Gel nag Gelngin e Ya’el Rodaed
Woed rogon i bi’eg nge fil mornga’agen e muscle fa’an dad fi’laged e muscle, ma bi’eg nge fil mornga’agen e mich ni dabin rrin’ ban’en ngay e dabyog ni nge gel e mich.
Ku falflaen’ ni fan e taw’ath ko e downgig, i’ir e tawa’ath nib ma’ang’ang ko Chitamangdaed nu Tharmiy. Bay 600 e muscle ko dowdaed.1 Bo’or e muscle ba t’uf e exercise ningar rrin’ed e tin t’uf rodad. Rayog ningad biy’eged bo’or marung’agen e biy’eg ko muscle rodad, machane fa’an ngad lemniged rayog ningad gelnog udakaen e biy’eg, ngad kirebaen’daed. Ma gelnag e masal rodaed kemus napan ni gadaed be murwel ngay.
Ku nang ni pi tawa’ath ko ya’el e ku aram rogon. Yadba t’uf e ngongol ningar gelniged. Fapi tawa’ath ko mich, nifan susun ney, e gathi kemus nib thamtham; ba rogon e mithmith ni baga’ nima m’ug u lane pi chep nib thothup ni ta’aborogon ko thin ni mithmith.2 Woed rogon e bi’eg nge fil ko muscle fa’an dad fa’leged e muscle, e biy’eg nge mafil ko mich dad pii’ e ngongol nib fel’ ningad gayed e mich.
Napan ni ba ragag nge nel’ e duw rog, ma cha’an nib ilal ko walageg ni pumo’on, Ivan, nib 22 e ngiyal’ nem, e yib bangiyal’ nga tabinaew me weliy boech ban’en nike buch ngomaed. Ke dugliy ni nge tawfe nga lan Fare Galasia rok Yesus Kristus ni fan ko Gidii’en Got ko Tin Tomur e Rran. Galabthir roamed e ni sap ngak nikan gin, ma kugu manang ni dagur nang fan ko mang e ribe buch. Boch e duw tomur biney, me yoeg reb e n’en ngomaed ni kuku gin gaed ngay: ke dugliy ni nge pigpig nib tamachib ko fare Galasia, ma dab guyed u lan l’agruw e duw. Dani falfalen’ e galabthir rog ko biney: machane, kuguy rok gelngin ni ba adag ni kug adag e binem rok nge n’en nike leam nang ninge rrin’.
In e pul nike yaen, napan nibe pigpig Ivan, ma gamaed laem nag boech e gidii’ u skuul rog ni nggu waerod nga biyang. Gamaed ba adag ni nggu fafal gaed u lan in e rran u dap’ e l’ay bachane kug mu’ gaed ko skuul.
Mug yol ngak e walageg nib tamachib, ni gube weliy mornga’agen e n’en ni nggu rrin’. Me yol nibe yoeg ni gin nibe pigpig riy e bay ko gin ni gura yaen ngay. Mug leam nag nib mangil ni nggu tal ngguy. Ta’aboch riy mug nang ni dabyog ni nge yib e tabinaew roraed ngan guy raed.
Mug turuw’liy. Kugu manang ni gube paer u baas ni gube leam nang urngin e n’en ni gomow e ragu rrin’ew ko re rran ney nib mangil. Gomow ra abich ni kadbul, sabathin, fafael u dakean e yan’, paer u tren’ e yal’—ra falel’!
Napan ni taw fare baas ko gin ni nggu waen ngay, muguy Ivan ni yow reb e pumo’on, ni yow l’agruw ni yow ba chuw ko kenggin nib wechwech nikan m’ag e tie. Kug og nga but, ma gomow m’ag e bachbach ngomow, me yoeg neg ngak e cha’an ni yow. Danug soen, mu gog ngak e walageg e n’en ni nggu rrin’ew, ma danug nang ni ba’ e n’en ninge rrin’ Ivan. Me sap ngog, me tingi’, me ga’ar ngog, “Rayog! Machane, bay e n’en nib tu’uf ni nggu rrin’ew ko somm’on. Ga ba adag ni ngam un ngomow?” Mu ga’ar e ea, ni gube leam nang ni nggu fafal gow ko dap’ e l’ay ko ta’aboch riy.
Re ran nem, ni pag 10 e awa, ni ug waen u lane re binaew nem ni gamaed walageg nge cha’an ni yow. Gu tingi’ ngak e gidii’ u lan fare rran. Kug non ngak e gidii’ ni daworuguy bi’id u lane yafas rog. Ku non gaed ko gubin e gidii’, tutguy e maab rok e gidii’ ni danug nanged, mani guy e gidii’ ni yow ma machib nag.
Bay bee’ ni guy, me be weliy e walageg nge cha’an ni yow mornga’agen Yesus Kristus nge fare wo’en e thap. Tumgin, me tal Ivan me sap ngog. Mug gin, ni fitheg fa’anra gu ba adag ni nggu weliy e n’en ni gube leam nag ko n’en ni yibe machib nag. Dakriy bee’ nibe non u lan fare na’un, ma yibe sap ngog. Kugu tuntun, machane meyog ni nggu non mug weliy mornga’agen e thamtham rog ni mornga’agen fare Tathapeg. Danug nang ko ba mangil e n’en ni ku gog fa danga’. Dariy biyay nike thin e walageg ngog; machane, me pining e magaer ngog ni ku weliy mornga’agen e tafney rog nge thamtham rog.
