Yi’iy ni fane Galasia, Yi’iy ni fane Yafas Rodaed
Ulan boech e rran nga m’on, ma dabiyog ni ngea fal’ rogoy ni dariy e gagyeg, nge powi’iy, nge gapas rok fare Kan ni Thothup.
Pi walageg nib t’uf rog, rib gadaed falfalen’ ko Easter u ta’abang ko re general conference ney ko Madnom! Dariy ban’en nib mangil ko bin ningan tafney nag e bin tha’abi ga’fan nike buch u dakean e re fayleng ney ni yibe liyoer ngak e cha’an nike paer u dakean e fayleng ni tha’abi ga’fan. Lan Fare Galasia ku Yesus Kristus ni fan ko Gidii’en Got ko Tin Tomur e Rran, e gadaed ma liyoer Ngak e cha’an nike tabab nag e Bayul Rok nib manechubog u lan fare Milaey’ u Gethsamane. Ba adag ni nge gafgow ni fan ko denen nge mo’owaer rodaed, ni n’anggin nge map rach’en u gubin yang u dow.”1 Kan kruth nag u Calvary2 me fas ko bin dalip e rran ni ir e bin somm’on ko pifaak e Chitamangdaed nu Tharmiy. Ba t’uf rog ma gube micheg nib fas! I Ir e be gagyeg ma be powi’iy e Galasia Rok.
Ra dariy e Bayul rok e Tabiyul rodaed, ma dariy bagdaed athap rodaed ni ngad suled ngak e Chitamangdaed nu Tharmiy. Ra dani Fos ko Yam’, ma yam’ e tomur. Bayul ko fare Tathapeg rodaed e ke riyul’ nag e yafas nib manemus ni fan ngodaed ni gubin.
Bachane muruwel Rok nib falel’ ma gapas nike pi’ ngak e pi’in nibe laek ni pin rog, Wendy, nge gag e gu thamiyew e gapas ko fare balayal’ ko January 2, 2018, nap’an ni gu od gow nikan call ni yibe yoeg ngomow nike yim’ President Thomas S. Monson.
Karin tawreng niged President Monson! Gomow be tay fan e yafas rok nge n’en nike rrin’. Bee’ nib thothup, ke ayuweg bukun e gidii’ ni yi manang nge Galasia nib t’uf rok.
Nap’an e Madnom, ko January 14, 2018, u lane bin ngalang e senggil u Salt Lake Temple, ma be yarmeg Somoel e Bin Somm’on e Presidency nib thothup rogon. Ma arame fowap, me tingiy e gidii’ ko Galasia u dakean e fayleng pa’ raed ngalang ni ngan micheg e n’en nike buch ko pi Apostle. Ba sobutan’ug ni gub falfalen’ ni fan ko ayuw rom.
Ma kugub falfalen’ ni pi’in ni imoy ko gin ni gubay riy. Gub falfalen’ ni nggu pigpig u lane Ulung ko fare Ragag nge L’agruwi apostle ni yan 34 e duw ma 16 urngin e President ko Galasia ma kug nang 10. Ra bagyaed ma kug fil ban’en roraed.
Kugube falfalen’ ko gidii’ rog ni kakrom. Meruk urngin e thingtuw rog ni kar uned ko Galasia u Europe. Ra bee’ ma ke miligach nag gubin ban’en ni ngan yib nga Zion. Machane, nap’an e bin migid e yangar ma gathi gubin e gidii’ rog nib yul’yul’. Bachane biney, ma dan chugliyeg u lane tabinaew nibay e gospel riy.
Ba t’uf e galabthir rog. Ri yow baga’ fan ngog ma kar filew e tin nib ga’fan ban’en ngog. Dabi math e magaer rorow ko tabinaew nib falfalen’ ni kar ngongliyew ni fan ngog nge pi walageg. Machane, nap’an ni kugub pagael, ma gu manang ni bay ban’en ni dariy. Boran mug af nga karo mug waen ko ba LDS bookstore ni nggu gay e babyor ni mornga’agen e Galasia. Gu ba adag i fil mornga’agen fare gospel.
Nap’an ni gu nang fan fare Falan e Dowef, ma gu ba adag ni nge fol e galabthir rog ko re motochiyel nem. Ere, boran nap’an ni kugub bitir, mug waen nga basement romaed mug bilig gubin e rom! Kug leam nag ni nge gechig nigeg e papa’ rog, machane ri dani yoeg ban’en.
