Fla’ab ko Tawa’ath
Boech e twa’ath ni ba’adag Got ni ngad thapegned e ba tu’uf ni ngaed muruwiliyed e birodaed e murwel ni somm’on—michan’daed ngak Yesus Kristus.
Pi walagen, Chitamangdaed nu Tharmiy nge Yesus Kristus e ba’adag ningar tawa’ath nigew daed.1 Fare duwer nibe fith ko urrogon ningaed ngongliyed ngad thapeged fapi tawa’ath e kan mel’eg e thin riy nge sabethin nib bo’or e biyu’ e duw.2 Boech ba yoeg thingar ningad muruwelgaed ko tawa’ath; u dakaen e ngongol rodaed. Ma reb, be yoeg ni Got Ke mel’eg e gidii’ nra pii’ e tawa’ath ngak nge rogon—ma dabiyag ninge thilyeg. Gali leam ney e ba oloboech. Pi tawa’ath u tharmiy e dar ma yag ngodaed ni woed e “coupon ni fan e chuway’” fa woed ni yibe soen nag ko lottery. Danga’, fa tin riyul’ riy e woed rogon e tha’ ko Chitamangdaed nu Tharmiy nib t’uf pi fak Rok—gadaed. Tin riyul’ ni ke weliy fapi tawa’ath e darma yib u dakaen e muruwel ni woed e salpiy, machane u dakaen e ngongol ko mich, ko somm’on nge tomur, nib t’uf.3
Nap’an ngad lemniged ko urrogon ningad thapeged e tawa’ath rok Got, ngad lemniged e pi tawa’ath u tharmiy ni woed rogon e l’ud ni kan ulnguy nga ta’abang. Mu lemnag ni lukngun e pi l’ud ney, ma bay boech e l’ud nib aching ni kan tay nga dakaen. Magid ngay e pang’in, nge bin magid e kengin nib achig, fani yib e lud ni bin nib gaa’ ni tomur. Biney e l’ud ni kan ulnguy nga ta’abang ab gel gelngin, nrayag ni nge pii’ gelngin e guwal nib bo’or e rran. Mu lemnag u to’oben fapi l’ud e bay ta’areb e masis riy, ni bay tobongin nib rowrow.4
Ninge yag gelngin fapi lud, thingar ningan yik fare match nge lud. Pi l’ud nem era yik me yag e nifiy riy ngak fapi l’ud nib gaa’ ma urufeg. Nap’an nra tabab i urufeg, nira urufeg urngin e l’ud nge mada’ ko ngiyal’ ndakuriy fapi l’ud fa dakuriy e nifeng riy.
Ke’eg fare masis nge urufiy fapi l’ud e ba ngongol nib moem nibay gelngin min gga’ ko fapi l’ud.5 Fin ngiyal’ nran ke’eg fare masis, dariy ban’en nra buch, dariy fan fapi l’ud nib gaa’. Fa’an ke yik fare masis machane dar yik e nifiy, magal nge gwael nira yib riy ra chigchig ma dariy fan ma dabi yib gelngin ko fapi l’ud. Fa’an ndariy e nifeng riy, ma fare nifiy era waer ma tal.
