Fare Profet rok Got
Profet e dar ma par u thilmew fare Tathapeg rom. Machane, ma par u chrem me powi’iy yem ngak fare Tathapeg.
Gube pining Elder Elder Gerrit Gong nge Elder Ulisses Soares ni ngar uned ngak fapi mo’on ko fare Ulung ko Ragag nga L’agruw.
Ko fare sustain ni kad ted ni fan President Russell M. Nelson ni’ir fare profet rok Somoel nge fare President ko Fare Galasia ku Yesus Kristus ni fan ko gidii’en Got rok’ ko Tin Tomur e Rran, ni biney e ulung ni gadad ma’un ngay e ba—mu’ulung ni fan ko liyor. Baga’fan ni bachan e biney e ran e kan dugliy ni kab kafram u nap’an ni yibay u tharmiy. Fare Somoel Yesus Kristus, ni ngongliy fapi murwel Rok, dabay nike yib u dakan President Eyring, e ke dag fare profet Rok, fare tiyugang’ Rok ni ke mel’eg, ngodaed, fapi gidii’ rok nibe fol ko motochiyel, ni be dag ngodaed ni ngad sustain nigeg magdaed leak fapi machib rogk.
Fapi biyu’ i member ni darn ramed u roy ko re Conference Center ney, gu ba’adag ni ngam nang ni fare Thothup rok fare Somoel nibay ulan e ra na’un ney ko ngiyal’ nin sustain nag President Nelson e r woed rogon ni fa’an nra gabay u roy. Machan fare mu’ulung rodaed ni gathi kemus ni uroy ko re Conference Center ney, machane u dakan e fayleng—chapel u Asia, Africa, nga North America; Ulan e pi tabinaew u Luk’ngun yang u South America nga Europe; nga yuyang ko fapi nam nib achig ulan e Pacific. Biney mu’ulung ni demtrug ko gin ni gabay riy u dakan fare naam, ndariy fan ni kemus ni fare phone rom e rayag ni ngam guy riy. Ya pa’daed ni kad tiningyed ngalang e dar thi’eg fare bisof rom, machane kan yoeloy u tharmiy, ni’ir fare motochiyel rom ngak Got ni kan yoeloy ngalan fare babyor ko yafos.
Fare Somoel e ma dugliy e Profet Rok
Mal’eg ko fapi profet e kab rok fare Somoel. Dariy babyoren e compaign riy, fa ngan guy ko mini’ e ba’adag, fan guy e cha’en nib chag, fa cha’en nib mon’og, male’eg e thin, fa to’ogor. K’agag, ma gube micheg gelngin fare tharmiy e de palog e rofen ni yibliy President Nelson ko fare singil nibay ngalang ko fare tempel rok Somoel.
Dariy fan nin yibliy President Nelson ko January, kan dugliy ni nge pigpig ni’ir fare profet rok Somoel e kan dugliy u tharmiy u m’on ni kad bad nga fayleng. Fare thib rok Jeremiah e kube yipfan ngak President Nelson: “Gu mel’egem u m’on ndawor mu sum nga mayal; mu m’on ni ngam gargelegem mu gu duwgliriy ni ngam mang profet ngak e pi nam.”1 Dalip e duw kafram, Elder Nelson, nap’an e 90 e duw rok, ma ir e cha’en nib ga’ nib migid ko bin aningeg e liiw nibay l’agruw ko fare dalip i Apostles nib il’al nib bitir ngak. Fare Somoel, ni’ir e ma gagiyeg nag e yafos nga yam’, a ma mal’eg fapi profet Rok. President Nelson, ni duw rok e 93, e rib fel’ fithik i duw. Gamaed be athapeg ni nge par romaed ni’in e duw fa l’agruw, kemus ni chiney e gamead ba gay rogon ni ngan nog ngak ni dabki yan ko fare ski u Utah nib loglog nga butt’.
