Ni woed Rogon ni Rin’
Nap’an ni gadaed ra gay rogon ni ngad pigpig gaed ni woed rogon ni Rrin, ma rran pii’ ngodad ni ngad pagtilin mornga’agendad magdad ayuweg e gidii’.
Gonpa’an 18 e pul kafram, ko fall ko 2017, walageg i Mike ni 64-e-duw rok’ e yog ngog ni ke yib e m’ar ko cancer ngak’. Ke yoeg ngog ni kan pii’ ngak’ fare meybil ko priesthood ko facha’ ni kan dugliy ngak’ ni nge guy, ni be yib ngabi nang salpen ni gubin ngiyal’, ma kar mada’gow fare bisof rok’. Pii’ ba sassing ngab ngog ni ya’an fare Tempel u Oakland California ko gin ba’aram ni yibe taflaynag riy, nibay e yol riy ni be ga’ar “Amsap ko n’en nrayag ni nguy ko singil u aspital rog.”1
Ke ggin owcheg ngay ni be weliy mornga’agen fapi home teachers, fapi meybil ko priesthood, fapi bisof, nge tempel ko bin ba’aray ni mornga’agen e cancer rok’. Sap ngay, Mike, e reb e priest nibay ko fare Aaronic Priesthood, ni dakir un ko galasia ni ke chuchgur ni nge gaman 50 e duw.
Tabinaew romad, ma woed ni be ggin’ owchmad ko payngin nibe mon’og ko tin nib thothup ban’en ko bin ba’aray ko cancer, nib gaa’ ni be fithfith mornga’agen fare Babyor ku Mormom, fare gum’ing ko m’ag u tempel, nge fare bin magid e yafos. Nap’an boech e pul nike thumur fare cancer rok’ ma ke garar u but’, mab tu’uf e taflay rok’ ere nifek Mike nga Utah ko fare Huntsman Cancer Institute.
De n’uw nap’an ni taw, me yib John Holbrook nge yibi guy Mike, ni’ir fare tiyugang’ ko ward mission ko fare ward nifan e gin’ey nibe par riy e chiney. Ke yoeg John ni “magagiyel ni Mike e reb e bitir rok’ Got” ma de n’uw nap’an me fal’ e thin rorow, me mang John fare ministering brother ku Mike. Rib papay me yib e missionaries ngabi nang fan salpen, ni siyeg walageg, reb e pul nga tomren nike fel’ e thin rorow, miki fith John biyay, nibe weliy ngak’ Mike, “Gube lemnag ni garam a’dag ni ngam motoyil ko mulwol ko fare gospel.”2 Biney e ngiyal’ ma ke magaraen’ ngay, me ul’ul nga i mada’ nag fapi missionaries, nib mu’un Bisof Jon Sharp ngay, ni pi sbathin ney e fanow nag Mike nge thapeg fare tawa’ath ko patriarchal blessing, 57 e duw ni tomren nikan tawfe nag.
Somm’on ko December ko bin ba’aray e duw nike thumur, nib bo’or yarn ne taflay, ke dugliy Mike ni nge taleg fare taflay ko cancer rok’, ni rib gel e gafgow ni tay riy, me digey nge mil fan ngak’. Me yog e togta ngomaed ni Mike e gonpa’an e kubay dalip e pul ni nge par nib fos. Nap’an nibe buchbuch e tiney, fare duwer rok’ ko gospel e kube ul’ul’—ni ku woed ni kube yib fapi tiyugang’ ko priesthood nga nang fan salpen. Nap’an kug wared ni ngan nang fan salpen Mike, ma bay farke Babyor ku Mormon nib mab u charen e bet rok’ ma gamad weliy mornga’agen fare gospel nikan Fulweg bayay, fapi kiy ko priesthood, nge ku boech e duwer ni mornga’agen e tempel, nge tin ni manemus ban’en.