Nta’ab rogon, boech e tawa’ath Got ni ba’adag ni ngad thapegned e ba tu’uf ni ngaed muruwiliyed e birodaed e murwel ni somm’on—michan’daed ngak Yesus Kristus. Mich ngak fare Tathapeg e ir kenginn e ngongol nge gelngin.6 Bin somm’on ngad ngongoliyed e mich; ma tomur bay yib gelngin—ko ngiyal’ ni ba’adag Got. Biney e yalen e ba gaa’fan.7 Fare ngongol nib t’uf, machane, nib chigchig ko fapi tawa’ath nira yib ngodaed.8
Mu laemnag mornga’agen e ngiyal’ nap’an e porchyog, nibe dramrom ni ke yib nga fithik fapi gidii’ u Israel nap’an kar milekagaed ko fare binaw nikan micheg. Porchyog era ka’ad ma ba alamrin nran yim’ riy. Ni cha’en ni ke k’ad e porchoyog e ran fosag ni fa’an nran ni changar ko re porchoyog ni wasey nem ma dabi yim’. 9 Uw gelngin fna momaw’ ni ngam sap nga ban’en? Pi cha’en nra sapgaed ngay e michaen’raed ko gelngin ni yib u tharmiy min fosagraed. Boech fapi Israelite ni ke k’ad raed fapi porchoyog e darn sapgaed ko fare porchyog ni wasey e ram’aed. Ni woed ndariy e mich roraed ningar sapgaed ngay.10 Sana dar mich u waen’raed ko ngongol nib moem ni nge yag e golnag nikan micheg. Fa sana kar el’el’ nigaed gum’racha’raed mar pii’ed keru’raed ko fapi fanow rok fapi profet rok Got.11
Fare yalen ninge thapeg e tawa’ath nibe yib rok Got ni yaen ko manemus. Woed rogon fapi gidii’ u Israel ni kakrom, thingar ningad ngongoliyed e mich ngak Yesus Krsitus ninge tawa’ath nagraed. Got ni ke weliy ni “bay e motochiyel, kan sunmiy u tharmiy ni dabiyoeg ningan thang u mm’on e sunmiy ko fayleng, nibe un urogon urngin e tawa’ath—ma nap’an demturug e tawa’ath nira yib rok Got, nira buch u dakaen e motochiyel e deaf riy.”12 Arragon, dabkum muruwel ni fan e tawa’ath—machib nem e ba baen—machane thingar ningam mata’aw ningam thapeg. Thapeg rodaed e ra yib ni kemus nu fithik’ ngu dakean fare murnguy rok’ Got e gimed rathap riy ku Yesus Kristus.13 Tin gaa’ ko maligach nib bayul rok ba yip fan e farengi l’ud nib gaa’ ko manemus; ngongol rodaed ningaed ta’abrogon ngak ni dariy fan. Machane gathi dariy, ma gathi dariy fan; u fithik e lumor, rayag ni ngam guy e masis nibe yik ba yaen nga palog. Ni woed, nrayag nran guy nga tharmiy ni bachan e mich nib achig e rayag ni nge gal’ rama’en fapi tawa’ath rok Got.14
Ningam thapeg e tawa’ath nib micheg ku Got, mu ngongoliy e mich, mag urufeg ni woed rogon fare masis ko fare tawa’ath nu tharmiy. Susun, reb e tin ko meybil ninge yoeg e tawa’ath ni ba’adag Got ninge pii’ machane thingar ningad fithed riy.15 Alma ni’i yoer nag ni ngan runguy, ma daki magafan’ ko pi denen rok; ma danki yib ngan’ e pi amith ni bay rok ko fapi denen ni’i rrin’. Falfalaen’ rok e bagel ko amith ni tay—ni bachan ke wenig ngak Yesus Kristus u fithik e mich.16 Fare gelnging nib t’uf ningad tababgaed ningad ngonogliyed e mich ngak Kristus ma fith ngak Got u dakaen e meybil mag thapeged e tin ba’adag Rok nge ningyal’ ni nge fulweg.
Boech e ningyal’, fare gelngin ninge yoeg e tawa’ath ba t’uf gaa’ ko piry’eg nge fith; e ngongol, nibe athamgil ko mich nib t’uf. Nap’an fare 19th century, Brigham Young ke loeg ulungi Gidii’en Got ko Tin Tomur e Rran ningar ranoed ngak mar paered u Arizone, e binaw nib gwael u loelluch u Merikan. Nap’an kar tawgaed nga Arizona, ke m’ay e garbad roraed ma dakuriy e raen roared. Kar ningaed e ayuw ngak Got. Me yibi buch ke aw e n’ew nge ice, mar suguyed tafan e rran roared ningar duruwiy’ e gamanman roared. Ke fel’ rogonraed mar pinninged e magaer, mar suloed nga Salt Lake City mar falflaen’gaed ngak Got. Nap’an kar tawgaed, kar weliyed e tin chepin ko milekag roared ngak Brigham Young mar yoeged Arizona ba kireb a binaw riy.
