Mu Toey e Rungrung ko Tin Ya’el nge Matangiy
Nap’an ngad paered ko fare gospel ku Yesus Kristus, ngad thapeged e Bayul ku Tathapeg ningad dared nga somm’on ufithik e mich, mag matangiyeddaed ko e tin baen ko mo’oniyaen.
Pi walageg, bayib e ning ko mo’olung ney, Gube pinning e magaer ngak Chitamangdaed nu Tharmiy ni fan e fanow, tin riyul’, ma pi thogthog kan weliy’ ko pulpit ney ko la’agruw i rran ke yaen. Kar filed ngodaed fapi tapigpig rok Got kan pinningraed ningar oged e thin nib thothup Rok. En Somoel ke pinning ningad pugurraengaed fare thogthog ko tin tomur e rran ney, “Fa’an udakaen e lamag fa … laman e tapigpig rog, nibe ta’agrogon.”1
Ngu sap nga mo’olung ney nib ga’ ko Gidii’en Got mug laemnag marung’agen e gidii’ nib sapgaed e general conference ulongob e fayleng, Gube laemnag marung’agen e mukun u lan fare Babyor ku Mormon nap’an Yesus Krisus ke m’ug ngak fapi Nephite tomuren e Kruuthnag Rok. Ke fil e gospel ngoraed me pinning fel’ laniyaen’raed, “Ere, mmaroed nga tabinaew romed, magmed fal’eg i lemnag e pin’en ni kugog, min fith ngak’ e Chitamangiy, u fithingag, ni nge yog ni ngam nanged fan.”2
“Maroed nga tabinaew romed, magmed fal’eg i lemnag e pin’en” i’ir bin magid e ban’en ningam rrin’ ningam thapeg e thin ko fapi profet nge tiyugang’ nga galasia kar oeged nap’an e mo’olung nib thothup ney. Tabinaew nib dayif ko Kristus i yaed e rungrung nibe matangiy u gil’lungun Got ko tin tomur erran ney, ni kan prophesynag, fare mo’oniyaen’ “[ba] gagyeg u lan gum’ircha’en e gidii’, [ma] k’aringraed ngar damomuw gaed ko tin nib mangil ban’en.”3
Urngin e gidii’ kar toeyed e rungrung ningar ta’leged e to’ogor nga wuru’. Boech e ningyal’ bayi wulyang ko salthaw i yaed ma matangiy—woed profet—ningar ninged koel chiya’ ni fan e to’ogor nibe yib.
Nap’an e ningyal’ ko pioneer u Utah, tituw ko tituw rog Thomas Rasband nge tabinaew rok i yaed chongin e bin somm’on e gidii’ nga Heber Valley u burey u Wasatch ko Utah.
U 1859, Thomas ke ayuweg ninge toey fare Heber fort, ni ke toey ko matangiy rorad. I’ir e rungrung nib moem kan toey koe lug ko cottonwood, i’ir e rungrung ko fare fort nem. Kan toeyed boech e na’un ko lud ulan fare fort ko rungrun riy’. Fare rungrung ke yoeg e matangiy ma posnog e tabinaew ko pioneer ulangin ningar toeyed e nam roared mar liyoergaed ngak Somoel.
Ere ku aram rogon ngodaed. Pi tabinaew rodad i yaed e rungrung nige matangiy ko tin mo’oniyaen’ ku fayleng. Ulan fapi tabinaew rodad ngad baed ngak Kristus udakaen e mafil ningad folgaed fapi motochiyel Rok, udakaen e biy’eg ko babyor nib thothup mag meybilgaed uta’abang, mag ayuweged reb e gidii’ ningar ranod ko kanawo’ ko michmicheg. Bin be’ech a mafil ko mafil ni fan e gidii’ nge tabinaew udakaen fare Come, Follow Me ni kan yarmiy ninge “gelong e thilyeg rodad ma ayuwegdaed ningad manged boed Yesus Kristus.”4 Nap;an ngad rrin’ed ngad manged woed rogon Paul ke yoeg “be’ech e [pi] gamanamn”5 ma gum’racha’daed ma ya’el rodad ma ta’abrogon ngak Got. Gadadba t’uf fare gelnging nem ningad chamgaed ko e tin to’ogor ko mo’oniyaen’.
