Tu’ufeg nib Gel ngak pi Fak e Chitamangdaed
Tu’ufeg e rib ga’ fan ko pigpig nge fapi tapgin ni ke pii’ e profet rodaed.
Pi walageg nib tu’uf rog, chiney e ngiyal’ nib thil rogon mab ga’ fan ko fayleng. Kan tawa’ath nagdaed ni ngad pired u nap’an bin tomur e dispensation u m’on ko Bin L’agruw e Wub ko fare Tathapeg. Ba chuchugur ko tabolngin e biney e dispensation, u lan e 1892, fare duw ni moey u m’on ni kan yarmey fare Galasia, ke yib ba yi’iy, ni yoeg ni ba “muruwel nib ma’ang’ang” e ba “chuchugur ni nge buch.” Re yi’iy ney e yoeg ni pi’in ni ra athapeged ni ngar pigpig gaed ngak’ Got e kan fal’eg rograed ko re murwel nem u dakean e “mich, athap, tu’ufeg nge adag, ni bay e ‘ar’ar nib ta’ab ko tirok Got.”1 Tu’ufeg, ni’ir “bin be’ech e adag ku Kristus,”2 e bay e tu’ufeg ku Got ni dabi m’ay ko gubin e bitir rok.3
Fan rog ko biney e kadbul e ngu weliy fare murwel nib ga’ fan ko binem e mit e adag ni bay ko murwel ko missionary, murwel ko chepin e tabinaew nge tempel, nge liyor ko tabinaew, ni fare galasia e be ayuweg. Tu’ufeg ko fare Tathapeg nge tu’ufeg ko gubin e pumo’on nge ppin4 e rib ga’ fan ko pigpig nge fapi tapgin4 ni ke pii’ e profet rodaed, President Russell M. Nelson, ni ngad rin’ed u lan e tin nib thil ni kanoeg u lan e 2018.
Murwel ku Missioary ni Ngan Kunuy Pi u Israel ni Kan Wereg
Kug guy e tha’ ko murwel ko missionaries nge tu’ufeg ulan e yafos rog nap’an ni ku gub bitir. Nap’an 11 e duw rog, ma kan pii’ ngog e tawa’ath ko patriarchal ko ba patriarch ni ku’ir e tutuw rog.6 Bang ko re tawa’ath nem e ga’ar, “Gu be yibliyem ko tu’ufeg nib ga’ ko gidii’, ya bay ni pinningem ni ngam fek fare gospel ko fare fayleng … ni ngam fek e ya’el ngak’ Kristus.”7
Gu nangfan nib bitir yangreg ni fare gospel e bay e kengin riy ni fare tu’uf nib ga’ iyaen ngak gubin e bitir ku Chitamngdaed nu Tharmiy.
Nap’an ni kan mel’eg General Authorities, ni ngar murwel ko Machib Nag e Gospel Rog nap’an e 15 e duw rog, kad dugliyed ni baga’ fan e tu’ufeg ko murwel ko missionary u nap’an e rran rodaed, ni boed rogon nib ga’ fan ni gubinngiyal’. Guruy ni 6, ni be weliy yalen Kristus, ni bay e tu’ufeg nge adag riy, e ke mang bin ni th’abi ga’ fan e guruy u fithik fapi missionaries.
Yaed e tapigpig ko fare Tathapeg ma yad be thamiy e biney e mit e adag, ma nap’an ni yaed be thamiy, ma murwel roraed e be tawa’ath nag. Fa’ani yib nga laniyaen’ ba changar ko re mit e adag ney, nib ga’ fan u nap’an ni yibe ayuweg fare Somoel ko fan rok, ma fare murwel ko Somoel e rayog ni nge mugu’ul.
Kayog ngog bayang u lan e susun nib mangil ko biney e mit ko adag. Fa’an gu murwel ni gag e President ko Pacific Islands Area, ke piningeg President R. Wayne Shute. Nap’an ni kab fel’ yangren, ke pigpig ko mission u Samoa. Taboech, ma ke sul nga Somoa ni’ir e President ko Mission.8 Nap’an ni kol nigeg, i’ir e president ko fare Tempel u Apia Samoa. Ba ta’reb e missionary rok’, u nap’an ni’ir e president ko mission, e ir e Elder O. Vincent Haleck, ni chiney ir e Area President ko Pacific. President Shute e ke tu’ufeg nib gel me liyoer ngak Vince nge fare tabinaew ko Haleck nib polo’. Bo’or e chongin fare tabinaew e pi chongin e galasia, machane Chitamngin Vince, i Otto Haleck, fare Chitamangin fare tabinaew (tha’ rok ir German fa Samoan), e ir gathi chongin e galasia. I nang President Shute ni gu ra ‘un ko reb e stake conference nge kuboech e mo’olung ni bay u Amerikan Samoa, ma ke ningeg ni ngu lem nag ni ngu paer u tabinaw Otto Haleck ni fan e ngu weliy fare gospel ngak’.