Tomuren ke motoyil nga salpenraed, Brigham Young e fith ngak reb e mo’on nibay u rom u singil ko n’en nibe lemnag ko mornga’agen fare milekag nge ma’ang’ang. Re mo’on nem, Daniel W. Jones, ke fulweg, Gura suguy bayay, mu athamgiliy, mug meybil bayay.” Brigham Young ke ta paa’ nga Brother Jones me yoeg, “Gara powiy’ bin magid e milekag nga Arizona.”17
Rayog ningad pugurrangaed e ningyal’ nap’an kad thamgilgad mag meybilgaed bayay—ma yib e tawa’ath. Tiney nike buch rok Michael nge Marian Holmes e ba dag e kenginn tiney. Michael nge Gag ku pigpignigew uta’abang ko Area Seventies. Kug falflaen’ nap’an kan pining ninge meybil ko mo’olung romaed ni bachan e mich rok nib moem ningam guy; Irma nang rogon ninge non ngak Got. Guba’adag ni ngu motoyil ko meybil rok. Somm’on ko mabgol rorow, dariyfan, ni Michael nge Marian dar meybil gow mdar ranow nga galasia. Kar muruwelgow ko delip e bitir nib chigchig mar muruweliyew ko construction company nib gaa’. Michael dar thamiy i’ir bee’ nma un ko tiliw. Reb e naep, e bishop rorow ke yib nga nu’un rorow me pinningrow ningar meybilgow.
Tomuren ke chuw bishop, Michael nge Marian kar me’legew ningar meybilgow. U mm’on kar ranow nga bet, kar ragbugow nga but, niyow be stuntun, Michael ke tabab ninge meybil. Tomuren boech e thin ko meybil, Michael ke tal, me ga’ar, “Marian, dabiyag ni ngu rrin’ e biney.” Nap’an ke sakiy ngalang me yaen, Marian ke koel paa’, me fulweg ir ninge ragbug nga but bayay, me ga’ar, “Mike, rayog ningam rrin’ e biney. Mu gay rogon bayay!” Ke pii’ e athmagil nga laniyaen’, Michael e pii’ reb e meybil nib ngochngoch.
Fapi Holmeses kar tababgaed ningar meybilgaed ni gubin ngiyal’. Kar thapeged e pinning ko yoror ningar ranoed nga galasia. Nap’an kar ranoed ulangin fare chapel mar motoyilgad ko pi thin ko tang, fare Ya’el ke yoeg ngak, “Biney ab riyul’.” Taboch, dan fith ngak, Michael ke ayuweg ninge be’ech nag boech e tafnadow ko fare galasia. Nap’an ke rrin’, ke thamiy, “Irraray e nu’un Rog.”
Michael nge Marian kar thapegew e muruwel ko Galsia mar pigpig nigew ko ward nge stake rorow. Kar m’agew paa’ row, nge fapi bitir ni 3 ni fakrow ni kan seal nagraed u ta’abang. Bo’or e bitir ni yib nga tomren, ni mada’ ko 12 urngin e bitir. Fapi Holmeses kar pigpigew ko mission president nge companion—l’agruw yay.
Fare meybil nib tamra’ u somm’on i’ir e ngongol nib michaen’ nib chigchig nike yoeg e tawa’ath ko tharmiy ngorow. Fapi Holmeses kar ayuweg e nifiy ko michaen’raed ningar uned ko galaisa mar pigpigniged. Athamgiliy ni kar tew ni bo’or e duw e ke fekrow ko nifiy nib gaa’ u tiney e rran.
