Urrogon Ningu Nangfan?
Nap’an mu filed ufithik e yul’yul’, gumaen’, dam mitmith, ko fare gospel ku Yesus Krsitus mafil ney, ra thilyeg e gum’racha’med.
Pi walageg, kug faflaen’ ningu mo’olunggaed uta’abang nap’an e general conference ney ko Fare Galasia ku Yesus Kristus ni fan e Gidii’en Got ko Tin Tomur e Rran nibe gagyegnog e profet nib t’uf rodad, President Russell M. Nelson. Gube pii’ e m’ag rog ningad rung’aged e laman Tathapegdaed Yesus Kristus udakaen e fil ko gidii’ nira meybil, yin’ed tang, fa non marunga’agen e tin t’uf rodad daba’ ko re conference ney.
Kan yoloey ulan fare babyor ko Acts, Filip fare Tamachib ke fil e gospel ngak reb e bee’ nu Ethiopia ni ke yib nga Jerusalem ninge liyoernag. I’ir e bee’ nib eunuch ni ke mmil fan fapi salpiy rok fare queen ko Ethiopia.1 Nap’an ke sul ko liyoer u Jerusalem, ke biy’eg fare babyor ku Isaiah. Udakaen e fanow ko Ya’el, Filip ke chuw ngak ni ga’ar, “Mog gaba nang fan e pi ni’ir ei ga be be’eg?
“Me [fare eunuch] fulweg ”Uw rogon mu gu nang fan ni fa’anra dabi weliy’ be’ fan ngog? …
“Me yog Filip ngak, me tabab ko ta’ab rogon e babyor, me machibnog ngak ni marunga’gane Yesus.”2
Fare duwer ni ke fith fare mo’on nu Ethiopia nibe pugurandad e muruwel rodad nu tharmiy ningad gayed nangfan ngad filed nga reb marunga’gen fare gospel ku Yesus Kristus.3 Arragon, ko e mafil nge weliy’ ko gospel, gadadma ta’abrogon ko fare bee’ nu Ethiopia—gadadba t’uf e ayuw ko e sensei nib michaen’; ma boech e ningyal’ woed rogon Filip—thingar ningad gayed e gelinginraed reb e gidii’ nap’an e thilyeg roared.
E fan rodad ningad gayed e lowaen’ nge fil udakaen fare gospel ku Yesus Kristus ningad gelong e mich nge mich ko gidii’ nib mafili rodad ko God nge yalen Rok ku tharmiy nge fare kanawo’ ko falflaen’ nge Yesus Kristus nge maligach Rok nib bayul. Fare mich nem ra ayuwegdaed ningad fi’leged ngad folgaed pi michmicheg ngak Got, gaa’nag e thilyeg rodad, nge gay fel’ laniyaen’daed ningad folgaed Yesus Kristus. Amrogon n’en ni ke buch ngak fare Eunuch nu Ethiopia tomuren ke thilyeg? Fare babyor ni ba ga’ar ni ke “yaen ufithik e flaflane’.4 Re thilyeg ney ra yoeg e falflaen’daed, gulbugwaendaed, ngad paered nib fel’rogon ma yoeg ningad sapgaed e tin manemus ban’en. Ni’ir fa pinn’en nike buch ko fare eunuch nu Ethopoia tomuren ke fil marunga’gen e Tathapeg make thilyeg ko gospel Rok? Fare babor nib thothup ba ga’ar “ni ke yaen ufithik e falflaen’.”5
Fare motochiyl ni ngad nanged fare gospel nge machib nagdad e dariy n’uw; Ke fil ngodad biney napan ke tabab e yafos rok gidii’.6 Bay e ningyal’, nap’an Moses nge gidii’ rok kar paered nga fapi binaw ko Moab ou’moon kar tawgaed ko fare binaw nib micheg, en Somoel ke weliy’ ngak ninge gay e fanow ngak e gidii’ rok marunga’gen e muruwel roared ningar folgaed e motochiyel nge michmicheg kar thapeged ku Somoel ningar weliy’ed ngak e bitir roread,7 bo’or ni dabkar thaped fare Ma Dai ni Roro’ fa thapeg e thogthog kan pii’ nga dakaen e Burey ko Sinai.
