ebanghelyo diha sa kalikupan sa pagpadayag.
Ako modapit kaninyo, minahal kong igsoong mga babaye, sa paghimo og panimalay nga usa ka dapit nga tagoanan. Ug akong bag-ohon ang akong imbitasyon kaninyo sa pagdugang sa inyong pagsabut sa gahum sa pagkapari ug sa mga pakigsaad ug mga panalangin sa templo. Ang pagbaton og mga dapit nga tagoanan diin kamo makatago makatabang ninyo sa paghangop sa umaabut uban ang hugot nga pagtuo.
Ikaduhang Baruganan: Andama ang Inyong Hunahuna nga Magmatinud-anon ngadto sa Dios
Kami dunay gihimo nga dakong proyekto sa pagdugang sa gidugayon ug kapasidad sa Templo sa Salt Lake.
Ang pipila mikwestyon sa panginahanglan sa paghimo sa dili ordinaryo nga mga buluhaton. Bisan pa niana, sa dihang ang Walog sa Salt Lake naigo og 5.7-magnitude nga linog sayo niining tuiga, kining tinahud kaayo nga templo miuyog og kusog kaayo nga ang trumpeta sa estatuwa ni anghel Moroni nahulog! 16
Sama nga ang pisikal nga pundasyon sa Templo sa Salt Lake kinahanglang lig-on kaayo aron makasugakod sa kinaiyanhong mga katalagman, ang atong espirituhanong mga pundasyon kinahanglang solido. Dayon, kon ang pinasumbingay nga linog mouyog sa atong kinabuhi, kita makasugakod nga “magmakanunayon ug dili mausab” tungod sa atong hugot nga pagtuo. 17
Ang Ginoo mitudlo kanato unsaon sa pagpadugang sa atong hugot nga pagtuo pinaagi sa “pagtulun-an, gani pinaagi sa pagtuon ug usab pinaagi sa hugot nga pagtuo.” 18 Kita molig-on sa atong hugot nga pagtuo diha ni Jesukristo samtang kita maningkamot sa pagtuman sa Iyang mga sugo ug sa “kanunay mahinumdom Kaniya.” 19 Dugang pa, ang atong hugot nga pagtuo madugangan matag higayon kita mogamit sa atong hugot nga pagtuo diha Kaniya. Mao kana ang gipasabut sa pagkat-on pinaagi sa hugot nga pagtuo.
Pananglitan, matag higayon nga kita adunay hugot nga pagtuo nga magmasulundon sa mga balaod sa Dios—bisan kon ang inila nga mga opinyon nagtamay kanato—o sa matag higayon nga kita mobatok sa kalingawan o mga ideolohiya nga nagsaulog sa pagsupak sa pakigsaad, kita nagpakita sa atong hugot nga pagtuo, nga maoy makapadugang sa atong hugot nga pagtuo.
Dugang pa, pipila lang ka butang ang mas mopalig-on sa pagtuo kay sa kanunay nga pagbasa sa Basahon ni Mormon. Walay laing basahon nga nagpamatuod ni Jesukristo uban sa gahum ug kaklaro. Ang mga propeta niini, nga nadasig sa Ginoo, nakakita sa atong panahon ug mipili sa doktrina ug mga kamatuoran nga labing makatabang nato. Ang Basahon ni Mormon mao ang atong ulahing adlaw nga giya sa pagpakabuhi.
Dayag lang, ang atong labing maayong seguridad magagikan sa atong pagyukbo sa atong kaugalingon ngadto sa Langitnong Amahan ug ni Jesukristo! Ang kinabuhi nga walay Dios usa ka kinabuhi nga puno sa kahadlok. Ang kinabuhi uban sa Dios usa ka kinabuhi nga puno sa kalinaw. Tungod kini kay ang espirituhanong mga panalangin moabut ngadto sa matinud-anon. Ang pagdawat og personal nga pagpadayag usa sa labing nindot niadto nga mga panalangin.