Nap’an ni gu ilal’ ma ku tabab i nang fan fare tunom rok e Chitamangiy u Tharmiy nib falel’, ma baga’ ni guma ga’ar ngog, “Kug dubu’ ni nggu fana’ e tawa’ath ko Krismas. Gu ba adag ni nggan chiyliyeg ko galabthir rog.” Binem e dani buch nge taw ko ngiyal’ nike pag e 80 e duw ko galabthir rog, machane ni ke buch. Daog ni nggu weliy gelngin e falfalen’ ni ku thamiy e rofeen nem,3 nge guma thamiy e falfalaen’ ney gubin e rran nifan e chiyliy rorow nge chiyliy rog ngorow.
Lane 1945, nap’an ni gubay ko skul ko togta, mug la’ngiy Dantzel White u lane Salt Lake Temple. Ir nge gag e ni fal’eg wa’athan mow ko mereb i ppin nge ta’areb e pagael ni fak mow. Daba’ ma ke ga’ e tabinaew rog ni reb e falfalen’ u lane yafas rog.
Lane 2005, nike chugur nge gaman 60 urngin e duw ni kug mabgol, me yim’ adow i Danzel rog. Ta’aboch ngiyal’, ni ri alamrin e kirbaen’ rog. Machane fare mulwol ko Easter nge fare micheg ko foskoyam’ e ayuweg neg.
Ma arame pi’ Somoel Wendy Watson ngog. Man chiyliy mow u lane Salt Lake Temple ko April 6, 2006. A rugu ba adag! Ba ppin ni rib falel’—ba tawa’ath ngog, ko tabinaew romaed, nge Galasia.
Ra reb e pi tawa’ath ney ma ke yib ni yibe gay ma yibe motoyil ko fare Kan ni Thothup. President Lorenzo Snow e ga’ar, “Biney e falfalen’ ko gubin Gidii’en Got … mat’won daed ni niba’ fare Kan Nthothup u lane yafas rodaed ni gubin e rran.”4
Reb e pin’en ni ra paer fare Kan Nthothup nibe sulsul u dakean u lanin’ug nap’an e calling rog nib bi’ech ni gub President ko Galasia e rogon ni ba adag Somoel ni nge dag e tafney Rok nge n’en nib m’agan’ ngay. Falfalen’ riy ni yibe thapeg e yi’iy e reb e tawa’ath nib falel’ rok Got nike pi’ ngak Pifaak.
Dakean e tin’ nibe dag fare Kan ni Thothup, ma ra ayuweg daed Somoel ko gubin e pin’en ni gadaed be rrin’ nib mat’aw. Lane senggil ni yima taflay nag e gidii’ riy, ma gube sak’iy u to’ben ba m’ar—ni danug nang ko rogon ni nggu rrin’ e murwel rog—ma fare Kan ni Thothup e ayuweg neg u lanin’ug.5
Gu non ngak Wendy ni rogon ni nge rayog ni nge yoeg e ea ngog, mug ga’ar, “Gumanang e yi’iy nge rogon ni nggu thapeg.” Ma ir e mangil e fulweg rok—ma, ku nang, rogon—ke mu’ i gay ma ke thapeg e birok e yi’iy nimornga’agen mow, ni pi’ gelngin nge yoeg e arrogon.
Muurwel rog ni gub mang ko fare Ulung ko fare Ragag ne La’agruwi Apostle, ma guma meybil ni gubin e rran ni fane yi’iy mug pining e magaer ngak Somoel ni gubin ngiyal’ nike non nga gumircha’eg nge tafney rog.
Leam nag e ma’ang’ang nima yib riy! Demtrug ko mang e calling u Galasia rodaed, ma rayog ni ngad meybil gaed e Chitamangdaed nu Tharmiy man thapeg e kanawo’, man magar nag daed ko magawon nge kireb, ma yag nang ni ngad rrin’ed e tin ni dabiyog rodaed ni go’ gadaed. Fa’anra ri kad thapeged fare Kan ni Thothup ma kad filed i nang fan, ma ran gagyeg nag daed ko tin nib ga’ ban’en nge tin nib achig ban’en.
Nap’an ni ku magawon ni nggu mel’eg l’agruw e counselor, mug leam ko rogon ni ri la’agruw ni’ ko pi ragag nge l’agruw i pumo’on nge nggu mel’eg ni yaed gubin nib t’uf rog.
Bachane ni gu manang ni yi’iy e be yan ko rogon e mornga’agen nib mangil, ma ra reb e pi apostle ma gamaed meybil.6 Ma aram mug waen nga lan reb e senggil ni demoy bee’ riy u lane temple ni nggu fith Somoel ko n’en nib m’agan’ ngay. Gube micheg nike yoeg Somoel ngog ni nggu mel’eg Dallin H. Oaks nge President Henry B. Eyring ni ngar pigpig gow ni yow e counselor rog u lane bin Somm’on e Presidency.
