Fare Gum’ircha’en e Profet
Rayag ningad falflaen’gaed ni fan ngak bee’ nibe gagyeg nag e thin rok Somoel nge muruwel rok Somoel ningan rrin’ u rrogon ni Ir ni ba’adag ningan mugu’ily.
Kug meybil nib yul’yul’ ninge yib fare Kan ni Thothup ngodad e daba’ ko nap’an e re mu’ulung ney nib thothup. Fatin kug guyed e ba ma’ang’ang nap’an fa bin 17th e profet ko mfen ney kan yarmiy nap’an e mu’ulung nib liyoer.
Nap’an kug pinning e powiy’ ningu nang e fan ko welthin rok ni ba’adag Somoel ninge pii’ daba’, kug lemnag mornga’agen e sabethin romow ko fare bin Somm’on e Presidency nib be’ech. Nap’an e sabethin romow, reb e counselor e ke yoeg e thin: “Gube athapeg ni urngin e chongin ko Galasia rayog ningar nanged fan e tin gaa’fan ni ke buch ni pinning e profet nib be’ech, President Russell M. Nelson, nge tin gaa’fan mab thothup ko mu’ulung nib liyoer nira buch nap’an e general mu’ulung. Ke yoeg, “Ke yaen 10 e duw, nge bo’or e gidii’, arragon e gidii’ ni fel’ yangren ko Galasia, dar pugurraengaed fa daworiy nanged riy.”
Ke pinning e pugurran ngog ko bi Rog. Fa bin somm’on e profet e rayog ningu pugurran i’ir e President David O. McKay. 14 e duw rog nap’an ke yim’. Gube pugurran e thamtham ko tawreng nap’an ke yim’ ma map luwan e nina rog. Gube pugurran ni kug oeg e thin “Wenig ningam taw’athnog President David O. McKay” nap’an e meybil rog ni dabkug lemnog riy’, arragon tomuren ke yim’. Guba yoeg fapi thin nem urngin e ngiyal’. Kug lemnog fa’an e tafnay nge gum’ircha’eg ra thamiy ni ta’abrogon ngak fapi profet nira yib ni bin magid. Machane woed rogon e galabthir nibe t’ufeg ngak urngin e bitir roraed, Kug peri’eg e t’ufeg ngak, nge tha’ ngak, nge m’ag ngak President Joseph Fielding Smith, ni ke yib u tomuren President McKay, nge ko urngin e profet ni ke yib u tomuren: Harold B. Lee, Spencer W. Kimball, Ezra Taft Benson, Howard W. Hunter, Gordon B. Hinckley, Thomas S. Monson, ma daba’ President Russell M. Nelson. Gube sustain nagraed ni gubin paa’ag ni gube tining ngalang—nge gum’ircha’eg nib yul’yul’.
Nap’an urngin e profet nib t’uf rodad kar m’aed, nib fel’ ningad thamiyed e gafgow ngad kirebaen’gaed. Machane e kirebaen’daed ma un e falflaen’daed nge athapeg rogad nima yib nap’an ngad guyed reb e taw’ath nib gaa’ ko Fulweg: e pinning nge yibliynag e profet nib fos u fayleng.
Aramfan, Gura non mornga’agen e yarmiy nib thothup nem ko fa bin 90 e rran ni ke buch. Gura weliy’ u aningeg i yang: bin somm’on, e yam’ ko profet nib t’uf rodad nge thang ko Bin Somm’on e Presidency; bin l’agruw, ngiyal’ ningan soen ko yarmiy ko fare Bin Somm’on e Presidency bayay; bin delip, e pinning ko profet nib be’ech nge bin Somm’on e Presidency; nge bin aningeg, e yibliynag ko profet nib be’ech nge bin Somm’on e Presidency nap’an e mu’ulung nib liyoer.
Yam’ ko Prophet
Nap’an e January 2, 2018, e profet nib t’uf rodad Thomas S. Monson ke chuw ma ke yaen nga bin barba’ e veil. Ngad pugurraengad u gum’ircha’endaed ko manemus. Thin ni ke pii’ President Henry B. Eyring nap’an e yam’ ko President Monson be un e thamtham rodad: “Fatin gaa’ ko yafos rok, woed rogon en Tathapeg, ni’ir e laniyaen’ ninge ayuweg e gidii’ nib gafgow, m’ar—ma urngin e gidii’—ulonob e fayleng.”1
President Spencer W. Kimball ke weliy:
“Nap’an e t’uf be chuweg ko lanelang, ra yib reb ninge fek loen, nge yam’ nirayoeg e yafas.
