N’en ni Gubin e Pi’in ni Bay e Aaronic Priesthood Rok ma nge Nang Fan

Yib Rok Douglas D. Holmes

Bin Somm’on e Conselor u lane Young Men General Presidency

Aaronic Priesthood rom nikan pi’ ngom e baga’ fan i ayuweg pifaak Got ni nge thapeg gelngin fare bayul rok Kristus.

Pi walageg, gub falfalen’ ni gubay romed u lane re conference ney nikab kakrom. Nap’an ni gub mission president nib bi’ech, ma gub falfalen’ ni taw e bin somm’on e ulungi tamachib nib bi’ech ngomow. Nap’an nike fal’ rogon e pi tamachib nike cheag nag ni ngar mada’eg row, mug tiyan’ug nikar yarmeged e chiya’ ko bitir nikan fal’eg e lulbuy.

“Mangfan e tiney e chiya nib achig?” e Kug fith.

Fapi tamachib, e ri fulweged, ni ri ga’ar gaed, “Fane bin bi’ech e tamachib.”

Mich u wun’ug ni rogon ni gadaed ma guy e gidii’ ma but ko rograed nge n’en ni yad ra mang.¹ Tamachib romaed nib bi’ech e paer nga dakean e chiya nib ga’ e roffen nem.

Boech ngiyal’, ma guba rus nag, ni gadaed ma pi’ e chiya ko bitir ko pagael ni fal’ yangren rodaed ko fare Aaronic Priesthood ni ngar pired nga dakean ko bin ni ngan ayuweg raed ni ngar guyed nike pi’ Got e pagan’ rok ngored nib thothup nge ba murwel nib ga’fan ni ngar rrin’ed.

President Thomas S. Monson e yoeg ngodaed ni pagael ni fal’ yangren e ba t’uf ni ngar nagged fan ko “mang e … be yup fan ni ngan koel e priesthood rok Got. Ba t’uf ni ngan gagiyeg nag raed ko tin thothup ko calling roraed nikan pi’ ngoraed.”²

Daba’, e gube meybil ni ra gagyeg nag fare Kan ni Thothup ni ngad nanged fan boech gelngin nge thothup ko fare Aaronic Priesthood me ayuweg daed ni ngad tiyan’ daed ngad athamgil gaed ko pi murwel rodaed ko priesthood.

Elder Dale G. Renlund e fil ni fan fare priesthood e ngan pi’ ko pifaak Got kanawo’en raed ko fare gelngin e bayul rok Yesus Kristus.³ Ra ngan thapeg gelngin fare bayul rok Kristus nga lane yafas roadaed, ma ngarin michan’ gaed Ngak, man kalngan’ dad ko denen rodaed, ni fal’eg man fol ko pi m’ag u dakean e pi gam’ing, man thapeg fare Kan ni Thothup.⁴ Pinn’ey e gathi ban’en ni gadaed be rrin’ ni ta’areb; machane, be muruwel u ta’abang, ni nge ayuweg ney nge paer ni yibe “yan ngak Kristus, man ma’ang’ang Rok.”⁵

Ere, mange muruwel ko fare Aaronic Priesthood ko biney? Urogon ni nge ayuweg daed ni ngad thapeged fare gelngin e bayul rok Kristus? Mich u wun’ug ni fulweg riy e bay u lan fapi kiy nibay ko Aaronic Priesthood—fapi kiy ko pi angel nib ta machib nge fare gospel.⁶

Fapi Machib ko pi Angel

Tabab gaed ko pi angel nib ta machib. Um’on ni rayog nige yag e mich ngak e pifaak Got ngak Yesus Kristus, mab t’uf ni ngar nanged mornga’agen man fil fare gospel Rok ngoraed. Rogon ni yog Apostle Paul:

“Mra di’in me michan’rad ni fa’anra dawor rrung’aged e thin rok? mra di’in miyad rung’ag ni fa’anra danir machib nag e thin rok?

“Mra di’in min machib nag e thin rok ni fa’anra dab nol’oeg? …

“Thin rok Got ni yib e machib nag yibe rung’ag e be yagnag e michan’ ngak e girdi’, ma re thin rok Got nem e aram murung’agen Kristus ni yibe machibnag.”⁷

Tabolngin, me Got e “lʼoeg e pi angel ni ngar machib niged e gidiiʼ, ni ngar daged … fare wub rokʼ Kristus.”⁸ Pi angel e gidii’ u tharmiy ni yaed be ma’afeg e thin rok Got.⁹ U Hebrew nge Greek, ma re buguthin ni angel “ta mo’log” ngay.”¹⁰

Ta’aborogon ni pi angel e pi ta ma’af thin nibay mat’won raed nike pi’ Got ni nge yoeg e thin Rok man pi’ e mich, gadaed ni bay e Aaronic Priesthood rodaed e kan yibliy daed ni ngad “machib gaed, ma gadaed pining gubin e gidii’ ni ngeb ngak Kristus.”¹¹ Fare gospel ni yibe machib nag e murwel ko priesthood. Ma gelngin e re murwel ney e gathi kemus ni fan ko profet fa kemus ni fan ko tamachib. Fan ngom!¹²

