T’uf nib Thothup ko Tanom Rok’ e Chitamangiy
Fan e machib ko gam’ing nge motochiyel ko re Galasia ney nike sulyarmen e nge ayuweg pi fak Got ni ngar thapeg e yafos min n’uf nagrad ngalang ko bin th’abi tolang e falfalaen’.
Fare tanom ko gospel e be dag fare t’ufeg Rok’ e Chitamangdad nibay u Tharmiy nifan ngak pi Fak. Ni ngad nanged biney, thingarda guy rogon ni ngad nangfan e tanom Rok’ nge pi motochiyel Rok’. Ir ba’adag e Fak nib ga’ ere nike pii’ kemus e Fak ni Ma’agirag Rok’, Yesus Kristus, nike mang e Tathapeg nge Tabayul rodad, ni nge gafgow nge yim’ nifan dad. U fare Galasia e gathi kemus ni fan e tin ba’aray e gidii’ nib sulyarmen, bay e ganop nib thil marunga’agen e tanam Rok’ Chitamangdad nibay u Tharmiy. Be pii’ ngodad reb e rogon ni ngad sapgad e fan ko yafos ney, fare pufthin nib thothup ni ra buch tomuren ney, nge pi’nen nib machalbog nib thabi tolang ni ra buch ngak gubin e bitir ku Got.
Gu ba’adagmed, brothers nge sisters. Gu ba’adag ni gubin e bitir ku Got. Napan nike fith e duwer ngak Yesus, “Bin ngan e motochiyel e ir e th’abi ga’ u fithik’ e motochiyel?” Ke fil ni ngad t’ufeg Got nge pi bugul yoror e bin somm’on e motochiyl nib ga’ rok’ Got.1 Pi fanow nem e bin somm’on bachane yow ma pinningdad ni ngad gelnag e ya’el napan ni ngad gayed ya’an ni woed e t’ufeg rok’ Got. Gube athap ni gadad gubin ni bay e nangfan nib mangil marunga’agen e pi motochiyl nge machinb nib t’uf ni kar fal’eg e Chitamangdad nibay u Tharmiy nge Fak ni, Yesus Kristus, ulan fare Galasia rok’ Yesus Kristus ni fan ko gidii’en Got ko Tin Tomur e Rran. Pi’nen ni gube yog e be guy rogon ni nge tamilang nag ma urogon e t’ufeg rok’ Got me weliy fapi machib nge motochiyel nib thothup ko Galasia.
I.
Bay e ganop ni de riyul’ marunga’agen e gechig nira yib tomur e yafos ney i ir e gidii’ nib fel’ ra dared nga tafen ni kanoeg tharmiy nge gidii’ nib kireb ra dared nga tafen ni kanoeg infierno. Biney e ganop ni de riyul’ be lemnag ni kemus la’agruw e tafen nge fa’an e bee’ dabi fol gubin e motochiyl thingari fol ko tharmey b’tuf ni nge yaen nga infierino.
