Tha’ Rodad ngak Got
Demuturug e tin ni be buch rodad u fayleng, rayag ni nge pagan’dad ngak Got min pire’eg e falfalaen’ ngak.
Wod Job ulan fare bin Kakrom e M’ag, napan e gafgow bay e gidii’ nima lemnag ni Got e ke pagtilinrad. Bachan e gadad manang ni Got e bay gelngin nrayag ni nge talag fa chuweg fapi gafgow, bay ni gadadra togopluw ni bachan e dar rrin’, ma bay ni fith, “Fa’anra dar pi’ Got e ayuw ni kug fith ngak, uw rogon nrayag ni nge michuwun’ug Ngak?” Kari taw nga bangyal’ riy ni kari gel e gafgow, rok’ Job me ga’ar:
“Got e ir e ke rin’ e ren’ey ngog ma ke tay e wup ni nggu aw ngay nge koleg.
”Ku gu tolulnag nike gafgow nigeg, ‘Ma dariy be’ ni fulweg lungug!’ Ma dariy be’ ni fulweg lungug; ku gu tolul ngalang, machane dariy ban’en nike yal’uw.”1
Fulweg rok’ ngak Job, Got e fith ngak, “Mog ga be guy rogon ni nge m’ug ni gu ba kireb, me par ni gur e ga ba mangil?”2 Fa wod ni be ga’ar, “Ngam teg ni gag e ba kireb rog? Ga ra gathay yeg ni gur e ngam par ni gab fel’?”3 Jehovah ni puwan’ ngak Job me pug oran ngak ni ir e be’ ni gubin ma rayag rok’ mab gel ko urngin ban’en, me siro’ nag Job me yog ni ir e ri dani chugur rogon ko tin ni manang, gelngin, nge mat’aw rok’ Got ma dabiyag ni nge sak’iy u mit e en ni gaa’ ko rofen ni pofthin:
“Gu manang ni gubin mrayag rom,” ni ga’ar, “nu gubin e tin ga ra finey mrayag rom ningam rrin’.
“… Ga be fith ko di’in mu gu thag ninggu fith rogon e gonop rom; ni yugu aray rogon ndariy bochi ban’en ni gu manang. …
“Ere kug tamra’ nga urngin e tin ku gu weliy, ma kug kolngan’ug u roy u fithik’ e fiyath nge awat.”4
Ma tomur riy, me guy Job Got, “Me fal’eg Somol wa’athan Job nike mun daken e flaab ni pi’ ngak nga rogon ko som’on.”5
Rib riyul’ ni rib meechang rodad ni ngad susun niged ma gadad pufthin nag Got ni bachan e tin ni gadad be guy nga owchdad ni rib achichig, lemnag e biney, ni wod, “Dan gu falfalaen’, sana Got e be rrin’ ban’en nib kireb.” Gadad, pi fak ni kad bad ko re fayleng ney, nri buchu’uw e n’en ni gadad manang ko tin nike thumur, tin ni be buch e chiney, nge tin nga mm’on, e ke ga’ar, “Gubin ban’en ni bay ma gu manang, ya gu manang ni gubin.”6 Puluw ni ga’ar Jakob: “Gathi ngam gayed rogon ni ngam fonow niged Somoel, ya ngam feked e fonow u paʼ. Ya musap gaed, gimed ma gimed manang niʼir e ma fonow u fithikʼ e gonop, ngu yalen e justice, ngu fithikʼ e murnguy, u poloʼ i gaʼangin e muruwel rokʼ.”7
Boch e gidii’ e darma nangfan fapi micheg rok’ Got ni be yib’ fan ni fa’an ran fol rokʼ ma bay bugi tawa’ath nra yib riy ko ngiyal’ nike dugliy. Bay ni bayra tafney niged, “Fa’an gura pigpig ko fare mission rog ni ga’ngin, ma Got e ra tawa’ath nigeg ko mabgol nge bitir nib fel’” fa “Fa’an gura tal i ngongliy e sukul rog ko Madnom, me ra pii’ Got e grayd ngog nib mangil” fa “Fa’an gura pii’ pilwon e tithing rog, ma ra pii’ Got ngog fare muruwel ni ri gu ba’adag.” Fa’anra dabi aw fa sul nge aw rogon ni kar lemniged ko ngiyal’ ni kar dugliyed, ma bay ra lemniged ni ke pagtilinrad Got. Gathi ra pos me buch bugi ban’en ni yad rorad e ke sum rorad. Dab da sap gad ko fare tonon rok’ Got ni wod e machine ni bay e okas riy ni (1) gadadra mel’eg e bin ntawa’ath ni gadad ba’adag, (2) min rrin’ urngin e tin nib mangil nib tu’uf, ma aram ni (3) fare tawa’ath ni kad mel’eged e bay ni pii’ ngodad.8