Ere urogon ni ngad thapeged gelngin e biney? Urogon ni ba deacon nib 12 e duw rok—fa bagdad—ni nge pi’ e mich ngak Kristus nga lan gumircha’en pifaak Got? Gadaed be tabab i cha’ariy e thin Rok ya nge paer gelngin u fithik daed.¹³ Ke micheg ni fa’anra gadaed ra rrin’, ma bay “gelngin Got ni nge ayuweg e gidii’” rodaed.”¹⁴ Ba kanawo’ ni ngan machib u lane mo’olung fa tabinaew ni yibe yan ni guy. Rayog ni ban’en ni ri dani ga’, ni boed e fagar ni yibe sabathin fa chongin e tabinaew. Fa’anra fal’ rogdaed, u lan reb e pin’ney, ma rayog ni ngad machib niged fare gospel ko rogon nima rrin’ e angel: u dakean gelngin fare Kan ni Thothup.¹⁵

Kafin gu rung’ag mornga’agen Jacob, ba Aaronic Priesthood u Papua New Guinea, ni micheg mornga’agen gelngin fare Babyor ku Mormon nge rogon nike ayuweg ni nge gel ko kireb me fol ko fare Kan Nthothup. Fapi thin rok e be gel nag e mich rog nge mich rok boech e gidii’. Mich rog e ke gel nap’an ni gu rung’ag e pi’in nibe koel fare Aaronic Priesthoos nibe machib ma yibe micheg u fithik e sobutan’ u lane pi mo’olung roraed.

Gimed e pagael ni fal’ yangren, gimed e pi ma’afthin nibay mat’won med. Dakean e thin rom nge mithmith rom, ma rayog ngam fek e mich ngak Kristus nga gumircha’en pifaak Got.¹⁶ Rogon nike yoeg President Russell M. Nelson ni ga’ar, “Yaed ma gimed ra mang e angel nib tamachib.”¹⁷

Fare Gospel nibe Fal’eg Rogoy

Mich nibe gel ngak Kristus e gubin ngiyal’ ma gagyeg nigey ni ngan adag ni ngan thil fa ngan kalngan’uy.¹⁸ Ere be magayal ni fare kiy ko pi angel nima machib e bay fare kiy riy ko fare gospel, “fare gospel ko kalngan’uy nge tawfe, nge bi’ech ko denen.”¹⁹

Nap’an ni gara fil mornga’agen e muruwel ko Aaronic Priesthood, ma gara guy nib tamilang ni ngam pining e gidii’ ni ngan kalngan’ man mangil.²⁰ Gathi be yoeg e binem ni ngam sak’iy u to’ben e kanawo’ ni gabbe tolul ni gabe ga’ar, “Kalngan’um!” baga ni, ngad kalngan’ gaed, ma gadaed n’ag fan e kireb rok bee’, ma nap’an ni gadaed be machib ngak boech e gidii’, ma gadaed be pi’ e athap nge gapas nima pi’ e kalngan’uy—ni bachan nike buch rodaed.

Kug un ko pi’in nibay e Aaronic Priesthood roraed nap’an ni ri guyed e gidii’ u lane ulung. Kug guy rogon nibe munguy nag e t’ufeg roraed gumircha’ey ma be ayuweg walagraed ngar thamiyed e t’ufeg rok Got. Kug rung’ag mornga’agen ba mo’on ni fal’ yangren ni yoeg e mich rok ngak e tafagar rok ni mornga’agen gelngin e kalngan’uy. Nap’an ni rrin’, me munguy gumircha’ey, man fal’eg e m’ag, ma kan tharmiy gelngin e gol rok Kristus.

President Gordon B. Hinckley e fil ni ga’ar: “Kalngan’ e ta’areb ban’en. Denen rodaed ni ngan n’ag fan e kureb. Gelngin ni nge buch e biney e kan pir’eg u lane Aaronic Priesthood.”²¹Fapi gam’ing ko Aaronic Priesthood ko tawfe nge sacrament me fal’eg e kalngan’ rodaed.²² President Dallin H. Oaks e weliy ni aray rogon: “Kan noeg ngodaed ni ngad kalngan’ gaed ko denen rodaed man yib ngak Somoel nike m’ing gumircha’en daed nike munguy e ya’el rodaed man feek fare sacrament. … Nap’an ni gadaed ra bi’ech nag e pi m’ag rodaed ko tawfe ni aray rogon, me bi’ech nag Somoel e rogon e tawfe rodaed.”²³

Pi walageg, ba kanawo’ nib thothup ni ngan rrin’ e pi gam’ing nima bi’ech nag e denen ko gumircha’ey nike kalngan’uy u dakean fare gelngin e bayul rok fare Tathapeg.²⁴

Kafin weliy mornga’agen ba priest ngog, ni i magawon ninge weliy mornga’agen, ninge yibliy fare sacrament ni somm’on rok. Nap’an ni rrin’, me yib ba kan thothup nga dakean nib gel nge gidii’. Ta’aboch ko fare mo’olung, me yoeg e mich rok nib ngoch mab tamilang ni mornga’agen gelngin Got nike thamiy nap’an e re gam’ing nem.

