Sap ngak Yesus Kristus

Rok Elder Kim B. Clark

Ko fare Medlipi Ragag

Fa’anra ngad sap gad ngak Yesus Kristus, Ir ra ayuwegdaed ningad folgaed fapi michmicheg rodad ma gelnagdaed ko muruwel rodad ko pi elder u Israel.

Nap’an Yesus ke yaen u but u kanawo’ ko Cpaernaum ¹ ko ulungi gidii’ u to’oben, keb e ppin nib m’ar nib almarin ko ragag nge la’agruw e due ke kii paa’ ngak ma math e farengi mad Rok. Ma ke golnag.²

Fare chepin u babyor nibe yoeg ni Yesus, ma nang “ke chuw [gelngin rok] ni dariy’ [Rok],”³ “make chel nga ulungi gidii’”⁴ ma “sap … ma guy fare ppin ni ke math maad rok.”⁵ “Nap’an fare ppin dabiyoeg ninge mith,”⁶ ke aw nga but u rifrifanen, me yoeg tin riyul’ ngak.“⁷

Yesus ke yoeg ngak, “Fakag, mu fel’ rogom: michaen’um ke golnigem, maen ufithik e gapas.“⁸

Yesus Kristus ke thapeg fare ppin nem. Ke golnag e downgin, machane nap’an Yesus ke sap ngak, ke yoeg e michaen’ Ngak ma Ke golnag e gum’racha’.⁹ Ke non ngak ufithik e t’ufeg, me weliy’ ni Ke faflaen’ ngak, me taw’athnag e gapas Rok ngak.¹⁰

Pi walageg, bachan e priesthood nib thothup rodad, gadadma muruwel ko thapeg. Fa biney e duw, en Somoel ke pinnindaed fapi elder ko Israel ningar powiy’ed fare muruwel.¹¹ Bay e thilyeg udakaen e thothog rok Somoel—muruwelgaed ko walagdaed nib ppin, ningad muruweliyed u rogon nib thothup, ningad papaynaged e mukun ko Israel ko urngin barba’ e veil, ningad yaermiyed e tabinaew ningar manged e gin’en nib matangiy e mich ma fil fare gospel ulangin, ma taermedilyed e fayleng ko bin La’agruw e Wub rok Yesus Kristus.¹²

Woed rogon urngin e ban’en, en Tathapeg ke dag fare wo’en ngodaed: thingar ningad sapgaed ngak ma pigpignaged Yesus Kristus woed rogon Ke sap ngak me pigpig ngak Chitamangin.¹³ En Tathapeg ke weliy’ ngak fare Profet Joseph:

“Mu sap ngog nap’an e lem rom: damu waer, damu tamra’.

“Mu sap ko mad’ad u kenginn, me pow ko pi nail u paa’angig nge rifriffaneg; mu michaen’um, mu fol pi motochiyel rog, ninge yoeg ningam fanay fare gil’lungun tharmiy.”¹⁴

Ou’moon e fayleng, Yesus ke micheg ngak Chitamangin ni Irra mugu’uliy laniyaen’ Chitamangin ninge mang e Tathapeg nge Tabayul rodad. Nap’an Chitamangin ke fith,“Mini’ Ningu pii’?”¹⁵ Yesus ku fulweg:

“Gube ara’, mu pii’eg.”¹⁶

“Chitamag, ninge yoeg laniyaen’um, mu fanay e fel’ngin riy’ ko manemus.”¹⁷

Nap’an e yafas Rok u fayleng, Yesus ke fol fare micheg nem. Udakaen e sobutaen’, fel’ rogon, nge t’ufeg, Ke fil e machib rok Chitamangin Me mugu’uliy e muruwel rok Chitamangin udakaen e gelngin nge mat’awaen ni Ke pii’ Chitamangin Ngak.¹⁸

Yesus Ke pii’ gum’racha’ ngak Chitamangin. Me ga’ar:

“Gube t’uf en Chitamangin.”¹⁹

“Gube rrin’ e n’en nib pii’ e falflaen’ ngak.”²⁰

“Kug yib … dabgu rrin’ e laniyaen’ug, machane gube rrin’ e laniyaen’ [Chitamangig,] ni ke pii’eg ngara’.”²¹

Nap’an e gafgow rok u Gethsemane, Ke meybil, “Machane gathi laniyaen’ug, machane laniyaen’um, ninge rrin’.”²²

