Cheppin e Tabinaew nge Murwel ko Temple: Chiyliy nge Gol

Yib rok Elder Dale G. Renlund

Ko fare Ulung ko fare Ragag nge L’agruwi Apostle

Napan ni gadaed ra kunuy e cheppin e tabinaew rodaed man yan ko temple ni pa’ e gidii’ rodaed ni kakrom, me rrin’ Got e pi tawa’ath nike micheg nag ko pi’in nike yim’ nge pi’in ni kab fas.

Tha’ ko tabinaew e rayog ninge mang e magawon fa falfalen’ ni buch rodaed. Oren i gadaed e bay ngiyal’ ni kad tugthin gaed u lane tabinaew rodaed. Binem e ke buch u thilin l’agruw ni’ ko fare Galasia rok Yesus Kristus u lane tiney rran ni kakrom nikan fulweg. Parley nge Orson Pratt e yow walag, nikar unew ko galasia, ma kan yibliy row ni Apostle. Ra bag yow ma ke yan u fithik e sikeng ko mich machane kar gel e mich rorow ko tomur. Yow l’agruw ni kar miligach nigew bukun ban’en nikar pi’ew bukun ban’en ni fan ko n’en nib riyul’.

Napan ni yiba’ u Nauvoo, me wagay rogon e tha’ rorow, kar domomow gow ngorow, u fithik e gidii’ ko 1846. Ke alamrin e togopluw. I yol Parley ngak Orson ni nge fal’eg rogon, machane dani fulweg Orson luman. Me tal Parley, nike leam nag nike paer ni aram rogon ni dabki fel’, nge taw ko ngiyal’ nike non Orson.¹

In e duw nga m’on, ko March 1853, me nang Orson mornga’agen ba murwel ni ngan fal’eg ba babyor ni mornga’agen e gidii’ rok William Pratt, walagen ba Mariken ni kakrom. Me tabab Orson ko yoer “ni boed e bitir” napan ni guy e biney e cheppin e tabinaew nib mangil. I munguy gumircha’en, me leam nag ni nge fal’eg rogon thilin row e walagen.

Yol Orson ngak Parley, “Chiney o walageg, dariy bee’ u fithik e gidii’ rodaed ni kakrom, i Lieu[tenant] William Pratt ni ba adag ni nge gay pigirdi’en ni boed godow. Orson e cha’an somm’on ni nang fan ni Gidii’en Got ko Tin Tomur e Rran e rayog ni ngar gayed mornga’agen cheppin e tabinaew, ya ngeyog ni ngan rrin’ e murwel ni gam’ing ni fan ngoraed. Letter rok e ulul ni ga’ar: “Godow manang ni Got ko pi chitamangin dow e bay pa’ ko biney. … gube wenig ngom ni ngam n’ag fan rog ni danug fulweg lumam. … gube athapeg ni gara n’ag fag.”² Demtrug rogon e mich rorow nib gel, tu’ufeg rogow ko gidii’en row ni kakrom e gol nag row, me gol nag e amith, man gay rogon ni ngan n’ag fan.³

Napan ni ra gagyeg nag dad Got ni ngad rrin’ed ta’ab ban’en, ma baga’ ni bo’or fan nibe rrin’. Cheppin e tabinaew nge murwel ko temple e gathi kemus ni fan ko yam’ machane ma tawa’ath nag e pi’in nib fas. Orson nge Parley, e kea fal’ e puruy’ rorow. Cheppin e tabinaew nge murwel ko temple e ke pi’ gelngin ni ngan gol nag e n’en nib tu’uf ninge gol.

Gadaed u Galasia, e bay e murwel rodaed ni ngad gayed e gidii’ rodaed ni kakrom man fal’eg rogon e cheppin raed. Biney e ba mithmith nima pi’ e athamgil ya pi gam’ing ko thap e rib ga’fan ngak gubin pifaak Got.⁴ Ngad nanged e gidii’ rodaed nike yim’ ni dan thapeg e pi gam’ing ko thap. Rayog ni ngad ngongliyed e pi gam’ing u lane temple, ma pi gidii’ rodaed ni kakrom e rayog ni nge mel’eg ni nge adag fapi gam’ing. Kukun noeg ngodaed ni ngad ayuweged chonggin e ward nge stake ko fithngan e tabinaew roraed.⁵ Rib falel’, ni dakean e cheppin e tabinaew nge murwel ko temple, ma rayog ni ngad ayuw gaed ngan buyluy e yam’.