Lukungun e December, nibay ulan paa’ fare patriarchal blessing rok’, be m’ug ni be yib gelngin Mike, ma be m’ug ko fapi sekeng rok’ ni krayag ni nge mada’ nag ko dalip e pul. Magmad fal’eggin rogon ni nge un ngomad ko Christmas, New Year, nge ku boech ban’en. Ko December 16, me kol nigeg Bisof Sharp, nibe yoeg ngog ni Ir nge fare stake president e kar interview nigew Mike, ma kar pire’egew nib be’ech ni nge thapeg fare Melchizedek Priesthood, ma ke fith ko wi’in e rayag ni ngu un ngay. Ere gu dugliyed fare yar riy ko Friday, December 21.
Nap’an ni taw ko fare yar riy, ppin rog, Carol, nge Gag e kug warow ko fare aspital min mada’nag mow u charan fare singil rok’ min nog ngomow ni dakriy e pogofan rok’ Mike. Ere gu warow ngalan fare singgil ma bay fare patriarch, fare bisof rok’, nge fare stake president ni yaed be soen—me pithig Mike owchen. Nike poyeg me yog ni be runga’ag lamag ma ke fal’ rogon ni ngan pii’ fare priesthood ngak’. Wugem e duw nga tomren fin pii’ mat’won e priest ko fare Aaronic Priesthood ngak’, kug rrin’, nibe pii’ fapi tiyugang’ rok’ e ayuw ngog, ni ngu pii’ ngak fare Melchizedek Priesthood mug pii’ mat’won fare walageg ko fare office ko elder. Laal e awa nga tomren, me yim’ Mike, me yaen u thilin fare veil ni nge mada’nag e galabthir romow nibay fare Melchizedek Priesthood rok’.
Ke chugur nge gaman reb e duw kafram, ke pii’ President Russell M. Nelson ba murwel ngodad ni gubin ni ngad tu’ufeged fapi walagendaed nib “tolang rogon, mab thothup wo’en.”3 Weliy mornga’agen fare Tathapeg, President Nelson e fil ni “bachan iraray fare Galasia Rok’, gadad ni fapi tapigpig rok’ e gadad ra pigpig ngak’ facha’, ni woed rogon ni ke Rin’. Gadad ra pigpig u dakan fithngan, u dakan gelngin nge mot’won Rok, nge tu’uf rok’ nib mangil.”4
Kan rrin’ e biney e mulwol nike pii’ e profet rok’ Got, fapi murwel ko pigpig ngak’ facha’ e be buchbuch u dakan e naam, ni la’agruw yang, gidii’en e tabinaew nib thothup ni yad be rrin’ e murwel rorad ko pigpig, nge tin ba’aray ni be pigpig ni ku gog e “dar son ni ngan nog ngak’” ni nge pigpig, ni ku woed e gidii’ nib bo’or ni be dag e tu’ufeg rok’ Kristus nibe rrin’ e biney e murwel. Ulan e tabinaew romad, gamad be micheg, nib chuchgur, e mit ney e pigpig.
John, ni fagar rok’ Mike, ni’ir fare ministering brother rok’, nge reb e mission president ni kab kafram, i yog ngak’ fapi misisonaries rok’ ni “fa’an bee’ nibay fifthngan ko babyor rom me ga’ar e ’dabun,’ ma dam mu digey. Ya ma thil e gidii’.“ Ma ki yoeg ngomad, “Ke thil Mike nib gel.”5 Somm’on ma John e reb e fagar, nibe pii’ e athamgil ngak’ ma be ayuweg—machane fare pigpig rok’ e dani tal u rom nike mus ni bachan e yow ba fagar. Mnag John ni pigpig e baga’ ko fagar ma fagar e ma gaa’ nap’an ni gadad be pigpig.
Dani tu’uf ni bee’ nib m’ar, ni woed walageg, nib m’ar ni rib togon e rib tu’uf ni ngan pigpig ngak’ ko tin nib tu’uf rok’. Tiney nib tu’uf e ba thilthil ya’en, gaa’ngin, nge rogon. Galabithir ni yigo’ ir; l’agruw i mabgol ni kar mo’owaer gow; fal’yangren nibe mo’owaer; reb e mitin nibe gafgow; mich ni be mo’owaer; gafgow ko salpiy, fithik i dowey, fa mabgol nibe kireb—bo’or e pin’ey. Machane, woed Mike, dariy bee’ ni kari palog nga orel, ma dariy bi’id mab saga’al fare tu’ufeg rok’ fare Tathapeg ni nge yib.
