Kwaļo̧k Gospel in Aenōm̧m̧an eo
Ewōr juon ad eddo ekwojarjar n̄an jaketo jaketak kajoor im aenōm̧m̧an eo an Jisōs Kraist ippān aolep ro renaaj ron̄jake.
Ro jeiū im jatū, kom̧ij ruwainene n̄an kweilo̧k in eļap! Ikar reim̧aantak n̄an rainin kōn kōtmāne eļap. Ij jar kōn kom̧ aolep raan. Ikar barāinwōt jar bwe kweilo̧k in eļap enaaj juon iien ad wōj kajjojo bōk kajoor ilo jetōb.
Jān kar kweilo̧k eo eļap, men ko reppen ilo laļ in rekar wōnm̧aanļo̧k wōt. Ajedeed in nan̄inmej in ipeļaakin laļ in ej jelet wōt mour ko ad. Im kiiō laļ in ekar em̧m̧akūt kōn juon poktak ej ibeb kōn kaam̧jak ioon milien em̧m̧aan ro ejjeļo̧k ruwāer, kōrā ro, im ajri ro.
Rikanaan ro rekar anto̧o̧ne raan kein ad, ke enaaj lōn̄ tariņae ko im iaron̄ron̄ ko kōn tariņae ko, im n̄e aolepān laļ in enaaj poktak.1 Āinwōt rikaļoor ro an Jisōs Kraist, jej akweļap ippān ritōl ro an laļ ko n̄an pukot juon wāween eanōm̧m̧an kōn oktak ko aer. Jej kūr ioon aolep armej aolep jikin n̄an jar kōn ro otemjej rej pād ilo aikuj, n̄an kōm̧m̧ane ta eo remaron̄e n̄an jipan̄ kōn jorrāān in, im pukot jipan̄ eo an Irooj ilo kabōjrak jabdewōt poktak ko reļļap.
Ro jieū im jatū, gospel eo an Jisōs Kraist ej jan̄in kar ļapļo̧k aikuji jān rainin. Poktak, iakweleel, im tariņae ej kakkure men otemjej Rilo̧mo̧o̧r eo ekar jutak kake im katakin. Ij iakwe Irooj Jisōs Kraist im kam̧ool bwe gospel eo An ej wōt uwaak in kijenmej eo n̄an lo aenōm̧m̧an. Gospel eo An ej juon gospel in kōjatdikdik.2
Gospel eo An wōt ej uwaak eo n̄e elōn̄ ro iaad ilo laļ in rej ilbōk kōn mijak.3 Men in ej kwaļo̧k aorōk in kōmeļeļe ko an Irooj n̄an rikaļoor ro An n̄an “ilo̧k … ilo aolepān laļ, im kwaļo̧k gospel eo n̄an armej otemjeļo̧k.”4 Ewōr juon ad eddo ekwojarjar n̄an jaketo jaketak kajoor im aenōm̧m̧an eo an Jisōs Kraist ippān aolep ro renaaj ron̄jake im wōn eo enaaj kōtļo̧k bwe Anij en anjo̧ ilo mour ko aer.
Aolep armej ro rekar kōm̧m̧an bujen ippān Anij rekar kallim̧ur n̄an kea kōn ro jet im jipan̄ ro rej pād ilo aikuj. Jemaron̄ kōmeļeļeik tōmak ilo Anij im aolep iien pojak n̄an uwaake ro otemjej rej kajjitōk kōn “kōjatdikdik eo ej ilo [kōj].”5 Kōj kajjojo ewōr juon ad eddo n̄an kōm̧m̧ane ilo aiintok Israel.
Rainin ij bar kapene im kōkajoorļo̧k bwe Irooj ekar kajjitōk ippān aolep likao ro rerreo, ekeke ānbwinnier n̄an m̧aanjabpopo n̄an im jerbale juon mijen. N̄an likao ro rej Armej ro Rekwojarjar ilo Raan Ko Āliktata, jerbal in mijenede ej juon eddo an priesthood. Kom̧ likao raņ kar kōjparok kom̧ n̄an iien in n̄e kallim̧ur in n̄an aiintok Israel ej bōk jikin. Ilo ami jerbale mijen ko, kom̧ naaj kōm̧m̧ane juon jerbal eaorōk ilo aiintok Israel!
N̄an kom̧ jiron̄ ro im sister ro rekeke ānbwinnier, juon mijen ej barāinwōt juon kajoor, ak kāālet, ej juon iien em̧m̧an. Kōm̧ij iakwe sister mijenede ro im karuwaineneik er kōn būruwōn kam̧m̧oolol im kallim̧ur. Ta eo komaron̄ jipan̄ kake n̄an jerbal in elukkuun aiboojoj! Jar bwe kom̧in jeļā eļan̄n̄e Irooj enaaj kōņaan bwe kom̧in jerbale juon mijen, im Jetōb Kwojarjar eo enaaj uwaake būruwōm̧ im ami ļōmņak.
Ro m̧ōtta reddik rejitōn bōro, kom̧ kajjojo ej aorōk ippān Irooj. E ekar kōjparok kom̧ m̧ae iien in n̄an jipan̄ aiintok Israel. Kāālet eo am̧ n̄an jerbale juon mijen, mekarta juon mijen in ito itak im kwaļo̧k gospel eo ak juon service mijen, enaaj kōjeraam̧m̧an eok im elōn̄ ro jet. Jej barāinwōt karuwaineneik ripālele ro rerūtto n̄e jekjek ko renaaj em̧m̧an. Kijejeto ko aer epen bōk jiker.
Aolep mijenede ro rej katakin im kam̧ool kōn Rilo̧mo̧o̧r eo. Jetōb in maroklep ilo laļ in enaaj kōm̧m̧an bwe meram in Jisōs Kraist en ļapļo̧k aikuji jān m̧okta. Aolep armej rej aikuj juon iien em̧m̧an n̄an jeļā kōn jepļaaktok in gospel eo an Jisōs Kraist. Aolep armej rej aikuj n̄an jeļā ia eo remaron̄ loe kōjatdikdik im aenōm̧m̧an in me “[ej eļļā jān] jeļā otemjej.”6
Kōm̧m̧an bwe kweilo̧k in eļap en erom̧ juon iien aenōm̧m̧an im m̧ōn̄ā in kijoone n̄an kom̧. Kōm̧m̧an bwe kom̧in kappukot im bōk revelesōn ko ami make ilo m̧wen̄an kein, ij jar ilo āt eo ekwojarjar etan Jisōs Kraist, amen.