Thilyeg e Mich ko tin nib Magan’ Got Ngay
Thilyeg e mich rodad ni tay e mu’un e muruwel rodad ningad pii’ e milwol ko gospel ku Yesus Kristus ngak e fayleng.
Gube falfalaen’ nifan milwol rok’ President Russell M. Nelson ko marunga’agen e pigpig ko missionary nge milwol niba pii’ athamgil rok’ President M. Russel Ballard nge Elder Marcos A. Aidukaitis marunga’agen e missionary u kadbul ney.
Muruwel ko mission rog ni kug rrin’ bin tomur e duw nga Great Britain nike pii’ ngog e rogon ni nggu lemnag marunga’agen e pi’nen nib thothup nike buch ngog nike fal’eg e daf ko mel’eg rog ni kug waen ku gu pigpig ko mission.1 Napan ni 15 e duw rog, walageg nib t’uf rog, Joe, e ba 20 e duw rok’—e duw ni rayog ni nge mang e missionary. Ulan fare United States, bachane e mael u Korea, kemus buchuw e rayog ni ngar pigpig nag. Yigo’ ta’ bee’ rayog ni ngan pinning ko mission gubin e duw ko gubin e ward.2 Ke gin owcheg ngay ko napan e bisof rog nike fith ngak Joe ni nge lemnag marunga’agen biney ngak e chitamangeg. Joe nike tabab yol ko pi babyor nifan e sukul ko togta. Chitamangin mow, nike tal’eg ni nge yib nga Galasia, nike fal’eg e tanom ko salpiy ni nge ayuwegen nge debun Joe ni nge yaen ko mission. Chitamangeg nike weliy Joe rayog ni nge ayuwegen bo’or e gidii fa’an ni nge yaen nga sukul ko togta. Biney e magawon nib ga’ u lane tabinaew rog.
Udakaen e sabathin nib thabi fel’ ngak e walageg nib fel’ ni bagel e ganop rok’, kug lemnag e mel’eg rok’ fa’an ni nge pigpig ko mission nge soen ko sukul rok’ ur taga’ u dalip e duwer: (1) Yesus Kristus ir nib thothup? (2) Fare Babiyor ku Mormon ir e thin rokʼ Got? nge (3) Joseph Smith ire profet ko fare Sulyarmen? Fa’an e fulweg nifan e pi duwer ney e arrogon, rib moem ni nge nang Joe rayog ni nge ayuweg bo’or e gidii’ ni bay fek fare gospel ku Yesus Kristus ngak e feylang ko mang e togta nib papay.3
Re neap nem, kug meybil nib gel u fithik’ e yul’yul’. Fare Ya’el, udaken e gelingin ni dabgu pagtalin, nike fulweg ngog e fulweg ko dalip e duwer ney ir e arrogon. Rib fel’ e n’en nike buch ngog. Kug fil ni bugin e mel’eg rog gura fal’eg ufithik’ ni gubin e yafos rog nira thapeg e ayuweg nifan e pi ney nib riyul’. Kug nang ni gura pigpig nag ko mission ni fa’an e rogon ra buch ngog. Ufithik’ e yafos rog nib sug ko pigpig nge pi’nen nib thothup nike buch ngog, kug thapeg e ganop ni thilyeg e mich ko tin nib magan’ Got ngay, nge fare Kan in Thothup ra powi’iy nagdad nge pi ngongol rodad.
Kug thap e mich nifan e thothup rok’ Yesus Kristus ni ir fare Tathapeg nifan ko feylang. Binem e neap’ kug thapeg e mich rog ni marunga’agen fare Babyor ku Mormon4 nge fare Profet Joseph Smith.