Chiney ni gadaed be sap ngak fare profet rok Somoel ni ke dugliy, thingar da nangfaned ni kemus ni Got e ngad ted fan, ni’ir e Chitamangdaed ni bay u Tharmiy, nge fare Fak ni kari mus. Ma kemus nu dakean e ngngol nib mat’aw, nge murnguy rok’ fare Messiah nib Thothup, ni’ir e pii’ e pogofan rok’ ni ngayag ni ngad suled ngak biyay.2
Fan ni Gadaed ma Laek fare Profet
Machane fill Yesus mornga’agen be’ nima pigpig ni pi nge yan. “Ma an nra fekeg nga tabinaw rok ,” Ke ga’ar, “e aram e ku ke fek e en ni loegeg.”3
Fa bin th’abi ga’fan e murwel ko profet rok Somoel e nge fil ngodaed salpen fare Tathapeg me gagiyeg nagdaed ni ngaed suled Ngak.
Bo’or fan rogon ni rayag ni ngad lakead President Russell M. Nelson. Ra ga’ar e gidii’ u fayleng ni yibe yog ni rib fel’ lolgen. Ni woed rogon ni weliy Elder Stevenson, mang togta nap’an nib 22 e duw rok, togta ko gum’richa’, ma reb e gidii’ ni tabab nag e taflay ko gum’ircha’.
Oran e gidii’ ni ra yoeg nib riyul’ be’ nib manmachib, mereb e duw ni’i fil mornga’agen e yafos nge yam’, nibe par darma to’ogor, ni ri woed gachalpen Yesus Kristus, nibe t’ufeg ma be machib nag gubin bitir rok Got ni demtrug ulan fare fayleng, ma ragag e bitir rok, 57 pfak pifak, 117 pfak pfak pifak (fan gi thil e biney e numba ni tomur; ke gargelen reb epifafk pifak pifak fa binem e Wednesday kafram).
Ma pi cha’en ni yaed manang e ra ul’ul ngar ga’ar gaed, “President Nelson e manang e gafgow machane ke par nib yul’yul’ ulan e yafos rok.” Nap’an ni yim’ reb i fak nib bpin ni 37 e duw rok, Emily, me digey e pumo’on rok nga laal i fak nib bitir, mug rung’ag ni ga’ar. “I gag e chitamangin, nib togta, ma ku reb fapi gachalpen Somoel Yesus Kristus, machane ri gup loligeg riy nga butt’ ma kug nangfan, ‘ni gathi murwel rog machane murwel rom.’”4
Ba Matnag ko fare Wulyang
Ndariy fan ni bo’or mornga’agen ni gadad ba’dag, mangfan ni ngaed lakaed President Russell M. Nelson? Mangfan ni gadaed ma laek e profet? Ni bachan fare Somoel Yesus Kristus e ke dugliy ni’ir e nge non ni pa’ Somoel ma mang damit fare wulyang.
Karkasson e ba yoror nib ga’ nibay u France ni’i moy ni kub kakrom i yib. Ba yoror nib tolang ngalang, ni toey fapi gidii’ ni ma matnag e rran nge nep ni yad be sap nag e gidii’ nibe yib ngorad nib to’ogor. Nap’an nra guy fare mo’on nibe matangiy be’ nibe yib, ma lamal nra tolul nibe ta’amagaran e ra ayuweg fapi gidii’ nu Karkasson ko pi tagan ni bayi yib ni dabiyag ni ngar guyed nga owchraed.
Profet e yaed gidii’en fapi tamatnag u pe’ebugul fare wulyang, ni be ayuweg daed ko fapi lumel nib tagan ni dabiyag ni ngad guyed.
