Nibe ta’areb nag rogon Kal Ayuw ko Ndariy Rogon
Nap’an nibe ga’ e tin nu fayleng ban’en nib a’dag e tin nib togon ban’en, thingar da gayed rogon ngad pired nib gel u dakan fare pi’i kanawo’ ko motochiyel rodad nra fekdad nga Somoel.
Bay boran ni kug guy ba yol u lan ba winda ko kantin ni be ga’ar, “Falfalen’, $15.00.” Ma rug ba’adag ni ngu nang ko uw urngin pilwon e falfalen’ nrayag ni ngu chuw’iy ko $15 ere gu wan ngalan fare kantin ni nguy nga owcheg. N’en nug peri’eg e bul’ungi churwo’ nge talbuch nib sobut’ pilwon—ma dariy reb fapi n’en ni kug guy nra fek e falfalen’ ngog ni woed rogon nike yog fare yol! Bo’or e duw, ni guma tafney nag marunga’agen e yol nem nga rogon nifnan mom ni ngan sap ko fal’falen’ ni’ir ban’en nib sobut’ pilwon fa kemus nifen e chi ngiyal’ ney. Gadad e chon ko Fare Galasia ku Yesus Kristus ni fan ko gidii’en Got rok’ ko Tin Tomur e Rran, kan tawa’ath nag dad ko luwan’ ni gadad manang ko gin nriyul’ nima yib e falfalen’ riy. Ran peri’eg e biney ni fa’an ni yibe fol ko fare gospel nike sunmeg Somoel nge Tathapeg rodad, Yesus Kristus, ma yibe gay rogon ni ngan woed Ir.
Bay reb e fagar romew ni’ir e ma murwel ko train engineer. Boran riy nike kol e yap’ ko fare train nibe yan u wo’en fare train, me guy baa’ karo ni kabi tal nga dakan kanawo’en e train nibay nga m’on rok. Ke nang ni fare karo e ke mit u dakan kanawo’en fare train. Me tay fare train ko emergency, nibay e brake riy ko gubin fapi boxcar nibe gerngiy ni woed palngin dalip-e quarta ko myl (1.2 km) nibay nga tomur ko fare engine ko train, ni tomalngin e 6,500 tons. (5,900 metric tons). Dariy rogon ma rayag ni nge tal fare train u m’on ni nge ’aw ko fare karo, ni ke rin’. Fapi gidii’ ni’i moy ulan fare karo, e rung’agned fare train nibe yan langan e yubul riy nglang miyad mil ko fare karo u m’on ni aw fare train ngay. Nap’an nibe non fare tamuruwel’ ko train ngak’ e police, bay reb e ppin ni yib u fithik e damomow ngorow. Be tolul ma be yog ni ke guy e n’en nike buch ma ke guy nga owchan ni facha’ nibe kol e yap ko fare train e dani gay rogon ni nge cheleg fare train ni dabi ‘aw ko fare karo!
Woed ni, fa’an ni ra guy rogon fare tamuruwel’ ko train ni nge cheleg fare train ni dabi ‘aw ko fare karo, ma ir nge ga’ngin fare train era accident nib alamrin ni woed nra tal fare train ma ra mada’ad e gidii’ ulanggin nib alamrin. Fare fagar romow, fare train nibe kol e yap’ riy e dariy fan e n’en nike buch riy ma kube yan nge m’on nib saga’al ulan fare kanawo’en e train nge mda’ ko gin nib t’uf ni nge taw ngay. Woed gadad, ma ku bay kanawo’en dad, fare pa’i kanaow’en ko motochiyel nikad michegned nap’an ni kan tawfe nagdad ni ngad mangad gidii’en Fare Galasia ku Yesus Kristus ni fan ko gidii’en Got rok’ ko Tin Tomur e Rran. Sana bay gelngin e mo’orwar nibe yib nga kanawo’endad, biney e kanawo’ e ra fekdad ko tawa’ath ni manemus ni fa’an gadad ra par u dakan fare kanawo’.
