13:36

Yesus ni yibe Leak: En Nima Pii’ e Gapas

Rok Elder Neil L. Andersen

Ko fare Ulung ko fare Ragag nge L’agruwi Apostle

Pii’ e gapas e dani tawasor; ya be pi’em nga kanawo’en fare Tathapeg.

Brothers nge sisters, tin ni be buchbuch rodad ko tiney e rran u fayleng, ni wod e tuguthin, nge, ni bo’or e tin nibe, gafgow, machane kab sug gum’ircha’endad ko magar ko fare Tathapeg nge fapi tawa’ath rok’ ngodad nib manechubog ko fare gospel rok’ Yesus Kristus nike sulyarmen. Btu’uf rodad mab pagan’dad ngak, ma gamad be meybil nag ni gadadra leak ni gubinfen.

Gafgow nibe Yib ko Social Media

Gelngin fani fel’ fare internet ni’ir e reb e tawa’ath machane ka bay kirbin, ko ngiyal’ ney nike gel e thil u fayleng.

Biney e fayleng nib sug ko social media ni gubin mornga’agen ban’en e bay riy, wod ni laman ta bee’ e rayag ni nge garar ni rib pay u langgin. Biney e lam, e ndemuturug ko briyul’ fa bban, demuturug ko fel’ fa og thibingin ban’en, demuturg ko mangil fa ba kireb, e pay ni be garar u daken e fayleng.

Thin ko social media nib fel’ e gathi rima m’ug ya’an ni gubin ngiyal’, machane tuguthin nge damomuw e be chub ulan teldad ni gathi ta’abiyay, ni demuturug ko thin ko am, fa gidii’ ni be aw ko nius, fa rogon e tafney rok’ bee’ ko fare m’ar nike garar u daken e fayleng. Dariy bee’ fa ban’an, nib mu’un fare Tathapeg ngay nge fare gospel rok’, ni darma gafgow ni bachan e tin nibe buch nibe yib u lingan e gidii’.

Mang Bee’ nima Pii’ e Gapas

Fare Michib ni tay Yesus u daken e burey e ba mulwol nifan ngak gubin e gidii’ machane rib ga’ nifan ngak pi gachalpen, ni gidii’ nike me’eleg ni ngar laked kanawo’en.

Somol e michib nag rogon ni ngan par, ko ngiyal’ nem nge ngiyal’ ney, u daken e fayleng nib bo’or e tuguthin riy. “Felan’ e pi’in yad ma guyrogon ni nge aw e gapas u thilin e girdi’, ya ra yog Got ni yad pifak.”¹

Fare shield ni’ir e michan’ rodad ngak Yesus Kristus, ngad pired ni gadad e gapas u thilin e gidii’, nibe gay rogon—nibe yip’ fan,—urngin gan e gat’ing ni be yik’ ni be pag Fa’anem nib Kireb ngodad.²

Fa’an gadadra rrin’ e birodad e muruwel, fare micheg rok’ e ran piningdad ni “pifak Got.” Gubin e gidii’ u fayelng e bugi “pifak”³ Got, machane ra ngan pining fithingay ni “bitir ku Got” e bo’or fan, nib thil. Napa ni bay dabad ngak Yesus Kristus ngad ngongliyed fapi m’ag ngak, ma aram ni kad manged fapi “gidii’ rok’“ nge “tafna’ fare gil’il’ungun Got,⁴ “piningmed ni bitir rokʼ Kristus, ni pagael ni fak, nge ppin ni fak.“⁵

Uw rogon e pi’in yad ma guyrogon ni nge aw e gapas ni ngar achig niged fapi gan e gat’ing ni be yik’? Gathi ngan par ni dabin non ngak e pi’en ni be rrin’ e kireb ngodad. Machane, ngad pired ni gadad ba yul’yul’ ko mich rodad, ma gadad weliy e tin nib michuwan’dad ngay, machane ni palog nigey ko damomuw nge tin togan ban’en.⁶

Dawri n’uw napan ngay, bugithin ni yog bee’ ni mornga’agen e Galasia ni rib ga’fan, fithingan i Reverend Amos C. Brown ngak, reb e tiyugang’ ni ma ayuweg e mat’won e gidii’ ni bee’ ni’ir e padrey ko fare Bin Dalip e Galasia ko Baptist u San Fransicso, ni ga’ar:

“Gube tayfan e n’en nike buch nge rogon nibe lem e chan’ey nike yoloy e tiney e thin. Machane, gathi ta’areb rogon e lem romow ko rogon ta’aban’en.”