Kan fil ngodad ko fare website ko pigpig ko far Galasia ni, “arragon ni bo’or yarmen fapi pigpig, pi murwel rodad e ngad ayuweged e gidii’ ni ngar a’daged ni ngar bad mi yaed woed fare Tathapeg.”6 Elder Neil L. Andersen ke yoeg:
“Bee’ nib fel’ gum’ircha’en e rayag ni nge ayuweg bee’ ni ke kireb e taya rok’, fek e gubiliyoror rok’ ko taflay, fa pii’ e changar nib mangil ngak bee’.
“Machane fare gachalpen ko fare bin somm’on e motochiyel e ra uneg rogon e pi pigpig ney ngay.”7
Fal’ag rogon fapi pigpig rodad ko tomren Yesus Kristus, rib tu’uf ningad tafnayed fare tu’ufeg Rok’, chibiyraed ngalang, pigpig, nga tawa’athnag e ba gaa’fan ko boech ban’en nib tu’uf. Ir e mnang ko mang e ba tu’uf ko reb e rran-nge-reb ma bay e murnguy rok’ ko pi gafgow rorad nap’an nibe fosagrad, durwi’iyrad, ma be machib ngorad. Machane Ir e ba’dag ni nge rrin’ boech nib bo’or ko bin bara’ ni kemus nifan e daba’. Ba’dag ni picha’en ni yaed bay u charen e ngar leaked Ir, mi yaed nang Ir, mi yaed rrin’ gelngin ni fal’nginraed.8
Nap’an ni gadaed ra gay rogon ni ngad pigpig gaed ni woed rogon ni Rrin’,9 ma rran pii’ ngodad ni ngad pagtilin mornga’agendad magdad ayuweg e gidii’. Tin nibe buch e rayag nib momaw’ rogon ma be sikeng nagdad ko tin ni gadad ba’dag ni ngad boedir fare Masta rodad, ni bin tha’abi gaa’ e pigpig ni tay e, fare Bayul Rok’ ndarmamus, ni’ir e fan gubin ban’en. Ko Mathew guruy ni 25, kan pugoran ngodad rogon nima tafneynag dad fare Somol, wi’in, woed Ir, gadad mo’owar ko gafgow, ma bo’or e denen, nge tin nibe yib ngalan e yafos rodad machane tiney e baga’ ni dayma sap ngay:
“Mired, ngan pi’ e gin sunwon Got ngomed, ni kan ngongliy rogon kan tay ni fan ngomed ni ka nap’an e ngiyal’ ni sunumiy e fayleng riy:
“Gum’ ko bilig, mi gimed pi’ ganag: ma gum’ ko belel, mi gimed pi’ e garbod ngog: gu be’ nda mu nanged wocheg, mi gimed fekeg nga tabinaw romed. …
“Ma pi’in yad bmat’aw e bay ra fulweged ngak, ni lungurad, Somol, wi’in e gguyed gur ni ka mum’ ko bilig, ma gamad pi’ ganam? ara ka mum’ ko belel, ma gamad pi’ ban’en ngom ngam garbod ngay?
“Ma wi’in e gguyed gur nda gu nanged owchem, ma gamad piningem nga tabinaw romad? …
“Ma bayi fulweg fare pilung ni ga’ar, Ngari gog ngomed, yu ngiyal’ ni um rin’ed e pin’ey ni fan ngak bagayad e pi cha’ney nth’abi sobut’ u fithik’ e picha’ ni pi walageg ney e kam rin’ed ngog.”10
Demuturing ko gadad be pigpig ni walag ni pi’in ni ppin fa pumo’on, fa ngiyal’ ni kanog ngodad nibay ban’en ku bee’ nib t’uf e ayuw riy, kanog ngodad ni ngad sapgad ko fare powi’iy rok’ fare Thothup—magdad rrin’. Rayag ni gadad ma lamnag rogon ni ngad pigpig gaed, machane fare Somol e manang, u dakan e Thothup Rok’ ma rayag ni ngan powi’iydad. Woed Nephi, ni’ir “ni thogthog nag fare Thothup, dagur nang ko mang e pin’en ni bay nga m’on ni thingar gu rin’,”11 ma kra powi’iydad fare Thothup nap’an ni gadad ba gay rogon ni ngad rin’ed fare murwel rok’ Somoel ni ngad tawa’athnag Pi fak. Nap’an ni gadad ra gay fare powi’iy rok’ e Thothup magdad pagaen’ ngak Somol, ma ran ta’dad nga biyang nge tin ni ngad rrin’ed nrayag ni ngad murwel gaed magdad fal’ag wa’athan—ni woed e, pigpig.