Fare lik’ay ko gak’iy ko yafos e dag ngodad ni tin ba’aray ban’en ni dariy rogon e rayag ni nge palog nagdad ko kanawo’ ko motochiyel. Tafney nag fare balay i wasey nge fare pa’ i kanawo’ nib eu’in’in nib k’ik’iy, nibe yan ko fare gak’iy ko yafos, ni iraram e gin nibay urngin e tawa’ath riy nike pi’ fare Tathapeg nge fare Bayul Rok’ nifen ngak e gidii’ nib michuwan’. Kan guy ko fare lika’ay fare pa’i luul’ nibe yipfan e tin nu fayleng ban’en. Fare pi chep nib thothup e weliy ni fare luul’ “e ba chuchugur nga chren” fare pa’i kanawo’ machane kemus ni “chren” fare gaki’iy, machane gathi yan nga’. Fare fayleng e bo’or bugi ban’en ni ma palog nigey riy, nima ligindad ni dariy rogon u wan’y fapi motochiyel—ni’ir e ma fekdad nge chugur ko fare ke gaki’iy, machane gathi ko fare gaki’iy. Fa’an dabda tiyan’dad ngad ted chiylen fapi motochiyel rodad ni woed rogon, fapi dariyfan rogon e rayag ni nge palog nagdad ko fapi kanawo’endad me fekdad magdad un ngak fapi gidii’ ni kar ranoed ko fara na’un nib ga’. Fa’an nra dab kal ayuw gad, nge gadad ra lamach ulan fare luul’.1
Bay rogon nrayag ni ngan par nib kal ayuw fa dariy rogon ko gubin ban’en, nib mu’un fare gospel ngay. Napan ni gadad ra lemniged ko fapi micheg ni kad ted chiylen ngak fare Tathapeg, ma tiney e ba kal ayuw fa dariy rogon? Ni bachan ni kad bad ngray nga fayleng, boechi ngiyal’ ma dani fel’ e ngongol rodad, ni woed boechi ngiyal’ ma pingindad e dani fel’ fa yibe athkuy e tin nib fel’ ban’en ko tin dani fel’ ban’en? Gubin ngiyal’ ni gadad ra ga’ar, “sana,” “woed,” fa “machane” ni yibe weliy mornga’agen e thin ko profet fa tay chiylen fare gospel, ma woed ni gadad be ga’ar, “Tiney e thin e dariy fan ngog.” Rayag ni ngad weliyed rogon ni gadad ba’dag, machane n’en nib riyul’, dariy kanawo’en nib mangil e rin’ e kireb!
Fare kengin ko fal’yangren ko 2019 e kan fek ko John 14:15 ni fare Somoel e ga’ar, “Fa’an gu ra t’uf romed, ma gimed ra fol ko tin kug ta’chiyel ngomed.” Fa’an nra ba t’uf rodad ni woed rogon ni gadad be yog, ma rayag ni ngad diged e biney ko rogon ni gadad be fol ko fapi motochiyel Rok’?
Kol ayuwan fare gospel e dar yipfan ni ngad pired ni gadad ba chag fa fal’ rogoy. N’en nibe yipfan e nge par e tafney rodad nge ngongol rodad ni woed gidii’en Yesus Kristus. Nap’an ni gadad be tay u wun’dad e n’en nib thil ko kay ayuw nge ndariy rogon ko fare gospel, ba’aray boech ban’en ni ngan tafney nag:
Gadad be kal ayuwan fare rran ko Madnom ni gadad be fal’eg rogondad ngad feked fare sacrament?
Rayag ni ngad kal ayuwgad ko rogon e meybil nge rogon i fil fapi chepin nib thothup fa rin’ed ni woed rogon e Come, Follow Me—For Individuals and Families?
Gadad be kal ayuw ko rogon ni gadad be meybil u temple, ma gadad be par ni woed rogon ni kad michegned nap’an ni kad tawfe gad nge nap’an ni kad dared nga temple? Gadad be kal ayuw ko ya’dad nge be chuw nga maad, woed ko gin ba’aray nib thothup? Gadad be kal ayuw ko rogon ni gadad ma chuw ko garment rodad nikan pi’ ngodad u temple? Fa pi yalen ko fayleng e baga’ ni be dag ndariy rogon fa fan e biney?
Gadad be kal ayuw nga rogon ni gadad be pigpig ngak e gidii’ nge rogon ni gadad be rin’ e murwel rodad u Galasia, fa gadad bthil fa ndariy rogon e biney?
Gadad be kal ayuw fa ndariy rogon e n’en ni gadad be be’eg fan guy u TV nge u telefon rodad? Gadad be kal ayuw gadad ko rogon e pi thin ni gadad be tay? Fa gadad be un ko yaba’ nge thin ni dani mangil?
Fare babyor ko For the Strength of Youth e bay e gum’ing riy, ni gadad ra rin’ nib kal ayuw rogon, ma ran tawa’ath nag dad magdad par u dakan fare kanawo’ ko motochiyel. Ndariy fan ni kan yoloy ni fan ngak’ e fal’yangren, ya fapi gum’ing riy e darma thil nap’an ni kad chuwgad ko fare program ko Young Men nge Young Women. Sor fan ngodad ni gubin ni gubin ngiyal’. Fil e pi gum’ing ney e rayag ni nge ayuwegdad ngad pired ni gadad be kal ayuw ko fare gospel.
