Babyoren ko gosgos e Priesthood Rom

April 2019 General Conference

2:3

Babyoren ko gosgos e Priesthood Rom

Rok Elder Gary E. Stevenson

Ulung ko fare Ragag nge L’agruwi Apostle

Fal’eg e birom e babyor ko gosgos ko rogon ni ngam dag ni gur e gachalpen Kristus.

Fare December nike thimur, ma fare bin Somm’on e Presidency e yoeg ba thin ni pagael ni 11 e duw roraed e ra “tabab i un ko … pi ulung ko Aaronic Priesthood … ni yira tabab ko tabolngin e January u lane re duw ni ke gaman 12 e duw roraed.”¹

N’en nike buch, e nap’an e yang somm’on ko re duw ney, ma in e pagael ni 11 e duw rok nike gin’ ni kar leam niged ni kiyaed ra paer u lane Primary mada ko bin migid e tanchubi roraed machane chiney e yaed be tabab i pi’ e sacrament ko Madnom ni yaed e deacon nib bi’ech.

Gube leam nag ko mini’ e pi’in nib gel nikar gin’ gaed ko binem nib thil—deacon fa galabthir roraed. Oren i giyaed 80,000 urngin raed e pi deacon, e bay rodaed ko re balayal’ ney u lane re Conference Center ney fa yaed be yaliy u biyang nibe yib ko fare technology. Gamaed be pining e magaer ngomed nikam baed kam manged ko priesthood!

Biney nike thil e somm’on nike buch—ma bin tha’abi ga’ e ulung ko Aaronic Priesthood nikan un ko mo’olung ko priesthood ko general conference. U fithik e tamilang ko ngial’ ney, ma baga’ ni gube non ngak e pi’in nib bitir e Aaronic Priesthood.

N’en ni Yibe Fil ko Gosgos

Gidii’en e bitir nima yan nga skul, oren ni gamed e be gay rogon nge chag nag ko n’en nib salap riy, tin ba’adag ban’en, tin ni uge mon’og riy u skul fa lesson nibe fek, fa ku bang e ulang ni gathi skul, fa gosgos.

Gag ni kug ba’adag e gosgos u fithik e yafos rog, ma gubin ngiyal’ ma gu ba adag e pi’in nima athamgiliy ninge cheag ko gosgos nge taw ko gin ni kari salap riy. Ra bee’ ni rib salap u ban’en, nib mu’un ni ku bee’ ni aram rogon mab kub t’uf ni kran fanow nag, me athamgil, nib bukun e awa nibe gay rogon nge rrin’ fare n’em. Boech ngiyal’ ma pi’in nima un ko gosgos e yaed ma rung’ag e thin ni kireb ko cha’an nibe ayuweg raed ma be tay e tin ni ba adag nga orel e chiney ko n’en nib falel’ nibay nga m’on.

Gadaed manang ni chonngin e Galasia nge pi’in nibay e priesthood roraed e kar taw gaed ko gin nib falel’ ko gosgos ni yaed ba salap riy. Bukun e wo’, machane kemus nri’in e rayag ni ngu weliy ni baachane e dariy e tym. Sana garam poy boech e pi gidii’ ney ni yaed ba salap ko gosgos: ko baseball, Jeremy Guthrie nge Bryce Harper; ko basketball, Jabari Parker nge Jimmer Fredette; ko soccer, Ricardo Rojas; u rugby league, William Hopoate; ko football, Taysom Hill nge Daniel Sorensen Ra bag yaed ma ke athamgiliy e gosgos ni bay riy.

Nap’an ni kari gel e salap roraed ko gosgos roraed, ma pi tagosgos ney e pi’in somm’on ni ra yoeg ni dar cheag gaed fa gathi yaed e gidii’ ni ri yaed ba ma’ang’ang. Kar athamgil gaed nib alamrin ko gosgos ni yaed bay riy—ma yibe fol ko fare gospel. Yaed be sak’iy nap’an ni yaed ma doel’, nge taw ko ngiyal’ ni kar athamgil mada’ko tomur.