Ku ta’aborogon, ni gube micheg ni Somoel e ke yoeg fare call rok Elder Gerrit W. Gong nge Elder Ulisses Soares ni ngan yibliy raed ni Apostle Rok. Gube pining e magaer ngoraed ni yad bay ko biney e pigpig nib thil rogon.
Nap’an ni gamaed ra yib nga ta’abang ni yib Council ko fare Bin Somm’on e Presidency nge Ulungi ko fare Ragag nge La’agruwi Apostle, ma senggil romaed e mang e senggil ko yi’iy. Fare Kan Nthothup e rayog ni ngan nang ni bay. Nap’an ni gamaed ra magawon, me buch ban’en nib falel’ nap’an ni ra reb e Apostle me weliy laniyan’ nge rogon e sap rok. Demtrug nib thilthil rogon e sap romaed, ma t’ufeg ni gamaed be thamiy ngomaed e darma mus. Rogon ni gamaed ba ta’areb e be ayuweg maed ni nggu nanged e n’en nib m’agan’ Somoel ngay ni fan ko Galasia Rok.
Lane mo’olung rodaed, dani yima to’ogor! Gamaed ma motoyil ngomaed ma gamaed be non nge taw ko ngiyal’ ni kug ta’areb gaed. Ma nap’an ni kari ta’areb e thin romad, ma ri gel gelngin fare Kan ni Thothup! Kan buch romaed e n’en nike buch rok Profet Joseph Smith ni manang nap’an ni ga’ar, “Ran ta’areb ma gadaed thapeg gelngin Got.”7 Dariy bee’ u lan bin Somm’on e President fa Ulung ko fare Ragag nge La’agruwi Apostle ni ra leam nag e tirok ban’en ni ngan rrin’ ko Galasia rok Somoel!
Pi walageg, urogon ni ngad manged e pumo’on nge ppin—pi tapigpig ni boed Kristus—ni ba adag Somoel ni ngad manged? Urogon ni rayog ni ngad pir’eged e fulweg ko pi duwer nima balyang nag e tafney rodaed? Fa’anra ke fil fare n’en nike buch rok Joseph Smith u fithik e Gak’iy nib Thothup ngodaed, ma ba maab e tharmiy ma non Got ngak Pifaak.
Fare Profet Joseph Smith e ke tay e kanawo’ ni fan ngodaed ni ngad lak e di pitheg e duwer rodaed. Thin nike yoeg James ni fa’anra gadaed ba adag ni ngad nanged ban’en ma rayog in gad fithed Got, me Joseph ni kab bitir e feek e duwer rok ngak e Chitamangiy nu Tharmiy,8 Ke gay e yi’iy rok, ma birok e bing e biney e dispensation.
Boed ni, mang e n’en ni ra maab ni fan ngom? Mang gonop e gabe gay? Mange gabe thamiy nib ga’fan ni ngam nang fa ngam nang fan? Laek e wo’ rok fare Profet Joseph. Gay bang ni dariy bee’ riy ni rayog ni ngu um mang ngay. Sobutan’um u pow’chen Got. Moeg e n’en nibay u gumircha’em ngak e Chitamangim nu Tharmiy. Chel Ngak ko fulweg ko duwer rom nge gapas.
Meybil u dakean fithngan Yesus Kristus ni mornga’agen e magawon rom, murus rom, mo’owaer rom—arrogon, pin’en nibay u lan gumircha’em. Ma aram mag motoyil! Mu yoloey e tafney nike yib nga lanin’um. Yoloey e n’en nikam thamiy mag rrin’ e pin’en nikan noeg ngom ni ngam rrin’. Nap’an ni gara ulul i rrin’ e biney ko rran ngo reb, pul nge af ko rebe pul, duw nge af ko reb e duw, ma gara “nang rogon fare yi’iy.”9
Riyul’ ni ba adag Got ni nge non ngom? Arogon! “Kab fal’ ni nge tay e pumo’on pa’ nga m’on ni nge gay rogon ni nge taleg fare Missouri River ko gin ni be yan riy, ko bin ninge taleg Got i pu’og e gonop u tharmiy nga dakean loelgen Gidii’en Got.”10
Dariy fan ni ngam leam nag mornga’agen e n’en nib riyul’.11 Dariy fan ni ngam leam nag ko mini’ e rayog ninge pagan’um ngak. Dakean e yi’iy rom, ma rayog ni ngam thapeg e birom e micheg ni fare Babyor ku Mormon e thin rok Got, ni Joseph Smith e profet, ma iraray e Galasia rok Somoel. Demtrug ko mang e ra yoeg boech e gidii’ fa rrin’, ma rayog bee’ ni rayog ni nge chuweg e binem mich nikan noeg nga gumircha’em nge tafney rom ni mornga’agen e n’en nib riyul’.