Fare muruwel rok Somoel e darmamus. Nap’an ra yim’ e tiyugang’ nib gaa’, dariy’ e ningyal’ nap’an dariy e powiy’ ko Galasia, u dakaen Bee’ ni ke yarmiy e gil’lungun ninge athamgiliy nge yaen ko manemus. Woed rogon ke buch u somm’on … u m’on ko tiney erran, gidii’ kar upnguyed e kahol ko yam’, fel’ rogon e yoer, mar sapgaed ko gabul.”2
Ngiyal’ u Thlin e Apostle
Fare ngiyal’ u thilin e yam’ ko profet nge yarmiy bayay ko fare bin Somm’on e Presidency ni kanoeg “Ngiyal’ u thilin e Apostle.” Nap’an e ngiyal’ ney, fare Ulungi Ragag nge L’agruw i, utangin e gagyeg ko fare president ko fare ulung, fanayed fapi key ningar gagyegnag e pow’iy ko Galasia, President Joseph F. Smith ke fil, “Bay e tiyugang’ ko Galasia ni gubin e ningyal’, ma fa’anra e Presidency ko Galasia ran chuweg fa rm’aed fa reb e ban’en, fare bin migid e tiyugang’ ko Galasia ni fapi Ragag nge L’agruw i Apostle, mada’ ko ngiyal’ ninge yarmiy e presidency bayay.”3
Fabin e ngiyal’ u thilin e apostle ni ke buch nap’an President Monson ke yim’ ko January 2 ma ke mu’ 12 e rran u tomur nap’an e Madnom, January 14, 2018. Nap’an fare rran ni Madnom nem, fare Ulung i Ragag nga L’agruw kar mu’ulungad ulan fapi singil nib tolang ko Salt Lake Temple kar balaynag e abich roraed mar meybilgaed, utangin e gagyeg ko President Russell M. Nelson, fa bin ilal’ e Apostle nge Presdient ko fare Ulung i Ragag nga L’agruw.
Pinning e Profet nib Be’ech
Nap’an fare mu’ulung nib thothup nem ni daki yoeg ninge pagtalin, tomuren e yalen nib kakrom u fithik e ta’abraed, fapi Walagen kar paered nga chiya’ urogon e bin ilal’ u 13 e chiya’ mar tayed paa’raed ngalang ningar yibliynag e yarmiy ko fare bin Somm’on e Presidency mar yibliynag President Russell Marion Nelson ni’ir fare President ko Fare Galasia ku Yesus Kristus ni fan e Gidii’en Got ko Tin Tomur e Rran. Tomuren e yibliynag fare Ulung i Ragag nga L’agruw kar mukungaed u ta’abang ni liyeg mar tayed paa’raed nga loelgen Presdient Nelson ningar yiblinag ma kii’egraed, fa bin magind ilal’ e Apostle ke ngongoliy lam.
Nge mu’ President Nelson ke me’leg gali counselor rok, President Dallin Harris Oaks, President Henry Bennion Eyring, make President Oaks ninge mang e President ko fare Ulungi Ragag nge La’agruwi Apostle ma President Melvin Russell Ballard ninge mang President nibe Gagyeg fare Ulung i Ragag nga L’agruw i Apostle. Aram e gaa’fan mab thothup e ban’en, nike yip fare Ya’el. Gube pii’ e m’ag nib polo’ rog ni fare laniyaen’ Somoel, nu kug pinninged u dakaen e meybil, ni ke yib nap’an e ngongol nge pinn’em ko rran nem.
Udakaen e yiblinag ko President Nelson nge yarmiy bayay ko fare bin Somm’on e Presidency, ke mu’ fare ngiyal’ u thilin e apostle, me yibi buch, fare Bin Somm’on e Presidency nib be’ech ke tabab ninge ngongoliy, ni rib fel’ rogon, ni dariy e ta’leg ko ta’a’reb e second ninge gagyegnag e gil’lungun Somoel u fayleng.