E nifiy, machane, ba t’uf e nifeng ko l’ud ninge yoeg e tin rayog rok. Woed ke yoeg Michael nge Marian Holmes, mich ngak Kristus ba t’uf e ngongol ninge yoeg e nifiy nib gaa’ nibe thamgiliy. Ngongol nib chigchig ba yoeg e gelingdaed ningar dared nga kanawo’ ko michmicheg ma yaen nga tawa’ath nib gaa’ ko Got ni ran pii’. Machane nifeng me yib fa’an ngad mitmith niged e rifrif nu aydaed. Boech e ngiyal’ thingar ningad fileged e gat’ing nge gane gat’ing ou’moon e thogthog ra dag ngodaed e bang nibay e gaan riy’.18 Boech e ngiyal’ thingar ningad fi’leged e talin u mm’on e thogthog ningad fi’leged e barkow.19 Boech e ngiyal’, u dakaen e fanow ko profet ku Somol, thingar ningad bake chi cake ko boech e gapgip nge flour ninge yoeg e e kahol ko gapgip nge tofen e flour.20 Nge boech e ngiyal’ thingar ningad “mtal’ mu nang ni gag [Got i’ir] Got” mu pagaen’um ko laniyaen’ Rok.21
Nap’an ngam thapege e tawa’ath ku Got, rayag ningam lemnag ni kam folgaed ko fare motochiyel nib manemus nib pethpeth ko fare tawa’ath nem.22 Machane mu pugurran e motochiyel “ni dabi tungun” ba yib ko ngiyal’, bay yib fan e tawa’ath ma yib nap’an ba’adag Got ninge yib. Woed fapi profet nu kakrom ni kar piry’eged e tabinaew roared u tharmiy23 “kar m’aed, ni daworiy thapeged pi tawa’ath, dar guyed raed nib palog … [mar] fi’leged laniyaen’raed ... mar thapeged riy.”24 Fa’an e tawa’ath nib t’uf ni daworiy yib ku Got—daworiy—dabi t’uf ningam kirebaen’, mu lemnag e tin ni t’uf ningam rrin’. Arragon, mu folgaed e fanow rok Jospeh Smith ni ngam “rrin’ed u fithik e falflaen’ urngin e ban’en nib rayag [romed]; ngem … tal, u dakaen e laniyaen’ nib fel’, ningan upnguy e paa’angin [Got] …. ngom.”25 Boech e tawa’ath ba yib nib sasagal’, arragon ni fan e gidii’ nib gelbugwaen rok Got.26
Lal’ i duw u faram kan yarmiy e babyor ko tabinaew, ma ayuweg fare Galasia ningan fil e machib, gelong e mich, nge matangiy e gidii’ nge tabinaew kan pii’. President Russell M. Nelson ke micheg nira ayuwegdaed ningad fasgaed ko ya’el, gaa’nag e falflaen’daed ko gospel, ma fel’rogon e thilyeg rodad ngak Chitamangdaed nu Tharmiy nge Yesus Kristus.27 I’ir e muruwel rodad ningad fanayed fapi tawa’ath ney. Bayi muruwel rodaed ningaed bing ngad biy’eged Come, Follow Me—For Individuals and Families, nge reb e babyor nib thothup Come, Follow Me material.28 Thingar ningad weliy’ed nga tabinaew ma fagar rodaed ma yarmiy e rran ni Madnom ningad yik’ e nifiy ko ya’el. Fa rayog ningad paged fatin fel’ u tabinaew rodad ma gelgning riy ni dariy fan.
Gube pinningmed ningam ngongoliy e gelngin tharmiy ningam thapeg e tawa’ath ku Got. Mu ngongoliy e mich ngam urufeg fare masis nga nifiy. Mu pii’ fare nifeng nib t’uf nap’an mu soen ni fan Somol. Ko fapi milwol ney, Gube meybil fare Kan Thothup ra powiy’med ninge yoeg ningam, wod rogon fare bee’ u Proverbs, ngam “fla’ab ko pi tawa’ath.”29 Gube pii’e m’ag ni Chitamangdaed nu Tharmiy nge Fak nib T’uf Rok, Yesus Kristus, ba paerew, yowba a’dag e tin t’uf romed, yow ba falfalen ni fanmed, u dakaen fithingan ku Yesus Kristus, amen.