Fol ko Babyoren fare gosgos

Lane gosgos nibay e team riy, ma sunmiy bochi tunom nifan bo’or miit e magaown u gosgos ma tay ulan e babyor ko gosgos. Pi’in nima un ko gosgos e yaed ma fil e tin ni muruwel roraed ko urngin fapi gosgos. Pi’in nib cheag e ma bi’eg babyoren fare gosgos nge m’ay nap’an ni ran pining, ma yaed ma nang, nib paey, ko gin ni ngar raned ngay nge n’en ni ngar rrin’ed.

Woed nib chuchgur rogon, gadaed ni bay e priesthood rodaed e bay e team rodaed (ba ulung), nge babyoren ko gosgos (fapi chep nib thothup nge thin rok e pi profet ko bin di’ir e rran).

Gama ayuweg e pi’in ni ba’ u lane team rom?

Uw gelngin rogon nikam fil fare babyor rom?

Karim nang fan e murwel rom ni rib fal’ rogon?

Sap ngay nib This Rogon

Ku woed, fapi couch e yaed ma nang e tin nib salap nge tin nib mo’owar rok fapi gidii’en e gosgos ni ku ta’ab rogon ngak fapi gidii’en e gosgos ko fab nem e team. Yaed ma ngongliy e tunom ko fare gosgos ni rayog ni ngar gelnag gaed. Mang ni gamed?

Ga ma nang e tin lumel ni gab mo’owaer ngay, ma rayog ni ngam nang rogon e mithmith rok e mo’oniyan’ ni nge kireb nigem. Kam fal’eggin rogom nga farke babyoren e gosgos ni ngam nang ko mang e ngam rrin’ nap’an nra thil ban’en ko fare n’em?

Nap’an ni gara yaen nga fithik e lumel—demtrug ko fithik e gidii’ fa nap’an ni go’gur ni gabe sap ko ban’en u screen—ma ga ma nang ko mang e ngam rrin’. Fa’anra bay e fagar rom nike yoeg ni ngam chingaw’ fa thapeg e drug, ma gama nang ko mang e ngam rrin’. Kam fil rogon ma kam nang rogon ni ngam mithmith u m’on.

Ra bay e tunom, babyoren ko gosgos, nge m’ag ni ngam rrin’ e muruwel rom, ma gara pir’eg nib dabiyog ni nge gel e lumel ngom. Kam dugliy ko rogon ni ngam mithmith nge n’en ni gara rrin’. Dani t’uf ni ngu um leam nag ni gubin ngiyal’ nap’an nike yib e lumel ngom.

Bee’ ko fare Ragag nge L’agruw e weliy mornga’agen e n’en kengin. Nap’an nib priest u high school, ke gosgos ko pi tafagar rok. Tomur ni kar mu’ gaed i feek ban’en ni ngan kay’ed, ma yaed be yaen u lan e karo iyan me yoeg bagyaed ni thingar ni ngan yaen ni guy ba kachido. N’en nib kireb riy e ma nang ni ba kachido ni dabyog ni nge guy. Biney e bang ko fare babyor ko gosgos nib priesthood rok. Biney ni ke yib ko babyor ko gosgos ko priesthood.

Me fil e faan rok ma fithik e athamgil, me ga’ar, “Dabug e binir e kachido. Mu yoen’ed gag nga tabinaew rog,” miyaed rrin’. Ngongol rok nib moem nike rrin’ nike gel riy! Boech e duw nga m’on, ma bee’ u fithik raed ko re neap nem e weliy rogon nike mang e binem e gelngin ni nge athamgil nap’an nike buch ban’en rok ni aram rogon u lan e yafas rok.