Ppin rog, i Mary, nge gag e gu pirew ku Otto nge ppin rok’, i Dorothy, ko tabinaew rorow nib mangil. Nap’an e abich ko kadbul, kug weliy e thin ko fare gospel kug pining Otto ni nge mada’ nag fapi missionaries. Ke gol, me ke madugil, ni nge tamun e pining rog. Ke yoeg ni ba’adag ni bo’or chingin e tabinaew rok’ e Gidii’en Got ko Tin Tomur e Rran. Machane ke yoeg nib gel rogon ni boech e gidii’ nib kakrom ku chitiningin ni be’ nu Samoa e yad e tamachib u lane Samoa, ma be thamiy ni rib gel ni nge ‘un ko yalen e mich ni Kristiano roraed.9 Machane, ke par e thin romow ni aram rogon nib mangil.
Taboech, fa’ani fal’eg President Gordon B. Hinckley rogon ni ngu thothup nag fare Tempel nu Suva Fiji, ke ning e seceratary rok’, i Brother Don H. Staheli,10 ni nge piningeg u New Zealand ni ngan fal’eg rogon. Ke adag President Hinckley ni nge yaen ko skuki iyib u Fiji iyaen nga America Samoa ni nge mada’ nag gidii’en e galasia. Reb e hotel ni ke paer riy faram e kanoeg. Kug ning ni ngu thilyeg e gin ni nge paer riy. Brother Staheli e ke yoeg, “I gur e President ko Ginney; ba mangil e binem.”
Kug pinning President Shute ma kugog ngak’ ni sana’ ni baey e bin l’agruw e yay romow ni ngu tawa’ath nigew e fagar romow Otto Haleck. Ngiyal’ ney, President Gordon B. Hinckley e ra mang fare missionary. Kug ning ni fa’anra ba mat’aw ni nge powi’iydaed fare Halecks ni gadaed gubin ni be ‘un ko ulung ko milekag rok’ President Hinckley.11 President nge Sister Hinckley, fakrow nip ppin i Jane, nge ku Elder nge Sister Jeffrey R. Holland e ra ‘uned ko fare ‘ulung ko milekag. President Shute, ni be murwel ko fare tabinaew, e ke fal’eg rogon e milekag romaed.12
Fa’an gu taw gaed iyib u Fiji u tomurean ni kan yibliy fare tempel, ma kan mada’ nagmad nib gol rogon.13 Kug numon gaed ko biyu’ i gidii’en e galasia nu Samoa, ma arame gu wared nga tabinaew ku fapi Haleck. Fa’an gu mada’ gaed ko abiich ko kadbul ko binem e kadbul, ma yow e fager President Hinckley nge Otto Haleck. Ke koel laniyaen’ug ni sabathin rorow e ta’ab rogon ko fare sabathin ni kug tayew Otto nge gag ni ke yaen in e duw kafram. Fa’ani weliy Otto ni be tay e Galasia rodaed nib mangil, machan e yoeg biyay ni ke mudugil ko galasia rok’, me tay President Hinckley paa’ nga dakean poen Otto me yoeg, “Otto, dawori fel’ e binem; ba tu’uf ni ngam mang be’ ni gidii’en fare Galasia. Biney e ir fare Galasia ku Somoel.” Kayog ni ngam guy u lanin’um fare mad ko mael ni rin gel ma be muul nga waen ku Otto ma ba mab laniyaen’ ko pin’en ni be yoeg President Hinckley.
Biney tabolngin kureb e machib ko missionary nge sobutaen ni rogon e ya’el ni pag Otto Haleck ni nge tawfe nge thothup nag u tomurean ni ke yaen e duw nge ku boech. Ta’areb e duw nga tomren, me m’ag fare tabinaew ko Haleck ni yaed e tabinaew ni manemus ma kan sealed nagraed u lan fare tempel.14
Ke math ko gumir’cha’eg u nap’an e ngiyal’ney e fare adag ni rib gel ko pigpig ni dag President Wayne Shute ko missionary ko faram, i Elder vince Haleck, nge thamtham rok’ ni nge guy fare tabinaew ku Haleck nib polo’ ni ngar m’ag gaed ni yaed e tabinaew ni manemus.15
Rogon e mukun ko Israel, ba tu’uf ni nge ta’ab e gumir’cha’dad ko re mit e adag ney ma ngad mithmiith palog ko thamtham ni yigo’ tin ni kan duwgily riy16 ara thamtham ni m’ingaen ni iyaen ko thamthaem ni adag nge ‘un ko fare tha’ ni thothup ni ngan dag fare mulwol ko fare tathapeg, pigpig, nge fan u nap’an ni moey u fayleng.17
Gadaed chongin ma rayog ni ngaed daged e adag rodaed ko fare Tathapeg nge pi walagdaed ni pumo’on nge ppin u dakean e fayleng u nap’an ni ngad pininged e gidii’ ni chi rogon. Rogon e mo’olung ko Madnom nib be’ech e be ayuweg daed ni rayog ni ngad pininged e fagar rodaed nge gidii’ ni gadaed ma nang ni ngar bad ngar guyed ngar thamiyed e yaen ko Galasia.18 Mo’olung ko sacrament nib thothup, ni boed Elder Jeffrey R. Holland ni ke weliy fowap, ni 50-minute nap’an ningan fil mornga’agen fare M’ag nib be’ech nge fare Tathapeg, ara pi numon ko Conference ni ku ra fil mornga’agen fare Tathapeg nge machib rok.