Machane, napan ni gadaed ra un ko cheppin e tabinaew nge murwel ko temple e daba’, ma ku rayog ni ngad thapeged e pi tawa’ath ko “gol” nike micheg e pi profet nge apostle.⁶ Pi tawa’ath ney e kukub falel’ ni bachane e kanawo’ riy, rogon, nge tin nibe buch u fayleng. Pi tawa’ath e mu’un e:

Nge ga’ e gonop ni mornga’agen fare Tathapeg nge miligach Rok ni bayul,
Nge ga’ nag rogon fare Kan Thothup u lane yafas rodaed ⁷ ni ngan thamiy gelngiy nge wo’ ni fan ko yafas rodaed;
Nge ga’ nag e mich, ya ngeyag ni thil rodaed ngak Tathapeg e ra gel,
Gel nag e tafney nge mithmith ni ngan fil ban’en man kalngan’⁸ ni bachane gonop ko gadaed mini’, gin ni kad baed riy, nge sap nib tamilang ko gin ni ngad dared ngay;
Gel nag rogon, thothup riy, nge fal’eg rogon ban’en u lan gumircha’en daed,
Gel nag e falfalen’ ni rayog ni ngad thamiy fare tu’ufeg rok Somoel;
Yo’or nag e tawa’ath ko tabinaew, demtrug rogon e magawon ko tabinaew fa rogon ni ri dani falel’ e tabinaew rodaed e chiney, kafram, fa boech nga m’on;
Gel nag e tu’ufeg nge magaer ngak e pi’in nike yim’ nge gidii’ ni kab fas, ya dabin thamiyed ni i go’ gadaed rodaed;
Gel nag rogoy ni ngan nang ko mang e ba tu’uf ni nge gol, ma dakean e ayuw rok Somoel, man pigpig ngak boech e gidii’;
Pi lumel nge ayuw nibe gel ma kan gel ko mo’oniyan’; nge
Ayuw nike gel nike gol nag e magawon, kirbaen’, fa gumircha’ey nike kirbaen’ me gol nigey. ⁹

Fa’anra kam meybil ni fan e pi tawa’ath ney, mag un ko cheppin e tabinaew nge murwel ko temple. Napan ni gara rrin’, ma ran fulweg taban e meybil rom. Napan ni ran rrin’ e pi gam’ing ni pa’ e pi’in nike yim’, me gol pifaak Got u fayleng. Arfan ni President M. Nelson, u lane bin somm’on e mulwol rok nib President ko Galasia, e ga’ar, “Liyoer rom u lane temple nge pigpig rom u rom ni fan ko pi gidii’ rom ni kakrom e ra fal’eg wa’atham ko gapas nge yi’iy ni fan ngom, ma ra gel nag e m’ag rom ni ngam paer ko kanawo’ nib m’ag.”¹⁰

Ba profet kakrom e guy e pi tawa’ath ni fan ko pi’in nib fas nge pi’in nike yim’.¹¹ Bea’ nikan l’oeg u tharmiy e dag ngak Ezekiel ya’an e temple nibay e raen nibe wagay riy. Kan ga’ar ngak Ezekiel:

“Re ran ney e be yan … nge log nga lane loway, nge yan ko day fithingan e [dead] sea … [ma] fapi raen e ra gol.

“Demturug e yungin be yan fare ran riy, ma be yib gubin mit e gamanman nge nig ngay, demturug e gin be yan riy, ma be pi’ e yafos … ya yaed ra gol; gubin ban’en e ra fas ko gin nibe yib fare ran riy.”¹²

L’agruw mit e raen nib falel’. Bin somm’on, demtrug ni bin achig e lul, e ga’ nge gel, nge ga’ daran me to’ar. Ta’ab ban’en e ma buch ko tawa’ath nima yib ko temple napan nikan chiyliy e tabinaew. Ra mangil rogon e tha’ napan nikan chiyliy nag e tabinaew nga ta’bang.

Bin l’agruw, fare lul’ e be bi’ech nag gubin ban’en nibe maath ngay. Fapi tawa’ath ko temple e kubay riy nima gol. Pi tawa’ath ko temple e rayog ni nge gol nag gumircha’ey nge yafas nge tabinaew.

Soen nggu weliy mornga’agen. Lane 1999, ma ba pumo’oon nikanoeg Todd ngak e ubchiya’ nike tagan e ngechey ko ma’n’ey rok. Demtrug rogon niba’ Todd nge tabinaew rok ko Galasia, ma gathi ban’en ni ri yad ma un ko tin ban’en u galasia, ma dariy basgyad nike nang e tawa’ath ko temple. Bin tomur e neap ko yafas rok Todd, me Betty, ni chitinngin, e paer u to’ben e bet rok nibe koel pa’ me ga’ar, “Todd, fa’anra ngarim maen, ma gube micheg ni ra m’ay e murwel rom ko temple.” Bin migid e kadbul ma ke yim’ e ma’n’ey rok. Togta e ri tayed gumircha’en Todd nga lanyen e m’ar rog, bea’ nikan noeg Rod ngak.

In e pul nga m’on ko tomuren nikan pi’ fare gumircha’ey, me nang Rod e tabinaew rok e cha’an nike pi’ gumircha’en ngak me tabab i non ngoraed. Napan l’agruw e duw nga m’on, me Betty, ni chitinngin, e pining Rod ni nge un napan ni nge yan nga temple ko somm’on rok. Rod nge Betty e ri mada’ gow ko somm’on u lane bin celestial e senggil ko St. George Utah Temple.