Gube yoeg ngom ni ngam cheag nigem ngam thapeg e yi’iy ni fan ngom, yak e micheg Somoel ni fa’anra gara fith, ma gara thapeg e yi’iy nga dakean reb e yi’iy, gonop nga dakean reb e gonop, ni ngam nang e pin’en nib mith mab gapas—nima pi’ e falfalen’, nima pi’ e yafas nib manemus.”12
Bo’or ban’en ni ba adag e Chitamngim nu Tharmiy ni ngam nang. Rogon ni yoeg Elder Neal A. Maxwell ni ga’ar, “Pi’in ni bay owchen ni nge guy nge teliy ni nge rung’ag, ba tamilang ni Chitamangiy nge fare Faak e yow be pi’ e tin mith ni mornga’agen e fayleng!”13
Dariy ban’en nima bing e tharmiy ni boed e bi’ech, fol, gay u fithik e athamgil, ma yibe fil e thin rok Kristus ni gubin e rran u lan fare Babyor ku Mormon,14 ma yibe yan nga temple nge muruwel ko cheppin e tabinaew ni yibe rrin’.
Riyul’, ni bay boech e ngiyal’ nap’an ni gabe thamiy ni boed nike maen e tharmiy. Machane nggu micheg nag ngom ni nap’an ni gara ulul ni ngam fol, ma gabe pining e magaer ko gubin e tawa’ath nibe pi’ Somoel ngom, nge nap’an ni gae athamgil ni gabe tay fan e ngiyal’ ninge non Somoel, ma rani pi’ e gonop ngom nge llowan’ ni gabe gay. Gubin e tawa’ath ni bay rok Somoel ni fan ngom—mu’un e ma’ang’ang ngay, ma ra yib. Iraram e n’en ni ra rrin’ e yi’iy ngom.
Bay e athap rog ko tin nga m’on. Ba sug ko kanawo’ ni fan ngodaed ni ngad cheg gaed, ni ngad pi’ed ban’en, ma gad fek fare gospel ko gubin yang u fayleng. Machane ku danug nang ko rogon e rran ni bay nga m’on. Gadaed be paer u fayleng nibe wagay. Social media ni kubay nge news ni 24 e aw ni ma athkuy loelgen daed ko mulwol riy. Fa’anra ngeyog e athap ngodaed ni ngad nanged e tin nib mangil u fithik luman e gidii’ nima kireb nag e tin riyul’ ban’en, ma ngarin filwed rogon ni ngad thapeged e yi’iy.
Fare Tathapeg nge Tabiyul rodaed, i Yesus Kristus, e ra rrin’ boech e murwel Rok nib falel’ ko chiney nge nap’an ni ra yib bayay. Gadaed ra guy e ma’ang’ang ni Got ni fare Chitamangiy nge Faak nib T’uf Rok e be gagyeg nag e re fayleng ney ni yow ba pilung u fithik e rir. Machane, boech e rran nga m’on, ma dabiyog ni ngea fal’ rogoy ni dariy e gagyeg, nge powi’iy, nge gapas rok fare Kan ni Thothup.
Pi walgeg nib t’uf rog, gube wenig nogm ni ngam gel nag med ni ngam thapeged e yi’iy. Mpag e biney e Madnom ko Easter ni nge thilyeg e yafas rom. Mel’eg ni ngam rrin’ e muruwel nib thothup ni ngan falfalen’ ko fare tawa’ath ko fare Kan ni Thothup man motoyil nga luman fare Kan Nthothup ni gubin ngiyal’ nib tamilang rogon.
Nggu un ko Moroni, ni gube pingmed ko re Madnom ney ko Easter ni “baed ngakʼ Kristus, magmed lʼeag paʼmed ko gubin e tawaʼath nib mangil,”15 tabab ko fare tawa’ath ko fare Kan ni Thothup, ni fare tawa’ath ni rayog ma ra thilyeg e yafas rom.
Gadaed e pi gachalpeg Yesus Kristus. Bin tha’abi ga’fan e riyul’ ni ra dag fare Kan ni Thothup ngom e Yesus e ir Kristus, fare Faak Got nib fas. Ba fas! Ir e Cha’an nima ayuweg daed ngad suloed ngak Got, Wo’ rodaed, nge Tabiyul rodaed. Biney e Madnom ko Easter, ma gadaed be leam nag e miligach Rok ni fare bayul, nike Foskoyam’, nge Ir nib thothup.
Iraray e Galasia Rok, nikan fulweg u dakean fare Profet Joseph Smith. Gube micheg, u fithik e t’ufeg rog ngomed, u dakean fithngan Yesus Kristus, amen.