Fare Somoel e ga’ar ngak Ezekiel, “nggu tem ni gur e ngam mang damit ni fan ko girdi’ nu Israel; ni gur e bay u mog ngorad e pin’en ni bay [ug] gineangrad riy.”5
Bo’or yay ni gadaed ma weliy nib t’uf ni ngaed laked fare profet, machane mu tafney nag urngin fapi murwel nike tay Somoel nga dakan poen fapi profet Rok: “Fa’an gu ra yog ni bay be’ nib kireb ni bay yim’ … , [ma] da mu ginaeng nge thilyeg pangin nge siyki yim; … ma yam’ nike tay e gu ra tay ni gur e kireb rom.”6
Reb e Mich Riy nib Gaa’
Kad sustain nigead President Nelson ni ku woed rogon ni gadaed ra sustain nag Peter fa Moses ni fa’an gadaed fos ko binem e ngiyal’ roraed. Got e yoeg ngak Moses, “Ya bay gu ayuwegnem ngam welthin, ma bay gog ngom e n’en ni ngamog.”7 Daba’ney e rran, fare Somoel e yoeg ni gadaed ra thapeg e thin ko fapi profet Rok I fithik e mich “ni woed ni nike yib u langan.”8
Biney ab mich ni dabiyag ni ngan guy? Danga’, gathi arogon. Gadaed gubin ma bay rodaed fare thothup ko fare gaspal rok Yesus Kristus ni kan Sulyarman. Ni gadaed ab milfan ngodaed, kad tininged pa’daed ngalang ko re kadbul ney, ni gadaed be ognagiyoeg ni gadaed ra tayfan fare profet rok Somoel ko rogon “ngrayag, mich, nge meybil [s]”9 magdaed lek fapi machib rok. Bay mat’won ni kan pii’ ngodaed chongin Gidii’en Got ni rayog ni ngad thapegned ni President Nelson e riyul’ ni ke dugliy Got. Bpin rog, Kathy, e manang President Nelson ni ke gaman guyey e duw ma manang ni’ir be’ ni de to’ogor, nap’an nin ntay pa’ay nga lolgan ni ngan yibliy, bpin rog e tabab i be’eg fapi tok rok ni gubin ko general conference 34 e duw kafram, nibe meybil ni ngayag ni nge nangfan fapi murwel rok. Gube micheg nag ngom ni ra tamilang ney e ra yib ngom ni fa’an garam gum’ing nigem mag gay rogon.
Mangfan ni gadaed ba gay rogon ni ngaed laked fare thin rok fare profet? Ngak fapi cha’ ni yaed be sap nag fare yafos ni manemus, thin rok fare profet e ra pii’ fare ayuw ko thothup ngodaed ko ngiyal’ nib momaw’.
Gadaed be par u dakan e re fayleng ney nib sug nga laman e gidii’ ni demtrug. Woed e internet, smartphone rodaed, kachido ni bo’ormit, ni gubin ma bay gam’ingin nga dakandaed, ni yad be athapeg ni ngad chuw’iyed e chugum roraed ni ngayag ni ngad boded yad.
Tiney ni machib rok e gidii’ ni demtrug rogon e woed fare thin nib thothup nin tay ta’amagaran ngodaed “ni be fekdad e n’ew i yan,”10 “ma be fekdad e nifeng i yan,”11 ma ke mang ni “nibe thray e murwel ko fayleng’,” ma yad bod ba ley i n’ew u maday nnifeng e be “mithmitheg ma be yannag.”12
Rran fol ko thin rok fare Somoel Yesus Kristus mab t’uf ni ngad motoyil gaed ngak e pi cha’ nike pi’ ngodaed. Laek fare profet e wod ni kan bichiydaed ko gulgul ko rran’ ni rib gel e ulum
Gadaed ba par kob fayleng ni gubin ban’en ma bay fan, l’egl’eg e thin, ngran nangfan, min weliy rogon. Ni yibe fith ko “mangfan?” ni bay fal’ngin ulan e yafos rodaed, ni gadaed ba taga’ ko luwan’ rodaed ni nge mel’eg bukun e n’en ni ngaed mel’eged ulan t’areb e rran.
Fare thin rok Somoel e ma yib ni day ma weliy rogon.13 U m’on ni sum e skul nin fil mornga’agen ni dab mu pirew be’ ni gathi figirngim nge pifak, fare Somoel e yog, “Dab mu pirew be’ ni gathi mabgol rom,” nga “Dab mmoro’ro’.”14 Gadaed manang e tin nib fal’ ban’en, ya bay fare Kan ni Thothup rodaed.
Dabi Gin Owchem Ngay
Thin rok fare profet, nibe non nib ku’ming, ni oran ni ngiyal’ ma woed nibe piningdaed ni ngad thilgaed, ngan kalngan’uy min sul ngak Somoel. Fa’an nra bay ban’en nib t’uf ni ngad thiliyegned, ma dab da son gaed. Ma dabi gin owchdaed ngay ni fa’an fare thib rok fare profet e dar t’areb rogon ko laman e gidii’ ko daba’ ney e rran. Woed, e gidii’ ni bayi mak’rang fa ogthran e thin rok fare profet u tomren nike non. Nap’an ni garam sobut’aen’ nigem mag fol ko fapi machib rok fare profet rok Somoel, ma gube micheg nag ngom fare taw’ath nge gapas nran pi’ ngom.
