Meybil nibe Buch
Manang daed, manang e tin nib tu’uf rodaed, ma ayuweg daed nib fal’ rogon.
Ba machib nib gapas mab ga’fan ko fare gospel rok Yesus Kristus e Chitamangdaed nu Tharmiy e ri gadaed ba t’uf Ro n rib gel. Bachane re t’uf nem, ma gathi kemus nibe fal’eg wa’athan daed ko tin ni gadaed ba adag nge tin nib t’uf rodaed machane kube yan ko rogon e gonop Rok. Rogon nike yoeg fare profet Nephi, “Gu manang ni [Got] e ba t’uf pifaak rok”1
Bang ko re t’uf nem nib gel e bay e Chitamangdaed nu Tharmiy u lane yafas rodaed, mu’un e ngiyal’ ni dar na’ab gaed ngay fa darni nang fan. Gadaed ma ning e ayuw ngak fare Chitamangiy u lane meybil, nib yul’yul’ ma yib riyul’ ngay. Nap’an ni gadaed ra tay fan e pi m’ag rodaed man athamgil ningad boeded e Tathapeg rodaed, ma rayog e binem e ayuw ngodaed2 ni kanawo’ nima yib u dakean fare Kan ni Thothup.
Fapi chep nib thothup e ke fil ngodaed ni ga’ar, “Ya Chitamam e manang ko mang e ba t’uf rom, um’on ni ngam fith,”3 ma “ma nang gubin ban’en, ya gubin ban’en ma be guy.”4
Fare profet Mormon e ba’ mornga’agen ni aray rogon. Dani fas ni nge guy e pow ko murwel rok. Machane manang ni Somoel e ke gagyeg nag nib fal’ rogon. Nap’an ni thamiy ni nge uneg fa tin achig e plet rok Nephi ko tirok, me yol Mormon ni ga’ar: “Ma gube rinʼ e rennʼey ni fan nga ba muruwel nib gonop; ya ke kathkath nag ngog, u rogon e muruwel ko fare Kan ni Thothup rokʼ Somoel ni bay rog. Ere chiney, gag e dag nang urngin banʼen; machane fare Somoel e ire ma nang urnign banʼen ni bay yib; ere, ire be gagyeg nigeg ni nggu rinʼ nrogon ni baʼadag.”5 Mus ni dani nang Mormon mornga’agen fapi babyor ni 116 urngin nike yan nga biyang, e manang Somoel ma ke fal’eg rogon e wo’ riy ni nge mangil rogon um’on ni nge buch.
Manang daed, manang e tin nib t’uf rodaed, ma raayuweg daed nib fal’ rogon. Boech ngiyal’ ma re ayuw nem e ma yib ko chingiyal’ nem fa tomuren nikad ninged e ayuw ngak. Boech ngiyal’ ma n’en ni ri gadaed ba adag e dani ma fulweg ni rogon ni gadaed be athapeg,machane gadaed ma pir’eg ni bay e tawa’ath riy. Ma boech ngiyal’ ma tin gadaed ba adag nib mat’aw e dani ma pi’u lane biney e yafas. Ngu gog, ko dalip e kanawo’ nib thil, ni rayog ni nge fulweg e Chitamngdaed nu Tharmiy e meybil rodaed Ngak.
Pagael ni faakmow ni bitir e pi pining ni nge pigpig nib tamachib u France Paris Mission. Nap’an nibe fal’eg rogon ni nge pigpig, ma gamaed un ngak ngan chuw’iy e kenggin, bin ni nge yan nga daken, tie, nge socks, nge coat. Machane, coat ni ba adag ni dakuriy e bin ni ra taw ngak. Machane, me yoeg e cha’an nima muruwel u rom ni ra yib e re coat nem u lan in e wik nga m’on ma ran pi’ ko missionary training center u Provo um’on ni nge yaen faak mow nga France. Gu pi’ed pulwon fare coat ma daku leam niged.
Yan faak mow nga missionary training center ko June, ma fare coat e taw um’on ninge yan e sukuki rok nga France u August. Dani chuw ko fare coat machane gurgur nge tay nga lane kabang rok nib mu’un ko tin ba’aram e maad nge chugum rok.
