Murwel ko Missionary: Weliy e Tin Nibay Ulan Gum’ircha’em
Demtrug e binaw rom u fayleng, bay boech e rogon ni ngam weliy’ fare gospel ku Yesus Kristus.
Biney e pul nike thumur fare Ragag nge La’agruw e ke pining raed fare profet i, President Russell M. Nelson, ni ngar malekag gaed nga ranod ngar yibliyed fare Temple u Rome Italy. Nap’an ni gamaed be malekag, mab ngan’ug fare Apostle Paul nge fare malekag rok’. U lane rran rok, ngan yaen u Jerusalem nga Rome, ma gonpa’an ni 40 e rran fin taw. Daba’, ko skuki ni rug ba’adag, kemus ni dalip e awa makan taw.
Gidii’ ni ma nang mornga’gen e bible e mich u wan’raed ngay ni Paul e imoy u Rome nap’an ni yoloy en ni babyor, ni’ir boech fapi kiy nima gelnag gidii’en e Galasia ni ku woed e dabay.
Paul nge ku boech gidii’en fare Galasia ni kakrom, far Gidii’en e Galasia ni Kakurom, e yaed manang fan e gafgow. Bo’or i yaed e un gafgow nag, ni woed nin lii’ ngem’.
Nap’an 200 e duw nike thumur, fapi gidii’en e Galasia rok Yesus Kristus nikan sulweg yarmen, fare Gidii’en-ko-tin Tomur e Rran, e gafgow ke buch roraed ni woed rogon e biney nib thilthil rogon. Machane dariy fan e mit ney e gafgow (ni bachan e fan), Fare Galasia ku Yesus Kristus ni fan ko Gidii’en Got ko Tin Tomur e Rran e kar ul’ulgaed kar gaa’gaed u dakaen gga’ngin fare fayleng.
Bo’or e Tin Nthingar ni Rrin’
Machane, u mm’on ni ngad lithed fare cake, magdaed yon’ fachngi mad nga lang, magdaed be yog e mnagar ngodaed ko biney e mon’og, ba t’uf ni ngaed sapgaed ko biney e mon’og.
Gonpa’an nbay medlipi billion e gidii’ u fayleng, ma ke mus ni 16 million gidii’en Fare Galasia ku Yesus Kristus ni fan ko Gidii’en Got ko Tin Tomur e Rran—ma gin ni kar suweyed u dakean e fayleng e ba achichig.1
Ma be m’ug ni, urngin e gidii’ nib mich u wun’raed ngak Kristus u dakan e fayleng e be achig i yean.2
Nib mu’un fare Galasia rok’ Somoel ni kan sulwegyarmen—ma babyoren e gidii’ nibe unn ko fare galasia e be gaa’ iyan—ni bo’or e gidii’ ndar ma thapeg fapi tawa’ath ni ngan unn ko Missa ni gubin ngiyal’.
Ere, demtrug bu’uw ni ga ba paer u dakaen e fayleng, rayong ni ngam fil fare e mulwol nib mangil3ko fare gospel ku Yesus Kristus ngak fapi gidii’ ni ngam mada nagrad, fil nagrad , nge paer fa muruwel u ta’abang.
U tomur e duw, kug ayuweg ko muruwel ko missionary ko fare Galasia u fayleng nib polo’. Ma bo’or e ngiyal’ ni guma tafney ma guma meybil ni mornga’agen fapi murwel ni pii’ fare Tathapeg ngak fapi gachalpen—gadad, bitir Rok—ni “mmarod, ngak girdi’en e pi nam, u gubin yang ngam tawfe nagrad nga fithingan e Chitmangiy nge Fak nge fare Kan Nthothup.”4
Guma tafney nag e biney e duwer “Uw rogon nrayag, fapi gidii’en gachalpen Kristus, ni ngar rrin’ed e biney e muruwel ulan e yafos roraed ni gubin ngiyal’?”
Daba’ gube piningmed ni ngam tafney niged nga gum’ircha’enmed e ku biney e duwer.5
Ba Tawa’ath ko Murwel ko Missionary
Tiyugaang’ ko Galasia e kar weliyed e biney ni woed laman e yibul “Gubin gidii’en e Galasia e ba missionary!” ni gaman bukun e duw.6
Gidii’en fare Galasia ku Yesus Kristus—tin kakrom e ngiyal’ nge tin chiney—ni yaed be wereg fare thin ko gospel ngak’ e tafagar nge ku boech e gidii’. Gum’ircha’enraed e ba sug ko fare mich ku Yesus Kristus, ma yaed ba’adag ni ngar thamiyed e biney e falfalaen’ ni kar thamiyed ni kar pir’egned ko fare gospel rok fare Tathapeg.