Boech fapi ppin ko Relief Society e be laemnag ko mangfan ni kan pi’ ngoraed e murwel ko “kunuy ngat’abang” ngak fapi gidii’en e priesthood quorum. Bay fan e biney, President Nelson ke weliy mornga’agen bochi binem fa biney e general conference kafram. Ke tal, “Dabyag ni ngu kunuyed e gidii’ nu Israel fa’an dariy e ayuw rom.”19 Ulan e rran rog kafram bay e ta’awath nib chuchugur ko 30 pasent ko pi missionary e yaed e ppin. Biney e be pi’ ngak fapi ppin ko Relief Society ni ngar adaged fare gospel mi yaed weliy ngak’ e gidii’. Fa’an gadaed ra dag e adag, gol, nge sobutaen, ma bo’or e ra thapeg e pining rodaed. Pi’in ni ra duwgliy ni dabi thapeg e pining rodaed e bayi paer ni fager rodaed. Pi’in ni ra duwgliy ni dabi thapeg e pining rodaed e bayi paer ni fager rodaed.
Murwel ko Tempel nge Chepin e Tabinaew ni nge Kunuy pi u Israel
Adag e kengin e murwel rodaed ko temple nge chepin e tabinaew ni nge mukun u yugraba’ ko fare veil. Nap’an ni ngad filed e sik’eng nge tin mo’maw ko gidii’ nib kakrom rodaed, ma adag rodaed nge liyoer e nge ga’. Muruwel ko tempel nge chepin e tabinaew rodaed e kari gel u dakean e thil nib be’ech ko rogon e mo’olung ko Madnom nge ku fare rogon e mon’og ko fel’ yangren u pi class nge ulung. Re thil ne ya ke yog nag ngodaed ni ngad filed ni rib gel nge papay ni mornga’agen e gidii’ nib kakrom rodaed nge mukun ni tay Israel ko yug raba’ fare veil. Murwel ko tempel nge chepin e tabinaew e ke mon’og.
Ba talin nib gel fare internet; fare tabinaew e bin somm’on e gil ko murwel ko chepin e tabinaew. Gidii’ nib fel’ yangrenraed e yaed be salap ko fil chepin e tabinaew ma yaed ba’adag ni rogon e ya’el ni gar tawfe gaed ni fan ko gidii’ nib kakrom roraed, ni kar filed rogon ni ngar adaged ngar liyor gaed. Tomuren ke thilyeg e dew ko 11 rayog ni nge rin’ e tawfe nifan e gidii’ kar maed, pi president ko pi tempel kar sapgad ni bo’or e gidii kar un’ed e tempel. Reb e president ko temple e ke yoeg ngodaed ni “kari gaa’ i’in e gidii’ ni be tawfe … ma peth ko bitir ni 11-e-duw rok e be yib nag ku boech e tabinaew. … Yaed e bay e [yangraed], ma gowa’ ni yaed be thamiy nib thothup nge fan ko fare gam’ing ni ngar ‘uned ngay. Ba fel’ ya’an ni ngan guy!”20
Gu ma nang pi Primary nge fel’ yangren e be rin’ e chiney ma yaed ra ‘ul’ul’ ni ngar tayed e murwel ko tempel nge chepin e tabinaew nib ga’ fan. Sisters ko Relief Society nge walagen e priesthood e rayog ni ngar ayuweged ni ngar mugu’uliyed e murwel roraed ko tempel nge chepin e tabinaew ni ta’ta’reb ma dakean e ayuweg ngan pii’ e athamgil nga laniyaen’ e bitir nge fel’ yangren ni ngar kunuyed Israel ko yugraba’ ko fare Veil. Rib ga’ fan e biney u tabinaew nge nap’an e Madnom. Gu be micheg ni ra un ko gam’ing u fithik e adag ni fan ko gidii’ nib kakarom rodaed ma ra gel ngan ayuweg e fel’ yangren nge tabinaew rodaed u dakean e fayleng ni be kireb i yean. Ku gu be micheg ni President Russell M. Nelson e ke thapeg e yi’iy nib gaa’ fan nib l’eag rogon ko pi tempel nge murwel ko tempel.
