Gin owchdad ngak Kristus nge Gospel Rok’
Nge par u wun’dad e pi n’en ni ke guy owchdad, nge tin nike thamiy gum’ircha’endad ni be ggin owchdad riy ngak fare bayul rok’ fare Tathapeg ni gafgow riy.
Bay reb e fagar rog ni be’ ni rib mangil, be’ ni rib fel’ lolgan ko sukul, nike mu’ ko muruwel ni’i moy ni be’ nima sensey, be’ ni bo’or e babyor nike yoloy, ma ka be’ nib yul’yul’ nima leak Yesus Kristus. Ma milekag ko farengi Nam nib Thothup ni bo’or yay nima un ko fapi mo’olung, fa yarmiy babyoren e sukul ko tin ni yibe gay mornga’agen, fa gagiyeg nag e gidii’ ko gin ni ngar ranod ngay. Rogon nima yog, gubin ngiyal’ nra milekag ko fare binaew ni yaen Yesus riy, ma rima falan’ ni bachan e tin ni be fil nib be’ech, ni be gin owchen ngay, mornga’agen fare Tathapeg, mornga’agen e michib rok’ u fayleng, nge ggin ni ilaal riy. Gin owchen e fagar rog nra weliy mornga’agen e tin ni ke fil ko farengi Nam nib Thothup e ka be af boch ngog, ma biney e fel’ e ke par ni ka bang ko tin nike mu’ i rrin’ ni rib fel’ ni ku wod e sukul rok’ ni yan riy ko yafos rok’.
Napan ni kug motoyil ngak nge tin nike buch rok’ ma guma thamiy gelngin fani tu’uf e pin’ey rok’ nibe weliy, ma ri guma lemnag e tin nib thothup, ni wod, nrayag ni ngad thamiyed fa susun ni ngad thamiyed ko fare gospel rok’ Yesus Kristus ni yibe fil nge rogon nra thilyeg dad nge milekag rodad i yean ko fare yafos nib manechubog. Fare leam ni gube weliy mornga’agen e ir fare thamtham ni yima thamiy u gum’ircha’ey, gin owchey, fa wod fare n’en ni be gin owchey ngay ko gidii’ nike tay ni fare Tathapeg e bay u lukungun e yafos rorad nge fapi machib rok’ ma yad ma guy rogon nima ayuwegrad ko yafos rorad. Biney e thamtham ko leam, e be thogthog nag fare Kan ni Thothup, nibe pii’ e falfalaen’ ko rogon ni yibe ayuweg e yalen rok’ Kristus.1
Fapi thin nib thothup e bay kanawo’en e biney riy ko rogon e biney e thamtham niba m’ug. Wod fare, profet i Isaiah, ni falfalaen’ ni bochan e n’en ke rin Somol.2 Ma pi’in ur motoyilgad ko thin rok ulan e synagogue u Capernaum ni kar gin gad ngarogon e machib Rok nge ni bod be’ ni bay gelngin e thin rok.3 Ri kab ta’areb rogon ko fare thamtham ni yib ngalan gum’ircha’en Joseph Smith nap’an ni be’eg fare Bible u bin somm’on e guruy ko James, ni powi’iy ni nge thapeg e gonop rok’ Got.4
Pi walageg ni gamed ba tu’uf rog, ngiyal’ ni gadadra gin owchdad ngak Kristus nge Gospel Rok’, ra gel e falfalaen’ rodad, mara passig an’uy ko muruwel rok’ Got, ma gadadra guy paa’ Somol ko gubin ban’en. Mara ul’ul’, nran fil e thin rok’ Got era gel angin; meybil rodad, nra gel fan; liyor rodad, nra gel e fol riy; pigpig rodad ko gul’il’ungun Got, nra mom mab fel’. Gubin e pi ngongol nima yib ni bachan fare ayuw nibe yib u daken fare Kan ni Thothup nibe ul’ul’ ko yafos rodad.5 Aragon, fare mich rodad ko fare Tathapeg nge fare Gospel rok’ e ran gel nag, ni Kristus irbe par nib fos u fithik’ag,6 me par e yafos rodad ”nib to’ar nga fithik’ Kristus, mi i gel i yan e mich romed ngak, … mu um pininged e magaer ngak.”7 Fa’an gadadra pared u rogon ney, gadad ra gel fare thothup rodad nra ayuwegdad ko mul ngalan e lup’ ko tafney ndariy lanin’uy riy nib thothup.