Mu’ulung ko Tayfan
Biney e kakadabul, e yalen nib thothup ni ke yaen nga tomur u rogon e chiylen ko babyor nib thothup ulane fare Doctrine nge Covenants: “Ni nge rrin’ urngin e ban’en nib fel’ rogon, nge udakaen e laniyaen’ e gidii’ ko galasia, ma udakaen e meybil ko mich,”4 ma “delip e High Priest niyaedba Gagyeg, … yibliynagraed udkaen e fel’ laniyaen’raed, michaen’raed, nge meybil ni fan e gidii’ ko galasia, ningar yarmiyed e mu’ulung ko fare bin Somm’on e Presidency.”5
Elder David B. Haight ke weliy fatin ni ke buch ngomaed nap’an fare rran nem:
“Gadad e mich ni m’ag ningad uned ko biney e rran nib thothup—mu’ulung ko tayfan ningad ngongoliyed e tin ku tharmiy. Woed rogon e ngiyal’ ko kakrom, bay yo’or e balaynag abuch nge meybil ni kan pii’ Gidii’en Got ulongob e fayleng ninge yoeg ningad thapeged e pu’oeg ko Ya’el rok Somoel, ni bay bo’or e pow riy … nap’an e mu’ulung biney e kakadabul.
“E mu’ulung nib tayfan, woed rogon e fithinang, bay yip fan e ningyal’ nib thothup, m’ingaen’, nge liyoer nap’a e Gidii’en Got ba mukun’gaed utangin e gagyeg ko fare Bin Somm’on e Presidency.”6
Pi walageg, rayog ningad falflaen’gaed—ngad tolulgaed, “Hosanna!”— ni fan e bee’ nibe gagyeg e thin ko Somoel, nge muruwel rok Somoel ningan rrin’ u rrogon ni Ir ba’adag ningan mugu’ily.
President Russell M. Nelson
Biney e yalen u tharmiy ma yaen ngak reb e profet ni kan pinning tharmiy ngay. Woed rogon President Monson i’ir e bee’ nib gaa’ ni ke yib nga fayleng, President Nelson e ba ta’abrogon. Ke taermedliy nib almaring ma ke fil ko Somoel ninge powiy’daed u tiney erran. I’ir e taw’ath nib gaa’ ninge yib President Russell M. Nelson ninge mang e profet nib t’uf rodad—fa bin 17th e Profet ko fare Galasia nap’an fare bin tomur e mfen.
President Nelson i’ir e mo’on nibe gel bugwaen. Bayi taw’ath rog ningu pigpignag fare Ulung i Ragag ni’ir e president ko ulung rog ko l’agruw e duw. Kug milekagow u ta’abang ma kug falflaen’ ni fan e gelngin, e bee’ thingar ninge mil nib papay ninge fol ngak! U numpngin, ke yaen nga 133 e nam nap’an e yafos rok.
Ke kii’ paa’angin ngak urngin e gidii’, ba fel’ yangren nge titaw. Ni woed rogon Irma nang urngin e gidii’ ma salap rok ninge pugurran e fithingan. Urngin e gidii’ ni yaedma nang ba lemnoged ni yaed e bin ragba’adag rok. Ni woed rogdad—bachan e t’ufeg nib riyul’ nge murus ngak e gidii’.
Tha’ rog ngak President Nelson ni ke buch udakaen e muruwel ko galasia, machane Kug fil mornga’agen e muruwel ko President Nelson u m’on ke mang General Authority. Boechi gamedmanang, President Nelson nib togta nib gaa’ ko gum’ircha’ ma nap’an, e ningyal’ ko muruwel rok ko togta, ke fi’leg e machine ni fan e gum’racha’ nge add. Boech e ban’en ni kan fi’leg ni ke yib u dakaen e laniyaen’raed nge pa’angin President Nelson nge gidii’ rok. Ke muruwel ko ulung ni togta ni kar ngongoliyed e bin somm’on e operation ninge bing e gum’racha’ ku be’, ko 1951 ni kar ngongoliyed e machine ko gum’ircha’ nge add. President Nelson e ngongliy gumir’achen President Spencer W. Kimball ni de n’uw nap’en u m’on nin pining President Kimball ninge mang profet.
Arragon, e pinning ko President Nelson ninge mange e Ragag nga L’agruw 34 e duw u faram ke ta’leg e muruwel ko togta ninge golnag ma fi’leg e gum’ircha’, ma ke tabab e machib ko Apostle ninge golnag ma fi’leg e gum’ircha’ ko ragag ni biyu’ e gidii’ ulongob e fayleng, ni ke chibiyraed me golnag u dakaen e thin nge ngongol ko gonop, pigpig, nge t’ufeg.
