Guy e Llowaen’ u Dakan fare Kan ni Thothup

Rok’ Elder Mathias Held

Ko fare Medlipi Ragag

Ma be ayuweg mow ni ngu pere’egnew e tin nib riyul’ ni gathi kemus ni rogon ni gamow ma tafneynag machane u dakan fare laman e Thothup nib achig

Pi walageg, bo’or yay nibe yog Somol ngodaed ni ngad “guy rogoned i fil u dakaen e mich.”¹ Rayag ni ngad thapagned fare tamilang nge nang fan ni gathi kemus u daken e manang fan e ganop rodad machane u dakaen fare powi’iy nge yi’iy rok’ fare Kan ni Thothup.

Rogon e tiney e llowan’ e gathi gubin ngiyal’ ma bay u lan e yafos rog.

Figirngig, i Irene, nge Gag kug un’ew ko Galasia 31 e duw kafram nap’an ni fanug mabgol gow. Gamow l’agruw ni kug ilal gow u Colombia, machane tomren in a pul ngay ni kug mabgol gow, muruwel rog e fek mow nga Germany. Ri kab fel’ yangren mow ma bo’or e pin’en ni gu athapegnew; ma rib falfalan’ mow ngay ko biney e ngiyal’.

siasing/Llecheklel

Sister nge Elder Held

Nap’an ni gube tiynug ko murwel rog, ke thamiy Irene ni bay i pii’ ngomow ba mulwol u tharmiy, ni de nang ningew ko rogon fa wi’in. Ere pag urngin ni dariy mit e gidii’ nibe yob ngalan e garog rorow tin nibe pii’ chuway’ e encyclopedia, vacuum, babyor ko luum, talin ko luum, nge ku boech, ni gubin ngiyal’ ma be soen nag fare mulwol.

Reb e mithig yaal’ me yoeg ngog ni bay l’agruw i mo’on ni kar bow ngalan e garog rok’ ni yow chuw ngamad ni tilmar ma ke thamiy nib tu’uf ni nge pag row ngar bow. Ni yow be yoeg ni yow ba’adag ni ngar nonew ngak’ ni mornga’agen Got machane yow ra yib bayay nap’an ni gubay u tabinaew. Biney irraray fare mulwol?

Ra tabab gow i yib ngan guy mow, nge u dakan e powi’iy rorow, mag mad bi’eg ulan fapi scripture nge kug nangfan ni rib ga’fan Yesus Kristus ni’ir fare Tathapeg nge fare Bayul rodaed. De n’uw nap’an ngay mag mow nang ni ku dubuyew ni kan tawfe nagmow nap’an ni gamow ba achig, ni dabgu mel’ig ni nggu micheg nag biney e m’ag. Machane, rran tawfe nagmow bayay ma be yipfan ni nggu mangew chongin e biney e Galasia nib be’ech, ere somm’on ma rib tu’uf ni nggu nangew urngin ban’en ni mornga’agen.

U rogon ni rayag ni ngu nangew ni fapi n’en nibe yoeg fa gali missionary ni mornga’agen fare Babyor ku Mormon, Joseph Smith, nge fare tunom ko thapeg e ba riyul’? Ere, kug nang fanew ko fare thin rok’ Somol ni rayag ni ngu “ranang u wa’amngiraed.”² Ere, gu warow riy, ma gamow be sikeng nag ko fare Galasia ni gamow be sap nag fapi wa’amngiraed ngalan owchenmow nge tafney romow. Mang kug guyew? Ere, Kug guyew:

Gidii’ nib mangil mab falfalan’ nge chongin e tabinaew ni yaed manang fan ko rogon ni ngan falfalan’ ko biney e yafos ma gathi kemus ni ngan thamiy gafgow nge mo’owaer.
Ba’ e galasia ni dabi pii’ pulwon fapi gidii’ riy nibe murwel machane reb ni fapi gidii’ e yaed ma thapeged fapi murwel nikan pii’ ngoraed.
Ba galasia ni Yesus Kristus nge gathon e tabinaew e ir urngin ban’en ko fare galasia, ni gidii’en fare galasia e yaed ma balay nag e abich roraed ulan ta’areb e pul miyaed pii’ e salpiy ni fan e gidii’ nibe gafgow, ma yad be ayuweg e dugur roraed, ma yibe fil ngodaed ni ngad palog gaed ko tin nib tagan nga fithik i dowdaed.

