Ngan Era Fekdaed e Biney Ngay?
Rayag rodaed ni ngad mel’egned e tin th’abi fel’ ban’en ni fa’an nran sap ko tin ni be buch nge ngan era fekdaed i yaen ngay.
Fare gospel nikan sulwegyarmen ku Yesus Kristus e be pii’ e athamgil ngodaed ni ngaed laem niged e tin nga mm’on ban’en. Be weliy mornga’agen e yafos u fayleng nge n’en nra buch ko bin magid e yafos. Be fil mornga’agen e tin nga mm’on ni nge powi’iy rogon e pi dodow rodaed e dabay.
Garam sap ngay, ma gadaed manang bee’ ni kemus ni tin chiney e ma lamnag: kemus ni dabay, falfalaen’uy ko dabay, ma dar lemnang e tin nga mm’on ban’en.
Tin chiney ban’en nge tin nga mm’on era gel nag e falfalaen’ rodaed ni fa’an gadaed be lemnag e tin nga mm’on ban’en. Nap’an ni gadaed be rrin’ e tin chiney ban’en, thingar fithed i gadaed, “Ngan era fekdaed e biney ngay?”
I.
Boech ban’en ni yima rrin’ e mal’eg u thilin e tin ni yima rrin’ fa tin danur rrin’. Ku rung’ag e mit ney e mel’eg ko stake conference u Mariken ni bokun e duw kafram.
Nnin tay ko ba campus u college ni rib fel’ ya’an. Ni fapi bitir nib fel’ yangren raed e yaed be par u butt’ u dakan e ka’ar. Ma facha’ nibe weliy rogon e ran’ey e yoeg ni yaed be yaliy ya’an ba squirrel ni rib fel’ ya’an, ma bay pochon nib gga’ ma be chingeg be math nga kenggin farke gaki’iy. Boech i ngayal’ ma be math pochan nga butt’, ma boech i ngayal’ me be ga’ar ngalang nge sul nga kenggin farke gaki’iy. Ere mang e rib fel’ ya’an ko biney nibe yiliy fare ulungi bitir nib fel’ yangren raed?
U charen farke gaki’iy e bay ba kus riy. Ni fapi bitir nu sukul e yaed be yaliy ya’an, ma fare kus e be yaliy ya’an fare squirrel. Nap’an e dar sap fare squirrel ya be mit i yeleg farke gaki’iy, me skan kan fare kus i yib ma tal nge thilyeg rogon nibe par. Ni irraray e n’en ni kari ngat fapi bitir ngay. Dakriy bee’ nibe noen fa be mithmith, ma kar ngat gaed ko ya’an e n’en nibe buch ma dar lemniged ko mang era boech nga m’on.
De n’uw nap’an, ma fare kus e kari chuchugur ngak’ fare squirrel me ka’ad nga langan. Me ggin owchen fapi bitir ngay, me gachgach fapi bitir u butt’ ni yaed be gay rogon ngar ayuwegned fare squirell nike ka’ad fare kus, ma ke saga’al. Fare squirrel e ke yim’.
Dariy bee’ u fithik fare ulungi bitir’ ni ayuweg fare squirrel fa toluf ni ngayag ni nge mil, dariy bagyaed ni rrin’ e biney. Kemus ni ke mit owchraed ko biney nga mada’ ko ngayal’ ni kari chugur. Dariy bee’ ni fith, “Ngan era fekdaed e biney ngay?” Nap’an ni buch e n’en susun nra buch, gubin nra gayed rogon ni ngar pe’ed e ayuw, machane ke saga’al. Ma kemus ni kirbaen’ e ku bay.
Biney ni buch e ku woed ni bay fan. Be yip fan e tin ni gadaed be guy ulan e yafos rodaed nge yafos ko gidii’ nge tin nibe buch u charendaed. Woed ni gadaed be guy ni be yib e mad’ad ngak bee’ fa ko tin nib tu’uf rodaed, bay nrayag ni ngaed turguyed e n’en ni ngad dagned fa ngad rrin’ed fa da pared ni dabda non gaed. Mab fel’ ni ngaed fithed gadaed, “Ngan era fekdaed e biney ngay?” Ya n’en nra buch rodaed u tomren e bagel e mad’ad riy, ma dabyag pulwon rodaed ni dabda rrin’ed ban’en ngay. Thingar da ta’amagaran niged e gidii’ fa ngad daged ban’en nrayag ni nge taleg e baney ko ngayal’ ni kbay.
