Ba’aram fare Faak e Saf rok Got

Keb rok Elder Jeffrey R. Holland

Ko fare Ulung ko fare Ragag nge L’agruwi Apostles

Ma mo’olung rodaed ko Madnom ngeyog nikan tiyan’ ko fare sacrament ni fare Abich rok Somoel nib thothup, ma be dag e bin tha’abi ga’fan u lane wik rodaed.

Kug fel’ rogon madako kug sap e map’ e lu’ u oewchraed pi gidii’ nib yangren ulan fare choir. Map’ e lu’ u oewchraed ney nibe thabi fel’ rogon ko gubin e machib rayog ni nggu pii’.

I sap u dakean e ma raen, nga pag fithik e gidii’ ni yibe yib ngak ni nge tawfe nag raed, John nima Tawfe e sap me guy walagen, i Yesus Kristus nu Nazareth, ni be yib ngak ni ngan tawfe nag Ir. Fithik e munguy, machane be yag ni pi’in nib chugur ngak e rung’aged e n’en nike yoeg ni mus ko chiney ma ba thin ni rib falfalen’ ngodaed: “Ba’aram fare Fak e Saf rok Got.”¹

Baga’ fan ni cha’aney ni kanoeg ni kab kakrom riy ni ra yan ngak Yesus e dani pining ni “Jehovah” fa “Tathapeg” fa “Tabayul“ fa “fare Faak Got”—ni gubin ma liw nib mangil. Danga’, John e leam nag ni nge yoeg e bin som’on e pow ko taliw roraed ni sana manang e gidii’ rok. Ke yoeg e thin ni fare saaf nike miligach nag ko fare bayul ni fan ko pi denen nge kirbaen’ko fayleng nge gubin e gidii’ nibe paer riy.

Wenig mu ayuwegned gag ngu weliy mornga’gen ere chep ney.

Napan fare n’en ni buch u lane Milay’ u Eden, me gafgow Adam nge Eve. Maab nike mab nga fayleng nge yafas nima mus rodaed, ma kar ningew e maab ko yafas nib manemus ngorow. Bachane togopluw rorow kar mel’igew nifan ngodad, ma chiney e rayog ni ngar m’ow ma ke chuw fare kan thothup rorow, nikar chuw gow u pow’chen Got nib manechubog.² Mang e kbay ni ngar rrin’ed? Bay kanawo’en nran chuw ko biney? Dadda nanged urngin ban’en ni kam manang e gali chan’ey ni kanog ngorow nap’an ni kayow bay ko farngi malay’, machane kiyow manning ni gubin ngayal’ ni ngar pe’ew e maligach ngak got nib polo’, fak e saf, ni bin somm’on e fak e saf ni pumo’on.³

Taboch riy me yib ba angel nge weliy ko mit i mang e mitney e malifach, nibe yipfan fare maligach rok fare Tathapeg ni bay ni tay nfan raed unge fan e fayleng. “Iraray e pow ko fare miligach rok fare Faak e Chitamangiy nib Tu’uf Rok,” fare angel e ga’ar. “Machane, … gimew ra kalngan’ mew mi gimiew meybil ngak Got u dakean fithngan fare Faak nib manemus.”⁴ Machane, bay e rogon ra feek nga laang.

U m’on nin sunmiy e fayleng, Got e tay chiylan ngak’ Adam age Eve (nge gadead gubin) nra yib e ayuw rok fare Fak nib polo’, bin somm’on i Faak ni pumo’on ndariy bang rok’ nib kireb, fare Faak e Sar rok Got “ni fa’an nli’ ngem’,“⁵ ni woed rogon ni weliy fare Apostle John. Pi’ fare maligach ni be yip fan fare saaf nib achig u roy u fayelng, Adam nge pi faak e yaed be dag ni yaed be nangfan fan fare bayul ko maligach rok’ Yesus Ni’ir e Kan Pii’.⁶ Ta’aboch, ma fare tabernacle u fithik e desert e ran rrin’ e biney e gam’ing riy, me tomuren e binem, ma ran n’naggin u lan fare temple ni ra toey Solomon.