Ang Ginoo misaad nga kon kita mangayo, kita makadawat og “pagpadayag ug dugang nga pagpadayag.” 20 Ako mosaad nga kon inyong dugangan ang inyong kapasidad sa pagdawat og pagpadayag, ang Ginoo mopanalangin kaninyo og dugang nga direksyon alang sa inyong kinabuhi ug uban sa walay kinutuban nga mga gasa sa Espiritu.
Ikatulong Baruganan: Ayaw Paghunong sa Pagpangandam
Bisan kon maayo ra ang mga sitwasyon, si Kapitan Moroni nagpadayon sa pag-andam sa iyang katawhan. Siya wala gayud mohunong. Siya wala gayud makontento.
Ang kaaway dili gayud mohunong sa pag-ataki. Mao nga, kita dili gayud mohunong sa pagpangandam! Kon kita mobarug pinaagi sa kinaugalingon nga paningkamot—sa temporal, emosyonal, ug espiritwal nga paagi—mas makaandam kita sa pagsanta sa walay hunong nga mga pang-ataki ni Satanas.
Minahal nga igsoong mga babaye, kamo hanas sa paghimo og mga dapit nga tagoanan alang sa inyong kaugalingon ug niadtong inyong gimahal. Dugang pa, kamo adunay balaan nga tuga nga makapahimo ninyo sa paglig-on sa pagtuo sa uban sa makapadani nga mga paagi. 21 Ug kamo dili gayud mohunong. Kamo mipakita pag-usab niana niining tuiga.
Palihug, padayon! Ang inyong pagka-igmat sa pagbantay sa inyong mga panimalay ug pagsilsil og hugot nga pagtuo diha sa mga kasingkasing sa inyong mga minahal makaani og mga ganti sa mga henerasyon nga moabut.
Minahal kong igsoong mga babaye, daghan kaayo kita og paabuton! Ang Ginoo mibutang kaninyo karon tungod kay Siya nasayud nga kamo adunay kapasidad sa pagbuntog sa kakomplikado sa ulahing bahin niining ulahing mga adlaw. Siya nasayud nga kamo makasabut sa kahalangdon sa Iyang buhat ug madasigon nga motabang sa pagpahinabo niini.
Ako wala moingon nga ang umaabut nga mga adlaw sayon, apan ako mosaad kaninyo nga ang umaabut mahimayaon alang niadtong kinsa nakaandam ug kinsa nagpadayon sa pagpangandam nga mahimong mga instrumento sa mga kamot sa Ginoo.
Minahal kong igsoong mga babaye, dili lang kita molahutay niining kasamtangan nga panahon. Atong hangupon ang umaabut uban sa hugot nga pagtuo! Ang gubot nga mga panahon mao ang mga oportunidad nato nga mouswag sa pagkaespirituhanon. Kini mao ang mga panahon nga ang atong impluwensya mas epektibo kay sa kalma nga mga panahon.
Ako mosaad nga samtang kita mohimo og mga dapit nga tagoanan, moandam sa atong hunahuna nga magmatinud-anon ngadto sa Dios, ug dili gayud mohunong sa pagpangandam, ang Dios mopanalangin kanato. Siya “moluwas [kanato]; oo hangtud nga siya [mo]sulti og kalinaw sa [atong] mga kalag, ug [mo]hatag ngari [kanato] og hilabihan ka hugot nga pagtuo, ug … mihimo [kanato] nga [kita] kinahanglan [mo]laum sa [atong] kaluwasan diha kaniya.” 22
Samtang kamo mag-andam sa paghangop sa umaabut uban sa hugot nga pagtuo, kini nga mga saad mainyo! Ako nagpamatuod, inubanan sa akong pagpadayag sa gugma alang kaninyo, ug ang akong pagsalig diha kaninyo, pinaagi sa sagradong ngalan ni Jesukristo, amen.