Bang u lan fare Babyor ko gosgos

Ku fith ngak’ in e gidii’ ni walagendaed ni Pumo’on ko mang e yaed ra yog ni ngaed ted nglan e babyor ko rodaed. Ba’aray boech e pin’en ni karogned:

Meybil ni gubin e rran nifan e tamilang nge mich ni mornga’agen Yesus Kristus.
Motoyil nib fel’ rogon ko thin rok e galabthir rom, bisof rom, nge pi Pumo’on ni Fel’ Yangren nge pi toygang’ ko ulung.
Palog ko pornography nge ya’an e tin nib tagan ko social media.
Tafaneyem ko pi m’ag nikam fal’eg ngak Got, mag athamgil ningam fol riy.
Mu fil e tin nike buch u lane pi chep nib thothup, mag leam nag e tin nib mangil roraed.
Fal’eg wa’athan e pifaak e Chitamangiy nu Tharmiy u dakean e pigpig.
Piriyeg e tafagar ngom ni nge ayuweg nem ngam mang bea’ ni ga ba adag ni ngam mang.
Mu cheag ko gay e tabinaew ko fare FamilySearch app, mag gay e birom e chep ko tabinaew.
Mu leam nag e gin’en ni rayog ni ngam man ngay nap’an nike yib e tin tagan ngom.
T’ufeg nge ayuw e ma ayuweg boch chonggin e ulung ko priesthood rom.

Ma kug non ngak’ fapi gidii’en e gosgos ni kad guyed fapi sassing ni ya’anraed. Kug guy ni gathi yaed ma weliy mornga’agen raed ko n’en ni yaed ma rrin’,ni pi’in nib salap ko gosgos machane, ko yaed mini’,ni yaed e pifaak e Chitamanguy nu Tharmiy nge pi’in nibe koel fare priesthood rok Got.

Chiney ngaed motoyil gaed ko tafney roraed:

Jimmer Fredette, nibay u roy nib deacon ma be fil rogon ni nge m’ag e tie rock’, e ga’ar: “gube pagan’ug ko gonop rok nge mich rog ko tin nib riyul’ ko fare gospel. Biney e ke powi’iyeg ni ngu mang e ... reb e priesthood nib be’ech—kanawo’en nib manggil.”
Bryce Harper, ni’ir e figirngin e tabinaew, e yoloy: “Kug lem nag ni fla’ab, cheg nag, ma ngan thapeg e award ko MVP e ra pii’ e fal’falaen’ ngog. Bay ban’en ni dariy riy. Ere, Kug ... fal’aggin rogog kug waen [nga lan] e temple. Aram e chiney e kug sul ko fare pi’i kanawo’ ngak e en Chitmangig nibay u Tharmiy nibay e tabinaew rog ni manemus—ni’r e bin th’abi gga’ e falfalaen’ u fayleng!”
Daniel Sorensen, ni’ir e missionary, e ga’ar: “Babyor e gosgos nib mangil e ma pii’ gelngin fapi gidii’ ko fare gosgos. ... Nap’an ni gura fil fare gospel rok Yesus kristus, ma guma nang rogon nrayag ni ngu pii’ gelngig nge ayuweg fapi priesthood.”
Jeremy Guthrie, ni be pigpig ni’ir e mission president, e weliy: “Nap’an e ba 12-duw rog ni gub deacon ... [Kug thamiy] ni be micheg fare Thothup ngog ni [irraray] e ngiyal’ i n’en ... ni ngar mada’ gaed Got.’² Fare fane gosgos e mich ngak’ Got min rrin’ [nge] kalngan’uy u dakan fare Tathapeg. ... Ma fare babyoren e gosgos e aram fapi thin nib thothup ulan e scriptures nga fapi profet nibay nib fos.”
Jabari Parker, nibay u roy ni kan pii’ matawan ninge mang office ko elder, e ga’ar: “Dabiyog ni nggu leam nag ko miti mang gidii’ gag fa’anra dabgu mel’ig ni nggu tawfe. ... Gube pining e magar ngak’ Got nibay ulan e yafos rog ni gubin ngiyal’ nibe powi’iyeg ni gubin e rran.”
Ricardo Rojas, ni’ir e branch president e chiney, ga’ar: “U dakean e [priesthood] rok’ [Got] rayag ni ngaed pe’ed e ayuw ko pi muruwel rok’. Kan pining daed ni ngaed ’gel gaed ma dab da rus gaed’³ ni ngan rrin’ e tin nib mat’aw.” Ni biney e ir e ke ayuweg ke mon’og nap’an nra yon’ fare baat nge nap’an ni be mang e preisthood.
Taysom Hill, ni’ir reb e missioanry, nibe thamiy ni fare gospel rok Yesus Kristus e ke ayuweg ni’ir fare babyoren e gosgos ulan e yafos rok’. Ke weliy, “Mich u wun’ug ngak’ e tonon rok’ [Got] mug rrin’ gelngin ngrayag rog e ma pii’ ngog e thamtham ko gapas nge falfalaen’ ulan e yafos rog, ni gum nang nib falfalaen’ Got ko pi n’en ni gube rrin’.”
William Hopoate, ni bay u roy ni yibliy fak ni ke gaman aningeg e mfen ngay, e yeog ni fare gospel e ma ayuweg “ni ma dag rogon nib thothup wo’en nrayag ni ngan sabthiy fare lumel min ayuweg boech e gidii’.”