Machane, fanathin ko kalngan’uy nge paer ni yib yul’yul’, ma biney ni yaed be pii’ e pi saaf nib mangil nib achig e dar fal’ nib fal’ rogon, rogon nibe yoeg u lane Bin Kakrom e M’ag. Be yoeg ni racha’ ko fapi miligach e boech ngiyal’ ma dar paer nib n’uw napan ninge milik e racha’ rok u dakean fapi malang. Ma demuturug rogon, ya de n’uw nap’an me aloboch, Cain ni li’ wolagen Abel nge yim’ ko fare bin somm’on e duw ko binem e tha’.⁷

Pi sikeng nge magawon e buch nike bukun e duw, arfan ni tang e angel ni kar falfalen’ gaed, ya, Yesus e kan gargeleg—fare Messiah nikan noeg ni ra yib. Ma arame napan e machib Rok u fayleng, ma Cha’aney ni fare saaf tha’abi ma’ang’ang e fal’eg rogon fare sacrament ko fare Abich rok Somoel nge pi’ ko pi gachalpen, fare gam’ing e ke buch u wuru’ fare milay’ u Eden. Kab tu’uf e n’en ningan pi’, nib mu’un e miligach ngay, machane bagel faan, ni rib gel e ga’fan riy ko fare bin somm’on e saaf ni yim ali’. Ngak fapi Nephite, tomuren nike Foskoyam’, me ga’ar fare Tathapeg ngoraead:

“Ma dab kum maligach gaed ngog ngalang ni puʼoeg rachaʼ. …

“… ngam piiʼed ngog ni maligach ni mʼingaenʼ nge kalngaenʼ. Ma enra yib ngog ni ke mʼingaenʼ make kalngaenʼ, e ireram e chaʼ ni gura tawfe nag ko nifiy nge fare Kan ni Thothup. …

“… kalngan’um, … ma gara thap.”⁸

PI walageg, fare gospel ni rogon ningan fil u tabinaew nike fal’ rogon, ma baga’ fan ngodaed ni kubay e n’en nikan motochiyel nag ngodaed “yan ko na’un ko meybil mag pi’ e sacrament rom ko rran rog nib thothup.”⁹ Tabinaew ni yibe fil mornga’agen e gospel riy, ma mo’olung rodaed ko Madnom e kuran ngoch nag ngeyog nikan tiyan’ ko fare sacrament ni fare Abich rok Somoel nib thothup, ma be dag e bin tha’abi ga’fan u lane wik rodaed. Thingar da tafnayan daed ko pi ngongol rodaed ni Kristus e yim’ ni yogi’ irr ni fan ko pi denen nie mo’owaer rodaed ni fan ngak gubin gidii’en fare tabinaew.

Ya aram rogon ni gadaed mu’un ko biney e magawon, a ba tu’uf ni ngaed ted faan. Arragon, gamaed be pi’ e athamgil ngom ni ngam baed nib m’on ko ngiyal’ ningan tabab nge fithik e munguy, nikam chuw ko maad nib fal’ rogon ma un ko bin e gam’ing nib thothup. “Madnom ni tha’abi mangil” e ke m’ay faan napan e gadaed, ma kad dariyed fan nag napan ni gadaed ma yib nga pow’chen, ma gamaed ba’adag ni ngan fulweg e bin ningan chuw ko maad nib yal’ow ko Madnom nge gin ni rayog rodaed.

Nifan ko ningyal ko yib nga misa, yima pi’ nib tomur ko pi nina’ ni, bay e bitir roraed, Cheerios, nge kabang ko pamper, ni kar taw gaed. Ma, bay e pi’in dani mangil e kadbul roraed ko Madnom. Machane, picha’n’ey ni yaed ma taw boech e ngiyal’ nib sag’al e yi manang fan, machane fa’anra gubin e ngiyal’ ma yibe sag’al ko Madnom, ma ngan guy ban’en ni ngan, rrin’ ngay.

Ngiyal’ nem, ma kad wenig gaed ni nge achig lingan gubin ban’en u lane na’un rodaed. Gadaed ba’adag ni gadaed ma guy gadaed, ma aram rogon—reb e falfalen’ u lane galasia—machane gathi nge fek e ngiyal’ ni ngan liyoer. Gube rus ni pi’in ni gathi gidii’ ko galasia rodaed ni ngar ggin’ gaed ko n’en ni rayog ni dani mangil ni susun e ngan meybil, pi mich, ma yibe thapeg e yi’iy, nge gapas. Sana ke gin’ tharimy ni amrogon.