Got e ra tay fan fapi m’ag rok’ ni wod rogon ni ke micheg nag ngodad. Dariy fan ni ngan rus nag e biney.9 Gelngin fare bayul rok’ Yesus Kristus—ni sul nga but’ ko gubin ban’en nge mu’ ma ki sul nga tharmiy10 kan pag fan urngin ban’en ngog u tharmiy ngu but’11—e micheg ni Got e rayag rok’ ma rayag ni nge rrin’ ni gubin e tin nike micheg nra rrin’. Rib ga’fan ni ngan tayfan min fol ko fapi motochiyel rok’, machane gathi gubin e tawa’ath e be turuguy ba tawa’ath ko ko rogon ni yibe fol ko fapi motochiyel12, nikan ngongliy rogon, nge ngiyal’ ni gadad be athapeg ni ngad thapeged. Ngad rrin’ed gelngin nrayag rodad ma gadad pag fapi tawa’ath ngak ni’ir e nge gagiyeg nag, tin nib thothup nge tin fel’ ngodad.
President Brigham Young e weliy rogon ni fare mich rok’ e dar yan u rogon e tawa’ath nra thapeg machane rogon fare tha’ rok’ ngak Yesus Kristus. Ke ga’ar: “Mich rog e gathi ke yan u rogon e muruwel rok’ Somoel u daken fapi donguch nib achichig, fa rogon ni nge fek fapi gidii’ ngaray, … fa rogon e tin nike dugliy ko tiney e gidii’ nge tin ba’aram e gidii’, fa rogon ni ran tawa’ath nagdad fa dangay, machane mich rog e bay ngak Somoel Yesus Kristus nge llowean’ rog ni kug thapeg ni ke yib rok’..”13
Kalngaen’ rodad nge rogon e fol rodad, pigpig rodad, nge tin ni ngad maligach e ma sap ngay. Gadad ba’adag ni ngad uned u fithik’ fapi gidii’ ni weliy Ether mornga’agenrad “ni gubin e ngiyalʼ ma yaed be rinʼ e tin nib felʼ e muruwel.”14 Machane gathi bachan ni wod ni bay ba ke babyor u tharmiy ni ma thi’eg e pin’ey. Pi n’ey e rib tu’uf ni bachan e be uneg dad ko muruwel rok’ Got ma ireray rogon ni be dag ni gadad be muruwel u ta’abang ngak ni be dag ni gadad be pag e fekyath min mang gidii’ rok’.15 N’en ni be pi’ e Chitamangdad nibay u Tharmiy ngodad e Ir nge fare Fak, tha’ rodad ngak u daken e murunguy nge meybil ngak Yesus Kristus, ni Tabiyul rodad.
Gadad e bitir rok’ Got, nikan yibliy ko yafos nu fayleng nge yafos nib manechubog ni bay rodad. Milekag rodad e ngad nanged nrayag ni ngad boded ir “ni pi fak nib manechubog, “ma kagdad ra un ngak Kristus.”16 Chitamangdad nibay u Tharmiy e ba’dag ni nge powi’iydad ko wo’en e m’ag rok’ ni bay kanawo’en nike mu’ i dugliy ni rogon e tin nib tu’uf rodad ni bay rogon ni ke ngongliy ko fare tonom rok’ ni fan ngodad ni ngad falfalaen’ gad ngak. Rayag ni ngad taga’gad ko fare pagaen’ nga mich ngak e Chitamangiy nge fare Fak, nra ga’ ni gadad be thamiy fare tu’ufeg rorow, nge fare Kan ni Thothup nra powi’iyey me ayuwegney ni gubin ngiyal’.
Dariyfan ni arrogon, biney e kanawo’ e ba gel e momaw’ riy ngodad. Bo’or nochi ban’en nib tu’uf riy fin aram nra mom. Yesus e ga’ar:
“I gag e bin riyul’ i kenggin e grape, ma Chitamag e ir e be ayuweg e woldug ni grape.