Nap’an nibe yib e winter nga Paris, ko gin ni be pigpig faak mow riy, me yol ngomow ke feek fare coat nge e chuw ngay ma kaygi ge e achig ngay. Ere mu gomow pi’ e salpiy ko account rok u bank ngeyog ni nge chuw’iy reb e coat ngak u Paris, ni ke rrin’. Fithik e ngachangchen’, mug yol ngak ni gube yoeg ngak ni dabki cha’ariy e bin somm’on e coat, ya dabiyog ni nge chuw ngay.
Taboch ni ke yoley ngomow: “Ni ba garbeb nib tha’bi gel iray. ... Demtrug gelngin nib tomal mab dub’ag fare coat rog nib bi’ech, ma boed ni ribe kuruf e nifeng fithik downgin maed. … Ku pi’ fare coat rog ko somm’on ngak [reb e tamachib u lane gin ni gamaed ma paer riy] nike yoeg ni ir ba meybil ni yib reb e coat ngak nib mangil. Bea’ ni kaffini un ko galasia ma kemus ni ir nge nina’ rok … nge re tamachib ni tawfe nag e yow ma ayuweg ko mission rok ere fare coat e yib ni bachane meybil, ere karug falfalen’ko binem.”6
Manang e Chitamangdaed ni re tamachib ney, nibe pigpig u Franch ni bukun e 6,200 miles (10,000 km) u tabinaew rok, ni ra t’uf e coat ngak ni fane garbeb Paris machane re tamachib neye dariy fan ni nge chuw’iy reb. Ku manang e Chitamangiy nu Tharmiy ni faak mow e ra feek e maad u lane kanntin u Provo, Utah, nib coat nib gel e achig riy. Ma nang ni re gal tamachib ney e yow ra pigpig u ta’abang u Paris ma re coat nem e ra yib ni bachane e meybil rok ba tamachib nib yul’yul’ ni rib t’uf rok.
Tathapeg e ke fil:
“Gathi la’agruw e aerche’ ma yima pi’ ko salpiy? ma reb e dabi mul nga but ni demoy e Chitamangim.
“Machane yimanang urngin gaf i piyoloelgem.
“Ere dam rus, ya baga’fam ko urngin e aerche’.”7
Boech e magawon, nap’an ni dan pi’ e n’en ni gadaed ba adag nib mat’aw, ma rayog ni bay fan ngodaed. Boed, Joseph ni faak Jacob ni walagen e kan awaen’ ngak ma dabuy dakean nge taw ko ngiyal’ ni yaed be leam nag ni ngar thanged e faan rok. Machane, ri pi’ed ni chuway’ nga Egypt ninge mang milngay.8 Ra bee’ nike thamiy ni darni fulweg taban e meybil rok ni rogon nibe athapeg, ma rayog ni Joseph. Machane, n’en nike buch rok ni dani mangil e mang e tawa’ath ngak me ayuweg e tabinaew rok ni dabri m’ad ko blig: U tabuch, ke mang e toygang’ nib gaa’ ko Egypt, ma udakaen e michen’ nge lowaen, ke yoeg ngak pi walagen:
“Chiney dam kirbaen’, fa mu domomow gaed ngomed, nikam pi’ed gag ni chuway’ ngaray: ya Got e ke pi’eg ngomed ni nggu ayuweg e gidii’.
“Re gal duw ney e dariy e gaan u dakean e binaew: machane bay laal’ e duw, ni dabin abich fa ni woldug.
“Ke pi’eg Got ngomed ni nggu ayuweg gimed u fayleng, ni nggu thapeg med.
“Ere gathi gimed e kam pi’ed gag, ya Got.”9
Cha’an ni tha’abi ilal e pagal ni faak mow, e nap’an nibay u college man feek ko ba murwel nib mangil nib part tie ni rayog ni nge yag nag e murwel ngak, ko tomuren e skuul rok nib mangil. I murwel nib gel ko re muruwel ney ni aningeg e duw, mari cheg nag, ma pi’in ni yaed ma urwel nge cha’an nib ga’ lungun ko murwuel e ni ta’ fan. Tomuren e bin tomur e duw ko skuul rok, ma boed nibe chub e music u tharmiy (aram rogon e leam rok faak mow), me maab reb fare muruwel ma ir bea’ nib cheag, ni ri yibe leam nag, ni riu’, ni ra yag fare muruwel ngak.