Bay boech e ngiyal’ ni kad guyed nib tu’uf e ayuw machane darda rrin’ed ni aram rogon, ni gadad be lamnag ni n’en nib tu’uf ni ngad rrin’ed e dani gaman. Ni ngan rrin’ ni woed rogon ni Rrin’,12 e, ngan pigpig ni woed rogon e tin nrayag ni ngad rrin’ed min pii’ ma pagaen’uy ngak Somoel nra ayuwegdad ngad tawa’ath niged fapi “gidii’ nibe malekag ko biney e yafos.”13 Boech e gidii’, ma yaed be pii’ e tawa’ath ko ngiyal’ nge tin ni yaed ba chag riy; ma boech, yaed be pii’ e thin nib mangil fa yaed bagel. Dariy fan ni gadad ra thamiy ni dariy angin fapi murwel rodad, President Dallin H. Oaks e weliy reb e yalen nib gaa’fan ni mornga’agen e “tin nib achig ban’en.” Ke fil ni murwel ni fan e tin nib achig ban’en e ba gel gelngin ni bachan e ma pining “fare Kan ni Thothup ni nge paer rodad,”14 nima tawa’ath nag e cha’en ni ke pii’ nge cha’en ni ke thapeg.
Ni manang ni dabi n’uw nap’an me yim’, Mike ni walageg e yoeg, “Kug guy ni fare m’ar rog ko cancer e ke ayuwegeg kug sap ko tin ba’aray ban’en ni th’abi gaa’fan.”15 Magar ngak’ e pi pumo’on nge ppin ni kar guyed e tin nib t’uf, ma dani gun’gun’ niged, ma kar pigpig gaed ni woed fare Tathapeg, ma dawri saga’ael ngak’ Mike. Boech e gidii’, rayag nra thil gubin ban’en rorad nib papay; ma boech e gidii’, e woed nra yib nap’an ni kar thumur gaed ko fare veil. Machane, thingar da tafnayandaed riy ni darma saga’ael ma dariy bee’ ni rib palog ko fare kanawo’en fare Bayul rok’ Yesus Kristus nib machelbog, ni’ir e darma m’ay n’umngin nap’an.
Ko fa bin e October nike thumur ko general conference, Elder Dale G. Renlund e fil ni “demuturug urngin nap’an ni kad mul gaed ko fare paa’i kanawo’ … , ngiyal’ ni gadad ra lemnag ni ngad thil gaed, ra ayuwegdad Got ngad suled.”16 Biney e laem ni ngan thil, e woed, ni kan pining daed ni woed “Gube lemnag ni garam a’dag ni ngam motoyil ko mulwol ko fare gospel.” Ni ku woed ni dawri saga’ael ko fare Tathapeg, ma dawri saga’ael ni ngan pining.
Biney season ko Easter, ku bayay, ni ngad sapgad ko fare maligach ko bayul rok’ fare Tathapeg, Yesus Kristus, nge n’en nike Rin’ ni fan ngodad ni gubin nibay pilwon nib gaa’—ni pilwon ni yoeg “bachan [Ir], ni’ir e tha’bi tolang ko gubin, ni gafgow ko a’mith.” “Ma dariy fan,” ni yoeg, “Kug fek ma kug rrin’ ni nge fal’eg rogon kanawo’en gubin e gidii’.”17
Gube micheg ni bachan e Ke “mu’i rrin’,” gubin ngiyal’ ma bay e athap. U dakean fithngan Yesus Kristus, amen.