N’en ni fanug mu’ i weliy mornga’gen e be dag nrayag ni ngan turguy ko ngan rrin’ ban’en ngay fa danga’. Mab chuchgur e pin’ey ko tin ni ngan rrin’ nge reb. Tiney e mu’un e turguy u thilin e tin nib fel’ nge tin nib togan, ma oren ni ngayal’ e turguy thilin l’agruw i ban’en nib manggil. U roy ma ku rayog ni ngan fith ko ngan era fekdaed e biney ngay. Gadaed ma mel’eg ni gubin ngayal’ u thilin l’agruw ban’en nib manggil, nib gga’ ni woed rogon ni ngad faned e tym rodaed. Dariy ban’en nib togan riy ni ngan fafal ko video game fa ngan text fan yaliy e TV fan noen ngak bee’ u telefon. Machane gubin e pin’ey ma bay ni kanog e “ndariy fal’ngin,” nibe yipfan ni fa’an gadaed ra rrin’ ni kemus ta’areb ban’en, ma gadaed be adabay rogon nrayag ni ngad rin’ed yug boech ban’en riy’. Gumanang ni rayag ni ngam guy fan nib tu’uf ni ngaed tafney niged e pin’en nibe palog rodaed nap’an ni kemus ni t’ab ban’en e gadaed be rrin, ndariy fan ni fa’an ban’en nib manggil.
Boech kafram ku pii’ e talk ni mornga’agen e tin nib “Manggil, Manggil boech, Fa tin Th’abi Mangil.” Ko binem e talk ku goeg ni “bachan e ban’en nib manggil e gathi aram fan e bagga’fan ni ngan rrin’. Urngin ban’en nib manggil nrayag ni ngaed rrin’ed e bo’or ko tym nibay ni ngaed mu’ niged ni gubin. Boech ban’en e bagga’fan ko tin nib manggil ban’en, ni irraray e tin thingar da t’ed um’on ulan e yafos rodaed. … Ngaed paged boech ban’en nib manggil ulan e yafos rodaed ni nge yog ni ngaed manggil niged boech fan rin’ e tin th’abi manggil ban’en.”1
Msap ko tin nga mm’on. Mang era buch nga mm’on ko biney ni gadaed ra turguy ni ngan rrin’ e chiney? Tafneynag u wun’um nib tu’uf ni ngam man nga sukul, fil fare gospel, be’echnag fare m’ag rom ni gabe fek fare sacrament, ma gabe yaen nga tempel.
II.
“Ngan era fekdaed e biney ngay?” e ba gga’fan nga rogon ni gadaed ma sap ngodaed ma gadaed be guydaed. Ma n’en ni th’abi ga’fan, gadaed gubin ma gadaed e bitir rok’ Got ni bay fal’ngin ko fare yafos ni manemus. Tin ni kubay ban’en, ni woed e muruwel rodaed, ggin ndabad riy, fa tin ni kayag ngodaed ni bachane gadaed ba cheg, e kemus ni tin nu fayleng ban’en. Dam turguy u wun’um fa mu tafneynag ni ngam tal’ ko tin ba’aray ban’en ni gabe lemnag ni ngam rrin’.