Machane, dan feek. Dariy bagmad nibe nang fan. Ke fal’eg rogon nib fal’ rogon, kan interview nag nib mangil, ma ir e cha’an ni rayog e binem rok, ma ki i meybil nib gel nibe athapeg nib gel! Kari kirbaen’, ma bine nike buch e kug balyang gaed riy. Mangfan nike digey Got ko n’en ni ba adag nib mangil?
In e duw nga m’on e tamilang fan. Fa’anra ke yag e binem e muruwel ngak ni ri ba adag, ma ra yan reb e kanawo’ u pow’chen, ni ke mang e tawa’ath ngak e chiney nib mangil. Ma nang Got e tomuren nge tabolngin (ni gubin ngiyal’), ma biney e kan fulweg taban e meybil rok ni danga’, nike buch ban’en riy nib falel’.
Ma boech e ngiyal’, ma meybil ni yima fulweg ni ri gadaed ba’adag nib mangil, ni ri gadaed be gay e dabin pi’ ngodaed u lane biney e yafas.
Sister Patricia Parkinson e ni gargeleg nb fal’ owchen, machane nap,an ni medlip e duw rok me tabab ko ma’aw. Nap’an nib mereb e duw rok, me tabab Pat ko un ko skuul u Utah ni fan e Ma’aw nge Bling u Ogden, Utah, 90 e mile (145 km) palgen ko tabinaew rok, magawon ko skuul nib mereb e duw rok nike magawon ko tawreng.
Nap’an ni 11 e duw rok, mar dabki guy ban’en. Sul Pat nga tabinaew nike gaman 15 e duw rok ni nge un ko high skuul. Yan nga college me mu’ nike feek e undergraduate degree rok ko thin nge psychology, ma tomuren ni ni dan feek ko university, me yan ko reb e skuul nge mu’ ni ba’ e master degree rok ko speech language pathology rok. Chiney e bay Pat ko 53 e bitir ko skuul ma be gagyeg nag aningeg e gidii’ ko speech-language u lane skuul. Ba’ e birok e tabinaew rok nge karo rok,ni tafagar rok nge tabinaew rok e ma yan nag fa’anra ba tu’uf ninge yan Pat nga biyang.
Nap’an nib ragag e duw rok, ma bay e taflay rok Pat ni ngan noeg ngak mornga’agen owchen nibe kireb. Gubin ngiyal’ ma galabthir rok e yow ma yoeg ngak gubin ban’en nibe buch ko taflay rok, machane ngiyal’ ney e dar yoeg new ngak mornga’agen e binem e taflay. Kemus ni n’en nike yoeg e galabthir rok ngak e ke mudugil e taflay rok, Pat, ko thin rok e nina’ rok ma,’ “rib wagay.” Me mil Pat ko reb e senggil nge sul me ga’ar ngak e galabthir rok nib pagan’, “Soen ngu gog ban’en ngomew. Gu manang, manang Got, ma fal’ ni ka gimew ra nang boech. Nggu paer ni gub ma’aw u lane yafas rog!”
Boech e duw nga tomur, me yaen Pat nga California nge guy chonggin e tabinaew rok nima paer u rom. Nap’an ni yow bay e pagael ni faak walagen u waen nib dalip e duw rok, me ga’ar ngak, “Aunty Pat, mang fan dam fith ngak e Chitamangiy nu Tharmiy ni nge pi’ reb e owchem nib mangil? Ya fa’anra gara fith Chitamangiy nu Tharmiy, me Ra pi’ ngom e n’en ni ga ba adag. Kemus ni ngam fith Ngak.”
Me yoeg Pat ni i leam nag fare duwer ni b n’uw nap’an machane ga’ar, “Am gu’, boech e ngiyal’ ma damra muruwel e Chitamangiy nu Tharmiy ni arrogon. Boech e ngiyal’ ma ba adag ni ngam fil ban’en, ere dara pi’ gubin ban’en ngom ni ga ba adag. Boech e ngiyal’ ma ngam soen. Chitamangiy nu Tharmiy nge fare Tathapeg e ma nang e n’en ni tha’abi mangil ngodaed nge n’en nb t’uf rodaed. Ere dabi pi’ gubin ban’en gom ni ga ba adag ko chingiyal’ ni ri ga ba adag.”