Biney a tawa’ath rok boech e chongin ko fare Galasia. Yaed ba’adag ni yaed ma machibnag fare gospel. Ni yaed ma pigpig ma dar rus gaed ni ngar rrin’ed fapi murwel ko missionaries.
Machane, bay boech i gadaed ni ma tuntun. Nap’an nray weliy mornga’agen e murwel ko missionary u Galasia, ma yaed mithag loligenraed nge mada’ ko ngiyal’ ndabki yag ni ngan guy raed u foen fare benchi ni woed e ggin nima mus e bitir riy, ni yaed be sap nglan fare scriptures roraed fa man owchraed ni yaed be gay rogon ni ndab ra sapgaed ngak’ boech gidii’en fare galasia.
Mangfan e biney? Sana yibe tamra’ ni darda weliyed ngak’ e gidii’ mornga’gen fare gospel. Sana bachan ndar da nanged rogon ni ngad rrin’ed rogon. Fa bachan e gadaed be tamra’ ni ngaed rrin’ed ban’en ni dawrda rrin’ed bi’id.
Gube nangfan e biney.
Machane tay u wun’um, ni fare Somoel e dariy bi’id nike pining e en th’abi cheg, ni nge rrin’ e murwel ko missionary. Ma kemus, “fare Somol e be yoeg ngak’ e gidii’ ni ba’dag e tafnay nge gum’ircha’enraed.”7
Fa’anra gabe muruwliy fapi murwel ko missionary, wenig ngom kum ul’ul i yaen, ngam par ni gabe dag rogon ngak’ boech e gidii’. Fare Somoel era fal’eg wa’atham.
Fa’anra, ni woed, kam thamiy ni gabe malmal ni ngam weliy mornga’agen fare mulwol ko gospel, ngu weliy laal’ i ban’en ni dabi kireb nigem ni rayag ni nge ayuwegnem ngam un ko fare murwel ni ngan kanuy pi u Isreal?
Laal’ i Rogon nib Mom
Bin somm’on, chuchgur ngak Got. Fare bin th’abi ga’ e motochiyel e nge t’uf rom Got.8 Irraray fan ni gadaed bay u roy u dakaen e fayleng. Mu fithem, “Rib mich u wun’ug ngak e Chitamangiy nibay u Tharmiy?”
“Ba t’uf rog mab pagan’ug Ngak’?”
Gara chuchgur nigem ngak e Chitamangiy nibay u Tharmiy, ma fare tamilang Rok’ nge falfalaen’ e rran pii’ nglan gum’ircha’em. Ma gidii’ e yaed ra guy ni bay ban’en nib thil rom mab fel’ u mornga’agem. Ma yadra fith ngom mornga’gen e biney.
Bin la’agruw, mu suguy gum’ircha’em ko t’uf rom e en boech gidii’. Ireray e bin migid ngay e motochiyel.9 Mu gay rogon ngam guy ni fapi gidii’ nabay u charem e bugi bitir rok Got. Pigpig ngoraed—demuturug ko be m’ug fithnganraed ko fare babyor ko pigpig rom ngak’ pi walagem.
Un ngoraed ko minmin. Un ngoraed ko falfalaen’. Un ngoraed ko miyor. Mu tayfan raed. Golnag, chubiy nglang, mag gelnag raed.
Mu gay rogon ngam dag fare t’ufeg rok Kristus mag runguy e gidii’—nib mu’un e gidii’ ngay nibe pii’ ngom nib kireb, fa be kakrangem fa ba’adag ni nge gafgow nigem. Mu t’ufeg raed mag rrin’ ngoraed ni woed ni yaed e pifak e Chitamangiy nibay u Tharmiy.
Bin dalip, mu gay rogon ngam par ko fare kanawo’ ko fanow. Nap’an fare t’ufeg rodaed ngak’ Got nge ngak’ Pi fak e ra gel i yaen, ma arram rogon gelngin ni gadaed ra laek Yesus Kristus.
Gadaed ma fil mornga’agen Kanawo’en nap’an gadaed be fil fapi thin Rok’ ma gadaed ba motoyil ma gadaed be rrin’ fapi machib nibe yib rok’ e profet nge apostles e daba’. Gadaed ra gel i yaen ma gadaed ra athamgil ni ngad leaked wo’en Rok’ nap’an ni gadaed be meybil ngak e Chitamangiy nibay u Tharmiy ni gadaed ba’dag ni ngaed filed rogon e tiney nge ni bay gum’iracha’em nib so’butan’
Ngan yaen u kanawo’en e pi fanow ney e ba murwel ni ngan rrin’ ni—gubin e rran, ni buch’uw ni buch’uw, “nib murnguy nib murnguy,”10 “Nga dakan reb nga dakan reb.”11 Ni boech e ngiyal’ ni ngan tay la’agruw i rifrifen aey nga mm’on min fulweg nga tomur ta’areb.