Pi walageg ni pumo’on, nge ppin ni kar guyed fa kar be’egned fapi n’en ni gube yoeg, gume athapeg ni ga manang fan fapi tiyugang’ nge fapi sensey nibe pii’ ngom fapi mulwol. Gamed btu’uf romaed, nge Chitamangdaed nibay u Tharmiy nge Fak, Yesus Kristus, nib tu’uf rom. Fare tonom rorow ngodaed e fare “wo’en e falfalaen’ nib gel”(Alma 42:8). Ra tonom nge fapi motochiyel Rorow nge fapi gum’ing nge m’ag era fekdaed ko fare wo’en e falfalaen’ nib gel nge falfalaen’ ko biney e yafos nge bin migid e yafos ni bayi yib. Gadaed e pi ta pigpig rok’ e Chitamangiy nge fare Fak, gamaed be fil ma yibe fanow ni woed rogon ni kan dag ngomaed u dakan fare Kan ni Thothup. Dariy ban’en ni gamaed ba’dag ma kemus ni ngu goged e thin nib riyul’ mag mad pii’ e athamgil ngom ngam rrin’ e tin ni kar dugliyew nra fekdaed ko yafos ni manechubog, “ni ni’ir e th’abi bin nib bagga’ e tawa’ath rok’ Got” (Doctrine nge Covenants 14:7).
III.
Ba’aray reb wo’en ni ke m’ug ni tin ni gadaed be rrin’ e chiney era dugliy rogondaed ko tin nga mm’on ban’en. Pi wo’en e mel’eg ney e ran gafgow riy machane ra yib angin ko gubul ma langlath.
Ko stake conference u Cali, Colombia, bay reb e ppin ni yeog ni ba’adag ni ngar mabgol gow e pumo’on rok’ u tempel, ma bin nib chuchur ngorow fare tempel e bay u Peru. Nrib n’uw nap’an, ni kar kunuy yew pilwon row nifan fare bus. Fin arram miyo yan ulan fare bus nga Bogota, machane nap’an nra taw gow ngram, ma orran fapi chiya ulan e bus e ke sug nrayan nga Lima, Peru. Rayag ni ngar sulew nga tabinaew rorow ndar mabgol gow fa ra mabgol gow machane gathi ulan e tempel. Ma woed, ni kubay reb kanawo’en. Rayag ni ngar unew ulan fare bus nga Lima ni ngar pirew nga butt’ ko fare bus ni ga’ngin yang fare malekag ni laal-e rran nge laal-e nap. Kar mel’egew ni ngar rinn’ew e biney. Ni yoeg ni rib momaw’, demuturug ni boech e gidii’ ulan fare bus e be pii’ e chia roraed ni ngar perew boech ngay ni ngayag ni ngar kekiyagnew ay row.
N’en ni ggin owcheg riy ko talk rok’ ere ppin ney e gelngin ni kari falfalaen’ ni kar mabgol gow e pumo’on rok’ u tempel, ni bachan e ke thilyeg rogon ni ma thamiy ko fare gospel nge rogon ni ke thamiy nap’an ni ke mabgol u tempel. Fare Somol e ke fal’eg wa’athan row ni kar nangew ko mang e gafgow. Maki yaliy ni fare laal-i rran ni kar milekag gow nga tempel e ke ayuweg row ke gelnag e thothup rorow ni ngar sulew ngar guyew fare tempel.
In ni duw ney ni kug rung’ag e biney e mich, guma tafney nag rogon nra thil ni fa’an e gali babgol ney e kar mel’egned reb e kanawo’ nib thil—ndan athamgil gow ni ngar mabgol gow u tempel.
Pi walageg, bo’or ban’en ni gadaed ma mel’eg ulan e yafos rodaed, tin nib bagga’ nge tin nib achig. Gura sap nga tomur, ma gadaed ra guy ni fapi n’en ni kad mel’egned e ke thilyeg e yafos rodaed. Gadaed ma mel’eg e tin th’abi fel’ ban’en ni fa’an gadaed ra sap ko tin ni be buch nge ngan era fekdaed i yaen ngay. Nap’an ni gadaed ra rrin’, ma aram ni gadaed ba fol ko fanow rok President Russell M. Nelson ni ngad tabab i ngongliy e ni ngad lemnag ko tomur e banen. 2 Nifan ngodaed, bin tomor e ban’en e ir e kanawo’ ko micheg u dakaen fare tempel nga yafos nib manemus, th’abi ga’fan ko tawa’ath rok Got.
Gube micheg rok Yesus Kristus nge fare ayuw ko Bayul Rok nge gubin e tin nib riyul’ ko machib Rok nib macholbog u dakaen fithngan Yesus Kristus, amen.