“Urngin i pa’ngig nder k’uf e ma th’ab [e Chitamangig]: mma tamilangnag owchen urngin i pa’ngig ni be yib wom’ngin, ni fan e nge tamilang owchen nge yib wom’ngin ni pire’.”17
Rogon ni be fal’ag Got ni be tamilangnag me pii’ wom’ngin ni pire’, e rib tu’uf ko biney, ni bay boch i ngiyal’ nib gel e amith riy. Wod rogon ni weliy Paul, gadad e “kagdad ra un ngak Kristus; fa’anra gadad be un ko gafgow, ma ka gadad ra un ko fla’ab rok.”18
Ere, u fithik’ ere nifiy ney, dabin puwaen’ ngak Got, machane thingarda chuchugurgad ngak. Mu meybil ngak e Chitamangiy u daken fithingan fak. Mu un ngorow u daken fare Thothup, ulan reb e rran nge mada’ ko reb e rran. Mu pag ngorow ni nge mang yow era dag ngom e pi’in ni yow ba’dag ni ngar dagew ngom. Moy ni ngam nang Got nge ni ngam nang gur.19 Mpag ni Got e nge gagiyeg nag.20 Ke micheg nag fare Tathapag ngodad:
“Motoyil ngak Yesus Kristus ni ire Ta’ayuw rodad ngak en Chitamangdad, ni ire ma wenig nag e gin rodad u’mon—
“Ni ga’ar: Chitamag, musap ko pi gafgow nge yam’ rok facha’ ni de denen nag, ni ir kam fal’flan’ ngak; musap fare racha’en e Fakam ni kan pu’oeg, fare racha’ rok fa cha’an ni kam pii’ ngak ni nge yoeg ni ngan dag e fla’ab rom;
Ere, Chitimag, wenig ni ngam thapeg pi cha’ney nib michaen’ nga dakaen fithingag, ni nge yoeg ni ngar baed ngog min athapeg e yafos ni manemus.”21
Mu tafney nag boch e pumo’on nge bpin ni yad ba yul’yul’ mab pagan’ rad ngak Got, nrib michuwun’rad ni fapi tawa’ath rok’ era yib ngorad ko biney e yafos fa tomuren ni kar m’ad. Mich rorad e gathi be yan u rogon e n’en nike rrin’ Got fa n’en ni dani rrin’ ko bangiyal’ fa napan ni buch ban’en machane ke yan u rogon ni yad dmanang ni ir e Chitamangiy nib gol ma Yesus Kristus e ir fare Tabayul rorad nib yul’yul’.
Napan ni ke chuchugur ngay ni fare priest u Elkanah u Egyptian e ban ni nge miligach nag Abraham, me yor ngak Got ni nge ayuweg, ere rrin’ Got ni aram rogon.22 Par Abraham nib fos ni mang e chitamangin e pi’in nib yul’yul’ ko pi fak gubin e tabinaew ni yib nga fayleng nran tawa’ath nagrad.23 Dawri n’uw napan ngay, ni ki ireray ere altar, nre priest ney ni lii’ dalip i rogod ni “bachan e tin nib michuwan’rad ngay nib mat’aw … ndabra liyorgad ko got ni kan ngongliy ko malang nge gek’iy.”24 Ra m’ad u rom ni bachan e tin nib micuwan’rad ngay.
Joseph ni kakrom, ni pii’ fapi walagen ni pumo’on ni chuway’, ni u fithik’ e gafgow rok’ me chel ngak Got. Mon’og, u tafen e nu’un ko masta rok’ u Egypt machane urngin e tin ni ke mon’og riy min gustuy u daken ni bachan fare le’engin Potifar ni ban. Krayag ni nge ga’ar Joseph, “Ere kalbus e n’en ni yag ngog ni dariyfan ni kug fol ko motochiyel ko ayuweg dowef.” Arrogon ya sul ngak Got ma kun fal’ag rogon u kalbus. Gel e kirbaen’ rok’ Joseph napan ni fare mo’on ni yow nga kalbus, ni micheg nag ngak Joseph, e pagtalin napan nin fulweg ko liw ni i moy riy ulan e ulung rok’ Farao. Fin arram, ni wod rogon ni gamanang, fi ni yib Somoel nge tay Joseph ko bin th’abi gaa’ e liw nibay gelngin nge pagan nib migid ngak Farao, me ligin Joseph ni nge ayuweg e gidii’ nu Isreal. Ir, ndariy be’ nib chag riy ngak e “urngin e pi’in ke piningrad Got ko tin be leamnag ni pi’in nib t’uf Got rorad.”25
Abinadi e dugliy nra mu’ nag e muruwel rok’ nib thothup. “Gura muʼ i yoeg e mulwol rog,” ni ga’ar, “ma arame demutrug e gin ni gura yaen ngay n’en nra [buch rog], ni faʼanra kug thap.”26 Lii’ nge yim’, machane ke thap nga gil’il’ungun Got, ma cha’en ni un, e fachi Alma, ni thilyeg cheppin e Nephite nge mada’ ko ngiyal’ ni wub rok’ Kristus.