N’en th’abi ga’fan e dabin dubuy fan pag ni dabkun rrin’; gayed rogon ngaed rrin’ed nib mat’aw. Ya gadaed ra mon’og, magdaed falfalaen’, magdaed nang rogon. Weliy ngak’ e gidii’ mornga’gen e mich rodaed era mang bangi duw daed. Ni riyul’, ni fare gospel era mang bayang, ni rib ga’fan ulan e yafos rodaed ni gadaed ra thamiy nib thil fa’an ni dab da weliyed ngak’ boech e gidii’. Biney e dar ma buch nib papay—ya ba murwel nib n’uw nap’an fani buch. Machane ra buch.
Bin aningeg, weliy e tin nibay ulan gum’ircha’em. Dagur yog ngom ni ngam saki’iy nga kanawo’ ngam fek e microphone mag tolul nag fapi guruy ulan fare Babyor ku Mormon. N’en ni gube fith ngam gay kanawo’en nrayag ni ngam weliy mornga’agen e mich rom ngak’ e gidii’ ma dab mu tatamra—ngak’ e gidii’ fa online. Gube fith ni ngaed “pired ni gimed a pi mich rok’ Got ni gubin e ngiyal’ ngo fithi’ gubin ban’en”12 ko fare gelngin fare gospel ni gubin ngiyal’—ma nap’an nra t’uf, mag non.13
Bachen “ko re thin ney ni mornga’agen Yesus … ya ir gelngin Got ni nge thapeg e girdi’ ngak,” nge gel bugwon daed, pii’ gelngin daed, min sobut’aen’ nigey nap’an ni yibe weliy.14 Bugwon daed, gelngin daed, nge sobut’aen’ e woed ndar m’ug nib thil ko biney, machane gathi arragon. Ni be dag fare pong ko Tathapeg ni dabin mithag fare yalen e gospel nge tan baraba’i ban’en machane ngad ted ko gin nrayag ni nge gal’ urngin e gidii’, e tin nib bfel’ ni gimed be rin’ miyad yog e sorok ngak e Chitamangiymed ni bay u tharmiy.15
Bay bo’or e rogon ni ngam rinn’ e biney, ko rrin’ tin nib mangil gubin e rran nga share nag mich rom u YouTube, Facebook, Instagram, fa Twitter nga non ngak e gidii’ ni ngam mada nag. Biney e duw ma gadaed be fil mornga’gen fare Bin Be’ech e M’ag ulan e tabinaew rodaed nge Sunday School. Rib mangil ni ngan pining e pi fagar nga pi gubuliyoror rodaed ngar uned ngodaed nga galasia nge tabinaew rodaed ngad filed mornga’agen fare Thathapeg. Mu dag mag fil ngoraed fare Gospel Library app, bu’uw ni rayag ni ngar pir’eged fare Come, Follow Me. Fa’an gam nang e gidii’ nib fel’ yangren nge tabinaew roraed, mu pii’ ngoraed fare babyor ko For the Strength of Youth, mag piningraed ngar guyed rogon fapi fel’ yangren rodaed rogon ni yaed ma fol ko fapi yalen.
Fa’an ke fithem bee’ ko rogon e weekend rom, dam tuntun ngam weliy mornga’agen e tin nike buch rom u galasia. Weliy mornga’agen fapi bitir ni kar saki’iy gaed nglang u powchen e gidii’ ni yo’or kar yon’ed e tang ni yaed ba’adag ni ngar boded Yesus. Weliy mornga’agen fapi ulung i fel’ yangren ni kar ayuweged fapi gidii’ ni ke labthir ulan e tabinaew nifan e gidii’ nib labthir. Weliy mornga’agen rogon nike thil fare mo’olung rodaed ko Madnom nge rogon ni be tawa’ath nag e tabinaew rom. Fa weliy fan ni gadaed be yoeg ni fare Galasia ku Yesus Kristus ma gadaed Gidii’en Got ko Tin Tomur e Rran, ni ku woed rogon ni un pining fapi gidii’en e Galasia ni kakurom Gidii’en Got.
Demuturug rogon nib mom ngom, mu weliy fan ngak’ e gidii ni Yesus nge fare Galasia Rok’ e bagga’fan ngom. Pinningraed ningar “mbow muguyew.”16 Mu pinning fel’ laniyaen’raed ningar baed mar ayuweged. Bo’or muruwel e Galasia nrayag ni nge pii’ e gidii’ e ayuw riy.
