Thin nib Tomur
Aygi yibliy nag nge yibliy gubin e rran pi yafos rodad ni ngad pig’pig’ ngak Got nge pifak Rok—ubarba’ ngo barba’ fare veil.
Pi walageg nib t’uf rog, napan gadadma yib ko tomur ko re conference ney, gadad ma oge magaer ngak Somoel ni fan ko thog’thog’ nge matanang rok. Pi mulwol ney e kan pi’ lowaen’ nge athamgil ngodad.
N’en ni kan noeg pi ta non e daki assign ngorad. Kar meybil gad ni ra yib e yi’iy ngorad fini kar fal’egned pi mulwol rorad. Gu gin’ ngay, ni ke yigi fel’ yathin pi mulwol u ta’abang. Napan gabe fil rogon, mu gay pin’en ni Somoel ma gay rogon ni ngam fil rogon ko pi tapig’pig Rok..
Rib mangil pi tang. Kamagaer gad ko picha’an ni kar chubeg ko pi instrument rorad ni ngan fekey e Kan Thothup rok Somoel ngak urngin e yang ko mo’olung ney. Ma Ke tawath nag pi meybil nge gidii’ u bang ko gubin e mo’olung. Riyul’, conference bayay nike mang woed e gaan ko ya’el rodad.
Gamad be athapeg nge meybil ni pi na’un roared e chongin e galasia ra mang e matanang ko mich, nge gin ni bay riy fare Kan Thothup rok Somoel. Riyul’ ni ba’ togopluw u bang ko fayleng, machane tabinaw rom mrayog e gin nu tharimy, ni ba’ riy e fil rogon, meybil, nge mich kan peth riy’ ko t’ufeg. Mrayog ni ngad manged pi gachalpen rok Somoel, ni gadadma sak’iy min yoeg ni fan Ir dem turug e gin ni gadad bay riy’.
Fan Got e thingari mang fan rodad. Ir ba’adag pifak Rok ni ngar mel’eged ni ngad suloed Ngak, nib fal’eg rogdad, matawdad, endowed nagdad, sealed nagdad, nge michaen’ ngak pi m’ag kan fal’eg ko pi temple nib thothup.
Chiney ba’ 162 temples ni kan yibliy nag. Bin som’on riy’ ma sak’iy nib pow ko mich nge athamgil u waen’ ko pi pioneer rodad. Urngin e temple ni kar fal’egned e ke yib ko miligach nge muruwel nib gel rorad. Yad ma sak’iy nib fel’ ya’an woed rogon e jewel ko crown.
Matawan rodad e baga’fan ni ngad matangiy nagrad. Ere, pi temple nibe toey pi pioneer e ra fal’eg rograd bayay nge boech e ra toey nib fel’ usun bayay. Gadad ra gay rogon ni ngad matangiy pin’en ni kan use nag ko toey rorad, ni nge yoeg ni ngan magey fa pin’en ni kan fal’eg rograd nu kakrom.
Tunom riy’ ko St. George Utah Temple e kan fal’eg rogon. Tunom riy’ ni fan ko fal’eg rogon e Salt Lake Temple, Temple Square, nge fare plaze nga ngreb ko Office ko Galasia e ra yoeg marunga’agen ko Friday, April 19, 2019.
Manti nge Logan pi temple e ra fal’eg rorow u boech i duw nga mo’on. Napan ke fal’eg e tunom ni fanrow, ra yoeg marunga’agrow.
Muruwel ney ra t’uf pi temple ney ni ngan ning ko boech i ngiyal’. Pi chongin e galasia mrayog ni ngar athamgil ko liyor ko temple rorad u pi temple nib chugur ngay. Napan i mu’ e muruwel riy’, ra yibliy nag bayay pi temple.
Pi walageg, gadadma tay pi temple e pi na’un ni th’abi thothup ko Galasia. Napan gadadma yoeg pi temple nib bi’ech e ra toey, ir ra mang bang ko chepin rodad. Chiney, mu motoyil nib sobutaen’ nge liyor. Fa’anre gube yoeg e temple ra yib ko tafen nib chugur ngom, wenig mu pii’ e meybil nib mocho’ laman nga lan gum’ircha’em. Dabda adag e ga’ laman ni nge lich nag e Kan Thothup ni kan thamiy ko re conference ney nge pi temple rok Somoel.
Daba’ gadadma adag ni ngad noeg ni ra toey pi temple ko pi tafen ney:
Pago Pago, American Samoa; Okinawa City, Okinawa; Neiafu, Tonga; Tooele Valley, Utah; Moses Lake, Washington; San Pedro Sula, Honduras; Antofagasta, Chile; Budapest, Hungary.
Kammagaer, pi walageg nib t’uf rog.
Napan gadadma yoeg ko pi temple rodad nib ilal nge fel’ yangren, aygi pii’ e magaer rodad nu dakaen e ngongoliy rodad ni gadad gachalpen nib riyul’ ngak Somoel Yesus Kristus. Aygi thiliyeg pi yafos rodad udakaen e mich nge pa’agaen’ Ngak. Aygi athapeg e gelingin e Bayul rok udakaen e kalngan’ rodad gubin e rran. May aygi yibliy ngag nge yibliy gubin e rran pi yafos rodad ni ngad pig’pig’ ngak Got nge pifak Rok—ubarba’ ngo barba’ fare veil.
Gu pii’ e t’ufeg nge tawath rog ngomed, ma nib riyul’ ma be athamgil e thog’thog’ u biney, fare Galasia rok Somoel. Ra athamgil mada’ ko “fan Got e ra mu’ nag, nge Yesus nib Ga’ ra yoeg ke mu’ fare murwel ngay’.”1
Gube pii’ e tawath rog nge mich rog ni be fos Got! Yesus ir fare Kristus! Ireray fare Galasia Rok. Gadad e gidii’ Rok. U dakean fithngan Yesus Kristus nib thothup, amen.