Alma nge Amulek nra pithigew e gaaf u pa’ row ulan fare kalbus u Ammoniahah ni bachan ni kar ningew e ayuw, ma fapi gidii’ ni to’ogor rorow e lii’rad ngar m’ad.27 Ku darwi n’uw napan ngay, ni ki ireray e pi gidii’ nra yon’ed fapi bpin nge bitir nga fithikʼ e dramrom. Alma, ni guy e biney ni rib tamdag ya’an ni ri amith gum’ircha’en me yib fare Thothup ngak ni dabi “thapeg raed u fithikʼ e dramrom,”28 ya fare Somoel e ke fekraed ngakʼ u fithikʼ e rir rokʼ.29
Fare Profet Joseph Smith ni i moy ulan fare kalbus u Liberty, Missouri, ndariy gelngin ni nge ayuweg fapi Gidii’en Got ni yibe tulufrad ko tabinaew rorad nga fithik’ e garbeb ko ngiyal’ e winter. “O Got, ga bay u ’uw?” Me yor Joseph. “U num’ngin napan ni ngam par ni dam mpii’ e ayuw?”30 Me fulweg, fare Somoel ni micheg: “Gafgow rom nge fare mo’oniyan’ nibe gafgow nigem e karimus ni ta’abchingiyal’; ma fa’an, gara athamgil, mara n’uf nigem Got ngalang. … Ya gathi gur e wod i Job.”31
Napan ni tomur riy, weliy Joseph ni wod rogon ni yog Job “Are fa’anra thang [Got] e fan rog ma ridi’in, nggu wan gu weliy lanin’ug ngak.”32
Elder Brook P. Hales e weliy be yat ni mornga’agen Sister Patricia Parkinson nin gargeleg ni fel’ rogon owchen ma napan i gaman 11 e duw rok’ me ma’ew.
Elder Hales ni yog bayay: “Kug nang Pat nike bukun e duw e kaffini goeg ngak ni gu ba adag rogon nib falfalen’ ni gubin ngiyal’. Ni fulweg lungun ni ga’ar, ‘E, dan’um moey rog u tabinaew, arrogon? Bay e yungiyal’ ni guma kirbaen’. Guma yoer nib gel, ma rima gel e kirbaen’ rog. Machane, ul’ul’ ni ga’ar, ‘Ngiyal’ ni tabab e ma’aw ngog, e rib gel e thil riy, machane gu manang ni bay e Chitamangiy nu Tharmiy nge fare Tathapeg u tabinaew rog. … Pi’i nima fitheg ko fa’anra gub domomow ni bachane gub ma’aw, mug fulweg ni, ‘Mini’ e nggu puwan’ ngak? Bay e Chitamangiy nu Tharmiy rog ko biney; gathi go’ gag. Bayrog ni gubin ngiyal.’”33
Ra tomur riy, fare tha’ ni ngan chuchugur ngak e Chitamangiy nge fare Fak e ir e n’en ni ngad gayed. Biney e ra thilyeg gubin ban’en ni pilwon e dabimus bi’id. Uned ngak Paul nge michuwun’dad “ni gafgow ni gadad be tay e [fayleng] chiney e dabi chuchugur ni nge ta’reb rogon ko fla’ab ni dawor da guyed ma be son nagdad.”34 Ri gube micheg ni ri demuturug e tin ni be buch rodad u fayleng, rayag ni nge michuwan’dad ngak Got min pire’eg e falfalaen’ ngak.
“Mu pagan’um ngak Somol u polo’ i lanin’um; ma ri dab mu toer ko tin ga be finey ni ga manang.
”Ngu’um leamnag SOMOL u fithik’ urngin ban’en ni ga be rin’, me dag ngom e bin mat’aw e kanawo’.”35
U dakean fithngan Yesus Kristus, amen.