Ma amrogoy:

Ma ri gamow ba’adag tin mornga’agen fare mon’og rom, mornga’agen e skul, nge murwel nib gel ni ngayag ni ngam ayuwegnem.
Ma kug mow nang mornga’agen fare rogon nima ayuw ni fan e gafgow.
Ma kari ggin owchmow ngay ko fapi general conference nge fapi tang ni rib mangil nge fapi yalen nib thothup ni yima weliy u rom.

Guyem e pin’ey, ma dariy tin nib kireb ko fare Galasia ni kug guyew. Ma ri gamow ba’adag gubin ban’en ni kug guyew. Machane, dabiyog ni ngu turguyew u wun’mow ni ngan tawfe nagmow bachane gamow ba’adag ni ngu nangew gubin ban’en u mm’on ni ngu rrin’ew e biney.

Machane, aram rogon ndar ta’areb e tafney romow, fare Somoel e ba gum’aen’ ma be fal’eg rogmow, ma be powi’iy mow, ma be ayuweg mow ni ngu piri’egnew e tin nib riyul’ ni gathi kemus ni rogon ni gamow ma tafney nag machane u dakan fare laman e Thothup nib achig mab waer, ni baga’ ni ma noen nga gum’ircha’dad.

Ra laman ney e gu thamiyew boran riy ni ke mithig yaal’ napa’an 10 e pul ngay ni gamow be fil mornga’agen fare gospel, nap’an ni kug be’eg ulan e Mosiah 18: “Bachan e gimed ba’adag … mab m’agaen’med ngay ni ngam ayuweged gimed, … mab m’agaen’med ngay ni nge kirbaen’med ngak’ e pi’in nibe kirbaen’, … fa’anra ireray e athap ko gum’ircha’ romed, ere mangfan ni dab ni tawfe nagmed u fithngan Somoel?”³

Biney e thin ulan fare Babyor ku Mormon e ri math nglan gum’ircha’mow, magmow thamiy ni dariy fan ni dabin tawfe nagmow. Kug ningew ni fapi m’agaen’ ni kan weliy u lan fapi verse e ku ta’areb rogon ko pi m’agaen’ romow ma irraray e tin nib tu’uf ban’en. Ma ba ga’fan ko bin ba’aray ni ngan nangfan gubin ban’en ni bachane kug nangew urngin nib tu’uf ni ngu nangew. Gamow ma tagga’ ko fare powi’iy rok’ e Chitamangiy nibay u Tharmiy ma mich u wun’mow ni ra ul’ul nge powi’iydaed.

Ere, ko rofen nem, mag mow duwgily e yaar riy ni ngan tawfe nagmow, ma de n’uw nap’an ngay min tawfe nagmow, fin array e mangil!

siasing/Llecheklel

Fare Tawfe ko Elder nge Sister Held

Mang e kug filew ni mornga’agen e biney nike buch?

Bin somm’on, kug filew ni rayag ni nge pagaen’daed ngak e Chitamangdaed nibay u Tharmiy, ni’ir ni gubin ngiyal’ ma be gay rogon ni nge ayuwegdaed ni ngad manged e gidii’ ni ma nang rayog ni ngad manged. Gamow be micheg e tin nib riyul’ ko fapi thin Rok’ nap’an ni yoeg: “Gura pii’ ko gidii’, ni bayil’ nga dakean bayil’, nib yalen nga dakean yalen, ni buchu’uw aray nge buch’uw aram; ma nge fel’ wa’athan e pi’en ni yaedra motoyil ko pi yalen rog … , ya yaedra fil e gonop; ya enra fek, e kug ra pii’ boech ngak.”⁴

Bin migid, kug filew ni, nib mu’un rogon ni gadaed ma laem, reb kanawo’en ni ngan thapeg e llowaen’ e rayag ni nge powi’iydaed ma gadaed nangfan. Ni ki’ir fare laman nib achig mab munguy rok’ fare Kan ni Thothup nibe noen ko tafney nge gum’ircha’endaed.

Gu ba’adag ni ngu ta’areb nag e biney ko rogon ni gadad ma guy ban’en. Chitamangdad u Tharmiy e gathi ke pii’ ngodaed nike mus ni ta’areb machane l’agruw owchdaed. Rayag ni ngad sap gaed u ta’areb owchdaed, machane bin l’agruw i owchdaed e ma pii’ ngodaed reb sap nib thil. Nap’an l’agruw fare sap ni ra tay ngalan lolegen daed, me pii’ ngodaed ya’an nib tamilang ko tin nibay u charen daed.

