14:9

Fanam nib Thothup nge Fare Milekag Nib Manechubog

Yib Rok’ Elder Dale G. Renlund

Ko fare Ulung ko fare Ragag nge L’agruwi Apostle

Gube piningmed ni ngam tay ni Yesus Kristus e bay u luk’ungun e yafos rom mag tay u wun’um fapi riyul’ ni bay ko def ulan fare Young Women theme.

Pi sister, kamagargad ni gamed bay u roy. Ri gub falfalaen’ ngay ni nggu un ko biney e mo’olung ko general conference nifan e pi’in ni bpin. Boch i ngiyal’ ma guma un ko klass ko Young Women. Son nngog ni fa’anra dawrim tin’med ngay—dani fel’ yangreg, ma gathi gag reb e bpin! Kug fil, ni, gag e gumu’un ko biney e ulung ni fa’an nrayag ni ngu un ko fapi bpin ni fel’yangren nggu bi’egned fare Young Women theme. Fare yalen nib gel ni yima fil ko fare Young Women theme¹ e rib ga’fan ko bpin ni fel’yangren, machane biney e fan ngak gubin e gidii’, nib mu’un e gidii’ ngay ni gathi kemus ni fan e pi’in ni bpin ni fel’ yangren.

Fare Young Women theme ma tabab ko, “I gag e bpin ni fakay ni bay e galabithir rog u tharmiy, ni bay fag nib thothup ni bay e milekag rog nib manechubog.² Biney e thin e bay aningeg fan nib riyul’. Bin somm’on, i gur e bpin ni fakay ni gab tu’uf. Dariy ban’en ni gara rrin’—fa dam rrin’—nra thilyeg e binem. Gab tu’uf rok’ Got ya gur e bitir rok’ nib thothup. Boech i ngiyal’ ma bay ni darda thamiyed e tu’ufeg rok’, machane gubin ngiyal’ ma bay u rom. T’ufeg rok’ Got ab polo’.³ Gadad e boech i ngiyal’ ma darda thamiyed e binem e tu’ufeg.

Fare Kan Nthothup e ma sunumeg u lanin’dad e t’ufeg rok’ Got ngodad.⁴ Machane, fare gagiyeg ko fare Kan ni Thothup e rayag ni nge “upunguy e tin ba’aray e thamtham nib gel, ni wod e dumomuw, fananikan, … [fa] murus … ni woed ni ngan kay ba grape ni rib fel’ lamen nge ta’abrogon ningan kay e ta’abil. … [Reb lamen] ab gel nga reb.“⁵ Ni ku wod, e ngongol nib kireb nra palog nagdad ko fare Kan ni Thothup, mu’un e denen ngay,⁶ nra momaw’ nag i thapeg fare tu’ufeg rok’ Got ni fan ngodad.

Ku wod, fare thamtham rodad ko tu’ufeg rok’ Got nra achichig ni bachan e tin ni be buchbuch ulan e ni wod e m’ar ko dogur fa m’ar ko laem, nge ku boch ban’en ni bo’or. Ko gubin e pin’ey ni demuturug ko rogon, mulwol ko pi tiyugang’ nib pagan’uy ngak fa gidii’ nib salap ko tiney e rayag nra pi’ e ayuw. Krayag ni gadadra mon’og nag i thamiy fare tu’ufeg rok’ Got ni gadad be fithed ngodad, “Fare tu’ufeg rog ngak Got e bay ni gubin ngiyal’, fa kemus nib tu’uf rog ni fa’anra fel’ fare rran ngog, machane gathi rib fel’ ni fa’anra ba gel e kireb ko fare rran?“

Fare bin l’agruw e tin nib riyul’ e gadad e bay e galabithir rodad u tharmiy, bay e chitimangiy nge chitiningiy.⁷ Fare yalen ni bay e Chitiningiy u Tharmiy e ke yib u dakean ba yi’iy ni Gidii’en Got ko tin tomur e Rran e michuwan’rad ngay. President Dallin H. Oaks e weliy fan ni rib ga’fan e biney: “Tin ni kad filed e tabab ko galabithir rodad u tharmiy. Bin th’abi tolang e athap rodad e ngad boded rad.“⁸

Kemus ni ri buchu’uw e tin ni kan dag ni mornga’agen e Chitiningiy nu Tharmiy, machane n’en ni gadad manang e kan yoloy ni bay ulan fare gospel topic nrayag ni bay u fare Gospel Library application.⁹ Tomuren ni kam be’eg e tin ni bay u rom, garam nang urngin ban’en ni gu manang ni mornga’agen e biney. Gube athap ni nggu nang reb. Sana gamed ni bay reb e pi duwer nge ba’adagdad ni ngam thapeg e pi fulweg. Gay rogon ngan nangfan boch ban’an nib ga’fan e ka bang ko tin ni gadad be fil nib thothup, machane wenig man riy u fithik’ e gonop. Fan e dabi yon’ lon e yi’iy.