Moses ke ning chiylen ngak e gidii’ rok:
“Mumotoyil, O Israel, ngu’um folgad urngin e pi motochiyel ni ba’aray ni nggu fil ngomed, ni ngu’ um pired ni dabi buch ban’en romed, mi gimed par u lan fare nam ni Somoel ni Got rok pi chitamanginmed e bayi pii’ ngomed. …
“… Ngu’um weliyed ngak pifakmed nge pifak pifakmed.”10
Tomure Moses ke ning, ke yoeg, “Um folgaed u urngin e pi motochiyel rok ni kug pi’ ngomed e daba’, ma aram e gimed nge pi’in ni bay ra bad ni owchmed e yugu bay um pired ni bfel’ rogomed mu’um pired u lan e re nam nem ni Somol ni Got romed e nge pi’ ngomed ngam tafnayed ni dariy’ n’umpngin e nap’an.9
Pi profet rok Got yaedma weliy’ed thingar ningad chugoelnag e tawbinaw rodad “u yalen nge fanow rok Somoel”10 nge “udakaen e tamilang nge tin riyul’.”11 President Nelson ke fini weliy’, “Nap’an tiney e rran ko denen nge pornography nib marnog, bay e muruwel nib thothup ko glabthir ningar filed ngak fapi bitir roared fa tin gaa’fan ku Got [nge Yesus Kristus] ko yafas roared.”12
PI walageg, e fanow ku profet rodad nibe dag e muruwel rodad ningad piry’eged ningad nang fan fare gospel ku Yesus Kristus nge weliy’ed ngak e tabinaew rodad ni bay e Chitamangdaed u Tharmiy ma irba’adagdaed ni ke yarmiy e kanawo’ ni fan e falflaen’ nib tolang ko bitir Rok; ni Yesus Kristus, Fak Rok, fare Tabayul ko fayleng; nge thap ni bay yib udakaen e mich ngak fithingan Rok.13 Gi ko tabinaew rodad thingari mang e gi ko matangiy ko ya’el, ni yaed dayif ko malong ko Tabayul rodad, Yesus Kristus, nira ayuwegdaed nge tabinaew rodaed ningad thapeged e thamtham ko ya’el u gum’racha’daed, ninge ayuwegdead ningad athamgiliyed ko mich rodad.14
Sana ngu’um pugurraen gali gachalpen John fare Tawfe ni kar folgow Yesus Kristus tomuren kar rung’age John ke pii’ e m’ag ni Yesus i’ir fare Gisaaf ku Got, fare Messiah. Fapi pummon be thapeged e pinning ku Yesus ngar “mbaed mguyew”15 mar paered Ngak ko tinem e rran. Kar filed ni Yesus i’ir fare Messiah, en Fak Got, mar folgow Ngak nifan urngin e yafos rorad.
U ta’abrogon, nap’an ngad thapeged e pinning ku Tathapeg ningad “moy ngam guy,” gadadra paer Rok, ngad thapeged e babyor nib thothup, ngad faflaen’gaed riy’, ngad filed marunga’agen e machib Rok, ngad paered urrogon Rok. Ninge yoeg, ningad nanged Ngak, Yesus Kristus, nanged e Lam, ngad nanged I’ir fare flowa ko yafas ma ngak enra nira michaen’ Ngak dabki balal fa bilig.16 Woed rogon gali gachalpen ngem ni kar parew ngak Yesus u rran ney, rayog nignad nanged e tin riyul’ u gubin yal’.