Fal’eg Rogon e Tabinaew ni Manimus nge Gidii’ ni Ta’ta’reb ni ngar Pired rok Got.
Fare changar nib be’ech ko fil e gospel ngan fol riy u tabinaew nge pin’en nib gaa’ fan ni ke pii’ fare Galasia e ba mangil e n’en ko tabinaew ni manimus nge gidii’ ni ngar mada’ niged Got ngar pired rok.21
Ra ni m’ag row e pumo’on nge ppin u lan fare tempel, ma yow be ‘un ko mabgol ko fare m’ag nib be’ech ma dabi ma’ay, Ba yang ko fare priesthood.22 Tabang ma yow ra fek ngar thapegew e tawa’ath ni rogon fare priesthood nge gelinrow ni ngar powi’iyew e tabinaew rorow. Ppin nge pumo’on e bay e murwel roraed ni boed rogon ni be yoeg “Fare Tabinaew: Ba Babiyor ni fan ko fare Fayleng,”23 machane murwel rorow e ba ta’ab e fan riy.24 Ba ye gelingrow nib ta’ab gelngin ni ngar thapeged e yi’iy ko tabinaew rorow. Nap’an ni yow be murwel u tabang u fithik e adag nge tin mat’aw, ma mudugil rorow e be tawa’ath nag e tharmiy.
Pi’in ni be gay ni ngar nanged fiti laniyaen’ Got ni ta’ta’reb ma fan ko tabinaew roraed e ba tu’uf ni ngar murwel gaed ni fan ko tin mat’aw, sobutaen, gol, nge adag. Sobutaen nge adag e pi’in ni be gay fiti laniyaen’ Somoel, ni ri fan ko tabinaew roraed.
Ngad flant niged gadaed, ngad fal’eged rograed ko fapi tawa’ath ko m’ag, ngad fal’eged rogdaed ni ngad mada’ niged Got, e arame a murwel ni ta’ta’reb. Ba tu’uf ni ngad gel gaed ni ta’tareb ngad murwel gaed ni gadaed ba’adag ni gadaed be fal’eg e tabinaew rodaed ni gin ni dariy e riya’ ko fapi yoko’ ni be liyegdaed25 nge “ba gil ko mich.”26 Galibthir e ba ye murwel rorow ni ngar filew iyaen ko bitir rorow u fithik e adag. Tabinaew ni ba sug ko adag e ba mangil, fel’, ma riba tharmiy ni baey u fayleng.27
Fare tang ni chitamangin th’abi adag e “Tu’ufeg u Tabinaew.”28 Fa’ani rung’ag tin som’on e thin, “Tawreng ra yib nga tabinaew, ra sug ko fel’ usun,” ke yib e luu’ nga oewchen ma ke thamiy e falflaen’. Nap’an ni gamaed bitir, gu nanged ni gu pired u tabinaew ni ta’abrogon; binem murwel ni th’abi ga’ fan.29
Mu’un nib sug ko adag u tabinaew, President Nelson e be achichig nag e media ni be kireb nag e murwel rodaed.30 Reb e thil ni nge ayuweg gubin e tabinaew e ngan tapig’pig nag e internet, social media, nge television ma gathi ba distraction ara ban’en nib kireb, ba pilung. Fare mal ni fan ko gubin, ma ku ri e bitir, e yibe tay u tabinaew. Gadaed galibthir ma ba tu’uf ni ngad thilyeged e n’en ko media e ba mangil, fel’ ko yangren, mab ta’ab rogon ko yalen ko adag ni gadaed be gay rogon ni ngad fal’eged.
Machib u tabinaew rodaed e ba tu’uf ni ngan nang fan nge pii’ athmagil nge laniyaen’31 machane ku rogon e ya’el, falflaen, nge sug ko adag.
Gu be micheg ni nap’an ni ngad tayed e adag rodaed ko fare Tathapeg nge Bayul Rok, ngad tayed ni Ir e kengin e murwel rodaed ni ngad kunuyed Israel ko ruw raba’ fare veil, ngad pigpig gaed ko gidii’, ngad fal’eged rogdaed ni ngad mada’ niged Got, ma gelngin e to’ogor ra ma’ay ma fare falflaen’, tin mangil, nge gapas ko fare gospel e bayi ga’ nag e tabinaew rodaed ko adag ku Kristus.32 Gube micheg e pinn’ey ma gube micheg Yesus Kristus nge maligach Rok ni fan ngodaed, u dakean fithingan Yesus Kristus, Amen.