Kuguy rogon nike thil e gidii’ u pow’cheg napan nike thapeg e gidii’ fare tamilang nga lane yafas roraed. Kuguy boech giyaed nike pir’eg e athap u lane mulwol ni yibe yoeg ngoread, mug fil rogon i pigpig ngak boech e gidii’ mug pagtilin mornga’ageg nge tin ni gu ba adag. Kuguy boech i giyaed nike pir’eg u lane fapi mulwol, mu nang rogon ni nggu pigpig ngak e gidii’ mug pagtilineg nge tirog ban’en. Kug rrin’ e n’en nike fil fare Tathapeg: “Fa’anra lakeg bea’, ma nge pagtilin nir.”3
Ragu sap nga tomur, mugu nang ni mich rog ke gelnag e roffen nem ni bachane walageg nike pi’ e kanawo’ ngog ni nggu murwel ngay. Kug murwel ngay napan ni gamaed be bi’eg fapi chep nib thothup, nge gidii’ ni yibe gay ni ngan machib nag, mich ni yibe weliy, gidii’ ni yibe pigpig ngak, nge kuboch ban’en. Dani yog ni nggu warow nga dap’ e l’ay e roffen nem, machane ke sug gumircha’en ko tamilang u Tharmiy. Dabgu sap ta’reb e yan’ ni ngguy u dap’ e l’ay, machane ke ga’ e mich rog ni boed e awoch ko mustard. 4 Danug waen u ta’aren e yal’ ni boed e gidii’ u biyang, machane kug fil boch ban’en nib fel’, ma daug nang, kug mang e tamachib—ma gathi bea’ ko Galasia!
Kanawo’en ni ngean Gel nag e Ya’el
Bachane fare gospel nikan Fulweg, ni keyog ni ngad nanged rogon nima ayuweg dad e Chitamangiy nu Tharmiy ni ngad thapeged e pi tawa’ath u Tharmiy. Boed nima pi’ kanawo’en ngodaed ni ngad thapeged e pi tawa’ath nem ko bin ni Kemus ni nge pi’ ngodaed ni dabin murwel gaed ni fan. Fa’anra gadaed ba ta’areb ko Kan Thothup Rok, ma gadaed ra nang I poey e pi kanawo’ nem ma gadaed rrin’ ban’en ngay.
Fa’anra gadaed ra gay e athamgil, ma gadaed ra pir’eg nib tu’uf ni ngad murwel gaed ni fan ma yibe soen nag. Fa’anra gadaed ba adag ni ngeyog ni ngad tu’ufeged e cha’an nib chugur ngodaed, ma rayog ni ngad pired u to’ben bee’ nib bi’ech u galasia. Kab chugur rogon ko mich: napan ni ra yib e marwaer nga lanyan’ daed, ma pi m’ag rok Somoel ninge pagan’ daed ngay e ba tu’uf ninge yag ngeyog ni ngan yan nga m’on. Biney e kanawo’, ma gadaed be murwel ko ya’el rodaed ma gadaed be ayuweg nge mang gelngiy u lane yafas rodaed.
Rayog ni dani moem ko somm’on, ma rayog ni rib momaw’. Thin rok Somoel, u dakean fare profet Moroni, e kuba’ fan ngodaed e daba’: “Fa’anra yib e gidii’ ngog ma gura dag e tin mo’owaer roraead ngoraed. Guma piiʼ e moʼowaer ko gidiiʼ ni nge yog ni nge sobutʼaenʼ raed; ma murnguy rog e ba gaman ko gubin e gidiiʼ ni yaed be sobutʼ niged laniyaenʼraed u pʼoewcheg; ya faʼan yaedra sobutʼ niged laniyaenʼraed u pʼoewcheg, me michaenʼraed ngog, ma arame gura guy rogon ni pinʼen ni moʼowaer roraed e ra mang gelingraed.”5
Gub falfalen’ ngak e walageg I Ivan, ni gathi Kemus nike weliy fare gospel ngog machane kiki piningeg ni nggu fol riy mug poey e tin ni gub mo’owaer riy. Ke ayuweg neg ku fol rok fare Masta ni ga’ar: “Moy, lakeg”6—ra ngan yaen ko gin ni yan fare Tathapeg riy, man gay ban’en no boed rogon fare Tathapeg, ma ngan tu’ufeg e gidii’ ni boed rogon ni gadaed ba tu’uf Rok. Boech e pul nga m’on, nike thimur e n’en nike buch rog ni tamachib, mug dugliy ni nggu tawfe mug waen ko birog e mission.
Ngad fol gaed ko pinning rok President Russell M. Nelson man yan ngak fare Tathapeg7 ni ngan poey e pi masal nib tu’uf ni ngan murwel ngay man tabab i murwel ngay. Iraray e sagreng-nib n’uw yang, gathi ba achig, ere dam pagtilin nochi n’en, ni ngam rrin’ nifan ko ya’el ni ra ayuweg gelngin e ya’el. Fa’anra gadaed ba’adag ni ngad gel niged e mich rodaed, ma arame ngad rrin’ed e pin’en nib ga’fan e mich riy.
Gube micheg ni gadaed e pifaak e Chitamangiy nu Tharmiy nib sug ko tu’ufeg. Faak, ni Yesus Kristus, e gadaed ba tu’uf Rok. Ke yib ko re fayleng ney ni nge dag ngodaed e kanawo’ me arame me pi’ e yafas Rok ni nge pi’ e athap ngodaed. Be pining daed fare Tathapeg ni ngad laked e kanawo’ Rok ni tha’abi mangil, mni ngad murwel gaed ko mich rodaed nge Bayul Rok, mani gel nag gubin e pi tawa’ath u Tharmiy ni nikan fal’eg wa’athan daed riy. Ir e kanawo’. Iraray e mich rog u dakean fithngan Yesus Kristus, amen.