Mu Thapeg fare Kan Thothup ko Tapowiy’ Rom
I’ir e taw’ath nib gaa’ nap’an e gidii’ ningar michaen’daed ngak Yesus Kristus. I’ir fare taw’ath ko fare Kan ni Thothup.
Nap’an e Madnom ney ko Easter, gadadba lemnag mornga’agen e Fas ko Yam’ ko Somoel i Yesus Kristus nge mornga’agen fare kahol ko yam’ ni dariy’ nibe pii’ urngin e bee’ nib michaen’ athap e gel ko Kristus ko e waer nib gaa’. Gube michaen’, woed rogon fare Apostle Paul, ni woed rogon Got “ni ir e faseg faseg Kristsus ko yam’, [e] [Ku] ra pi’ e yafos ko dowef [rodad] nra yim’, mra pi’ u daken fare Kan ni Thothup rok ni bay u fithik’[dad].”1
Ningan faseg ba yip fan ni ngan fas bayay. Woed rogon Kristus ba faseg e dowdad ko yam’ udakaen fare gelngin Fas ko Yam’ Rok, rayog Ninge fasegdaed, fa pii’ e yafas ngodaded bayay tomuren e yam’ ko ya’el.2 U dakaen fare babyor ku Moses, gadadba bi’yeg ni Adam ke thapeg biney e faseg: Adam ke tawfe, ma ke yib fare Ya’el rok Got ngadakaen, ma kan gargelen bayay ko Ya’el, ma ke faseg fare mo’on ulaniyaen’.”3
Marib gaa’ puluwon e ta’awth ney nibe yib ngak e gidii’ nibe michaen’daed ngak Yesus Kristus. Fare taw’ath nem ni’ir fare Kan ni Thothup ni nge pii’ fare nem ni kanoeg ulan fare Bin Be’ech e M’ag “yafas u Kristus.”4 Gadad ba pii’ ni dariy’ fan?
Walageg nib mo’on nge ppin, i’ir e taw’ath nib gaa’ ni ngad “thapeg … fare Kan ni Thothup ninge powiy’nogdaed,”5 ni woed rogon ni kan dag ko tiney nike buch.
Nap’an fare Mael ko Korea, Ensign Frank Blair ke salthaw u barko ko troop transport ulane Japan.6 Fare barko ke chigchig ma dariy’ e tiyugang’ ni chaplain nga dakaen, ere fare captain ke fith ngak Brother Blair ni nge mang fare chaplain ko barko, ni ke guy fare mo’on i’ir e bee’ nib michaen’ nge fel’ rogon, nibe thapeg e liyoer ko gidii’ ko barko.
Ensign Blair ke yoloey: “Ke yib e yoko’ nib gaa’ nga barko roamad. Bayi n’ew u maday nib bay 45 feet [14 m] u tolang. Kug pos nag … nap’an e ningyal’ ke ta’leg ta’areb ko delip e engine roamed ma ke taer u radan e barko. Bayi la’agruw e engine roamed nibe fel’ rogon, machane ta’areb ke girngiy ko balay’ e gimig. Marib kireb e magawon roamad.”
Ensign Blair ke mu’ e posnag rok me sul nga bet nap’an fare captain ke tugtuguy maab rok. Ke fith, “Wenig ngom ni ngam meybil ko barko ney?” Arragon, Ensign Blair ke yoeg ni nge rrin’.
U ningyal’ nem, Ensign Blair rayog ni nge yoeg, “Chitamangdaed nu Tharmiy, wenig ngom ningam taw’ath nag re barko ney mu thapmaed,” ma sul nga bet rok. Machane, ke meybil ni nge nang e tin rayag ni nge rrin’ u ningyal’ nem ni nge ayuweg fare barko ni nge gapas. E fulweg ko meybil rok Brother Blair, ke yoeg fare Kan Thothup ngak ni nge yaen nga tafen e bridge, non ngak fare captain, nge fil mornga’agen fare magawon. Nap’an ke rrin, ke fil ni fare captain ba gay rogon ni nge nang e speed ko la’agruwi engine nem ko barko. Ensign Blair ke sulweg nga singil rok me meybil bayay.
Ke meybil, “Mang rayag ni ngu rrin’ ni ngu ayuweg e magawon ko gali engine ney?”
U fulweg, fare Kan ni Thothup ke yoeg thingar ni nge yaen ulongob e barko ma guy ninge thapeg e nang fan. Ke sul ngak fare captain me fith ko mat’awon ninge yaen ulongob fare deck. Me yibi buch, ni ke pethpeth e gaf nib el ko peeyoy rok, ke yaen nga wuru’ ko yoko’.