Nap’an ngad paered ufithik e pagaen’ nibe yib ku mich ngak Yesus Kristus, gadadra thamiy e gapas nibe yib ku Kan Thothup, Irma powiy’daed nga tin riyul’, gay fel’ laniyaen’daed ningad paered nib mat’aw ko pi taw’ath ku Somoel, ma pii’ e m’ag nibe fas Got ma irba’adagdaed. Pinn’ney ma buch ulan e rungrung ko tawbinaw rodad. Machane mu pugguran, e gelngin ko tabinaew rodaed ma yaen ko e gelngin e ya’el ko gidii’ ulangin e rungrung riy’.
President Russell M. Nelson ke fil, “U fapi rran ni bay yib, dabiyoeg ningan fas e ya’el ko bee’ fa’an dariy’ e powiy’, fanow, golnag, fa ayuw ko fare Kan Thothup.”6 Ni’ir fare profet nib fas, ta yi’iy, nge tathogthog ko tiney e rran, e salthaw ngadakaen fare wulyang ko rungrung, Fare Galasia ku Yesus Kristus ni fan e Gidii’en Got ko Tin Tomur e Rran, irma guy fapi to’ogor nibay yib.
Pi walageg, gadadba cham ko mael ngak Satan ni fan e ya’el ko gidii’. Kan yarmiy e gi’ ko mael rodad ou’moon e fayleng. Satan nge delip e yangi ulungi bitir ku Chitamangdaed nu Tharmiy kar pii’ed keru’raed nga micheg Rok ko thapeg. Ko fare ningyal’ nem, fapi tiyugang’ ko mo’oniyaen’ kar chamgaed ngak fare gidii’ nib michaen’ ni kar me’leged e kanawo’en Chitmangiy.
Satan ma nang bayi boech e rran rok ma ba chingyal’ rok ba waer. Arrogon ke gel bugwaen, machane dabiyoeg ninge gelong. Machane, mael rok ni fan urngin e ya’el ba thamgiliy.
Ni fan e matangiy rodad, thingar ningad toeyed e rungrung nibe matangiy e tin ya’el rodad, e rungrung ni dabiyoeg ninge gathay nag fare bee’ nib kireb ngay.
Satan i’ir e porchyog nibe baen, irba lingraed nga tafnay ma gum’racha’daed nap’an dad sapgaed ngay, nang fan e kirebaen’, fa n’ag athap. Irma pinningdaed ko thin nib manging’ u tiliy, micheg e fel’ rogon, ayuw, nge falflaen’ nap’an kad waergaed. Irma yoeg e t’uft’uf, 7 Fare Ya’el ra chuw ngodaed. “Ere aray rogon ni fare mo’oniyan’ e ra baen nag e ya’el roraed, me wawliyraed nib kolchiya’ iyaen nga infierno.”8
U reb e rogon, bay yib e thamtham nib gel ku Ya’el ni pii’daed ningad tanggaed e liyoer ngak Got woed:
Bagel e rungrung ni’ir Got rodad,
Wulyang nib tolang ni darma waer.
Tapigpig nib gaa’ e Got rodad.
Nira gelnog urngin e tin kireb ko yafas.9
Nap’an ngad toeyed e rungrung ko gelngin e ya’el, gadadra pii’ keru’daed nga baen ku mo’oniyaen, pii’ keru’ daed ngak, ngad thamiyed e gapas ku Ya’el. Rayog ningad folgaed e fanow ko Somoel nge Tathapegdaed, ni, ke yib e lumel ngak u wuru’ e binaw, me yoeg, “Mu waen nga keru’ rog, Satan.”10 Thingar ningad filed udakaen e tin ko yafas urrogon ningad rrin’ed fare’nem.