Joseph Smith Nike Mang Pa’ e Talin e Muruwel Rok’ Somoel
Mich rom ra ga’ nag napan ni ngam nanged ulan e gum’ircha’med udakaen’ e meybil ni fare Profet Joseph Smith nike mang a talin ko muruwel’ u pa’ Somoel, Ke gaman meruk e duw ngay, ni reb e muruwel rog ni gag reb fapi Ragag nge L’agruw e Apostle e nggu be’eg mu gu waen u dakean fapi bayor rok’ Joseph Smith mu gu yoloy mornga’agen fapi yol nriy ni yib nge taw ko Gidii’en Got babyor riy.5 Mich rog nge t’ufeg rog ngak fare Profet Joseph Smith e ke gel ma ke gaa’ u tomuren ni kug be’eg mornga’agen e yafos rok’ u mm’on ni tabab ko michib.
Pilyeg rok’ Joseph nifan ko fare Babyor ku Mormon udakaen e to’owath nge gelingin Got nike mang e daf ko fare Sulyarmen.6 Fare Babyor ku Mormon dabi baen, ni rib fel; ni ke yol, nge bay fapi fulweg nifan e pi duwer nib ga’ ko yafos. I ir reb e m’ag mornga’agen Yesus Kristus. Gube micheg ni Joseph Smith ir e bee’ nib mat’aw, nike sug ko mich, nge ke mang e talin pa’ e muruwel rok’ Somoel ni nge thapeg fare Babyor ku Mormon.
Fapi yi’iy nge pi’nen nike buch ulan fare Doctrine nge Covenants ma pii’ fapi kiy, pi gam’ing, nge pi micheg nib ga’fan ko wo’en e thap nge n’uf ngalang ko falfalaen’. Nima weliy marunga’agen e pi’nen nib ga’fan ni nge fal’eg e Galasia nge pii’ e machib nib fel’ nima ayuwegdad ni ngad nanged e fan ko yafos nge pii’ ngodad e sap nib manechubog.
Ta’areb ko bo’or e susun nifan Joseph Smith e muruwel rok’ e rayag ni ngan pire’eg ulan fare 76th section ko Doctrine and Covenants Biney ir e chepin nib ga’ marunga’agen e yi’iy ko tharmiy, ni tay e pi gil’ilungun ko rir, nikar thapgow fare Profet Joseph Smith nge Sidney Rigdon ko February 16, 1832. Ngiyal’ ney, bo’or e pi galasia kar fil’ed e Bayul rok’ Somoel dabi pii’ e thap ngak bo’or e gidii’. Ya mich rorad yigo boch e gidii’ ni ra thap nge bo’or ra feked e infierno nge gafgow, tay e bu’un ko badi tal’e amith ko pi’nen nib thabi kireb nib ga’.”7
Pi thogthog ni bay ulan fare guruy ni 76 ma pii’ e yi’iy nib fla’ab marunga’agen e pi yang ko rir ni bay bo’or e fak Chitamangiy ni bay Tharmiyni yad e pi’in nib mangil umon e yafos nira thapeged e to’owath napan ra yib e pufthin.8 Fare yi’iy marunga’agen e dalip e gil’il’ungun ko rir, nge bin achigchig ney ra “bay nga tomur e nangfan,”9 be dag nogdad nib gel’ e pi magawon nifan e fil ney ni bo’or e gidii’ nira reked e infierno nge gafgow.
Napan ni ngam nanged kemus 26 e duw rok’ Joseph Smith, baa’ buchuw e sukul, nge buchuw fa dariy e nangfan ko pi thin nib kakrom ni ta’ab e thin nike pilyeg e Bible, nike mang e talin e muruwel nib fel’ u tan pa’ Somoel. Ulan fare guruy ni 17 ko 76 nike thapeg e yi’iy ni thingari pilyeg e thin ko tin de ma’taw nge gathi gafgow ulan e Gospel ku John.10
Ni rib’ fel ko 45 e duw kafram biney bay e cha’ nib ga’ ko galasia nib Angelican nge bee nike fil’ bo’or nifan e tin nib kakrom,11 Frederic W. Farrar, nike yoloy Fare Yafos ku Kristus12 ni ke weliy e ba yip’fun ko gafgow ulan e Bible ku King James ni bay bo’or e oloboch bachan kireb e pilyeg ko Hebrew nge Greek nga English.13
U rran rodad, bo’or e gidii’ be lemnagdad ni dariy wengan e denen. Yad ba’adag e lemnag ni ngar rrin’ed e denen nge dariyfan ko kalngaen’. Yalen rodad nikan dag ni ma tugthin e lem ney ni bo’or e gidii’ ra fek’ed fare infierno nge gafgow nge weliy e kalngaen’ rodad ir e motochiyl thingarda rrin’ed fa’an ni ngad thapeged e Bayul rok’ Somoel nge thapeg e gil’ilungun inb celestial.14 Gube micheg ni Joseph Smith ir e talin pa’ ko muruwel rok’ Somoel ni nge thapeg fare gospel Rok nib Sulyarmen!