Ke sak’iy u stern, ma ke guy gali propeller nib gaa’ nap’an kar chuwgow ko raen nap’an fare barko ke yaen ko n’ew u maday. Kemus ta’areb ke muruweliy nib fel’ rogon, ma ke chelchel rib papay. Tomuren ke guy, Ensign Blair ke meybil bayay. E fulweg ke yib ngak ni fare engine nib fel’ ni ke muruweliy nib gel ma thingar ningar sasigal. Ere ke sulweg ngak fare captain me yoeg fare milwol ngak. Fare captain ke tamra’, me yoeg fare engineer ko barko ke yoeg nib thil—thingar ningar papayniged fare engine nib fel’ ningar chuweg ko yoko’. Machane, fare Cpatain ke me’leg ninge motoyil ko Ensign Blair make sasigal’ fare engine. Nap’an ke yib kakadabul, fare barko ke yaen ufithik e maday nib gapas.
Tomuren l’agruw e awa, ke kireb fare engine nib fel’. Ko fare engine ni balay e gimig rok, fare barko ke yaen nga nam.
Fare captain ke yoeg ngak Ensign Blair, “Fa’an dadkum sasaga’al fare engine nap’an kug rrin’ed, ngad malogaed u yoko’ nem.”
Fa’an dariy’ e engine, dabiyoeg ningar tawreg nga bang. Fare barko ra thig, magayel’ u maday. Fare captain ke pinning e magaer ngak fare LDS officer ni fel’ yangren me yoeg ir ba lemnag e mafol ko fapi thamtham e ya’el rok Ensign Blair ke thapeg fare barko me thapeg e crew riy’.
Arragon e chepin ney e ba ma’ang’ang. Ma boech e ningyal’ nira yib e ban’en nib almarin ngodaed, Chepin ney ra pii’ e fanow urrogon ningad thapeg fare Ya’el ni gubin yal’
Bin Somm’on, mornga’agen e thogthog, thingar ningad fi’legdaed ningad thapeg milwol ku tharmiy. Ensign Blair ke paer nib machaelboeg ma ke michaen’. Fa’an dabke fol, dabiyoeg ni nge thapeg e nangfan ko ya’el ni nge meybil woed rogon ke rrin’ ni nge matangiy fare barko ma thapeg e fanow nib riyul’. Thingar ningad gayed a rayog rodad ningad fi’leged e yafos rodad ninge folgaed fapi motochiyel rok Got ninge pii’ e fanow ngodaed.
Boech e ningyal’ dabiyoeg ni ngad runga’ged e signal ku tharmiy bachane dad mat’awgaed. Kalgnaen’ nge mafol e pin’en nib t’uf ningad thapeged e milwol nib machaelboeg bayay. Fare thin ulan fare Bin Kakrom e M’ag ko kalngaen’ ba yib fan “chel” fa “chel u but’.”7 Nap’an ngad thamiyed kum palog ko Got, thingari me’leg ni ngam chel ko denen, mu chel u but ngam sak’iy u powchen Tathapeg, mu piry’eg ni Irba soen ni fanam, Irba pii’ paa’ rok ngom. Irba’adag ninge powiy’nigem, kemus ta’areb e meybil nib t’uf ningam thapeg re powiy’nem bayay.8
Bin L’agruw, Ensign Blair dab ke fith ngak Somoel ninge fel’ rogon e magawon rok. Machane ke fith mange ninge rrin’ ninge ayuweg e fel’ rogon. Nap’an ngad sabethin ngak Somoel, sana ngad fithed ni ta’abrogon, “Mange thingar ni ngu rrin’ ni ngu ayuweg fare magawon?” Nap’an ngad meybilgaed gadadba yoeg urngin e magawon rodad me fith ngak Somoel ninge fel’ rogon ni ngad lemnigedmornga’agen e tin nib t’uf romaed ma tomuren lemniged, e rogon ningad meybil gaed ni ngad pinninged ayuw ko Somoel ko magawon nem, ngad fi’leged laniyaen’daed ningad ngongoliyed ko fanow rok Ya’el.
Bin e delip e mafil ko re chep ku Blair ney. Ngay yoeg ni nge meybil ufithik e gapas Elder Blair fa’an dabke thapeg e ayuw ko Ya’el u reb e ningyal’ u somm’on? Wub ko e yoko’ ni’ir e ningyal’ nib kireb ningam tabab ningam thapeg fare taw’ath ko fare Kan Thothup bayay ma lem nag urrogon ningam ngongoliy riy’. Fare naval officer nib fel’ yangren ney ma fol a yalen ni ke ngongoliy bo’or e yay u somm’on, e yalen ke fil nap’an ke full-time missionary. Thingar ni ngad pinninged fare Kan Thothup ni nge powiy’ nogdaed nga maday nib gapas, ni ngad nanged lam Rok ufithik e yoko’ nib almarin.