Chitamangiy nibay u Tharmiy nib sug ko t’ufeg e bay e tanam rok’ nib fel’ ni fan pi fak. Pi machib ko fare Galasia rok Yesus Kristus nike sulyarmen ma fil ni gubin e pifak rok Got—madako kemus ni rib buchuw ni dabgu weliy—ra dared nga boech e gil’il’ungun ko rir.2 “Pire’ e senggil ni bay u lan e pi na’un rok e Chitamag,”3 Ke fil Yesus. U dakaen e yi’iy ko ngiyal’ daba’ gadad manang e pi na’un ney ni bay u dalip e pi gil’ilungun ko rir nib thil. Ko bin Tomur e Pufthin gadaed gubin ma fek e pufthin nag nifan ko fapi murwel rodad nge fapi ar’ar’ u gum’ircha’dad.”4 U mm’on ko binem, thingarda fek e gafgow nifan e pi denen ndawrda kal’gad ngaen’dad. Fapi babyor nib thothup ma weliy biney ni dakiry e balyang.5 Ma tomuren e Tapufthin nib mat’aw ra pii’ ngodad e tafen ulan ta’areb e gali gil’i’lungun nib rir ney. Ere, gadad manang nifan ko pi yi’iy ko ngiyal’ daba’, gubin “gidii’ ra fek e pufthin … , nge gubin bee’ ra thapeged bachane pi murwel’ rorad, e tafen rorad, ulan e pi na’un ni ke fal’eg.”6
Fare Somoel ke mel’eg ni de weliy bo’or marunga’agen l’agurw e pi gil’il’ungun nib rir ney. Nib thil, fare Somoel nike weliy bo’or marunga’agen e gil’ilungun nib rir nib thapbi tolang, nge fare Bible be weliy ni “Yal’ e bay e birok’ e gamog.”7
Ulan fare “celestial” fel’ngin8 bay dalip e dodow fa tafen.9 Rib thabi tolang ko binem ni bay e tolang ko yungi falang ulan fare gil’ilungun ni celestial, nge ragnad manged woed e Chitimangdad nge Fak’ ni, Yesus Kristus. Nibe ayuwegdad ni ngad fal’eg e pi rogon woed Got ngodad nge thilyeg e rogon rodad ere ngad nanged e tin nib thothup rodad, fare Somoel ke yi’iy ngodad fapi machib nge ke fal’eg e motochiyel nibay e daf nib manechubog. Ireray ni ngad machib ulan Fare Galasia ku Yesus Kristus nifan ko Gidii’ rok’ ko Bin Tomur e Rran bachane e fan ko pi machib nge motochiyel rok’ e Galasia nibe sulyarmiy ney nima ta’ermadliy e pi fak Got ko e thap ulan e rir nib celestial nge, ni rib ga’, ni fan ko pug ngalang ni thabi tolang.
Fapi micheg ni kan fal’eg nge pi tawa’ath kan micheg ngak e gidii’ nibay e mich ulan e pi temple ku Got ir ga’fan. Pinn’ey ba weliy fare toey ko temple u dakaen gubin a nam, ni ke weliy e choir ke tang nib pidorang. Gali cha’ ma balyang nifan nem, ni dabi nanged fan e pi micheg nge pi gam’ing ko fare temple ma powi’iy dad in nga pug ngalang. Kemus rangad nanged fan biney ulan e ganop nib riyul’ ko dalip e pi gil’il’ungun nib rir. Bachane tu’ufeg nib ga’ rok’ Chitimangdad nibay u Tharmiy ni fan e pifaak ni gubin, ke pii’ boech reb e pi gil’il’ungun nib rir—ni Elder Quentin L. Cook ke weliy fowap—ma gubin nem nib sobut e kab mangil ko rogon ni be leam nag e gidii’.10
Fare Bayul ku Yesus Kristus e ra yib ngodad ni gubin. Nike yi’iy ngodad Irma “tayfan e Chitamangiy, nge thap gubin e pi’nen nike fal’eg ko pa’.”11 Thap ney ra yib u pi gil’il’ungun nib rir nib thil. Gadad manang nifan ko pi yi’iy ko ngiyal’ daba’ ni “gubin pi gil’il’ungun ba’ e motochiyel.”12 Rib ga’fan:
“Fa’an ni dabi fol e motochiyl ko fare gil’il’ungun nib celestial dabi thapeg e rir ko celestial.
“Fa’an ni dabi fol e motochiyl ko fare gil’il’ungun nib terrestrial dabi thapeg e rir ko terrestrial.
“Nge fa’an ni dabi fol e motochiyl ko fare gil’il’ungun nib telestial dabi thapeg e rir ko telestial.”13
Ko reb e thin, fare gil’il’ungun nib rir ni ngad thapgad ulan fare Pufthin ni bin Tomur be mel’eg udakaen e tonom ko Chitimangdad nibay u Tharmey. U tan e tonom ney ni bay boch i pi gil’il’ungun ere gubin e Fak rangar feked e gil’il’ungun ni ngar “pared.”
II.