Nap’an Somoel ra pinning pi elder ko Israel ningar “sapgaed ngog u urngin e laem” ma “sap ko pi mad’ad” ko downgin Ke fas ko yam’, i’ir e pinning ningan pii’ed keru’ ngak urngin e denen nge fayleng ngan chelgaed Ngak ngan t’ufeged ngan folgaed Ngak. I’ir e pinning ningan machibnag e machib Rok ngan mugu’uliyed e muruwel Rok u rogon Ir ba’adag. I’ir, aramfan, e pinning ngan pagaen’ Ngak nib polo’, ngan pii’ed laniyaen’ ma gum’racha’ Ngak, ma udakaen e gelngin Rok ninge bayulnag ningan ta’abrogon Ngak.²³

Pi walageg, fa’an ngad sapgaed ngak Yesus Kristus, Ir ra taw’athnagdaed ningad manged pi elder [Rok] ko Israel—sobutaen’, fel’ rogdaed, fol, sugaed ko t’ufeg Rok.²⁴ Ma gadadra pii’ e falflaen’ nge tin taw’ath ko gospel Rok nge Galasia Rok ngak fapi tabinaew rodad nge walagdaed ko bin barba’ e veil.

President Russell M. Nelson ke pinning dad ni ngad sap gad ngak Yesus Kristuts u rogon ney: “Dariy ban’en nib moem mornga’agen ni ba gacahalpen nib gel’. Thingar ningad sapgaed ni gubin yal’ nga Tathapeg nge gospel Rok. Nib moem’aw ningad sapgaed Ngak nap’an urngin e laem. Machane nap’an ngad rrin’ed, ra chuweg e wear nge tam’ra rodad.”²⁵

M’agi’ir e thin nib fel’. Ba yib fan ningad m’ag nib fel’ rogon, thapeg nge koel ni polo’.²⁶ Gadadma m’ag e laniyaen’daed ngak Yesus Kristus ma Gospel Rok udakaen a mafol ko michmicheg rodad.

Nap’an gadadma fol pi michmicheg rodad, ngeyoeg e ngongol nge thin fel’ rodad. Gadaba paer yafas nib michmicheg²⁷ ko boech e ngongol nib moem, ko mich nibe ayuwegdaed ningad sapgaed ngak Yesus Kristus, udakaen e meybil uFithingan, abich ko thinRok, sapgaed Ngak ningad kalgaedngaen’raed ko denen rodad, folgaed fapi motochiyelRok, feked fare sacrament ngad tay fan fare rran Rok ni Madnom nib thothup, liyoergaed ulan fapi temple nib thothup Rok, ngad ngonogliyed e priesthood nib thothup Rok ningaed pigpignoged ngak fapi bitir ku Got.

Fapi ngongol ney ni fan e michmich ra taermedliy e gum’racha’daed nge tafnay rodad ningaed thapeged e gelngin ko bayul rok Tathapeg nge fare gelngin ko be’ech rok fare Kan Thothup. Buchuw nga buchuw, en Tathapeg ma thilyeg e rogdaed, ran thilyegdaed Ngak, nge pi michmicheg rodad ra paer u gum’racha’daed.²⁸

Fapi micheg rodad ngak Chitamangdaed nu Tharmiy ra mang e dayig ko ngongol rodad, e tin t’uf rodad Chitamangdaed nu Tharmiy ba micheg²⁹ Pi michmicheg ra thilyeg ko motochiyel thingar ningad folgaed nga kenginn e yalen ni be ayuwegdaed ma m’ag paa’dad nga Yesus Kristus.³⁰

Pi ngongol ney ko liyoer rayog urngin e gidii’, fel’ yangren nge glabthir. Gimed mo’on nib fel’ yangmed ni bay fare Priesthood ni Aaronic rom, urngin e ban’en kug weliy’ biney e nap ni fanmed. Gube pinning e magaer ngak Got ni fanmed. Gamedba pii’ e gam’ing nge michmicheg nib thothup ngak bo’or i biyu’ e Gidii’en Got ko Tin Tomur e Rran urngin e week. Nap’an gamedra taermedliy, yibliynag, pii’ fare sacrament; pigpignag, tawfe ulane temple; pinning e fagar ko misa’; fa thapeg e chongin ko mo’olung rom, gamedra mugu’ul e muruwel ko thapeg. Rayog ningam sapgaed nga Yesus Kristus ngam folgaed pi michmicheg rom urngin e rran. Gube micheg fa’an ngam rrin’ed, gamedra mang e tapigpig nib pagaen’ rok Somoel chiney, ma boron, e elder nib gel bugwaenmed ko Israel.