Ni woed, nikan pii’ ngodaed l’agruw fan fare n’em, ko bin ni gadaed be thamtham nge bin nib thothup. Tafney rodaed e ma guy e biney ko rogon ni gadaed ba thamtham fa rogon ni gadead be leam. Machane u dakan fare tawa’ath ko fare Kan ni Thothup, Chitamangdaed e ke pii’ ngodaed e bin l’agruw rogon ni ngan guy, ni’ir e bin tha’abi gga’ mab gga’fan, ni bachan e ke yib Rok’. Machane ni bachan fare laman e Thothup e ba munguy mab achig, bo’or e gidii’ ni darma nang ni bay e biney.

Nap’an nra peth e gali n’ey nga ta’abang ko dugur rodaed, mran dag ya’an fare n’em nib tiplo’ ni aram rogon nib riyul’. Riyul’, u dakan fare sap ko fare Kan ni Thothup, boech e tin nibe “buchbuch nib riyul’,” ni kad guyed ko tafney rodaed fa rogon ni kad nang faned, e rayog ni nge m’ug ni de riyul’ fa ba tagan. Tafnayem ko fapi thin rok’ Moroni: “Ma dakean gelngin fare Kan ni Thothup e rayog ni ngam nanged riy e tin nib riyul’ ni mornga’agen gubin ban’en.”⁵

Urngin fapi 31 e duw ni kug mang e chongin fare Galasia, ke buch rog ni bo’or yay ni fa’anra gadaed ra taga’ ko tin nibe yoeg e tafney rodaed magdaed pag e tin nib thothup ni gadaed manangfan ni gadaed be thapeg u dakan fare laman nib achig mab munguy ko fare Kan ni Thothup, ma woed ni gadaed fos ni kemus nibay ta’areb i owchdaed. Machane, ni biney e bugi fan e thin, kan pii’ ngodaed “l’agruw owchdaed.” Ni kemus ni ngan puthuy nga ta’abang nrayag ni ngaed guyed gga’ngin nge fare saseng nib polo’ nge ko gubin ban’en nibe buch’buch’ u lane yafos rodaed, ni ku woed ni gadaed ra nang fan ko gadaed minii’ nge fan dad ni woed pifak e Chitamangdaed nibay u Tharmiy nib fos.

Ku gumanang ko mang ni ke fil President Nelson ngodaed boech e duw kafram nap’an ni ga’ar “tin ba’aray e pi rran ni bayi yib, dabyag ni ngan par nib fos ko thothup ndariy fare powi’iy, dag rogon ngodaed, ma be ayuwegdaed, fare Kan ni Thothup ni nge gagiyeg nagdaed.”⁶

Kug nang ni rib riyul’ ni:

Bay e Chitamangadaed u Tharmiy nib tu’uf rodaed, nge kad ba’adag ni ngad daered nga fayleng ney ni’ir bang fare tonom rok’ nib thothup.
Ni Yesus e ir fare Kristus; nib Fos ma Ir fare Tathapeg nge Tabayul rog.
Gu manang ni Joseph, nib sobu’utaen, min pining ni nge mang fare profet ni rrin e biney, ni fulweg fare gospel nga fayleng, ni gubin fapi kiy riy ma bay riy, nge gelngin, nge fare matawon ko priesthood nib thothup rok Got.
Gu manang ni fare Babyor ku Mormon e ir fare gin l’agruw e mich rok’ Yesus Kristus ma gathon e tabinaew e nge ul’ul’ nge par u ta’abang.
Ma guma nang ni Somol, Yesus Kristus, e be gafaliy e biney, fare Galasia Rok’ nikan fulweg, u dakaen e profet rodaed nib fos, President Russell M. Nelson, e daba’.

Tiney nge ku boech reb e tin nib riyul’ ban’en e be ayuwegneg ngu par nib thothup ma be ayuwegned ko fapi n’en ni ba’adag Got ni ngu mang. Ma gube sap nga mm’on ko tin ni ba’adag ni ngu fil ngog—nge gur—ni ngad thapeged u nap’an ni gadaed bay ko biney e yafos “magdaed fil … guy rogoned i fil u dakaen e mich.”

Gu manang e pin’ey ni rib riyul’ ma gube micheg nagrad u dakaen fithngan Yesus Kristus, amen.