Biney e tafney ndariy lanin’iy riy e bay nga tanggin e tin ba’aray ban’en nike m’ay e falfalaen’ rodad ngay ni ngan un ko gospel rok’ Somol. Ni tabab napan gadad ba thamtham ni kad filed gubin ban’en nge ni bay gubin a gonop nge tawa’ath rodad ni ba t’uf dad u lane a yafos ney. Biney e thamtham nikan gaman riy, e wod, nra l’igindad ngan thamiy ni fapi tawa’ath ko gospel e dariyfan, ma aram nra tabab i yan, ni gadadra pag i fil e tin nib tu’uf ko fare gospel rok’ Yesus Kristus8 nge fapi m’ag ni kad mu’gad i fal’ag. Nira buch, ni gadad be palog nagdad ngak Somol; nibe mo’owar nag ni ngad ”Motoyil Ngak,”9 ni gadadra thil ma dabkin thamiy e tin th’abi fel’ ko muruwel rok’. Marwar ndemuturug marunga’agen e pi’nen nib riyul’ kad thapeged nira ning ko tafney rodad nge gum’ircha’dad, nibe mom nagdad ko lumel ko fare to’ogor.10
Pastor Aiden Wilson Tozer, e cha’ ni ke yoley nge e cha’ ku Got, key yoley, “Thamtham nikan gaman riy e ra kireb nag a gel nag nib thothup.”11 Biney ni ke buch ngak e gidii’ ku Nephi tomuren fare gargeleg ko Kristus? Ra ”tabab i waer iyaen e balyangaenʼ ni yaed be tay ko pow nge maʼangʼang nu tharmiy, … [mar maʼew] niged laniyaenʼraed ko gubin e pinʼen ni kar rungʼaged ma kar guyed.” Ere Moʼoniyanʼ e ”maʼew nag oewchraed me wawliyraed nga orel nge michaenʼraed ni fapi machib rokʼ Kristus e ba meechiyang mab mʼay fan.”12
Pi walageg, fare tu’ufeg rok’ nib polo’ ma darma m’ay ma manangdad,13 ke mu’ fare Tathapeg i ngongliy rogon ndabin mul ngalan e lup’ ko tafney ndariy lanin’uy riy nib thothup. Ke pinning rok’ Tathapeg ma pii’ ngodad e sap nib ga’, napan ni ngam lemnag marunga’agen e fayleng rodad nib mo’omaw, ”Mu fil rog, mag motoyil ko fapi thin rog; mag yaen u fithik’ murunguy ko fare Thothup rog, mara par a gapas rog rom.”14 Napan ni gadadra thapeged biney pinning rok’ fare Tathapeg, ma aram ni gadad be dag e sobut’aen’, gadad be dag ni ngan fil ngodad, nge athap ni yi ba’adag ni ngan bod.15 Pinning ney ni tay e bu’un pigpig Ngak nge pii’ ayuweg ngak e pi fak Got “u polo’ i gum’ircha’raed, tafney nge gelingdad.”16 Luk’ungun e milekag rodad, e bay, fagli motochiyel riy ni th’abi ga’: thangri t’uf rom Somol ni ir e Got rom u polo’ i gum’ircha’em ma thangri t’uf rom e en ni buguliyoror rom.17
Biney e kabang ko fare Tathapeg nib thothup ni pow riy ko gubin ban’en ni rrin’ ko napan e machib rok’ u fayleng.18 Ere, napan ni gadadra fal’eg u fithik’ e yul’yul’ ni ngad sapgad ngak min fol ko rogon wo’en nib polo’ mab fel’,19 ma rayag ni gadadra chuchugur ngad nanged salpen. Mara falfalaen’dad ngay ma gadadra a’dag ni ngad rrin’ed ni wod rogon ni susun ni nge par e yafos rodad, fa rogon wo’en ni ngad ted, nge rogon fapi motochiyel ni ngad laked rogon. Ma gadad ma thapeg boch e llowaen’, gonop, ngongol nib thothup, nge murunguy ngak Got nge bugiliyiror rodad.20 Rayag ni nggu micheg ngon ni rogon nrayag ni ngad thamiyed fare gagiyeg nge tu’ufeg rok’ fare Tathapeg e ran gel nag ulan e yafos rodad, me gel nag e mich rodad, ma gadadra a’dag ni ngad rrin’ed e tin nib mat’aw, mara pi’ e athamgil ngodad ni ngan pigpig ngak nge ku boch e gidii’.21 Ul’ul’ ngay, og nag e magar ko fapi tawa’ath nge tin nib momaw’ nibe buchbuch rodad u fayleng ere par ni kabang ko liyor rodad nib thothup.22
Pi tafagar rog, gubin e pin’ey nima gelnag e leam rodad nib thothup ko fare gospel mare fekdad ni ngan ayuweg fapi m’ag ni kad ngongliyed ngak Somoel—ndariy fan ni gadad bay u fithik’ e lumel nge gafgow nibe yib ngodad. Machane, fa’anra ke buch e tiney, thingarda duruwʼiyed gimed ko thin rokʼ Kristus,23 ni yibe par ni karimus ni yibe sap ngak e Chitamangdad nibay u Tharmiy nge Yesus Kristus min par ni yibe gay rogon ni ngan rrin’ ni wod e pin’en ni yow ma rrin’.24 Ul’ul’ ngay, nib tu’uf ni ngad chuchugur nigey ngak u daken e kalngaen’,25 ni yibe gay ni nge n’agfan e pi kireb rodad nge gelngin e buyul rok’ ulan e yafos rodad ma yibe ayuweg fapi motochiyel rok’. Somol e micheg nag nra powi’iy dad ni fa’an gadadra pagan’ ngak u polo’ i gum’ircha’en dad, ngu’um leamnag Somol u fithik’ urngin ban’en ni ga be rin’ ma ri dab mu toer ko tin ga be finey ni ga manang.26
Kug mada’ nag e pumo’on ni dawri n’uw napan, fithingan e Wes, nge ni ke yib nga conference ni daba, ni thapeg e mulwol rok’ Kristus nge fare gospel rok’ ma aram ni tabab nge gin owchen ko tu’ufeg rok’ u tomuren 27 e duw ni palog nag ir ko fare kanawo’en e m’ag. Ke yog ngog ni borran riy me non e missionary ngak u Facebook, Elder Jones, nikan dugliy ni nge gagiyeg nag e ggin’en ni bay Wes riy u mm’on ni nge yan ko ggin nikan mu’ i dugliy ngak u Panama. Napan ni yan Elder Jones ko Facebook rok’ Wes, dani nang ni i moy ni reb e member ko Galasia, ke thamiy fare Kan ni Thothup me nang ni thingari non ngak Wes. Papay nag ir nge rrin’ e biney ni thamiy. Ke gin owchen Wes ngay ko biney nike buch me nang ni Somol e dawri pagtalin ndemuturug rogon nike palog nag ir ko fare kanawo’en e motochiyel.