Me gur? Kam nag rogom ni gab thothup ni gur faak Got, ni gabe koel fare priesthood Rok nib thothup? Kam nag rogom ni gur faak Got, ni gabe koel fare priesthood Rok nib thothup? Biney nib manemus nibay ko tafney, me fal’eg rogon e mithmith rom nge babyoren e priesthood rom ni ra gagyeg nigem nap’an e ngiyal’ nibe yib e kireb nge lumel.

Rogon e tafney nib gel ra ayuw nge gel nag e mich me yag nag ni ngan paer ko wo’ nib ki’iy nib achig. Woed wo’en nib mu’un e meybil ngay ni gubin e rran, chep nib thothup ni yibe bi’eg, galasia ni yibe un ngay nge yan nga temple, miligach ni yibe pi’, ma yibe fol ko thin nibay u lan fare babyor nikan noeg e For the Strength of Youthngay.

Kanawo’en i yuwegnem e mu’un ni ngam fal’eg rogom nga m’on ko rogon ni gara gel ko lumel. Nap’an ni ra yib e lumel ngom ni ngam kireb nag e tin mangil rom, ma ga manang ko mang e thingari rrin’.

Ba t’uf fare babyor ko gosgos ngom ko binem.

Dabug ni ngam meybil e daba’? Ngiyal’ ney ni ngan rin’ e tonom ni kam leam nag.

Kam thamiy nibe waer e mich rom? Bay e tonom ni ngam rrin’ ngay. Gamanang ko mang e ngam rrin’.

Gubin e gidii’ ma manang Got

Gimed e pi’in nibe koel fare priesthood nib thothup rok Got. Adag rok ni ngam kol for lay i wasey ra thilyegem e bee’ nib manemus ni ke sunmiy nigem.

Got e manangem mab t’uf rom. Ra fal’eg wa’atham me gagyeg nag e gin ni gabe tay em ngay.

Danan gara leam nag ni gathi gur bee’ ni rib ga’fam, ma gathi gur bee’ ni rigab cheag ko gosgos. Dani riyul’ e binem. Danum nang ni ke ga’ar Got, “Pin’en nib mo’owaer u fayleng e ra yib nga m’on nge aw nga but me gel”?⁴

Ere, gabe thamiy ni gab mo’owaer? de fan’ rom? Mu falfalen’, ya kam un ko ba mukun ni n’uw!

Gabe thamiy ni dani ga’fan? achigchig? Ma rayag ni gur bee’ ni ke t’uf rok’ Got.

Woed David e ba wo’ ni mornga’agen e binem nib falel’ ni yaen ko mael ni ngar cham gow, Golliath? Pagaen’ ngak Somoel, nibay e n’en nike leamnag, David e ayuweg ni gathi kemus ni yogi ir machane fapi salthaw pi u Isreal!⁵ Mu nang ni bay Got rom nap’an ni gara athamgil ma dab rus ya bay u chrem. “Fa’anra bay Got rodaed, ma mini’ e nge gel ngodaed?”⁶

Rayog ni nge bing e maab me ayuweg daed ni ngad pir’eged gelngiy nge tin ni rayog rodaed ni dan nanged ni bay rodaed.⁷

Motoyil ngak’ fapi couch rom, ni arram e pi galibthir rom, bisof rom, nge tiyugang’ ko Young Men. Mufil fare babyor ko gosgos. Bi’eg fapi chep nib thothup. Mu fil fapi thin rok’ e profet nibay e chiney. Fal’eg e birom e babyoren e gosgos ko rogon ni ngam dag ni gur e gachalpen Kristus.