Susun nag i nangfan e dabi pii’ e ganop nib ga’ ko pi’nen nib thothup, machane ra fekdad ko tin nde riyul’ fa palog nag e tafney rodad ko tin ni kan mu’ i dag.¹⁰ Wod, fare Tathapeg ni michib nag fapi gachalpen, “thingar um meybil gaed ni gubin e ngiyalʼ ngakʼ e en Chitamangiy u fithingag.”¹¹ Gadad ma yan u wa’en e biney ni yima meybil ngak e Chitamangdad ni bay u Tharmiy u daken fithingan Yesus Kristus ni dayma meybil ngak e Chitiningiy ni bay u Tharmiy.¹²

Ngiyal’ ni tabab Got i turguy e profet, pi’ mat’wonrad ni ngar nonad ngak. Machane gathi yad e yadma sunumiy rogon e yalen “ni [gathiyad e ngar turguyed”¹³ fa ra michib niged e tin ni dawrin dag ni nang. Mu tafney nag fapi thin rok’ Balaam ulan fare bin Kakrom e M’ag, nni pi’ ngak ba bpin ni nge le’ngiy ni nge kireb nag fapi gidii’ ni Isrealities ni nge yib fal’ngin ngak pi u Moab. Me fulweg Balaam ni ga’ar, “[fare Pilung nu Moab] ra pi’ Balak ngog urngin e silber nge gol ni bay u naun rok, ma dabiyag ni nge dab gu fol ko thin nike yog SOMOL ni Got rog ni mada’ ko tin ba’achig ban’en ma gu ra fol riy.”¹⁴ Ku wod rogon e profet ko tiney e rran ni bay e tin ndabiyag ni ngar rrin’ed. Ran par ma gi yibe fith ngak Got ni nge pi’ e yi’iy ngodad nri fan e ran’ey e dani fel. Btu’uf, ni ngad son gad nge mada’ ko ngiyal’ rok’ Somol ni nge dag e pin’ey nib riyul’ rok’ ko dakean e pi n’en ni ke mu’uguliy.¹⁵

Fare bin dalip e riyul’ e bay ko gin somm’on ko fare Young Women theme ni bay “fandad nib thothup.“ Biney e kabang ni rib ga’fan ni be dugliy ko gadad mini’. Ka bang nib thothup “u fithik’ e racha’ rodad,“ ni kad feked rok’ e galabithir rodad u tharmiy,¹⁶ ndariy ban’en nib tu’uf ni ngad rrin’ed. Ireray e n’en ni th’abi ga’fan ni be dugliy ko gadad mini’, ndemuturug rogon ni gadad be dugliy rogon ni gadad ba’adag. Nangfan e biney nib riyul’ e rib ga’fan ngak gubin e gidii’ machane bay ni rib ga’fan ngak e cha’en nib mu’un ko ulung ko tin ni dani ga’fan, fa ulung ni be gathay e gapas ko gidii’, nge ulung nib fekyad. Mu tayed e wun’med e n’en ni th’abi ga’fan ni be dugliy ko gadad mini’ e bay rogon ko fanan nob thothup ni gur e bitir rok’ Got.

Fare bin aningeg e riyul’ e “fare milekag rog nib manechubog.“ Biney e milekag nib manechubog e dabin turuguy ni nge mudugil nga dakendad. Tomuren e yam’, gadadra thapeg e bin ni kad turuguyed nga dakendad nge “falfalaen’ [ni kemus]e bin ni [kad] feked ni ngad thapagned,“¹⁷gadad e milfan fare milekag radad nib manechubog ngodad ni be yan u rogon e tin ni kad mel’egned. Fil ni fare milekag rog nib manechubog rodad be thilyeg ufithik’ e mel’eg rodad. Tayfan fapi m’ag nib thothup ab tu’uf ko biney. Biney kanawo’en e m’ag ir e rogon ni ngad dared nga Krisuts nge bay u daken e tin ni rib riyul’ mab manechubog, ndabiyag ni ngan thilyeg e biney e motochiyel. Dabiyag ni ngad dugliyed rogon e kanawo’ ni ngad dared riy min taga’ ngak Got ni nge tawa’ath nagdad. Ra yibe son nag fapi tawa’ath rok’ machane danur fol ko fapi motochiyel nib manechubog e wod¹⁸ ndariy bang riy, ni wod ni gadad be lemnag nrayag ni ngan math ko stov nib guwal machane kad “dugliyed“ ni dabi yik dowdad.