Dabda subut’ niged e pi’ gum’ing rodad ni ngayag ni ngad ligined be’ ni nge thamiy e t’ufeg. Gadad pi gidii’en Yesus Kristus, ni ngad pi’ed e ayuw ngak e gidii’, ni ngad chubiy rad nglang, ko gin nib thothup nrayag ni ngar thapegned boech fapi tawa’ath.
Gube pining med ni gubin ni ngam pag fare Kan ni Thothup ni nge powi’iy yem ko tin nib t’uf ni ngam thilyeg ulan e yafos rom ni ngayag ni ngam tay chiylen fapi motochiyel. Gube wenig nag ngomed ni dam mu gun’gun’ niged e gidii’ ni nge rin’ e biney. Pufthin e gag e ba milsuwan ngog, nibe yoeg fare Somoel.”2 Gadad gubin ma gadad be gay rogon ni ngad thilgad.
Fare yaat nibay ulan fare Babyor ku Mormon ni mornga’agen fapi Amlicites e rug ba’adag. Nap’an ni yad be dag ni ngar daged ko gidii’ ni kar palog gad rok Yesus Kristus nge fare Galasia Rok’, miyed achay lolgorad ko rowrow ni ngayag ni nge guy gubin e gidii’.3 Gadad gidii’en Yesus Kristus, uw rogon ni gadad ma dag ni gadad gidii’en? Rayag ni nge guy e gidii’ ko rogon e ngongol rodad nge rogon ni gadad ma fanow nag e yafos rodad?
Gadad nibay e motochiyel rodad, e gathi susun ni ngad manged e gidii’ ko fayleng. Gadad gidii’en fare nam “nike mel’egmed Got”4—rib mangil e biney e sobathin! Nap’an nibe ga’ e tin nu fayleng ban’en nib a’dag e tin nib togon ban’en, thingar da gayed rogon ngad pired nib gel u dakan fare pi’i kanawo’ ko motochiyel rodad nra fekdad fare Tathapegdad, ni gadad be sabthriy e tin nu fayleng ban’en.
Nap’an ni gube tafney nag e falfalen’ ni manemus, kug guy ni boech e ngiyal’ ma gadad be rin’ e tin susun dabda rin’ed. Bo’or e lumel nibe yib nap’an ni gadad be gay rogon ni ngad pired u dakan fare pi’i kanawo’ ko motochiyel. Lumel nge tin ba’aray ndariy rogon e rayag ni nge fekdad ko lumor ko fayleng me palog nagdad ko fare pi’i kanawo’ ko motochiyel. Nap’an nra buch biyay e biney, profet nib t’uf rodad, President Russell M. Nelson, e ke yog ngodad ni ngad suled biyay nga dakan fare pa’i kanawo’ nib papay. Gub falfalen’ ngay ko fare tawa’ath nifen e kalngan’ nge fare gelngin fare Bayul rok fare Tathapeg.
Dabda pared ufithik e yafos nib machalbog rodad. Kemus ni ta’areb e mo’on e yag ni nge par u roy u fayleng ni gubin ban’en rok’ mab fel’. Ni’ir Yesus Kristus. Dariy fan ni gathi gubin ban’en rodad mab fel’, pi walageg, rayag ni ngad be’echgad: be’ech ni ngad feked fare sacrament, be’ech nifan fapi tawa’ath ko temple, be’ech nrayag ni ngan thapeg fapi yi’iy.
Ke micheg nag Pilung i Benjamin marunga’agen fapi to’owath nge falfalaen’ nira yib ngorad pi’in ni ma leked ngak fare Tathapeg: “Nge ku arragon, ni gu ba’adag ni thingar mu lemniged rogon e tawa’ath nge falfalaen’ rok’ e pi’in ni yaed mafol ko fapi motochiyel rok’ Got. Ya muguyed, kan tawaʼath nagraed u fithikʼ gubin banʼen, ni lʼagruw mit, ni tinu fayleng nge tinu tharmiy; ma faʼan yaedra athamgil nge madaʼ ko tomur ma yaedra thap nga tharmiy, ni ginem e yaedra paer riy rokʼ Got u fithikʼ e falfalaenʼ ni dariy nʼumngin i napʼan.”5
Rayag ni ngan chuwi’iy e falfalen’ ko $15? Danga’, dabiyag. Falfalen’ nib n’uw nap’an e ma yib ko fare gospel rok Yesus Kristus. U dakean fithngan Yesus Kristus, amen.