Pi walageg, dad buch ni dariy’ fan. Un’ed e tin ku tharmiy gathi moem. Irba t’uf e ningyal’ nge rayog rodad, ma irba t’uf e wenig ngak Got ko ayuw ngad filed urrogon ningad thapegd fare Gospel ku Yesus Kristus ninge mang e dayif ko yafas rodad. Fa’an ni ngad rin’ed, gube micheg ni udakaen e ayuw ku fare Kan Thothup ninge yoeg e tin riyul’ nga gum’racha’daed nge laniyaen’daed, weliy’ urngin e ban’en nge fay fel’ laniyaen’daed ningad paer17 ko tin riyul’.18
Fare duwer ko bee’ nu Ethopia, “Uw rogon mu gu [nang] fan ni fa’anra dabi weliy’ be’ fan ngog?” ba mang gaa’fan nap’an mu un ko e muruwel rodad ningad ngongoliyed fare gospel u yafas rodad. Ko fare bee’ nu Ethiopia, ko sasun, ke ngongoliy ko fa tin riyul’ ke fil ku Filip. Ke fith ninge tawfe nag. Ke nang ni Yesus Kristus i ir e Fak ku Got.19
Pi walageg, e ngongol rodad thingari dag e tin kug filed mag weliy’ed. Thingar ningad dag e michaen’daed udakaen e paer rodad. Bin thabi fel’ e sensei rodad ni’ir e dag nib fel’rogon. Fa’an ngad weliy’ed e tin ko yafas roaded ra yoeg e tin fel’ nga gum’racha’ e gidii’ nib fil rodad. Fa’an gadadba a’dag e gidii’, fa chongin tabinaew fa danga’, ningar thapeged e falflaen’ ko fapi babyor nib thothup nge machib ko apostle nge profet nib fas u rran rodad daba’, thingar ningar guyed e falflaen’daed riy’. Woed rogon, fa’an gadadba a’dag ningar nanged President Russell M. Nelson ni’ir e profet, tayiiy, nge tathogthog ko tiney e rran rodad, thingar ningar guyed daed ningad yiblignag ko paa’daed ningar nanged e mafil nib thogthog rok. Woed rogon fare fan e thin nib Merikan, “ngongol ba gaa’ ko thin.”
Sana boech u fithimed ba lemnog, “Elder Soares, Kug rrin’ pinn’ey ma gube fol ma ta’abrogon e tabinw rog, machane kug kirebaen’, boech e fagar nge gidii’ nib t’uf ngog kar paloggaed ko Somoel. Mange Nggu rin’? Ni fan e gidii’ nib kirebaen’, gafgow, fa kalngaen’, wenig ningam nang fan e gidii’ nib t’uf romed dar maloggaed bachane Somoel ma nang marunga’raed ma matangiyraed. Mu pugurran, yaed fapi bitir Rok!
Nib moem’aw ningam nang fan urngin e fan ko gidii’ nib t’uf ni kar ranoed ko reb e kanawo’. Bin fel’ e ngonogl rodad ningad tayed ningad t’ufeged raed ngad thapeged raed, ngad meybilgaed ni fanraed, ngad piry’eged e ayuw ko Somoel ni fan raed. Mu falflaen’ nap’an e gelong raed; mu mang e fagar roared mu matangiyraed. Dad pii’ed keru’raed ngoraed machane ngad thapraed. Damu pii’ keru’raed fa pufthinagraed. Mu t’ufeg raed! Fare yaar ko fare fak nib balyang ba fil ngodaed ni nap’an e bitir ra pugurraen, yaed ba’adag ningar suloed nga tabinaew. Fa’an ni’ir ra buch ngak e bitir rom, mu sug e gum’racha’med ko t’ufeg, ngam mil ngoraed, ngam koel e k’angraed, mu farayraed, woed rogon fare papa’ ko fare fak nib balyang ke rrin’.20
U tomuren, muthamgiliy ningam paer nib mat’aw, mu dag e ngongol nib fel’ ko michaen’um, mu chuw ko Tathapeg rom Yesus Kristus. Irma nang fan e kirebaen’ nge miith rodad nib almarin, Irra taw’athnag e rayog rom nge muruwel rom ni fan e bitir rom fa’an gathi nap’an e yafas ney, fa nap’an e yafas ni bay yib. Mu pugurran, pi walageg, ni athap i’ir gaa’ yangi kanawo’ ko gospel.
