Fal’eg Rogoy ko Gubin e Tin Nib T’uf Ban’en
Gube micheg ni pi tawa’ath e ra yib napan ngaram gay rogon ni ngam rin’ e tin ni murwel rom mag fil mag t’ufeg fare gospel rok Yesus Kristus ni kan fulweg.
Fapi program nge gosgos ko Fare Galsia ku Yesus Kristus ni fan ko gidii’en Got rok’ ko Tin Tomur e Rran e be mang bang nib ga’fan ulan e tabinaew ma be pi’ e Galasia motowon’, ni pow riy ni fin gun pi’ ko fabin ni ke thamur e general conference. President Russell M. Nelson e ke fanow nagdad: “Bo’or boech ni ku bayi yib. … Mu kay e falay ko vitamin rom. Mag tofan. Ya ri gara fal’falan’ riy.”1
Gube meybil ma gube ning e ayuw rok fare Kan ni Thothup nap’an ni gadad ra tafneynag uta’abong ko pin’ey ni’ir e def ko pin’ey nibe buchbuch ulan fare Galasia Rok’ Somoel ni ke sulweg.
Lukungun-e Tabinaew nge Galasia-ma ayuw ni Yibe Fil ma yibe Pi’ Gelngiin
Elder Craig C. Christensen e ir e cha’en ni gamow ko ba mo’olung nifen e tiyugang’ ko priesthood conference, me yus nag l’agruwi duwer ni’ir e dag yalen rogon ko lukungun e tabinaew nge Galasia ni yibe pi’ Gelngiin. Me yog ni susun e kad suled nga tabinaew rodad ni kan mu’ ko Misa magdad fithded i gadad, “Mang e kam fil ni mornga’agen fare Tathapeg nge fare gospel Rok’ e daba’ u Galasia?” ma woed ni ngad fithed biney u lan e mo’olung ko Misa, “Mang e kam fil ni mornga’agen fare Tathapeg nge fare gospel Rok’ u tabinaew rom ulan e biney e wik?” Rogon ni ngan Fanow-Nag e Rran ko Madnom, biney ab be’ech e talen ko fil, ma fare ngiyal’ ko mo’olung nikan thilyeg e ke ayuwegdad ni ngad filed mornga’agen fare gospel u tabinaew nge galasia.
Gubin e chon ko Fare Galasia ku Yesus Kristus ni fan ko gidii’en Got rok’ ko Tin Tomur e Rran e murwel rorad ni ngar filed miyad fas gad ni woed rogon fapi fanow Rok’ Somoel miyad thapeg ned fapi gam’ing ko thapeg nge falfalen’ ufithik e mat’won gelngin nib mat’aw. Thingar dab da tagan’dad ngak e Galasia ni’ir e ma fil ngodad gubin ban’en nib t’uf ni ngad nanged magdad woed gachalpen magdad ul’ul nge mada’ ko tomur.2 Ere, e mat’won dad ni ngad filed e tin nib t’uf ni ngad filed, ni ngad fasgad ni woed rogon ni ngad fas, magdad mang e gidii’ ni woed rogon ni ba’dag e Masta rodad ni ngad pired. Ma tabinaew rodad e gin somm’on nran fil rogon ban’en riy, min nang rogon e par nib mat’aw, min rrin’ ni aram rogon.
Nap’an ni kab bitir, Joseph Smith me fil mornga’agen Got ulan e tabinaew rok. Gelngin e pi athamgil rok me peri’eg e murwel Rok’ Got ni ligin Joseph nge gay e tin nib riyul’ ko fapi tiliw nib thilthil, me lemnag mornga’agen e thin nib thothup, me meybil ngak Got. Nap’an ni sul Joseph Smith nga tabinaew rok ulan fare Luway nib Thothup u tomren ni ke m’ug e Chitamangdad nge Fak ngak, me yib nge non ngak e chitinngin ni somm’on. Nap’an ni yibe “gire’ nga charen e gin nibay e nifey riy, [chitinngin] e fith ngak ko mang e ke buch. Me fulweg [Joseph], ‘Dariy, gubin mabfel’—kabfel’ rogog.’ [Me] ga’ar [ngak] e chitinngin, ‘kug fil ban’en.”3 N’en nike buch rok Joseph e kanawo’en e luwan’ ni gadad gubin ma thingar da gayed rogon. Ba t’uf ni ngad filed nifan ngodad.