Ra uneg ko fare kan thothup ko pi mo’olung ko sacrament rodaed fa’anra pi’in nima paer u lang e nge paer u m’on ni ngan tabab e mo’olung, ma Motoyil ko music ma yibe dag e kanawo’ nib mangil ni ngad laked. Fa’anra yibe sasabathin aray u lang, ma ka’aram rogon ni yibe sasabathin ko ggin nibe par e gidii’ riy u butt’. Gamaed falfalen’ ngad e pi bishopric ni yaed be chuweg e tin ni yibe yoeg ni ra chuweg fare kan thothup ko liyoer rodaed. Gag, reb, e dabyog ni nggutafney nag reb e priest ni woed Zacharias—u lane temple ni kakrom rok Somoel, ni ba’ ninge un ko murwel ko priest, ba miligach ni ra yib ngak u lane yafas rok—dabyog ni nggu tafney nag nibe tal’ ko altar ni nge pogran ngodaed ba palang niba’ u lan nel’ e wik nga m’on.

Pi walageg, biney e awa e ke fal’eg Somoel ni ngiyal’ ni tha’abi ga’fan u lane wik rodaed. Motochiyel, e ngad mukun gaed ngad thapeged e gam’ing u lane Galasia. Ku manang e Cha’an ni fith fa’anra rayog ni ngan chuweg fare kaap Rok ni ba ninge feek, machane me ul’ul’ ya manang ni gadaede dabiyog rodaed ni go’ gadaed. Ra ayuw fa’anra gadaed ra tafneyed gadaed ni fare fanathin ko re kaap nem nibe yib ngom e chingiyal’ nem udakaen e pa’ ko pi deacon nib 11 fa 12 dew rok.

Napan ni ra taw e ngiyal’ ni ngan pi’ fare miligach ni tawa’ath rok Somoel, ma ra bagdaed ma bay e birok e denen nge kireb rok nge magawon ni nge fal’eg rogon. Arfan gadad be pared uru’. Machane gadaed ra cheag fa’anra gadaed ra leam nag e pi’in ni kari gel e kirbaen’ roraed nib liyeg ney. Gidii’ nibe par nib chugur e bay ni ba kirbaen’raed—nibay ni be mu’ fa danga’—ko ngayal’ ni yibe yon’ fare tang nge pi meybil roraed fapi priest. Aygun thapeged nochi flowa nib achig nge bochi kaap nib achig ko runguy ngoraed—nge pii’ ngoraed? fa ngak bee’ ko galasia ni be yoor nike gafgow ni gathi be pigpig ma, ba’ adag boech e ayuw rodaed, kubay e bin migid e wiik? fa ngak fapi walagdad ni gathi e chongin ko galasia rodad machne be pi walagded? Dariy e ngoch ko gafgow u lane biney e fayleng, langgin e Galasia nge wuru’, ere mu sap ni Demtrug yang ma gara guy bee’ nib tomal e birok e magawon nge pi’in ni boed ni dar m’ay e kirbaen’ rok. Reb e wo’ ningan “tafneyey rok ni gubin ngiyal’”¹⁰ ngan un ngak fare Togta nib Cheag ngan ayuweg e pi’in nike tomal man pi’ e gapas ngak e pi’in nike kirbaen’.

Pi tafagar, napan ni gadaed ra ta’areb u dakean e fayleng ni gubin e wik ko n’en ni gamaed be athapeg nike gel nag e thothup ko rogon ni gadaed be sap ku Kristus, ma aygun fekedkofare altar ko miligach e “lu’ ni bachane pi gafgow Rok [nge] amith ni ngad thamiyed ko kirbaen’ rok.” Nge napan ni gadaed ra leam nag, meybil, man m’ag nib bi’ech, aygun feked koko ngiyal’ nem e “gapas u fithik e gafgow, … ma yibe falfalen’.”¹¹ Athamgil nge gapas, ko binem e thothup nge athap, ma gube meybil ni fan ngomed ni gubin u dakean fithngan Facha’ nike ta’aer e bin somm’on e flowa ko n’ag fan me poe’oeg e bin somm’on e wayn ko bayul, ni ir Yesus Kristus, fare Saaf ku Got nib ta murunguy mab thothup, amen.