Fapi machib nge motochiyel ko fare Galasia rok’ Somoel nike sulyarmen be tay e tin riyul’ udakaen e rogon ni ngad nanged ni gubin kemus ufithik e ganop ko tanom ko Chitimangdad nibay u Tharmey nifan gubin pi Fak.
Ere, ngad liyorgad e gelingen ko mel’eg rok bee’. Bo’or e gidii’ manang e ngongol nib ga’ rok e Galasia nima ba’adag e mat’awon ko tiliw. Ngongol ney ra buch bachane tonom rok e Chitamangdad nibay u Tharmiy. Gube guy rogon ni nga ayuweg gubin e pi Fak—gathi kemus e chongin rodad—nibe thap e falfalaenl nifan e mat’awon ko mel’eg.
Woed rogon, bochi yay gube fek e duwer ni mangfan ngad pii’ fapi missionary ngak bo’or e pi nam, ni aram rogon e gidii’ nib Christian. Kad fek e duwer ni mang fan gadad be pii’ bo’or e ayuw ngak e gidii’ ni dakiry e chon ko Galasia rodad ne dabi u biney ko e muruwel ko pi mission. Gadad be rin’ed biney bachane fare Somoel nike fil nogdad ni ngad ba’adag gubin e Fak ni woed e walageg, nge gadad ba’adag ni ngad pii e pi’nen ko ya’el nge pi’nen ko fayleng ngak gubin e gidii’.
Fapi machib nib manechubog ma pii’ e sap nib thil marunga’agen e bitir. Udakaen e sap ney rangad guyed e chugol ko pi bitir ir e yang ko e tonom nib thothup. Binir e ngongol ni rib falfalaen’ nge thothup rorad ni bay e gelingrad ni ngar rin’ed. Ere, kad thapeged e motochiyel ni ngad fil’gad nge togopluw nifan ko fapi kenggin nge ngongol nima pii’ rogon nib thabi fel’ e tugul nge falfalaen’ ngak e bitir u tan e tonom rok’ Got.
III.
Me tomur, bo’or e gidii’ manang Fare Galasia ku Yesus Kristus ni Fan ko Gidii’en Got ko Tin Tomur e Rran ir e Galasia nifan e tabinaew. Machane bo’or e gidii dabda nanged e tin riyul’ e pi tha’ ko tabinaew dabi puth tomur e yafos. Pi tha’ nib manechubog ir baga’ fan ko machib rodad. Muruwel ko fare Galasia nike Sulyarmen e nge ayuweg gubin pi fak Got ni ngar thapeged e n’en ni ba’adag Got ni ngar boded. Udakean fare bayuliy ko fare Bayul rok’ Kristus, gubin e gidii’ nrayag ngak e yafos ni manechubog (bin th’abi tolang e falfalaen ulan e celestial), ni wod rogon Chitiningiy Eve ni yog ’“ni Got e pii’ ngak e pi’in ni kar fol gad.”14 Iraray ni nge gel ko thap. President Russell M. Nelson ke pugurandad ni “ulan e tonom rok Got nib machalbog, thap ir e ba’nen nifan yigo’ ta’ bee’; [machane] n’uf ngalang ir e ba’nen nifan e tabinaw.”15
Ni rib ga’fan e yi’iy rok Got ngodad ni ngad thapeg e n’uf ngalang udakaen e yul’yul’ rodad ngak fapi m’ag ko mabgol u thilin e pumo’on nge ppin.16 Binir e machib nib thothup ma ir e fan ni ngad fil e “dugliy dowem e ir ga’fan e yang ko e bee’ ni nge manag ir nge fan rok’ umon e yafos, yafos ney, nge manechubog.”17
Aram fan fare Somoel ke yoeg ngak e Galasia nib sulyarmin nima togopluw e machib rok’ e bee’ nge motochiyel ko nam ni ngad thilyeg ko machib Rok’ marunga’agen e mabgol ko pumo’on nge ppin nge togopluw e thilyeg niba balyangan’ fa kirebnag e tin nib thil u thilin e pumo’on nge ppin.