Bachane Sulyarmen ko fare gosepl rok’ Yesus Kristus, gadad manang e ga’fan nifan ko kalngaen’ nge fare “pi ngongol ko tin nib mat’aw.”15 Gadad manang e ga’fan nifan e Bayul rok’ Tathapeg nge pi gam’ing nge micheg Rok’ nima thapdad, ni tay e bu’un e pi’nen ulan e temple.
Fa “pi ngongol ko tin nib mat’aw” ma yib ko wa’amngin e mich. Thilyeg nib riyul’ nira yib udakaen e mel’eg nge ba’adag ni ma fol e ba’adag rok’ God.16 Fare ulungi pi wengan nge tawa’ath nima yib nifan e thilyeg e mich ir e gapas nib riyul’ ni dabi chuw nge pagaen’ rodad ko e falfalaen’ nib fla’ab17—dariyfan e yoko’ ko yafos ney.
Thilyeg e mich ngak fare Tathapeg ma thilyeg e pag e fekyath ni nge mang e bee’ nib machalbog, gargeleg bayay, thothup nag—e yafos nib bie’ch u Kristus Yesus.18
Bo’or e Giddi’ ni Dawori Nang e Tin Riyul’ ni Bachan e Dar Nanged ko Gin ni Ngar Pire’eged Riy
Mang boech e ngongol nira buch nifan e thilyeg ko mich? Ulan fare Kalbus nib Liberty fare Profet Joseph ke yol ne bo’or “ ni dawor e tin riyul’ rorad kemus bachan dar nanged ko ningam riy’.”19
Ulan e weliy rok’ Somoel marunga’agen fare Doctrine nge Covenants, bay e weliy nib ga’ ko fan rok’ Somoel nifan ngodad. Nike weliy, “Ere, Gu ba fare Somoel, ba nang fare tin nib kireb ni bay yib udakean e gidii’ ko fayleng, kug pining ko pigpig rok Joseph Smith, Jun., nge kug yog ngak u tharmiy, nge pii’ ngak pi motochiyel.” Be ul’ul’ e weliy, “Fare gospel Rog ni ga’ngin e ra gidii’nib mo’waer ma ba moem rograd e yad ra yoeg u dakean e fayleng.”20 Biney niba tay e mu’un ko fapi missionary. Biney niba tay e mu’un gadad gubin. Biney thingari mang e lemnag ngak gubin e bee’ ni kar thapeged e tawa’ath nifan e thilyeg e mich ko tin nib magan’ Got ngay. Fare Somoel nibe pinningdad ni ngad manged e Laman nge Pa’.21 Fare t’ufeg rok’ Somoel nira mang e magal nib powi’iy rodad. Fare Somoel nike fil’ ngak fapi gachelpen ni, “mmarod ngak girdi’en e pi nam u gubin yang.”22 Nge ngak Joseph Smith, niKe weliy, “Machib e gospel rog ngorad gubin e bee’ ni dabi thepged biney.”23
Ta’areb e wik tomur e yibilynag nifan fare Kirtland Temple ko April 3, 1836, biney e Madnom ko Easter nge Passover, fare Somoel e yibi m’ug ngak Joseph nge Oliver Cowdery. Nike ba’adag e temple nge weliy, “Ma biney ea tabolngin ea towa’ath ni bay ni pu’og nga dakean lolugen ea gidii’ rog.”24
Tomuren ni ke man biney ea vision, me m’ug Moses ngomow “me pii’ … fapi kiys ko fare makun ko Israel iyib ko fa aningeg ea yang ko fayleng, nge ku ngan powiy fare ragag i lung iyib ko nam ni bay u lol’oech.”25