Woed rogon fare fan nib mat’aw kan weliy’ u lan fare Babyor ku Mormon nap’an Captain Moroni ke taermedliy fa gidii’en Nephite ningar chamgaed ko e gidii’ nib baen, togopluw, m’arnag gel’ngin ko Amalickiah. Moroni ke toey e rungrung nib gaa’ ninge matangiy fapi Nephites “ni nge yog ni ngar pired ngar pigpig gaed ngak’ fare Somoel ni Got roraed, ni gomanga yog nra cha’ariyed fare n’en ni yoeg e pi to’ogor roraed ni fare gam’ingin e Kristiano.”11 Moroni “ir bee’ nib mo’on nib miyuluy ko mich ngak’ Kristus,”12 nge ke michaen’ ma “fol ko pi motochiyel ku Got ... nge keru’uy e kireb.”13
Nap’an fapi Lamanite kar baed nga chamgaed, kar balyangaen’ ko fa pin’nen ke taermedliyed fapi Nephite, ma kar waergaed. Fapi Nephite kar pinninged e magaer ngak “Somoel ni Got roraed, ni bachan gelingin ni dariy e puluw riy e chuwegraed u pa’ e pi to’ogor roraed.”14 Kar toeyed e rungrung roroaed ko matangiy u wuru’, ma kar ngonogliyed e mich ngak Kristus u langin—u to’orngin e ya’el roared.
Mang boech e rogon ningad taermedliydaed ko e ningyal’ nib kireb, ningad manged e “ni nge yog ni ngad manged talin e muruwel u pa’ Got ni ngad mugu’uliyed e re muruwel ney ni th’abi fel’”?15 Ngad sapgaed nga babyor nib thothup.
Gadadma folgaed. En Somoel ke motochiyel nag en Chitamangiy ni Lehi ninged yaen ko pi fak ko Jerusalem ningar “gayed e pi chep nem, ngam feked ngam baed ngaray nga wuru’ e binaw.”16 Lehi fith e duwer ni fan; dabki laemnag fa’an rayog fa mang fan. Ma Nephi, ke fulweg, “Gag e bay guwaen nggu rin’ e pin’en ni ke motochiyel nag Somoel.”,17
Gadadma folgaed woed rogon e laniyaen’ Nephi? Fa gadadma pinning e duwer ngak e motochiyel ku Got woed rogon kar rin’ew fapi walagen Nephi, kar waergow ko mich mar pii’ew keru’uy nga Somoel? Mafol, ngan ngonogliyed u “thothup u gum’racha’uy,”18 nibe fith Somoel ngodaed.
Ngad pagaen’daed ngak Somoel, ni ke yoeg ngak Joshua nap’an ke tearmedliy ninge powiy’ fapi Israelites nga fare binaw nib micheg, “Mu gel bugwaem; damu tamra’, ma damu waerengaen’um: bachan i gag Somoel i Got rom ngu waen u to’obem nga urngin e gin’uy.”19 Joshua ke pagaen’ ngak fapi thin nem ma yoeg ngak e gidii’ rok, “Mu yibliynogmed; ma gabul en Somoel ra ngongoliy e ma’ang’ang ngomed.”20 En Somoel ke kii’ fapi raen ko fare raen ni Jordan, ma tomuren 40 e duw u wuru’ e binaw fapi Israelites kar tawgaed.
Gadadba sak’iy ni fan e tin riyul’, woed rogon Abinadai ke rrin’ u lan fare Babyor ku Mormon. Ke arrestnog ngak, min fek ngadakaen Pilune Noah nge priesthood nib tagaen’ rok, Abinadi ke weliy’ fapi Ragag e Motochiyel me machibnog marunga’gen fare Kristus ni “ra yib nga fithik’ e gidii’ u fayleng .. me thapeg e gidii’ rok.”21 Me, udakaen e michaen’ u to’orngin e ya’el rok, ke yoeg, “O Got, mu fek e ya’el rog,”22 me Abinadi “ni ke yim’ ko nifiy.”23
Gadadma fi’leg e michmicheg udakaen e sacrament nge liyoer ulane temple. Fare sacrament i’ir bin thabi gaa’fan e yang ko liyoer rodaed nap’an e Madnom, rayog ningad thapeged fare micheg ni “ni nge yog ni paer fare Kan ni Thothup rok’ [ngodaed] ni gubin e ngiyal’.”24 Udakaen fare gam’ing nem nib thothup gadadma thapeg e fithingan Yesus Kristus ngadakendaed, ngad folgaed ngak, mag thapged e muruwel nib thothup Rok. Ulane fare temple gadadma “tay nga ban’en ko fayleng”25 mag thamiyed e Somole nge gapas nib tolang Rok. Rayog ningad puluwgaed ko gidii’ rodad, tabinaew rodad, ma yafas nib manemus u to’oben Chitamangiy. Aram fan President Nelson ke yoeg u Rome, “Fa tin fel’ nima yib ko temple ni dabiyoeg ningan matheg.”26
Ngad rrin’ed ufithik e tin yul’yul’. Ngad thapeged e nang fan ma rogon gachalpen ningad nanged e tin mat’aw ko tin gilal’. Thingar ningad motoyilgaed ko e pi thin ku Peter, reb e Apostle ko Galasia u kakrom, ni ke yoeg, “Damu un’um, mu posnag, bachan e to’ogor rom fare mo’oniyaen, i’ir e lion nibe tolul, ma yaen u but’, ni piry’eg ninge abichnigem.”27
Nap’an ngad gelnog e rungrung rodad, ngad manged woed rogon Yesus Kristus, i gadad e gachalpen Rok nib yul’yul’, Ninge matangiy e ya’el rodad.