Fare fan e fanow Rok’ e Chitamangdad nibay u Tharmiy nge tonom Rok’ e fan ngak pi Fak ni ngar boeded Ir. Ma woed, Nike pi’ rogon ngodad ngrayag ni ngad ’’lal i yan magdad mon’og. Tiyan’dad magdad fil magdad par ni woed rogon e tin nib riyul’ ban’en e rib ga’fan ko fayleng e chiney ni “bo’or e tin nibe buchbuch riy”4 ma ke yo’or e denen nge balyang ngan’ riy. Dabyag ni kemus ni ngad dared ko mo’olung ko Galasia min un ko fapi program mayag ni ngad thapegned gubin fapi n’en nib thothup min ayuwegdad “ko pin’en nib denen ko pi rran ney.”5
“Galabthir e bay e murwel rorad ni ngar fanow niged pifak rad ni ngar t’ufegned miyad rin’ e tin nib mat’aw ban’en.”6 Thogthog ngak e pi tiyugang’ ko Galasia, pi sensey, nge pi gosgos e rayag ni nge ayuweg e gidii’ fa tabinaew ni ngar mon’oggad ko tin nib thothup ban’en. Ma demtrug ni gadad gubin mab t’uf e ayuw rodad ni ngad mon’og gad nga m’on u dakan fare kanawo’ ko motochiyel, ma gadad rodad e bay e murwel rodad ni ngad gel niged e thothup rodad.
Lemnag Nephi, fak fare profet Lehi, ke ba’adag ni nge guy, rung’ag, nge nang ngak fare gelngin ko fare Kan ni Thothup ni fapi n’en nike guy e chitamangin ko l’akay rok ko fare gak’iy nibe yip fan e yafos. Naphi e rib t’uf ma kan tawa’ath nag nap’an ni kab fel’ yangren ko rogon e fanow nge machib ko “galabthir rok ni yow ba gol.”7 Arragon, ni woed Joseph Smith, ni’ir e ba’adag ni nge fil me nang ni fan ngak.
Fa’an gimed gubin fa gag ni gadad manang ni Yesus Kristus nge fare Galasia Rok’ nikan sulweg e iraram e n’en ni ma fil e gidii’ fa non ngodad, ma aram e fare def ko fare mich rodad Ngak’ nge Tin Tomur e Rran e kan toy nge daken e yan’.8 Dabyag ni ngad taga’gad fan ning e tomilang ko fare gospel ngak e gidii’—demtrug ni fa’an fapi gidii’ nib t’uf rodad fa pagan’dad ngak.
Ri woed, profet Joseph Smith e fil ni gubin Gidii’en Got ko Tin Tomur e Rran e ba t’uf ni nge nangfan ni fan ngak “fare rogon nge fan rok Got nge fan ni kad bad ngray nga fayleng.”9
“Rayag ni ngad bi’egned magdad nangfan fapi yol ni yib rok Adam, rogon e tha’ ko gidii’ ngak Got nge fapi angel nibay nga m’on, ni gadad manang mornga’agen nib achig. Fil mornga’agen e n’en nike buch ku bee’, fa tin ni kan thogthog nag ngak ngorad, e dabyag ni nge pi’ ngodad urngin nib t’uf ni ngad nagfaned nge rogon e tha’ rodad ngak Got. Tiney e lowan’ e kemus nrayag ni ngan thapeg ni fa’an nra buch rom u dakan fapi gam’ing rok Got nikan tay nibay nga m’on nifan ngodad. ”10
Ngan thapeg min mu’nag ko pi n’ey nib thothup nifan ngodad nge tabinaew e ir reb fan nib ga’ e pi program nge pi gosgos ko Fare Galasia ku Yesus Kristus ni fan ko gidii’en Got rok’ ko Tin Tomer e Rran aram fan ni be mang lukungun e tabinaew nge Galasia ni yibe pi’ ni nge ayuweg e chi ngiyal’ ney ko pi rran rodad.
Lukungun-e Tabinaew nge Galasia-ma ayuw ni Yibe Fil ma yibe Pi’ Gelngiin
Ngug weliy nib ngochngoch rogon ni ngan rin’ ko gospel ni yibe fil nibe ga’i yan ulan lukungun e tabinaew nge Galasia ni yibe pi’ gelngin.
Fare bin tigil’ e gin ni ngan machib riy e bay ulan e tabinaew rodad; bin l’agruw e training center ko missionari nibay u Provo, Manila, Mexico City, nge ku buch nibay u biyang. Pi klas ko Sunday School e thinger ri tabab rodad nge tabinaew rodad nge gin ni gadad ma par riy; ma kab mangil ma susun ni bin l’agruw e klas ko Sunday School e yima tay u galasia.