Dabi gin owchem ngay ni fapi laem rom ab thil ko fapi machib rok fare profet rok Somoel. Iraray e ngiyal’ ni ngan fil, min sobut’aen, magdaed garbug nga butt’. Magdaed yan nga m’on u fithik e mich, michan’ ngak Got, nra taw ko rran riy ma rran thapeg fare langan’ nike yib rok e Chitamangdad ni bay u Tharmiy. Reb e profet e weliy mornga’agen fare t’awath rok fare Tathapeg, “ma laniyaen’ facha’ ni Fak e ra m’ing nga laniyean’ facha’ ni Chitamangiy.”15 Murwel rodaed nifek fapi murwel rok Got, e ir, e somm’on ko rogon nran gel. Mu tay u wan’um ni gumaen’ e bay ko fare babyor rok Somoel ni tha’abi ga’fan.
Boech e gidii’ e ra gay rogon ni nge wergiy fare thin rok fare profet, nibe gay rogon ni nge guy ko mang e be yog nga rogon ni ra uneg e tiro’ e luwan’ ngay.
Nap’an 1982, l’agruw e duw ni kan piningeg ni ngu mang General Authority, me ga’ar Brother Russell M. Nelson, “Dariy bi’id ma kug fith ngog, ‘mang ngiyal’ ma ma non fare profet nibe machib ma ngiyal ni darma machib?’ Tafney rog e, “’Uw rogon mug wod ir?” Maki ul’ul’, “Tafney rog e ngu tal i duwer nag fapi thin rok fare profet mug tay ni kemus ni exclamation point e ngu tay nga’.”16 Iraray rogon be’ nib sobut’aen ni ke yarmiy fare yafos rok. Chiney, 36 e duw nga tomran, I ir fare profet rok Somoel.
Mon’og nag e Mich Rom Ngak fare Tathapeg
Ulan e yafos rog, kug pir’eg ni nap’an ni gura meybil mug fil fapi thin ko profet rok Got, mug gay rogon ni buch’uw ni buch’uw, ni gube gay rogon ni ngu rin’ fapi n’en ni ke machib nag, ma fare mich rog ngak Somoel Yesus Kristus e ma ga’ i yan.17 Ma fa’an gadaed ra mel’eg ni ngad ted e thin rok nga wuru’daed magdaed tafney nag ni gadaed manang gubin ban’en, ma mich rodad e ra gafgow. Gube micheg nag ngom ni ra ga’ fare mich rom ngak fare Tathapeg rom ni fa’an garam laek fare profet, ma fare mich rom ngak fare Tathapeg e ran ga’nag.
Fare Tathapeg e ga’ar, “Gubin fapi profet … ni michan’ ngog.”18
Fare profet e dar ma par u thlim nge fare Tathapeg. Kemus, ni ma sak’iy u chirem me pow’iy kanawo’en ngak fare Thathapeg. Fare bin th’ani ga’ e t’awath ko profet e fare michan’ roraed, luwan’ rok nib piluw, ni Yesus e ir fare Kristus. Ni woed Peter ni kakrom, ni weliy fare profet rodaed, “[I gur] fare Messiah, ni Fak Got gur, ni Got nib fos.”19
Boech nga m’on, ni gadaed ra sap nga tomur ko biney e yafos, ma gadaed ra fal’falan’ ni kad dugliyed ni ngad leaked fare profet nib fos u dakan e fayleng. Ko rofen nem, gadaed ra ga’ar:
Kad motoyil gaed ngak.
Mich u wan’daed ngak.
Kad filed fapi thin rok u fithik e gum’aen nge mich.
Kug meybil gaed nifan ngak.
Ma gamaed bsakiy u charen.
Gum’aen wun’mad ni kug laked ir.
Ba t’uf rodaed.
Gube pi’ ngom e micheg rog ni Yesus e ir fare Kristus, ni’ir fare Bayul nge Tathapeg rodaed, ma President Russell M. Nelson e kan turguy ni’ir e profet u dakan e fayleng. U dakan fithngan Yesus Kristus, amen.