“Machane ku thi’eg ni ireray reb e falfalaen’ ulan e yafos rog ni rib gel ni kug nang ni pi tiyugang’ ney [ko Galasia], nib mu’un President Russell M. Nelson ngay. Ya yaed, ko rogon ni gube sap ngay, e yad e bin kanawo’en e tiyugang’ nth’abi tu’uf ko nam rodad.”

Me ul’ul’ nge ga’ar: “Rayag ni ngad ul’ul’gad ngad togopuluwgad ko tin nibe buchbuch. Rayag ni ngar ul’ul’ ngan par ni dabin guy e tin nib fel’ nibe buchbuch e chiney. … Machane tiney ni yibe rrin’ e dabi gol nag thilin e nam rodad nibe fo’od. … Wod rogon ni michib nag Yesus, dabiyag ni ngan chuweg e kireb ko boch e kireb. Ngad tu’ufegned ma gadad runguy e gidii’, nib mu’un e gidii’ ngay ni gadad be lemnag ni’ir e to’ogor rodad.”⁷

Reverend Brown e bee’ nima guyrogon ni nge aw e gapas u thilin e girdi’. Ir e be ayuweg i achig nag fapi gan e gat’ing ni be yik’. Bee’ nima guyrogon ni nge aw e gapas u thilin e girdi’ e darma tabab nag e kireb; ya yad e yad ma pingeg laniyaen’ e gidii’ ni wod kanawo’en fare Tathapeg.⁸

Mang e be pii’ ngodad fare ayuw, ko gapas, u thilin e gidii’, nge pilig urngin gan e gat’ing ni be yik’ ni be yib ko tin nib riyul’ nib tu’uf rodad? Gelngin e biney e ma yib u daken fare mich rodad ngak Yesus Kristus nge fare mich rodad ko fapi thin rok’.

“Ma rafelʼ waʼathmed u napʼan nra gathibthib me gafgow nagmed e gidiiʼ, … maroeged gubin mit e kireb nib togopluw ngomed nigoʼ baen, ni bachag.

“… Ya bay labgen ni ba ga’ ni fan ngomed ni kan tay u tharmiy: ya ireray rogon e gafgow ni i tay e girdi’ ngak e pi profet ni yad ba kakrom ngomed.”⁹

Fan nib Ga’fan e Me’eleg

L’agruw e yalen nima gagiyeg nag e a’dag rodad ni ngan mang e gapas u thilin e girdi’.

Bin somm’on, ke pii’ e Chitamangdad nibay u Tharmiy nra bee’ mab puf rogon ni nge rinʼ nrogon ni baʼadag, nra bee’ me mel’eg e kanawo’en nrogon ni ba’adag.¹⁰ Biney nrayag ni gur rom ni ngam me’eleg e tin ni ga ba’adag e ir reb fapi tawa’ath rok’ Got ni th’abi gaa’.

Bin l’agruw, biney ni gur rom nrayag ni ngam me’eleg, ke pigey e Chitamangdad nibay u Tharmiy e ke tay ni “gubin banʼen ma thingari yaeni aw ni bay e togopluw riy.”¹¹ Gadad “nnri’ lemen e mugunin, ni ngeyag ni [ngad] nanged fal’ngin e tin nib fel’.”¹² Dabi gin owchdad ko togopluw. Be fil ngodad ni ngan nang e tin nib fel’ ko tin nib kireb.

Falfalaen’dad ko fare tawa’ath ko biney ni gur rom nrayag ni ngam me’eleg, mag nangfan ni bo’or e gidii’ ni darma michuwan’ e tin nib michuwan’dad ngay. Nriyul’, karimus nib lichlich e gidiiʼ nra me’eleg ni nge michuwan’rad ngak Yesus Kristus mi yad tay ni bay u luk’ungun e yafos rodad ko gubin e pi n’en ni yad be lemnag ma yad be rrin’.¹³

Bachan e social media, ta’areb ban’en nrayag yog ta bee’ nib kireb e rayag ni nge guy e gidii’ nib bo’or,¹⁴ machane dariy fan nib bo’or laman e gidii’, thingarda me’eleged e bin kanawo’ nima pii’ e gapas ngak e gidii’.

Fapi Tiyugang’ rok’ Somoel

Bay boch e gidii’ nima lemnag ni fare bin Somm’on e Presidency nge fare Ulung ko fare Ragag nge L’agruw e tin ni yad be lek e tin nu fayleng ban’en, ni wod nummon ko am, fan e muruwel, nge yalen e tiyugang’.