U Sydney, Australia, ma aningeg e gidii’ ko fare ulung ko priest e ri tawfe niged e gidii’ ko ba tabinaew ni fithngan raed e Mbuelongo. Reb e chitinngin reb e pi priest ney e yoeg ngog rogon nike buch e ke ayuweg faak. Pi priest ney e ri nanged fan e “Yesus Kristus e ke mel’eg raed.”²⁵

Rogon ni gamanang, ma priest e rayog e chiney ni nge rrin’ e tawfe u lane temple. Pagael ni fakag ni 17 e duw rok e kafini tawfe nigeg ni fan ngak boech e gidii’ romaed ni kakrom. Gomow la’agruw ni kug thamiyew e falfalen’ ni bachane fare Aaronic Priesthoos nge kanawo’ey ni ngan mithmith ni pa’ e thap rok pifaak Got.

Pi pagael ni fal’ yangren, nap’an ni gimed ra athamgil ko murwel romed ko priesthood, ma gimed be un ngak Got u lane muruwel rok “ngan pi’ e yafas nib manemus ngak e gidii’.”²⁶ Pin’en nibe buch ni boed e biney e be gel nag ni ngam adag mag fal’eg rogom ni nge machib nag e kalngan’uy man tawfe nag e gidii’ ni boed e pi tamachib. Kuma fal’eg rogom ko pigpig u lane yafas rom u lane Melchizedek Priesthood.

John nibta Tawfe, Wo’ Rodaed

Gadaed ni be koel e Aaronic Priesthood, e bay mat’won daed nge murwel ni yib tapigpig ni gadaed John nibta Tawfe. John e ni pi’ nib ta ma’af thin ni nge micheg mornga’agen Kristus me pining gubin e gidii’ ni ngan kalngan’ man tawfe—binem, e muruwel ko fapi kiy ko Aaronic Priesthood nikad weliyed mornga’agen. Ke ga’ar John, “I gag e gu be tawfe nagmed ko ran ni nge dag ni kam kolgad ngan’med kam pi’ed keru’med ko denen ni gimed be rin’: ma en ni bayi yib nib u tomureg e ri ka ba ga’ ngog … : bayi tawfe nagmed ko fare Kan Nthothup, nge nifiy.”²⁷

Ere fare Aaronic Priesthood, nibay fapi kiy ko fapi angel ni tamachib nge fare gospel, me fal’eg rogon pifaak Got ni ngan thapeg, fare tawa’ath ko fare Kan ni Thothup, u dakean fare Melchizedek Priesthood, nib tawa’ath ni tha’abi falel’ ni rayog ni ngad thapeged u lane biney e yafas.²⁸

Ba muruwel nib falel’ nike pi’ Got ngak e pi’in nibe koel Aaronic Priesthood!

Ba Pong nge Micheg

Pi galabthir nge pi toygang’ ko priesthood, rayog ni ngam thamiyed nib ga’fan fare thin rok President Monson ninge ayuweg e pagael ni fal’ yangren ni ngar nanged fan “ko mang e be yup fan … ni yibe koel fare priesthood rok Got”?²⁹ Fare Aaronic Priesthood ni yibe nang fan ma yibe rrin’ e muruwel riy e ra ayuweg raed ni ngar manged e pi’in nibe koel fare Melchizedek Priesthood ni yib yul’yul’, tamachib nib cheag, nge pi chitamangiy nge figirngiy nib mat’aw. Dakean e pigpig roraed, ma gathi kemus ni yaed be nang fan ma yaed be thamiy nib riyul’ gelngin fare priesthood, fare mat’woy ni ngan mithmith u dakean fithngan Kristus ni fan ko thap rok pifaak Got.

Pi pagael ni fal’ yangren, bay e muruwel nike pi’ Got ngom ni ngam rrin’.³⁰ Aaronic Priesthood ni gabay riy e baga’ fan ko Pifaak ni ngar thapeged gelngin e bayul rok Kristus. Gube micheg ngom ni nap’an ni gara tay e murwel ney nib thothup nib ga’fan u lane yafas rom, ma gara thamiy gelngin Got ni dani boed kafram. Gara nang fan nem ni gur faak Got, nikan pinngem ko ba muruwel nib thothup ni ngam rrin’ e muruwel Rok. Ma, boed John nibta Tawfe, gara ayuw ngam fal’eg rogon e wo’en Faak nge wub Rok. Pi riyul’ ney e gube micheg u dakean fithngan Yesus Kristus, amen.