Kug nang Pat nike bukun e duw e kaffini goeg ngak ni gu ba adag rogon nib falfalen’ ni gubin ngiyal’. Me ga’ar, “Ere, danum moey rog u tabinaew, fa? Bay e yungiyal’ ni guma kirbaen’. Kuug yoer nib gel, nikari gel e kirbaen’ ngog. Machane, ulul ni ga’ar, “Ngiyal’ ni tabab e ma’aw ngog, ma rib thil, machane gu manang ni bay e Chitamangiy nu Tharmiy nge Tathapeg rok e tabinaew rog nge gaag. Ku warod u fithik gelngin ni rayog romad, gag rog biney, ma kug rrin’ed nib mat’aw rogon. Ku mang bee’ nib mangil, ma kuguy ni gaag bee’ ni ku ug falfalen’. Kugu manang pa’ ni bay ko gubin ban’en. Pi’I nima fitheg ko fa’anra gub domomow ni bachane gub ma’aw, mug fulweg ni, ‘Mini’ e nggu puwan’ ngak? Bay e Chitamangiy nu Tharmiy rog ko biney; gathi go’ gag. Bayrog ni gubin ngiyal’.”
Biney, ma n’en ni ba adag Pat ni nge fal’ owchen e dabin pi’ ngak u lane biney e yafas. Machane thin, nike fil ko papa’ rok,e “Biney e kura chuw.”10
President Henry B. Eyring e ga’ar, “Chitamangiy e manang ko chingiyal’ ney ni gaba’, manang e thamtham rom, nge tin nib t’uf ni ya’el nge tin fayleng ban’en rok e pi’in nib liyeg nem.”11 Biney nib riyul’ nib gapas e rayog ngan pir’eg u lane dalip e n’en nike buch rog.
Pi walageg, boech e ngiyal’ meybil rodaed e ma buch nib machrag ko rogon ni gadaedbe tafney nag. Boech e ngiyal’ e meybil rodaed e dani fulweg ko rogon ni gaded be athapeg, machane yungiyal’ ma gadaed nang niba’ e pi tawa’ath ku Got nike fal’eg rogon ni fan ngodaed ni dan nanged. Ma boech e ngiyal’ ma tin nib mat’aw ni gadaed be meybil nag ngak Got e dabin pi’ u lane biney e yafas.12 Rogon ni yoeg Elder Neal A. Maxwell ni ga’ar, “Mich e mu’un e pagan’ ngak e Got.”13
Gadaed manang ni Wo’en nge ngiyal’ nike dugliy, ma Chitamangiy nu Tharmiy e ra tawa’ath nag daed nge chuweg gubin e magawon rodaed rodaed, nge fal’eg rogon e amith rodaed, nge kirbaen’.
Pilung i Benjamin ke ga’ar: “Nge ku arragon, ni gu baʼadag ni thingar mu lemniged rogon e tawaʼath nge falfalaenʼ rokʼ e piʼin ni yaed mafol ko fapi motochiyel rokʼ Got. Ya muguyed, kan tawaʼath nagraed u fithikʼ gubin banʼen, ni laʼagruw mit, ni tin u fayleng nge tin u tharmiy; ma faʼan yaedra athamgil nge madaʼ ko tomur ma yaedra thap nga tharmiy, ni ginem e yaedra paer riy rokʼ Got u fithikʼ e falfalaenʼ ni dariy nʼumngin i napʼan. O mu tayed u wunʼmed, mu tayed u wunʼmed, ni pinnʼey e bogi banʼen nib riyulʼ, ya fare Somoel ni Got e ke yoeg.”14
Gu ma nang nima rung’ag Got e meybil rodaed.15 Gu ma nang ni, Chitamangiy nib sug t’uf, ni gubin ban’en ma manang, e ma fulweg taban e meybil rodaed ni rib fal’ rogon, nibe yan ko rogon e gonop Rok, nge pi wo’ ni fan ngodaed nge tawa’ath rodaed. Gube micheg u dakean fithngan i Yesus Kristus, amen.