Mornga’agen e gidii’ rodad nib kakrom e bay ulan e tabinaew rodad e chiney. Tin nib t’uf rodad ni mornga’agen e gidii’ rodad ni kakrom e kubay u galasia.
Klas ni ma fal’eg rogoy ko yan nga temple e ma buch ulan e tabinaew rodad; ga’fan machane bin l’agruw e klas ko temple e krayag ni ra’i buch u galasia.
Fal’ag rogon e tabinaew rodad “ni nge par nib thothup ni gubin yang”11 e rib ga’fan ko tin tomur e rran. Ni ku woed fare lukungun-e Tabinaew nge Galasia ni yibe fil ma yibe pi’ gelngiin ni fan ko gelngindad nib thothup mra ayuweg dad ko tiney e rran, ma rib ga’ angin nga mm’on.
Tabinaew-Lukungin nge Galasia-ma ayuw ni be Fil ma yibe Pi’ Gelngiin nge Fal’ag Rogoy ko Temple
Wenig mu tafnayem ko rogon fare yalen ko “lukungun e tabinaew nge Galasia ni yibe pi’ gelngiin” nib sor fan ngon nge rogon ni gabe fal’ag rogom ni ngam thapeg fapi gum’ing nge motochiyel ulan fare na’un rok Somoel.
Arragon, fal’eg rogoy ko temple e rib ga’fan ulan e tabinaew rodad. Bo’or gidii’en e Galasia ni de nang ko mang e rayag fa dabyag ni nge weliy ko rogon e tin ni ke buch rok u tomren nike yan nga temple.
President Ezra Taft Benson e weliy fan e biney nima buch:
“Fare temple e bang nib thothup, ma fapi gam’ing ni yima tay u temple e ba thothup e ngongol riy. Ni bachan gelngin fani thothup aram fan ni boech e ngiyal’ ma darda yogned ban’en ni mornga’agen fare temple ngak e pi bitir rodad fa ngak pifak fakdad.
“Oren ni ngiyal’, bo’or e darma thamiy ni ba’dag ni nge yan nga temple, fa nap’an kar raned ngram, ma kar raned ni dan fal’ag rogonrad fa ra nanged e gin ni yib riy ni ngayag ni ngar rin’ed fapi gum’ing nge motochiyel nib yal’uw rogon.
“Mich u wun’ug ngayngan nangfan nib fel’ rogon fan nang fan e gin nike yib riy e rayag ni nge ayuweg e bitir nib fel’yangran ko fare temple … [ma] kar rayag ni nge ayuwegrad ni ngar sap niged fapi tawa’ath ko priesthood ni woed Abraham.”12
L’agruw kanawo’en nrayag ni nge ayuwegdad ni ngad thapegned e biney e lowan’ nike yog President Benson.
Kanawo’en #1. Ni bachan nib t’uf Somoel rodad, gubin ngiyal’ ni thingar da weliyed mornga’agen fare na’un Rok’ u fithik e tayfan nge liyor. Dabyag ni ngad daged fa weliyed fapi ya’en nge fapi motochiyel ni kan pi’ ngodad ulan fapi mo’olung ko temple nib thothup. Ma dabyag ni ngad weliyed morng’agen e ganop nib thothup ni kan pi’ ngodad ma kad michegned ulan e temple ni dab daged.
Kanawo’en #2. Fare temple e ir fare na’un rok fare Somoel. Gubin ban’en ulan fare temple e ba sor nagdad ngak fare Tathapeg rodad, Yesus Kristus. Rayag ni ngad weliyed e tin ba’aray ban’en nib achig nifan e temple nge rogon e motochiyel riy nge machib nge yalen ni yima rin’ u temple.