Ko ngiyal’ nem, me tabab Wes nge fagli missionaries ko numon. Elder Jones nge companion rok’ kar pigpig gow ni gubin e wik ma yow be pii’ e mulwol nib thothup ni ayuweg Wes nge fal’ rogon ko fare ngatngak fare Tathapeg nge fare gospel rok’. Fulweg fare nifiy ko mich rok’ nib riyul’ nge fare tu’ufeg rok’ fare Tathapeg ngak. Thamiy Wes fare gapas nima yib ko fare Ta’ayuw me yib gelngin ni nge sul ko fare ulung. Ke yog ngong ni biney ni buch rok’ e fulweg ko tin nib thothup nge tin nibe thamiy ulan e yafos rok’ me ayuweg nge chuweg e fananikan nike yan bukun e duw nike par rok’ ni bachan e pi n’en nib momaw’ nike buch rok’.
Ke par fare tafagar rog ni’i sensey ke yaliy, bay ban’en ni rib mangil ma rib fel’ ni ngan fil ni mronga’agen Yesus Kristus nge gospel rok’.27 Somol e ke micheg bugi tawa’ath ni rib fel’ nifan e gidii’ ni gubin, ni gadad mu’un ngay, ni yad be gay rogon ni ngar filed mornga’gen ma yad be gay rogon ni ngar feked e thin rok’ ngalan e yafos rorad. Ga’ar ngak Enok, ”Bay [i par] e Thothup rog nga daken nem, gubin e thin rom e bay gu rrin’, ma bay mpar ni baga’ lungum ko fapi burey, ma fapi lul’ ni bay thil e gin nib sor ngay; ma bay par ni ga bay rog, nge gag ngom.”28 Udakaen e pigpig Rok’ ni King Benjamin, ke ga’ar, ”Ngan piningmed ni bitir rokʼ Kristus, ni pagael ni fak, nge ppin ni fak; ya musap gaed, biney e rran e kam thap gaed ngakʼ kam chitamangyed; ya kamoeged ni pi gumʼirchaʼ romed e kethil u dakean e mich romed u fithingan; ere, kam sum gaed rokʼ ma kam manged pagael nge ppin ni fak.”29
Ere, napan ni gadadra ul’ul’ min gay rogon i fil rok’ fare Tathapeg nge wo’en Rok’, ri gube micheg ngom, u dakean Fithingan, ni fapi muruwel Rok’ e ran yoloy nga laniyan’ dad nge gum’ircha’dad,30 ni gadadra bod ir, ma gadadra un ngad dared u barba’ rok’.31
Pi walageg nib btu’uf rog, gube meybil nag ni ngad pired ni ngan ngat ngak Yesus Kristus nge fare tu’ufeg rok’, ni rib polo’, mab manechubog. Nge par u wun’dad e pi n’en ni ke guy owchdad nge tin nike thamiy gum’ircha’dad ni be ggin owchdad riy ngak fare bayul rok’ fare Tathapeg ni gafgow riy, nrayag ni nge gol nag dad ko m’ar rodad nib thothup nge tin nibe amith nagdad me ayuwegdad ngad chuchugur gad ngak. Gin owchdad ko fapi tawa’ath ni falel’ ni bay ulan paa’ e Chitamangiy nike mu’ i ngongliy rogon nifan ngak e pi’in nib yul’yul’:
”Fare gil’ilingun e gil’ rom nge fare taw’ath riy’ e tawath rom, nge amrogon e fla’ab nib manemus.
“Ma enra thapeg gubin ban’en u fithik’ e og nag e magar e ran fla’ab nag.”32
Yesus e ir fare Tabayul ko fayleng, ma ireray e Galasia Rok’. Pin’ey ni gube micheg ni rib riyul’ ko pi n’en ni ngan ngat ngay, nib thothup, ma rib fel’ u dakean fithingan fare Tathapeg, Yesus Kristus, amen.