Fal’eg Rogoy nifan ko Sul Rok Somoel
Fare Galasia rok Yesus Kristus ni fan ko Gidii’en Got ko Tin Tomur e Rran e ba thil ni bay mat’woy nib ga’fan ni ngan murwel ngay ngan fal’eg rogoy ko yan La’agruw e Wub rok Somoel.
Ulan la’agruw e wik, gadad ra madnam ko Easter. Fare Foskoyam’ e be pow nag rogon Yesus Kristus nge Got ni Chitamangiy nib riyul’. Ma cheal e tafney rodaed ngak fare Tathapeg, ma gadaed be leam nag e “yafas Rok nib fel’ nge bayul ni miligach Rok nib mangil.”1 Gube athapeg ni ka gadaed ra leam nag e sul Rok nap’an ni “Ra yoeg lungun nib Pilung u fithik e Pilung nge … Somoel u fithik e Somoel.”2
Bangiyal’ nike n’uw nap’an u Buenos Aires, Argentina, mug un ko ba mo’olung nib sug e toygang’ ko gubin e taliw riy. T’ufeg roraed ko gidii’ roraed e ba mangil. Yaed ma ayuweg e gidii’ nike gafgow ngar gel gaed ko gafgow roraed nge mo’owaer roraed. Rugub falfalen’ ko t’ufeg rok e gidii’ ko biney e Galasia, ni yibe un nga fithik e gidii’ ko boech e taliw u lan fare mo’olung. Ku falfalen’ ko t’ufeg rok e gidii’ ko Fare Galasia rok Yesus Kristus ni fan ko Gidii’en Got ko Tin Tomur e Rran nima pigpig ni boed Kristus.
Ningyal’ ney, fare Kan ni Thothup ke weliy la’agruw e ba’nen ngog. Somm’on, Muruwel’ ni ngad ayuweddad ba ga’fan nge t’uf ni nge ul’ul’. Bin la’agruw e ku gin’ ngay, machane rib gel ma rib tamilang. Iraray biney: fithik e pigpig, ma rib ga’fan ni ngan fal’eg rogon e fayleng ni fan ko bin La’agruw e Wub rok Somoel ni Yesus Kristus.
Nap’an ni ra yib, ma gathi kemus ni ra chuw e kireb; ya ra m’ay:
Pi wolf e yaedra paer e saaf nib felʼ thilraed, nge leopard e yaedra mol nga butʼ u fithikʼ pifak e kaming, ma pifak e garbaw nge layon ni ke felʼ yangren nge gamanman nib sugsug e yaedra paer u taʼabang; ma beeʼ nib bitir e ra powiʼiyraed. …
Ma dabra kʼaeded ara madʼad gaed ngakʼ beeʼ u gaʼangin yang fare burey rog nib thothup, ya fayleng ni poloʼ e ra sug ko llowaenʼ rokʼ Somoel, ni boed e day nibe tharey e butʼ u maday.”3
Gafgow e gathi kemus ni ra tal; ra chuw:
“Gathi bay ki yib e bilig ara balel ngorad bi’id; ma dab kur m’ad nga gowalngin e yal’ ara gowelngin ban’en.
Ya fare Fak e Saf ni bay u lukungun i tagil’ e ir e bay i gafaliyrad ni bod e en nma gafaliy e saf, me pow’iyrad ko fapi alublub ni bay n’ag Got e lu’ u owcherad.”4
Mus ko amith nge kirbaen’ ko yam’ ma ra chuw:
“Lane re rran nem ma bitir madway e dabi yim’ nge taw ko ngiyal’ nike labthir; ma yafas rok e ra boed e yafas ko gak’iy;
“Ma nap’an ni ra yim’ ma dabi mol, fa ranoeg kubay u dakean e fayleng, machane me thil ni boed e t’uf nike mat nib peay, me yib, nge toffan nike falel’.”5
Ere aragon, ngad rrin’ed gubin ni rayog rodaed ngad ba’ud niged e gafgow nge kirbaen’ e chiney, ma gadaed yul’yul’ gaed i fal’eg rogoy ko re rran nap’an nike yib e amith nge kireb u ta’abang, nap’an ni “[ra] ga’ lungun Kristus u dakean e fayleng; ma … fare fayleng e ra bi’ech e paradis riy.” 6 Irarame fare rran ko bayul nge pufthin. I Dr. N. T. Wright, nib Anglican Bishop u Durham, e weliy fan fare Bayul rok Kristus, nike Foskoyam’, nge fare Pufthin ni yibe pithig gubin ban’en nge mangil rogon.