Sana ga manang ni ku’ug ayuweg e gidii’ ni bay nike m’ar gum’ircha’en. N’en ni gol nagrad e ba’aray ni kan dugliy rogon, pow ko rogon e falay ko m’ar ni ngan rrin’. Dariy fan ni yi manang e biney, boech e gidii’ nib m’ar e ma gay rogon ni nge thileg fare falay ko m’ar ni nge rrin’. Yad ma ga’ar, “Dabug ni nggu fek e falay ni bo’or mit“ fa “Dabug ni ngan sikeng nigeg ni bo’or yay.“ Riyul’, ya ra reb e m’ar ma bay mat’won ni nge duguliy laniyaen’, machane fa’anra ngar raned u reb e kanawo’ ni gathi kanawo’en e taflay nib puluw, ma dabi yib angin e taflay ngorad. Gidii’ nib m’ar gum’ircha’en e dabiyag ni nge mel’eg e tafalay nde fel’ ngak me sul nge yon’ e kireb nga dakean e togta rok’ ko n’en nra buch.

Ka ta’ab rogon ngodad. Birok’ e Chitamangdad ni bay u Tharmiy e kanawo’ ni ke mu’ i dugliy e ireram e bin th’abi fel’ e kanawo’ nib manechubog. Ra beeʼ me rinʼ u rogon ni baʼadag ni nge rinʼ, machane dabiyag ni ngad mele’egned e tin nra buch ni fa’anra dabin leak fare wa’en ni kan dag.¹⁹ Ke ga’ar Somoel, “Ya ra n’en nra kireb nag e motochiyel, ma dar fol ko motochiyel, machane be gay rogon ni’ir e nge mang fare motochiyel, … e dabiyag ni ngar ta’areb gow e motochiyel, ni ku wod ndabiyag ni ngar ta’areb gow e murunguy, justice, nge pufthin.“²⁰ Dabiyag ni ngad thiliyegned wa’en e Chitamangdad ni bay u Tharmiy min turguy e kireb ngak ni bachan e n’en nike buch u tomuren.

Fare bin l’agruw e paragraf ni bay ko fare Young Women theme e be ga’ar: “Gidii’en gachalpen Yesus Kristus, gu ma gay rogon ni nggu bod Ir. Gube gay e yi’iy ni fan ngog mug fol riy mug michib ngak boech gidii’ u dakean fithingan nib thothup.“ Rayag ni nge sum fare mich rodad ngak Yesus Kristus ni yibe gay rogon ko fare mich.²¹ Rayag ni ngad fanayed fare tawa’ath nib thothup “ni ran nang ni Yesus Kristus e fak Got, ma kan kuruth nag ni fan e denen ko fayleng.“ Fa krayag ni ngad thapeged fare tawa’ath nra michuwun’uy ko fapi thin ko gidii’ ni yad manang,²² nge mada’ ko ngiyal’ ni kad nanged. Rayag ni ngad laked wo’en e michib rok’ fare Tathapeg min ayuweg e gidii’ ni ngar bad ngak. Biney e kanawo’, gadad be un ngak ko muruwel rok’.²³

Fare Young Women theme e kabe ul’ul’ ni ga’ar, “Gura sak’iy ni nggu micheg rok’ Got ni gubin ngiyal’ nge fithik gubin ban’en nge gubin yang.“ Gubin gidii’en e Galasia e ba tu’uf ni ngar pired ni yad e mich rok’ Got,²⁴ kemus ni fapi Apostles nge fapi Ragag nge Medlup e kan turuguy ni yad e fapi ta micheg ni kan dugliy u daken fithing Kristus.²⁵ Tafney nag ba gosgos ni ka nog e soccer ngay ni fare goalie e kemus ni be ayuweg fare gol. Fa’anra dar pi’ boech fare team e ayuw, fare goalie e dayibyag rok’ ni yigo ir ni nge ayuweg fare goal ma yadra war ko fare gosgos. Ku wod, ni urngin gubin e gidii’ nib tu’uf ko team rok’ Somol.²⁶