Nap’an bo’or e duw ko pigpig rog u Galasia, Kug guy bo’or e chongin nib michaen’ ni yaed ba ngongoliyed nib fel’ rogon fapi kenginn ney u yafas roared. Aray e chepin e nina’ ni dariy’ figirngin ni guba pi fithinga ni “Mary” Nib kireb, Mary ke yib e divorce nib kireb ngak beoch e duw tomuren e mabgol rok. Nap’an e ningyal’ nem, ke nang Mary ni bay yo’or e me’leg thingar ninge tay ni fan e tabinaew rok. Bayi duwer ko ngongol rok meybil, biy’eg ko babyor nib thothup, balaynag abuch, fa misa’ ga temple ra gaa’fan ngak?
Bay e mich rok Mary, nge nap’an e ningyal’ nem, ke me’leg ni irra koel ko tin ni Irma nang nib riyul’. ke pinning e gelngin u lan fare “The Family: A Proclamation to the World”: Parents have a sacred duty to rear their children in love and righteousness ma fil ngodaed ningar folgaed fapi motochiyel ku Got.21 Ke piry’eg e fulweg e ko Somoel me yoeg ngak anigneg e bitir rok. Kar sabethingaed marunga’agen fare gospel, kar fithed e duwer, mar weliy’ed e mich roared.
Dariy’ fan e kirebaen’raed, pi bitir rok kar gayed e t’ufeg ko fare gospel ku Yesus Kristus ma yaedba a’adag ningar weliy’ed ngak reb e gidii’. Delip kar suloed nga tabineaw tomuren e mission nib mich roared, nge bin chigchig ba pigpignog rok u South America. Bin ilal’ e tir nib ppin, ni guma nang cha’ney, ke mabgol ma ba gel e mich rok, ke yoeg, “Dabkug thamiy e nina ke chuguwliymaed ni go’ bachan fare Somoel ke paer u tabinaew romaed. nap’an e nina’ rok ke pii’ e m’ag Marunga’agen, kug tababgaed ningad piry’eged e fulweg Ngak. Kug falflaen’ ni ke pii’ fare gospel nga yafas romaed.”
Pi walageg, Biney e nina’ nib fel’ ke ngonogoliy e tabinaew rok ningar filed e tin ya’el. Woed rogon fare duwer fare bee’ nu Ethiopia ke fith ngak Filip, Mary ke fith e e yay, “Uw rogon e bitir rog ra fil fa’an dariy’ e nina’ ra powiy’raed?”
Pi fagar rog ko Gospel, Gube pii’ e m’ag ngomed ni nap’an mu filed ufithik e yul’yul’, gumaen’, dam mitmith, ko fare gospel ku Yesus Krsitus udakaen e langaen’ nib yul’yul’ ko fare ayuw ku Ya’el, fapi mafil ney ra thilyeg e gum’racha’med ma gay laniyaen’med ningam paer ko tin riyul rok Got.
Gube yoeg ni Yesus Kristus i’r e Tathapeg ko fayleng. I’ir fare Tabayul, Irba fas. Gumanag Irba powiy’nag e Galasia Rok udakaen fapi profet, tayi’iy, nge tathogthog Rok. Ya gumanang ni bafas Got, irba’adagdaed. Ir ba’adag ni ngad suloed ngak—gubindad. Ir ma rungan e pi meybil rodad. Gube pii’ e m’ag rog marunga’agen fatin riyul’ ney udakaen e fithingan ku Yesus Kristus, amen.