Ba Gum’ircha’ Ni Woed Kristus
Nap’an Gube leamnag mornga’agen e gum’ircha’ ko Kristus, Gube leamnag mornga’agen President Nelson. Dabkug mada’nag reb e cha’ nibe dag e fare’nem ni woed rogon. I’ir e taw’ath rog nib fel’ ningu fil mornga’agen e gum’ircha’ ku Kristus rok President Nelson.
Tomuren boech e wik ni kug un fare Ragag nga L’agruw u October 2015, Kug guy e muruwel nib fel’ ko President Nelson. Ke pinningeg ningu un e madnom nap’an ke thapeg e Cardiothoracic Surgery Award. Nap’an kug gub ngaram, Kug falflaen’ ningu guy bo’or e togta kar baed ningar pinning e liyoer ngak mar oged e thin nib fel’ ko President Nelson ni fan bo’or e duw nap’an i’ir e togta nge surgeon.
Nap’an fare nep nem, bo’or e gidii’ nib salap kar pinning e tayfan nge magaer ngak President Nelson ni fan e tirok ko togta. Arragon marib fel’ urngin e welthin ko gidii’ mornga’agen e tirok President Nelson, Machane kug balyangaen’ ko sabethin Rog ko ba mo’on ni ke paer nga chiya’ u to’obeg. Dabke nang fithingag, machane irmanang President Nelson ko Dr. Nelson, nap’an ke gagyegnag e thoracis surgery residency program ko skuul ko togta u 1955.
Cha’nem i’ir e student ko President Nelson. Ke yoeg boech e chepin. Ke weliy e rogon ninge gagyegnag e fil President Nelson, ni, ke yoeg, ma pinning e murus ko e gidii’. Ke weliy’ e rogon ko mafil ko e resident ko surgery e gum’racha’ ninge rrin’ ulane tafen e operation. Aram, boech e resident ra guy mar ngongoliyed utangin e gagyeg ko sensei, ni’ir e class ko laboratory. Ke yoeg ni fare tafen nem nima yoeg e tin kireb ngay ko tugthin, cham, murus, nge puw e day ko gidii’. Fare mo’on nem ke weliy i’ir e tafen ko fil nib magowen, ma boech e ningyal’ e ba kireb. Aram fan, bo’or e surgeon resident be lemnag e muruwel roraed e ngan kirebnag.
Ke weliy bayi rogon nib thil ni ke gagyegnag President Nelson ulane tafen nem. Bayi tafen nib gapas, dariy e murus, nib tayfan. Fapi resident ra thapeg e tayfan. Machane, tomuren e mafil, Dr. Nelson ba t’uf urngin e rayog roraed pi resident. Fare mo’on nem ke weliy urrogon e golnag nib fel’ ko gidii’ nib m’ar nge bin gaa’ e surgeon kar yib ko class rok Dr. Nelson.
Dabkug balyangaen’ug ko pinn’ey. Kug guy amrogon ma yoeg e taw’ath ngog udakaen e Ulung ko fare Ragag nga L’agruw. Kug thamiy ni woed rogon, ni kug, mang e “resident nima fil rok.”
President Nelson bayi rogon nib gaa’ ninge fil ngak reb e gidii’ me pii’ e chilyen ngoraed urogon nib fel’, tayfan, nge liyoer ngoraed. Irma fol e gum’ircha’en Kristus ma pii’ e fanow ngodad. Udakaen e fanow rok, rayog ningad filed u demturug e rogdad, rayog ningad fi’leged e ngongol nge gum’racha’daed ningad folgaed fapi kenginn e gaspal ku Yesus Kristus.
Chiney bayi taw’ath nib gaa’ rodad ningad yibliynag e profet rodad, President Russell M. Nelson. Nap’an e yafos rok, ke ngongoliy nib fel’ rogon urngin e muruwel rok ko student, chitamang, sensei, figirngiy, togta, tapow’iy ko priesthood, tituw, nge Apostle. Ke mugu’uliy urngin e muruwel rok—ma athamgily chiney ninge rrin’—u dakaen e gum’ircha’ ko profet.
Pi walageg ni mo’on nge bpin, n’en ni kad uned ma kad michegned e dabay, ko biney e ulung ni kadted, e mich riy ni President Russell M. Nelson e ir fare lungun Somoel ngak gubin e gidii’. Ma kugbe micheg nakg Got fare Chitamangiy, rok Yesus Kristus, nge fare murwel rok ni’ir fare Tathapeg nge Bayul rodaed. U dakan fithngan Yesus Kristus, amen.