Demuturug rogon, ra bagadad ma bay e muruwel rok’ nib thil ngak bee’. Dan ni me’elegdad fa nni turuguydad ko rogon ni be yog e babyor. Dan ni dugliy ko mit i mang muruwel e ngad uned ngay, machane kan piningdad ma kan yibliydad ni ngad micheged fare mich ko fare fithingan Yesus Kristus u daken e fayleng nge mada’ ko ngiyal’ ni kad m’ad. Gadad ma gay rogon ni ngad yibliyed e m’ar, gidii’ nibe kirbaen’, gidii’ nibe mo’owar, nge gidii’ nib gafgow min gelnag gil’il’ungun Got. Gadad ma gay rogon ni ngan nangfan e muruwel rok’ Somoel min rrin’ ni bod rogon, nrib gaa’ ni ngan rrin’ ko gidii’ nibe gay e yafos nib manechubog.¹⁵

Dariy fan rogon ni tin ni gadad ba’adag e wod ni gidii’ ni gubin e ngar tayed fan fapi michib rok’ fare Tathepeg, ya thin rok’ Somoel e ma yib u daken fapi profet rok’ ni bay e gidii’ u daken e fayleng ni fananikan e tiney e leam. Ka aram rogon ni ki’i buch.¹⁶

Ga’ar fare Tathapeg ngak e pi Gachalpen:

“Fa’anra [fanenikay] med e girdi’ nu fayleng, ma thingar mu nanged ni gag e som’on ni ar fanenikayed gag. …

“… Yadra rrin’ gubin e pin’ey … ni bachan ni gathi kigimed boch i yad ni ke pi’eg ku gub.”¹⁷

Ayuweg e Gidii’ ni Gubin

Ngad tu’ufegned ma gadad ayuweg e buguliyiror rodad, ndemuturug ko michuwun’rad ni wod rogon dad fa danga’. Fil Yesus ko fare fanethin ni mornga’agen fare mo’on nib fel’ ni gidii’ nib michuwan’rad e thingar ra ayuweged e gidii’ nike tu’uf e ayuw rorad, ya en ma guyrogon ni nge aw e gapas u thilin e girdi’, e aram ni be pii’ e gidii’ ni nge rrin’ e tin nib fel’.

Napan e February, bay ba yol ko fare Arizona Republic nibe ga’ar, “Bay l’agruw i tiliw nib mu’un Gidii’en Got ko tin Tomure e Rran e ra ayuweg e gidii’ nib gey nge gidii’ nib transgender u Arizona.”¹⁸

Gadad, e pi Gidiiʼen Got ko tin Tomur e Rran, e, “falfalaenʼdad ngay ni kad uned ko biney e mich, muruwel, nge ulung ko LGBTQ nge pi tiyugangʼ riy ni kad muruwel gad u taʼabang u fithikʼ e thothup nge paganʼuy nge tafyan.”¹⁹

President Russell M. Nelson e tafney nag me fith, “Rayag ni nge mʼug e mithil ni nge par ndariy fare mithil riy ko maal?”²⁰

Gadad ma gay rogon ni ngad pired ni gadad “piʼin gapasaenʼ ni gidiiʼen Kristus.”²¹

Ngiyal’ ni Dariy Ban’en ni ngan Nog Riy

Boch fapi cham nturguy nga daken fare Tathapeg e rib kireb machane de yog bugithin riy. “Nge fapi tolang ko prist nge pi tamchib …e ra thaygad ngam’on ngrogned e thin nib gel nib togopluw ngak … ma un moninggad ngak,” machane Yesus ”de fulweg Jesus ta’ab bug riy [ngorad].”²² Bay boch i ngiyal’ ni gadad e gidii’ nima guyrogon ni nge aw e gapas u thilin e girdi’ e be yip’ fan ni dabin non ni togopluw machane, u fithik’ e yul’yul’, ngan par ni dabin non.²³

Rib gel e kirbaen’ riy ni pi gidii’ ni yad ma weliy e thin nib kireb ni mornga’agen fare Tathapeg, pi gachalpen, nge Galasia rok’ e i moy ni ur uned ngodad bingyal’, ra uned i fek fare sakrament, micheg fare michib rok’ Yesus Kristus.²⁴

Biney e buch ko ngiyal’ ni’i michib fare Tathapeg.