Ke yoeg: “Ke fal’eg rogon Got ba rran ni cha’an nike mel’eg e ra pufthin nag e gidii’—ma ke yoeg ni re pumo’on ney e ran fas ko yam’. Mornga’agen Yesus u Nazareth, ni baga’ ni mornga’agen nike foskoyam’, e baga’ fan ni fare fayleng e gathi yug ban’en. Gathi ba oloboch; ni nap’an ni gadaed ra ra pufthin ko roffen nem ma darani falger u fithik e lumor, ni yibe gay rogon ni ngan puthug ba na’un nike puth, fa karo ningan fal’eg nike kireb. Nap’an ni faseg Got Yesus ko yam’, ma iraram bochi ban’en ni buch nibay u lan bochi awoch, boed e awoch, [fare] awoch … ko athap. Ke yoeg Got, ko thin nib alamrin, ni Yesus nu Nazareth e riyul’ ni ir fare Messiah. … Kakrom, [Yesus] e ir rok e ke yan u fithik e kireb nge pufthin ni dani mangil, ke yib nga bang ni gubin e kireb nge pufthin ni kireb u, ke yaen u fithik e pi wagey nem, re lumor nem, re kireb nem, re pufthin nib kireb nem, nge magawon nag gelngin.”7
Nap’an ni gubay ko fare mo’olung u Buenos Aires ni kug gog faram, ma ke yoeg fare Kan ni thothup nib tamilang ngog ni Fare Galasia rok Yesus Kristus ni fan ko Gidii’en Got ko Tin Tomur e Rran e ba thil ni bay mat’woy nib ga’fan ni ngan murwel ngay ngan fal’eg rogoy ko yan La’agruw e Wub rok Somoel; riyul’ ni iraram fan nikan fulweg. Rangam dap e gidii ni ba’adag e ningyal’ ney boed ke weliy “ningyal u nap’an ni ke tayim” nge ba’ e fan rok Got ni nge “kunuy ni ta’arebdad ulan kristus”?8Fa’an dabi piriyeg e ulungi e gidii ni ba’adag ni ngar rin e ngongol nifan e gidii’ ba fasgad nge gidii’ ke maer, fa’an dabi piriyeg e ulungi gidii ni ba’adag ni ngar pii’ed e salpiy nge ningyal’ ni ngar kunuy nge taer’madliy e gidii ni ngar thapeg fare Somoel, dabiyog ni ngam sapgad.
U lane 1831, me non Somoel ngak Galasia ni ga’ar:
“Fapi kiy ko gil’ilungun Got e kan pi’ ngak e gidii’ u fayleng, ma chiney e ra yan fare gospel u dakean e fayleng. …
“Pining Somoel, ngeyag ni nge yan gil’ilungun nga dakean e fayleng, meyag ni nge thapeg e gidii’ niba’ u dakean, man fal’eg rogoy ko rran ni nge yib, ni ngiyal’ ni ra yib fare Faak e Gidii’ nga but’ u tharmiy, nike chuw ko maad nib sug ko rir, ninge guy fare gil’ilungun Got nikan fal’eg u dakean e fayleng.”9
Mang e rayog ni ngad rrin’ed e chiney ni fan ko fare rran nem? Rangad taer’madliydad e gidii’; rayog ni ngad kunued e gidii kar fal’ig e micheg ngak Somoel; nge rayog ni ngad thapeg e micheg ko thap ni “ke fal’ig ngorad e chitimangiy nu kakrom” ko lik’igal’ rodad.10 Gubin biney thingari buch umon ra yib Somoel be’ie.