Fare daf ko machib ni fan biney rok’ fare Galasia nike sulyarmen ma fek e damomuw bo’or yay. Gadad manang e binir. Tonon rok’ e Chitamangiy nu Tharmiy e ke pag ni bay fare “togopluw ko gubin banʼen,”18 ma Mo’oniyan’ e bay ni kabang ko biney e tonom ni rib ga’fan. Nge ir ba adag kireb nag milekag nga yafos ngalang udekean kireb nag e gabwol, dariy e gargeleg e fak, fa kirebnag e tin nib thil u thilin e pumo’on nge ppin. Machane, gadad manang u reb e rran, e fan nib thothup nge tonom rok’ e Chitamangiy nibay u Tharmiy e dabi thil. Tin nibe buch ko gidii’ e ma thil, ma tonom rok’ Got e micheg nra borran ngay, pi’in ni ur koled folen fapi m’ag rorad e yadra thapeg urngin fapi tawa’ath ni kan micheg ni yira thapeg.19
E machib nib mangil nib thil ngodad nira ta’ermadliy ni fan ko e yafos nib manimus, “nib thabi ga’ ko gubin e tawa’ath ku Got,”20 i ir fare 1995 proclamation marunga’agen e tabinaew.21 Thin riy e, riyul’, nib thil ko fapi motochiyel rodad e chiney, rogon ni yibe rrin’, nge rogon ni yibe yog, ni wod e gidii’ ni yad be par u ta’abang ni darwi m’ag pa’ fa rogon e mabgol ni l’agruw e pbin riy fa pumo’on riy. Gidii’ ndar nangfan e biney e tonom rok’ e Chitamangiy ni fan ngak pi fak e bayra lemniged nike m’ay fa ke thil e biney e motochiyel. U reb e rogon, gamad be micheg ni fare bugithin nifan e tabinaew, e ke sunmiy u dakaen e pi machib ni dabi thilyeg, ma weliy marunga’agen e tha’ ko tabinaw nibay e mon’og nib machalbog nib ga’fan ra buch.
Binem irra fan ko machib nib thil nge motochiyel rok’ fare Galasia rok Yesus Kristus ni fan ko Gidii’en Got Rok ko Tin Tomur e Rran.
IV.
Ulan bo’or e pi tha’ nge pi’nen u yafos ney, gadad ma fosgad ni bay i tin nib thil. Gadad e gachalpen Yesus Kristus ma thingarda t’ufeged e gidii’ rodad, thingarda pared ufithik e gapas ngak e pi’in ni dabda thapeg e mich ni woed gadad. Gadad gubin e bitir ku Chitimangiy nibay u Tharmey nib t’uf. Nifan gubin dad, ke sunmiy e yafos tomuren e yam’ nge, tomur, ni bay e gil’il’ungun nib rir. Got ba’adag ni ngad guy rogon ni ngad thapeged e tawa’ath nib thabi tolang napan ni ngad koel e pi motochiyel, pi micheg, nge pi gam’ing nib thabi tolang, nima buch ulan e pi temple nib thothup niba toy ulangab e feylang. Bt’uf ni ngad pii’ e pi’ney nib riyul’ nifan machalbog ngak reb e bee’. Machane ufithik e t’uf thingarda pii’ ngak gubin e buguliyoror rodad, bt’ut ni ngad m’agaen’ e meleg rorad. Woed e profet ke fil u lan fare Babyor ku Mormon, thingarda miliyed yaed nga m’on, ni bay “e t’ufeg rok’ Got ngak’ gubin e gidii’.”22
Woed President Russell M. Nelson ke yog bin tomor e mu’ulung: “Dariy reb e ngiyal’ ulan e chep ko feylang napan e ganop ko fare Somoel rodad e rib gaa’fan ngodad nge peth ngak gubin e gidii’. … Rib gaa’ e gelngin e machib nib machalbog ku Kristus. Ma thilyeg e yafos ngak demuturug e bee’ ni ra nanged fan mra gay rogon ni ngar tay ulan e yafos rok’.”23
Aygun tayed e machib nib thothup ulan e yafos rodad, gube meybil u dakean fithngan Yesus Kristus, amen.