Boch fapi gachalpen Yesus ni’i moy rok’ ko ngiyal’ ni’i pii’ e ma’ang’ang e dugliy ni nge “dakur [uned] ngak.”²⁵ Rib gel e kirbaen’ riy, ni gathi gubin e gidii’ nra par nib michuwan’ mab tu’uf fare Tathapeg rok’ me dugliy ni nge fol ko fapi motochiyel rok’.²⁶

Ke fil Yesus ngodad ni ngad palog niged gadad ko ulung ni bay e domomuw nge me’eleg thin riy. Reb kanawo’en e biney, e wod napan ni togopluw i Farise ngak Yesus me puruy’ nag ni ngar li’ed ngem’, rogon ni bay ko thin nib thothup e ga’ar me yan Yesus nge chuw u rom²⁷ me buch be ma’ang’ang ni ”un e girdi’ ngak ni leak’, me golnag rad ni urngin.”²⁸

Tawa’ath nag e Yafos ko Gidii’

Krayag rodad ni ngad palog niged gadad ko mel’eg thin min ayuweg e gidii’²⁹ ni gathi yibe palog nigey ni kemus ni yigo gadad rodad.

U Mbuji-Mayi, Democratic Republic u Congo, boch e gidii’ e dani nangfan e Galasia, dani nangfan e tin nib michuwan’dad ngay fa manang bee’ ko chonggin e galasia.

Boch e duw kafram, I gag nge Kathy e gu unew ko Galasia u Mbuji-Mayi. Fapi bitir e kar chuwgad nga mad ni rib beech, ma rib fel’ owchrad ni ri yad ba falfalaen’. Ku athapeg ni nggu non ngorad ni mornga’agen e sukul roroad mu gu nang ni oren i yad e darma un nga sukul. Tiyugang’ romad, nib mu’un e salpiy ko ayuw ngay, e pire’eg rogon nge pii’ e ayuw.³⁰ Chiney, ppag urngin e 400 e bitir—bpin nge pagal, gidii’en e galasia nge gidii’ ni de ta’areb e mich rodad, ni yad ma yib ngar fil sukul ni bay 16 e sensey riy ni gidii’en e Galasia rok’ Yesus Kristus.

Ragag-nge-aningeg e duw ko Kalanga Muya e ga’ar, “[Dariy e salpiy nib bo’or,] ke yan aninggeg e duw ni danug un nga sukul. Ri gub falfalaen’ ko n’en ni ke rrin’ e Galasia. … Gu manang rogon ni nggu be’eg e yol e chiney, fa rogon ni ngan yoloy, fa rogon ni thin nu French.”³¹ Weliy mornga’agen e biney, facha’ nib gaa’ nu Mbuji-Mayi e ga’ar, “Ke pii’ Fare Galasia ku Yesus Kristus ni Fan ko Gidiiʼen Got ko Tin Tomur e Rran boch e thogthog athap ngog ni bachan e [boch] e galasia e be fo’od nag ir u but’ … [gamed be muruwel] u [ta’abang] ni ngam ayuwegned e binaew nib tu’uf e ayuw rorad.”³²

T’ufeg Bigimed ngak Bigimed

Gubin ngiyal’ ni gura be’eg e John chapter 13, ma pugoran ngog fare wo’en fare Tathapg nib polo’ ni’ir e ma guyrogon ni nge aw e gapas u thilin e girdi’. Yesus e lukuy rifrifin ay fapi Gachalpen. Ma, gadad be’eg, “me yib e taganan’ ngak nib gel”³³ me lemnag facha’ nrib tu’uf rok’ nra yag nag. Guma gay rogon ni nggu tafney nag e leam nge tin nibe thamiy fare Tathapag u napan ni chuw Judas rok’. Wod ni, nap’an e ngiyal’ nem, ma danki yog Yesus ban’en ni mornga’agen e tin ni bay ko “tafney rok’“ fa mornga’agen e en nra yag nag. Ya, weliy mornga’agen e tu’ufeg ngak fapi Gachalpen, nthin rok’ e kabay e chiney nike pag mir’ay e duw ngay:

“Nggu pi’ reb e motochiyel nib be’ech ngomed, nge bigimed me t’uf bigimed rok; wod rogon ni um pired ni gimed ba t’uf rog. …

“Fa’anra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.”³⁴

Gayed rogon nge tu’uf rodad ma gadad tu’ufeg e gidii’. Da pired ni gadad e gadad ma pii’ e gapas ngak e gidii’, ni ngeyag ni piningdad ni gadad “pi fak Got,” gube meybil u daken fithingan Yesus Kristus, amen.