Somm’on, nge n’en nib ga’fan ko sul rok Somoel e gidii’ u fayleng nike fal’ rogoy ni ngan thapeg e wub Rok. Ke yoeg ni pi’in ni kuba’ e roffen nem, “pi’in nib achig [nge mada’] ko pi’in nib ga’, … e ra sug ko gonop rok Somoel, ma ra ta’areb e sap roraed, ma yaed ra tolul, ni yibe tang ni yibe yoen’ e biney e tang nib bi’ech, ni yibe ga’ar: Fare Somoel e ke fulweg fare Zion biyay. … Ke kunuy Somoel gubin ban’en nga ta’abang. Fare Somoel e ke feek fare Zion u lang. Ke feek Somoel fare Zion nga lang u fayleng.”11
Nap’an e kakrom, me feek Got ba binaew nu Zion ngalang.12 Bin nib thil, e lane tin tomur e rran ma bin bi’ech e Zion e ra thapeg Somoel nike sul.13 Zion e gumircha’ey nib ma’ang’ang, gidii’ ni ta’areb e tafney roraed nge gumircha’en raed, ni yaed be paer u fithik e mat’aw ni dariy bee’ nib gafgow u fithik raed.1486 Fare Prophet Joseph Smith e ga’ar, “Ngad tayed e Zion ni ngad toyed ni ban’en nib falel’ rodaed.”15 Gadaed ma fal’eg e Zion u lane tabinaew rodaed, ward, branch, nge stake ni ta’aborogon, nib thothup, nge t’ufeg.16
Ngarin ted ni fare Zion ni yibe toey e ke buch ko ngiyal’ nib momaw’—“rran ko gafgow, rran ko mu’ruf, rran nike m’ay ban’en, ko yoer, nge kirbaen’; ni boed e nifeng ma ra yib ni gubin nga dakean e fayleng, ni Somoel e ke yoeg.”17 Ere, kunuy fapi stake e ke mang e “ayuw, nibe ayuwegney ko yiko’, nge domomow nap’an ni ran pi’ nge yib nga dakean e fayleng.”18
Ma pi chon e galasia e ur moʼolung gaed, ni “ngar baley niged e abich roraed ma yaed be meybil, ma yaed be fith salapraed ni morngaʼagen rogon e paer roraed. Man … feek fare flowa nge [raen], ni ngan tafney nag fare Somoel ni Yesus”19 Rogon ni weliy President Russell M. Nelson u lane general conference ko October nike thimur ni ga’ar, “N’en ni yima rrin’ u lane Galasia e ngan ayuweg gubin e gidii’ riy nge gel e mich roraed ngak Somoel ni Yesus Kristus rodaed nge fare Bayul Rok, man ayuweg raed ngad fal’eged mar fol gaed ko fapi m’ag roraed ngak Got, man gel nag raed man chiyliy raed ko tabinaew roraed”20 Rogon nib mangil, ma weliy gelngin nib ga’fan e pi m’ag u temple, fare Rran ni Thothup, nge fare gospel ni yibe paer ma yibe fil u lane tabinaew, niba’ e Galasia nibe ayuw ni yibe fil. Gadaed ba adag ni ngad nanged mornga’agen Somoel, ma gadaed ba adag ni ngad nanged Somoel.21
N’en nib ga’fan i muruwliy i toey e Zion e gidii’ rok Somoel ni kan kunuy raed nga ta’abang.22 “Ba mich u wanʼmad rib riyulʼ ni bay ni ulunguy piyu Israel ma bay ni fulweg nga yalen fa Ragag i Ganong.”23 Gubin e pi’in ni ra kalngan’, me michan’ ngak Kristus, man tawfe nag e gidii’ rok ko m’ag.24 Somoel e Ir Rok e ke yoeg e binem ni um’on ni nge sul biyay, ma fare gospel e ran machib nag u dakean ga’ngin yang e fayleng25 “ni ngan ayuweg e gidii’ [Rok], ni pi’in ko fare na’un rok Israel,”26 “ma arame taw e tomur.”27 Thin ku Jeremiah e ke buch:
“I ga’ar Somol, bayi taw bangiyal’ dabki mow e girdi’ nga fithingag ni gag fare Got nma par nib fos ni gag e gu chuweg e girdi’ nu Israel u lan yu Egypt;
N’en ni bay rin’ed e bay ur mow gad nga fithingag ni fare Got nib fos ni gek e girdi’ nu Israel nga wuru’ gubin e nam ni gu werweregrad riy; bay gu fulwegrad ko nam rorad, ni fare binaw ni gu pi’ ko pi chitamangirad.”28
President Nelson nibe weliy bo’or ngiyal’ mornga’agen “[Israel] ni yibe kunuy nga ta’abang ni tha’abi ga’fan nibe buch u dakean e fayleng e daba’. Dariy ban’en ni ta’abrogon ngay, dariy ban’en nib ga’fan ngay, dariy ban’en nib ga’ ngay. Ma fa’anra gara mel’eg … ma rayog ni ngam un ngay.”29 Gidii’en Got ko Tin Tomur e Rran e gubin Bukun mira’ay nge biyu’ e gidii’ e ke yan ko mission nap’an nike Sulyarmen fare gospel; bukun ragag e biyu’ e be pigpig e chiney. Ma, rogon ni yoeg Elder Quentin L. Cook ni ga’ar, <167>gadaed gubin ma rayog ni ngad uned ko kanawo’ nib moem, fithik e t’ufeg, pining e gidii’ ni nge un ngodaed nga galasia, guy e gidii’ nga tabinaew roraed, ngan mang bang ko fare lulbuy rodaed. Fare ke Babyor ku Mormon nikan yoloey nga babyor e pow nike tabab fare mukun.30 Fare Babyor ku Mormon e ir rok ma ba talne murwel ko kunuy nge thil.