Pi walageg, Gumanang pinn’ey e ba moem’aw. Machane mu tafnay nang fapi thin ko Tathapeg: “Gathi go’ gag ni bay gu wan gu per, ya en ni Chitamangiy e bay rog.” ³¹ Ere ku aram rogon ngodaed. Dawor ni pagtilin dad. En Somoel Yesus Kristus nge Chitamangdaed nu Tharmiy ba’adagdaed, ma yaedma paer rodad.³² Bachane Yesus ke sap nga Chitamangin me mugu’ul fare maligach nib gaa’ ko bayil, rayog ningad sapgaed ngak Yesus Kristus udakaen e pagaen’ ni Irra ayuwegdaed.

Dad machalboeg gaed. Boech e ba tal. Rayog ningad wereged fa waergaed. Ngad dol’gaed. Machane fa’an ngad sapgaed ngak Yesus Kristus udakaen e gum’racha’ nib kalngaen’uy, Ir ra chibiydaed nga lang, be’echnag e denen rodad, gay e n’agfan ngodad, ma golnag e gum’racha’daed. Irba gol me gumaen’; e t’ufeg nib bayul Rok dani tungun ma dani waer.³³ Irra ayuwegdaed ningad folgaed fapi michmicheg rodad ma gelnogdaed ko muruwel rodad ko pi elder u Israel.

En Chitamangiy ra taw’ath nagdaed ma pii’ urngin e ban’en nib t’uf ngodad ningad mugu’uliyed e muruwel Rok: “tin … u tharmiy nge u fayleng, ko yafas nge magal, fare Ya’el nge gelngin, ra yaen u dakaen e fel’ngin Chitamangiy udakaen Yesus Kristus, Fak rok.”³⁴

Nap’an bay yib e tamilang nge gelngin ku tharmiy nga yafas rodad, ra yoeg delip e ma’ang’ang ngodad:

Bin somm’on, rayog ningad guyed! Udakaen e thogthog rayog ningad guyed woed rogon Yesus ke guy fare ppin: u to’orngin e gum’racha’.³⁵ Nap’an ngad guyed woed rogon Yesus, Irra taw’athnogdaed ningad t’ufeged ngak e gidii’ ni ngad pigpigniged ngak ko t’ufeg Rok. Udakaen e ayuw rok, gidii’ nib pigipg rodad ra guyed en Tathapeg mar thamiyed e t’ufeg Rok.³⁶

Bin la’agurw, bay fare gelngin priesthood rodad! Bay e gelingdaed nge mat’awaen’daed ningad ngongoliyed u dakaen fithingan Yesus Kristus “ningad taw’athnog, powiy’ed, matangiy’ed, gelnag, ma golnag reb e gidii’” mag gayed ma’ang’ang ngak e gidii’ nib t’uf rodad ngad matangiyed fapi mabgol nge tabinaew nib pos rodad.³⁷

Bin delip, Yesus Kristus ma yaen rodad! Bin aram ningad dared ngak, Irma yaen! Nap’an ngad weliy’ed, Irra weliy’. Nap’an ngad ayuweg, Irra ayuweg. Nap’an ngad taw’athnaged, Irra taw’athnag.³⁸

Walageg, dariy tapgin ni ngad falfalaenʼ gaed? Arragon! Bay fare priesthood nib thothup ku Got rodad. Nap’an ngad sapgaed nga Yesus Kristus, ngad folgaed fapi michmicheg, ngad m’ag paa’dad Ngak, rayog ningad uned pi walageg nib ppin ma pigipgnog u rogon nib thothup, pinninged e gidii’ nib malog ko Israel u bin barba’ fare veil, gayed gel’ngin m’ag paa’daed ko tabinaew, ngad taermedliyed e fayleng ni fan bin La’agruw e Wub ko en Somoel Yesus Kristus. Irra buch. Kugu be micheg.

Gube pii’ e meybil ko gum’racha’eg, ni fan daed, gadad gubin, ra sapgaed ngak Yesus Kristus u gubin yal’. Dad waergaed. Dad tamra’gaed. U dakean fithngan Yesus Kristus nib thothup, amen.