President Russell M. Nelson, profet rodad nib tu’uf e daba’ ni bay e pi kiy ney rok’ nib ta’ab rogon: “Gimed e pagal ni fel’yangren e kan tay med ko ngiyal’ ney ni be buch e mukun rok’ pi u Isreal. Napan ni bay man ko mission rom, ma aram ni gamed be fal’eg kanawo’en e biney ni be buch e chiney!”26
Nifan e motochiyl rok Somoel ni ngad pii’ e gospel ni nge mang e yang ngodad, Thingarda thilyeg e mich nga fapi thin niba’adag Got; Bt’uf ni ngad t’ufeged e cha’ ni buguliyoror roded, weliy marunga’agen e gospel nike sulyarmen rok Yesus Kristus, nge pinning gubin ni ngar saprad. Gadad e pi chongin ko fare Galsia, gadad ba’adag e pi thin rok’ fare Profet Joseph ngak John Wentworth, Tayol ko fare Chicago Democrat, u 1842. Ba’adag boch e ganop ni marunga’agen fare Galasia. Joseph ke tal’eg e non rok’ napan nike nang e “Tin nib Riyul’” nifan ragag nge dalip e Fapi Kenggin Lik’ngin e Mich. Pi’ney ma weliy, ni rib moem, e pi’nen thingarda rrin’ed:
“Dariy bee’ nib kireb ni rayog ni nge taleg e murwel ni dabi buch; gafgow e ra gel, gidii’ ni kireb e ra yib nga ta’abang, salthaw e ra mukun, thin ni go’baen e ra kireb nag, machane tin riyul’ rok Got e ra yan nga m’on dariy e tuntun riy, nib mangil, ma go’ ir, nge taw ko ngiyal’ nike thap ko gubin e naam, gubin e yafang, nge tha ko gubin e binaew, me rung’ag gubin e gidii’nge taw ko ngiyal’ nike m’ay fan Got, me ga’ar fare Jehovah ni Gubinfen e ke m’ay fare murwel.”27
Binem ir e pinning nib gaa’ ko bo’or e duw nifan e pi Gidii’en Got ko Tin Tomur e Rran, ma rib gaa’ ni yigo’ fapi missionary. Ulan e gelingin ko fare Tin nib Riyul’, gadag ba’adag ufithik’ e m’ar ulangab e feylang bay e pi missionary mab yul’yul’ nima pii’ e gospel. Pi missionary, gimed ba tu’uf romad! Somoel niba fith ngodad ni ngad pii’ e gospel Rok’ ufithik e thin nge ngongol. Thilyeg e mich rodad ni tay e bu’un e muruwel rodad ningad pii’ e mulwol ko gospel ku Yesus Kristus ngak e fayleng.
Pi to’owath napan ni ngad pii’ e gospel ni tay e bu’un gaa’ nag e thilyeg ko mich ngak e ba’adag rok’ Got nge gadad ba’adag Got ni ubchiya’ nga rogon ko yafos rodad.28 Gadad ba yibliy nag reb e bee’ ni nge thap e “thil lan e gum’ircha’em.”29 Bay e falfalaen’ nib fla’ab napan ni ngam yognag e gidii’ riy nib yo’or nga Kristus.30 Ngongol nifan e thilyeg e mich romed nge nifan reb e bee’ i ir fare muruwel’ nib mangil.31 Gube micheg u dakean fithngan Yesus Kristus, amen.