Ma n’en ni kad ga’fan ni ngan fal’eg rogon ko fare bin La’agruw e Wub e ngan ayuweg e gidii’ rodaed ni kakrom. Ke micheg Somoel ninge pi Elijah ni profet nge yib um’on ni nge buch fare bin La’agruw e Wub, “fare rran rib wagey rok Somoel,”31 ninge “dag … fare priesthood” me “tay nga gumircha’en e bitir e pi n’en nike micheg ngak e chitamangin raed.”32 Ke yib Elijah nrogon nikan micheg. Rran riy e April 3, 1836; u Kirtland Ohio Temple. Ginn’em nge roffen nem, ma riyul’ nike yib ke pi’ fare priesthood, fapi kiy nifan ko bayuliy e pi’in nike yim’ nge mada’ rok e pi’in, nike mabgol, nge tabinaew ko gubin e yangar nge manemus.33 Ra dariy e biney, ma fan nikan sunmegey e dani mangil, ma ra aram rogom, ma gare fayleng e ra “kireb” fa “ngari ma’adab.”34
Nap’an ni yiba’ ko fare devotional ko bitir ni yibe yibliy fare Rome Italy Temple, ma bukun mira’ay e pumo’on ni fal’ Yangren nge rugod nikan un ni yaed be dag ngak President Nelson e pi card ni kar fal’eged ni bay e ngochol ko gidii’ roraed ni kakrom riy. Ke fal’ rogon raed ni ngad raned nga lane temple ngar tawfe gaed ni fan ko pi gidii’ nem nap’an nike maab fare temple. Ngiyal’ nem e rib falel’, machane reb e wo’ ni yibe athamgil ngan fal’eg e Zion ni fan ko gidii’ nike yim’.
Nap’an ni gadaed ra athamgil ngan yul’yul’ i toey e Zion, ni gadaed mu’un ko kunuy e pi’in nike mel’eg Somoel nge ko wo’en e bayul ko pi’in nike yim’, ma thingardi tal gaed ngad tafneyed gadaed riy ni murwel rok Somoel me Ir e be farowliy. Ir e Somoel ko fare milaey’, ma gadaed e pi tapigpig Rok. Be pining daed ni ngad murwel gaed u milaey’ ni nge mus rogon daed ngay “ko ta’yane’” me un ngodaed ko murwel.35 Ba mangil rogon ni ngan noeg ni Ir e ke pag daed kad uned ngak ko murwel. Ke ga’ar Paul, “Kug yung e awoch me tugul, mi Apollos e i pu’og e ran ngay; machane Got e be pi’ gelngin be ga’.”36. I Ir e be pey nag e murwel Rok ko ngiyal’ nibe guy.37 Murwel rodaed ni ri dani mangil i mangil—“murwel rodaed nib achig”—ma ra fal’eg Somoel ban’en riy nib ga’.38
Ngiyal’ ney e ribe chuchgur—Zion u dakean e fayleng, nike peth ko—Zion u tharmiy nap’an nike sul fare Tathapeg. Fare muruwel ko Fare Galasia ku Yesus Kristus—ni ngongoliy nag—fare fayleng ko rran nem. Ere, biney e Madnam ko Easter, ngad madnam gad fare Faskoyam ku Yesus Kristus; sul Rok ni nge gagyeg nag ko biyu’ e duw ko gapas, e pufthin ko riyul’ nge machalbog ko gubin gidii’, fare yafos nib manimus ko gubin ni kad pired u dakean e fayleng nge fare micheg ko yafos nib manechubog. Faskoyam’ Rok Kristus ba pagan’ ni gubin ban’en ma ran fal’eggin. Ngad toyed fare Zion ngan gur nag ko re rran nem. U dakean fithngan Yesus Kristus, amen.