President Howard W. Hunter e ga’ar: “Weliyed ngak fapi bitir rodad e pi thamtham nib thothup ni kad thamiyed ulan fare temple. Magdad fil ngorad e tin ba’aray ban’en nrayag ni ngad weliyed ngorad ni fan fare na’un rok Somoel.”13
Tha’ ni kab kakrom, ni yib rok Profet Joseph Smith nga mada’ ku President Russell M. Nelson, fan fapi machib u temple nge fapi motochiyel e kemus ni tiyugang’ ko Galasia e ma machibnag e tiney.14 Bo’or mornga’agen nibay nrayog ni ngan print nag, fan motoyil ngay, fan yaliy e kachido riy, nge ku boech ni bay nrayag ni nge ayuwegdad ngan fil mornga’agen e gum’ing ko initiatory, endownment, mabgol, nge gum’ing ko m’ag.15 Ku bay mornga’agen rogon ni ngan leak wo’en fare Tathapeg min thapeg min tayfan fapi motochiyel ko rogon e motochiyel ko fol, nge motochiyel ko maligach, nge fare motochiyel ko gospel, motochiyel ko dam mu prew be’ ni gathi figirngim, nge motochiyel ko game’yag.16 Gubin gidii’en e Galasia ma thingari nang mornga’agen e pin’ey nibay ko temples.ChurchofJesusChrist.org.
President Russell M. Nelson e ke weliy e n’en nib thil ko gam’ing nib thothup u temple nge ganop ba’aray ban’en ni mornga’agen e temple ni ke pi’ motwon e Galasia nib pluw, mab mangil, mrayog ni nge guy e gidii’ ni gubin. Ke weliy ni ga’ar: “Gube pi’ e athamgil ngak gidii’en e galasia … be’eg gubin ban’en ulan fare Bible Dictionary nibay mornga’agen e temple riy, ni woed e‘Yibliy,’ ‘M’ag,’ ‘Miligach,’ nge ‘Temple.’ Kar rayog ni ngam be’eg e Exodus, guruy 26–29, ngeLevitikus, guruy 8. Fare Bin Kakrom e M’ag, nge fapi babyor ku Moses nge Abraham u lane Pearl of Great Price, nibe weliy mornga’agen e murwel ko temple nge rogon e gam’ing riy.”17
Ere, mu tafney nag ni fa’an nike fithem fakam, “Bay bee’ u skul ni kayog ngog ni yima chuw ko mad nib thil ulan e temple. Biney e ba riyul’? Bay reb e video ko temples.ChurchofJesusChrist.org ni fithingan riy e “Sacred Temple Clothing.” Biney nikan noeg e rib mangil nibe weliy rogon e ngiyal’ ni kakrom napan nima tay fan e gidii’ e musik nib thothup, meybil nib thil, maad ni pow, thin, nge yilen ni ngan noeg e tin ni gabe leam nag ngak Got. Arragon, fare Galasia e be pi’ ayuw ngak e tabinaew-fal’ag rogoy u lukungun fare tawa’ath ko temple ni ngan nang e pin’ey nib mangil nibay ko re video ney. Bo’or mornga’agen nib mangil nibay nifan ngom.18
Napan ni gadaed ra athamgil u fithik e munguy ko fare Ya’el rok Somoel,19 e ra fal’ wa’athan daed ni ngad nanged fan ma gadaed rrin’ ban’en u lane tabinaew rodaed nib ga’fan ni nge fal’eg rogon e n’en nib riyul’ nge n’en ni dani mangil ni ngan weliy ni mornga’agen e pi gam’ing nge m’ag ko temple.
M’ag nge Mich
Gube lemnag ngay ni boech i gimed e be tafney nag ko fare gospel ni gabe fil e be ayuwegnem u tabinaew rom ni nge par nib lukungun ma be pi’ e Galasia gelngin. Krayag ni gur e kari mus ni gur e gidii’en e Galasia ulan e tabinaew rom, fa bay figirngim ni dar mageran’ ko tiney, fa kemus ni gur ma dariy figirngim, fa kemus ni yigu gur fa kam dar gow e mabgol rom, ma gabe sap ngay ko uw rogon nrayag ni ngam rin’ e tiney e yalen nifan ngom. Ma woed ni karayag ni gamew be sap figirngim ngomew magmew fith, “Rayag ni ngad rin’ew e biney?”
Rayog ni ngam rin’e biney! Gube micheg ni fare tawa’ath e ra yib ngalan e yafos rom. Mra bing e maab. Mra mat e tomilang. Mran ga’ nigem min ga’nag e guman’ nge lowan’ rom.
Gube micheg u fithik e falfalen’ ni fare tawa’ath e ra yib napan ngaram gay rogon ni ngam rin’ e tin ni murwel rom mag fil mag t’ufeg fare gospel rok Yesus Kristus ni kan fulweg. Rayag rodad “ngad fal’agned rogondad ngad thapegned urngin ban’en nib t’uf.”20 Ni rugbe micheg u dakan fithngan fare Somoel nib Thothup Yesus Kristus, amen.