Manang nga m’on e n’en ni ngam rrin ni nge gel nag e ya’el rom me palog nigem ko lume ku mo’oniyaen.

Mu rrin’ e biney ma ra muruwel Got ngom.

Chiney, bay boech e gidii’ nima chuweg ir ko fare gospel me yaen nga biyang. Boech e ma paer nib palog nge yaliy fare gosgos nibay nga orel. Ma boech e ke dugliy ninge paer u dakean e bechi, ni dariy fan ni be gay rogon fare couch ni ne pii’ raed ngranod. .Pining med ngam pe’ed e ayuw, mag med yib, mag tu’ufeg raed ni ku woed rogon e gidii’en e gosgos!

Boech e ba adag ni nge un ko fare gosgos—me rrin’. N’en nib ga’fan e gathi rogon ni yaed ba cheag machane rogon ni yaed ba adag ni ngad ted raed u lane fin’en ni yibe gosgos riy. Dar son niged e gidii’ ni ngan kol nag raed ko namba roraed, ni bachan e yaed manang fare thin ulan e scripture, “Fa’an ra gaba’adag ni ngam pigpig ngak Got ma aram ni kan piningem ko fare murwel rok’.”⁸

Rayog ni ngam un ko fare mukun.

Garam rrin’ e biney nap’an ni garam fil mag rrin’ ni woed rogon ni be dag fare babyoren e preisthood.

Boech nga m’on ma woed ni gara doel’ ngam mul—sana bukun, ni bukun yay. Danum ma’ang’ang; mul e bang ko murwel ni nge n’anggin nem ngam sap ko pi ngongol rom ma yag ni ngam pigpig u fithik e murunguy. Fare Tathapeg nge fare Bayul rok’ ni darmamus e ke pii’ kanawo’en nrayag ni ngaed degeyed e pi togon rodaed u dakaen fare kalngaen’.

Pi’in nib ta gosgos e ma paer ni bukun mira’ay e awa ni yibe fal’eg rogon e gosgos roraed. Gadaed ni bay e priesthood rodaed, e ba t’uf ta’ab ban’en ngodaed. Fa’an gara dol’, kalngan’um mag nag rogon. Mag gay rogon ngayag ni ngam nang rogon e yan migid. Ma gur, e ba mil fan ngom. Garam fil farke babyoren e gosgos?

Gube yog ngom: Pagan’um ngak fare Somol. Chuw ko fare maad nge salthaw rok Got,⁹mag un ko fare gosgos.

Dani yo’or e pi’in ni ma un ko gosgos nib salap, machane nap’an ni ra yib ko pi gachalpen, ma bo’or e gidii’ ni laek wo’en Kristus.

Machane, iraram e muruwel rom u lane biney e yafas—fil kanawo’ Somoel, ma mang gachalpen, mag athamgil ni ngam paer ni rogon ko tunom rok Got. Ra chubiyem Got me tawa’ath nigem nap’an ni gara yan Ngak. Rayag ni ngam rrin’ e biney e gur e gab salap u pow’chan.

Gube meybil ni gara fal’eg e binem e m’ag ni ngam paer ni gaeb yul’yul’ ko fare priesthood nib thothup ni bay rom mag athamgil ni ngad rrin’ e muruwel rom nib thothp ni gubin e rran. Gube tawa’ath nigem ni ngam cheag mag adag ni ngam rrin’. Gube uneg e mich rog ko gelngin fare priesthood ni gimed be koel, pi profet nibay ko tiney e rran, nge Yesus Kristus nge muruwel Rok ni r e Tathapeg nge Tabiyul rodaed. U dakean fithngan Yesus Kristus, amen.