Boech e gidii’ ba lem nag we ni dad lem niged nima yib e powiy’ ko Ya’el urngin e rran bachane [Got] dab ke motochiyel nagdaed ko urngin e ban’en,” ninge yoeg ningad manged tapigpig nib malmal.9 Fare guruy ney, machane, kan pii’ ngak boech e missionary ni ba’adag ni ngar thapeged e thogthog ko Joseph Smith ni ngar nang e gi ko milekag roraed. Ulan fare guruy u somm’on, gadad ra biy’eg e yang nib gaa’fan. Ba ga’ar Somoel ni ngar baed nga binaw ney nap’an “ngar mo’olung gaed ngak Somoel.”10
Pi missionary ney ba’adag ngak profet ni nge fith Got urrogon ningar milekag raed ko gi ko mission roraed. Dawur filed thingar ni ngar filed ngak Somoel u rograed ko pin’nem. Nge Somoel ke yoeg e rograed ni biney e kanog e: malmal ngay. Pi chongin e Galasia u somm’on kar falflaen’gaed ni bay e profet nib riyul’ roraed machane boech e ningyal’ kar oloboech gaed bachan dar fil’ed urrogon ni ngar thapeged e thogthog ni fan raed. Yang nib gaa’fan ko gelbugwaen ko ya’el ningan motoyil ngak lam Somoel udakaen e Ya’el Rok.
Alma ke pii’ e fanow ngak pi bitir nib pagael ni ngar “ngam mogow gaed puruy’ ngak’ Somoel u gubin fithik’ gubin e pin’en ni gama rin’.”11Ningad paer u amrogon—ni kanoeg e “paer ko Ya’el”—i’ir e taw’ath nib gaa’. Nima yoeg e thamtham nib gapas nge fel’ laniyaen’ ma urngin e wompngin ko Ya’el, wompngin woed rogon e t’ufeg, falflaen’, nge gapas.12
Birok Ensign ku Blair ni nge thapeg fare Kan Thothup ni nge mang powiy’ Rok ma yoeg e matangiy ngak nge reb e salthaw nap’an e yoko’ nib almarin. Bayi reb e mit yoko’ nib almarin daba’. Fare fanathin u lane fare Babyor ku Mormon ko fare gak’iy ko yafas13 be dag e ya’an nib gaa’ nibe weliy’ urrong ni ngad matangiyed daed ko ya’el ulane fayleng ney. Fare lik’ay ney ba weliy’ bayi chuwo’ ko lumor nibe yib ninge gathaynog e ya’el ko chongin e Galasia nibe milekag ko fare kanawo’ nibe soer ngak Got.14
Nap’an gube lemnag ko ya’an nem, Gube lemnag ni bay ulungi gidii’ nib gaa’ ni yaedba milekag ko kanawo’, boechi gidii’ ba koeled nib gel ko fare layi wasey, machane boech e gidii’ ba sasigal mar folgaed e gidii’ u somm’on. Bin la’agurw e rogon dani t’uf e gay rogon nib gel fa lowaen’. Rayog ningam lemnag ngam rrin’ ta’ab e ban’en nibe lemang ma rrin’ e gidii’. Ra muruweliy’ nib fel’rogon nap’an e rran nib fel’. Machane nima yib e yoko’ nib baen nge chuwo’ ko tin baen ra yoeg u gubin yal’. Nap’an e ningyal’ ney, fa’an kum motoyil ngak fare lam rok Kan Thothup nira thilyeg e yafas fa yam’ ko ya’el.
Nephi ke yoeg e micheg nib gaa’ ni “pi’in ra motoyil ko thin rok’ Got, mar … chech’eyed pa’araed riy … e dabra m’aed; ma ku dabiyog ni nge yib e pi lumel nge sabaenbaen rok’ mo’oniyan’ i ma’ew nagraed, me wawliyraed iyaen ko gafgow.”15
E lek ko pi gidii’ u somm’on ko kanawo’ dabki mugu’uliy. Dabiyoeg ni ngad rrin’ed fa lemniged e tin nib rrin’ed fa lemniged reb e gidii’; thingar ni ngad tayed paa’dad ko fare layi nib wasey. Ninge yoeg ningad dared ngak Somoel ufithik e gelbugwaen nib sobutaen’, ni ngad nanged fan ni Ir ‘ra powiy’daed ma fulweg pi meybil rodad.”16 Udakaen e fithingan ku Yesus Kristus, amen.