Mu meybil ni fan fapi missionary ningar piry’eg e gidii’ nib me’leg. Mag meybil nib polo’ i gum’ircha’en ni ngam pir’eg e pi gidii’ ney ni ra yib nge sap, ra yib nge ayuw, me yib nge me par. Mu tay u wun’um ni non ngak fapi missionaries mornga’agen e biney. Yaed woed rogon pi angel, ba’adag ningar ayuweged!
Nap’an ni garam weliy fare thin nib mangil, fare gospel ku Yesus Kristus, mag rrin’ u fithik e t’ufeg nge gum’aen’. Fa’an gadaed ra non ko gidii’ ni gadead be gurgur nag raed ni ngar tawfe gaed, ma gadaed be rrin’ nib togan rogan.
Boech e gidii’ e ra yib nge guy, ma, dabi unn ko fare Galasia; ma boech e fan ngaram. Biney e tin ni kar dugliyed. Machane dam mu thilyeg fare t’ufeg rom ngoraed. Ma dabi thil rogon ni gadaed be gay rogon ni ngad pininged e gidii’ fa tabinaew ni ngar bad ngar guyed, bad ngar pi’ed e ayuw, nge ni ra yib me par.
Bin Laal’, pagaen’um ngak Somol ni nge ngongliy e ma’ang’ang. Mu nang fan ni gathi murwel rom ni ngam thilyeg e gidii’. Irraray e muruwel rok fare Kan ni Thothup. Muruwel rom e ngam weliy e tin nibay ulan gum’ircha’em mag ul’ul ngam par ko tin nib mich u wun’um ngay.
Ere, dani t’uf ni nge kirbaen’um ni fa’an e dani fana’ bee’ fare mulwol ko gospel nib papay. Gathi gur e ke aw rom.
Ya thilin facha’ nge fare Chitamangiy nibay u Tharmiy.
Thingari t’ufeg ngak Got nge t’ufeg ngak fapi buguliy yoror rom, bitir Rok.
Micheg, t’ufeg, rrin’.
Nap’an ni garam laek e ra pi’i kanawo’ ney, Got e ra fal’eg e ma’ang’ang nibe yib rom nge fal’ag wa’athan pi fak.
Lal i fan ney ra ayuwegmed ningam mang e gachalpen ku Yesus Kristus kar rrin’ed ko kakrom. Gospel nge Galasia Rok ba gaa’fan e yang ko yafas nge rogmed nge ngonogl romed. Aram fan, mu pinninged reb mar baed mar guyed mar baed mar ayuweged, nge Got ra ngonogliy e muruwel ko thap Rok, mar baed mar soengaed.
Ma Fa’anra Ba Momaw’?
“Machane,” ni gara fith, “fa’anra gura rrin’ ni gubin e pin’ey ma gidii’ e ra fanenikiyeg? Ma fa’anra yadra dubuy dakan e Galasia? Ma fa’anra yadra tal ngar manged e pi fagar rog?”
Arrogon, rayag ni ra buch e biney. Kub kakurom, ni fapi gachalpen Yesus Kristus e un gafgow nagraed.17 Fare Apostle Peter e ga’ar, “Felfelan’gad … ni gimed be un ko gafgow ni i tay Kristus.”18 Pi gidii’en Got ney ni kakurom e kar felfelan’rad “ke tafinay nag Got ni bay rogorad ni ngar gafgowgad ni fan nga fithingan Yesus.”19
Arragon, ya Somoel e ma muruwel u fithik e ma’ang’ang. Rayag ni gur ni gabe gay rogon ni ngam woed Kristus e somm’on ku bee’ ni nge munguy gum’ircha’en.
I gag ni Apostle ku Yesus Kristus, gube yibliy med ni garam nang rogon ni ngam par ni gab fos nibay e mich rom ko tin nib ga’fan ko fare gospel, nib mu’un e athamgil nran guyem min nang ni gur gidii’en Fare Galasia ku Yesus Kristus ni fan ko Gidii’en Got ko Tin Tomur e Rran, nib mu’un e sobut’aen’ ni ngam ayuweg e muruwel Rok’ ni woed rogon e t’ufeg rom ngak e Chitamangiy nibay u Tharmiy nge Ngak’ pi fak.
Pi fagar nib t’uf rog, garam falfalaen’ mag nang ni gur reb gidii’en ni ra kunnuy pi u Isreal nga ta’abang, ni gabe fal’ag rogon e wub rok Kristus u “gelngin nib gel ma falfalaen’ ni alamrin; nib mu’un fapi angel ngay nib thothup.”20
Ma nangem e Chitamangiy nibay u Tharmiy. Gab t’uf rok’ Somol. Ra fal’eg wa’atham Got. Biney e muruwel e kab Rok’. Rayog ngam rin’ e biney. Rayog ni gnad rrin’ed uta’abong.
Gube micheg u dakean fithngan i Yesus Kristus, amen