Fare bin tomur e paragraf ni bay ko fare Young Women theme e be ga’ar, “Nap’an ni gube gay rogon ni ngeyag ngog fare n’uf ngalang ko falfalaen’, gube’adag fare tawa’ath ko kalngaen’ mu gu gay rogon ni nggu mon’og ni gubin e rran.“ Bachane fare miligach nge bayul rok’ fare Tathapeg, rayag ni ngad kalngaen’gad, min fil e tin ni kad rrin’ed nib kireb, ma dabin gichig nagdad ni bachan. President Russell M. Nelson e michib nag, “Bo’or e gidii’ ni ma lemnag ni kalngaen’uy e ba gechig. … Machane biney e leam e be yib rok’ Satan. Ma gay rogon ni nge taleg dad ni dabin yan ngak Yesus Kristus, nib saki’iy nibe pithig l’agruw raba’ i paa’, nibe athapeg ma ba’adag ninge gol nigey, me n’ag fan e kireb, bi’ech nigey, pi’ gelngiy, ma’anga’ang, me thothup nag dad.”²⁷

Nap’an ni gadad ra kalngaen’ u fithik’ e yul’yul’, dariy bang fathan nra par, ndemuturug ko mang ere n’en ni kad rrin’ed, demuturug gelingin e kireb riy, fa demuturug gelngin yay ni kad kalngaen’ gad riy.²⁸ Machane oren yay ni yaed be kalngaenʼ mar gayed e manʼaegfan, u fithikʼ e yulʼyulʼ, min nʼaegfan roraed.²⁹ Rib mangil e biney e tawa’ath ni kab rok’ fare Tathapeg, Yesus Kristus!³⁰ Fare Kan ni Thothup era micheg nag ngodad nikan n’agfan e denen rodad. Napan gadadra sug ko falfalaen’ nge gapas,³¹ kireb rodad e ra mʼay,³² ma daki magaf anʼuy ko pi denen rodad.³³

Kara buch ni tomuren ni kan kalngaen’uy u fithik’ e yul’yul’, bay ni, kara tun ay dad. Tun ay e dar yip’ fan ni fare kalngaen’ e dariy anggin machane be dag rogon e gidii’ nib mo’owar. Ma yib e gapas ni bachan e yim manang ni “fare Somoel e ba thil rogon ni ma guy e mo’owar ko gidii’ ni ma tagopuluw.“ Susun ndabi lalangban’ dad ko fare gelngin fare Tathapeg ni nge ayuweg dad ko pi mo’owar rodad ni bachan “nap’an nra non Somol ni mornga’agen e mo’owar, gubin nigyal’ ni ma weliy fithik’ e murunguy.”³⁴

Gin tomur ko fare Young Women theme e ga’ar, “U fithik’ e mich, gura gel nag e tabinaew rog, gura ngongliy e m’ag mug fol riy, gura thapeg e pi gam’in nge tawa’ath ko temple nib thothup.“ Gel nag e nu’un nge gidii’en e tabinaew e bay nibe yip’ fan ni ngan ngongliy fare bin somm’on e tha’ ko yul’yul’, me ul’ul’ e tabinaew ko biney e mich, fa dangay ma ngan sul bayay ngay.³⁵ Demuturug rogon, gelngin e ma yib ko fare mich ngak Yesus Kristus nge fapi m’ag ni yibe ngongliy nib thothup.

Ulan e temple, gadad ma fil ko gadad mini’ nge ggin ni kad bad riy. Ga’ar be’ nu Roma ni kanog i Cicero ngak, “Ra dariy e llowaen’ ko tin nike buch u mm’on nin gargelegem e wod e gechig ni bachan e gur e bitir.“³⁶ Be, riyul’, nike weily marunga’agen e chepin nib kakrom, machane rayog ni ngad ga’nag e lem rok’ nib fel’. Wod ni gadad be par ni bod bugi bitir ni fa’anra danur lemnag e tin nib manechubog ni yibe fil ulan fapi temple. U rom e gadad be chuchugur riy ngak Someol, thapeg ga’angin gelngin fare Kan ni Thothup,”³⁷ ma gadad mang gachalpen fare Tathapeg.³⁸ Nap’an ni gadadra ayuweg fapi m’ag rodad, ma gadadra thapeg gelngin Got ulan e yafos rodad.³⁹

Gube piningmed ni ngam tay ni Yesus Kristus e bay u lukungun e yafos romed mag tay u wun’um fapi riyul’ ni bay ko def ulan fare Young Women theme. Fa’anra gara gay rogon, fare Kan ni Thothup era powi’iyem. Chitamangdad ni bay u Tharmiy e ba’adag ni ngam mang pi fak mag thapeg urngin ban’en ni bay Rok’.⁴⁰ Dariy reb ngay nib ga’ ko biney nra pii’ ngom. Dariy reb ngay nib ga’ ko biney nra micheg ngom. Gab tu’uf rok’ ni rib gel ni ri dan mu nang ma ba’adag ni ngam falfalaen’ ko biney e yafos nge bin migid e yafos ni bayi yib. U dakean fithngan Yesus Kristus, amen.