E michaen’daed ngak Yesus Kritus ra mang a rungrung rom, ninge matangiy e ya’el rom. Nap’an e tituw ko tituw rog nge reb e pioneer kar toeyed e Heber fort, kar tayed ta’areb e lud nga reb mada’ ko ke mu’ “ma fel’ rogon”28ninge matangiyraed. Woed rogon e michaen’. U chingyal’ ngad thapege m’ag ko fare Kan Thothup nap’an Irra non nga ya’el rom, mu fil e “tin riyul’ ulangim.”29 Nap’an ngad paered ko fare gospel ku Yesus Kristus, ngad thapeged e Bayul ku Tathapeg ningad dared nga somm’on ufithik e mich, dad tam’ragaed, mag matangiyeddaed ko e tin baen ko mo’oniyaen. E michaen’daed ba pethpehtnogdaed nga Tharmiy, ninge taw’athnogdaed ko “tin riyul’ ban’en.”30 Nge, woed rogon fapi pioneers kar matangiy ngak e rungrung, nge liyegdaed ko paa’angin nib t’uf rok Tathapeg.
Ke fil’ed fare profet Ether, “Ere, enra michaenʼ ngakʼ Got e rriyulʼ ni rayog ni nge athapeg rebe fayleng nib felʼ, arragon, ni boed rogon bangi banʼen u baʼani matʼaw i paʼ Got, nib athap ni ma yib u dakean e mich, ni ma yuluuy e yaʼel ko gidiiʼ, niʼir e ratay raed ni yaed bagael ma yaed ba miyuluy, ni gubin e ngiyalʼ ma yaed be rinʼ e tin nib felʼ e muruwel, me wawliyraed ngar liyoer gaed ngakʼ Got.”31
Pi walageg, Gube pii’ e taw’ath ngomed ningam mared ufithik e gelbugwamed ko Somoel nge gospel Rok. Mu kii’ed paa’med ngak e gidii’ nibe waer, ma udakaen e gelingdaed ko Ya’el rom, powiy’raed ulangin fare rungrung ko ya’el nge matangiy. Mu gayrogon ningam “ta’areb ko Yesus,”32u rogmed; mu pii’ed keru’med nga tin kireb ma lumel; mu kal’nganmed ni ke chiliy profet nib t’uf rodad, mu mat’awgaed u gum’racha’daed; mu machaleboeg; mu gay e gol ma t’ufeg ngak reb; mu t’ufeg ngak Somoel i Got rom ko e liyoer nib yul’yul’ ko gachalpen rok.
M’ag rodad ko fare gospel ku Yesus Kristus, tabinaew rodad, nge gachalpen rodad ko Fare Galasia ku Yesus Kristus ni Fan e Gidii’en Got ko Tin Tomur e Rran rayog ningad toeyed e rungrung ninge matangiydaed ma posnogdaed ko e gelngin mo’oniyaen’. Marunga’agen pinn’ey Gube pii’ e m’ag nib thothup ko Somoel ma Tathapegdaed, arragon Yesus Kristus, amen.