Ta’aboch riy, ma chitamangin Todd—pumo’on rok Betty—e yim’. In e duw nga m’on, me pining Betty Rod ni nge yoen’ loen faak nike yim’ ni nge thapeg e pi gam’ing rok ko temple. Me rrin’ Rod u fithik e falfalen’, man rrin’ fare murwel u lane senggil ko chiyliy u St. George Utah Temple. Kan chiyliy Betty ngak e pumo’on rok, nibe garbog nga but niba’ e pumo’on ni fak fak ni ir e be yoen’ loen. Ma arame, me map e lu’ u owchen, me yoeg ngak Rod ni nge un ngorow ko fare altar. Me garbog Rod nga to’ben row, nibe yoen’ loen faak, ni Todd, nibe chub gumircha’en u lanyen Rod. Todd, ni gumircha’en e bay rok Rod, e ni chiyliy ngak e galabthir rok nib mangil. Chitinngin Todd e cha’ariy e m’ag nike micheg ngak faak nike bukun e duw.

Machane dani mus u rom. Ragag nge lal’ e duw ko tomuren gumircha’en nikan pi’ ngak, me ke fal’eg rogon ni nge mabgol me yoeg ngog ni nggu mang e cha’an ni nggu chiyliy u lane Provo Utah Temple. Fare rran ningan mabgol, mug mad’eg Rog nge ppin rok, ni Kim, u lane senggil ko chiyliy, ni bay e tabinaew rorow nge tafagar rorow nibe soen nag row. Napan ni kuguy Rod nge Kim, mug fith ko bay e duwer rorow fa dariy.

Me ga’ar Rod, “Ea. Bay e pi’in tabinaew rog u roy ma yad ba adag ni ngar mada’ niged gur.”

Danug nang ni ra yoeg e binem mug ga’ar, “Gabe yoeg ni yaed bay u roy? E chiney?”

Me fulweg Rod, “Ea.”

Gu sak’iy u barba’ e rungrung mug pining fare tabinaew nge yib nga lane senggil ko chiyliy. Betty, ni ppin ni faak, nge pumo’on rok e ri un ngomaed. Me m’ag Rod e bachbach ngak Betty, me pining e magaer ngak nike yib, me arame yoeg neg ngak. Rod e ga’ar, “Betty, iraray Elder Renlund. Ir fare togta ni ayuweg gumircha’en fakam nike bukun e duw.” Me yib u barba’ fare senggil nge m’ag e bachbach ngog. In e ment nga m’on, ma yibe m’ag e bachbach ma yibe yoer.

Napan ni fal’ rogon maed, ma gamaed yaen nga lane senggil ko chiyliy man chiliy Rod nge Kim riy nib manemus. Rod, Kim, Betty, nge gag e rayog ni nggu micheg ned ni tharmiy e rib chugur, ma bay e pi’in nike yim’ u fithik daed nib chugur.

Got, u fithik gelngin, me chiliy nge gol nag e gidii’ nge tabinaew ni demtrug rogon e n’en nike buch, yam’, nge momaw’ riy. Boech ngiyal’ ma gadaed ma sap ko thamtham ni gadaed be nang u lane temple ni boed bang u tharmiy.¹³ Re rran nem u lane Provo Utah Temple, re thin ney nike yoeg C. S. Lewis nib ga’ fan ngog: “Gidii’ … e ma yoeg mornga’agen boech e gafgow ni dani n’uw napan, ‘Dariy e falfalen’ ni rayog nge yoen’ loen,’ re Tharmiy nem e dan nang, ta’ab biyay nikan nang, e ra thilyeg e amith rodaed nge falel’. … Pi’in nib tawa’ath e ra ga’ar, ‘Daworug pired u bang ma kemus ni Tharmiy.”¹⁴

Ra pi’ Got gelngiy, me ayuw, me chubiy dad;¹⁵ ma ra bi’ech nag daed e bin tha’abi kirbaen’ rodaed.¹⁶ Napan ni gadaed ra kunuy e cheppin e tabinaew roraed man yan nga temple ni pa’ e gidii’ rodaed ni kakrom, me rrin’ Got oren e pi tawa’ath ney nikan micheg ngak e pi’in nike yim’ nge pi’in nib fas. Ta’aborogon, gadaed ba tawa’ath napan ni gadaed ra ayuweg e pi’in u lane ward nge stake rodaed ni ngar rrin’ed ni ta’aborogon. Chonggin e galasia ni darma paer nib chugur ko temple e kuma thapeg e pi tawa’ath ney ni yibe un ko murwel ko cheppin e tabinaew, ni yibe kunuy fithngan e gidii’ roraed ni kakrom ni fan ko pi gam’ing u temple ni ngan farowliy.

Machane, ke ga’ar President Russell M. Nelson: “Rayog ni ngad falfalen’ gaed ni gubin e rran ni mornga’agen e temple nge cheppin e tabinaew nike buch rok boech e gidii’. Machane ngarin rrin’ed ban’en ni ngad nanged boech.” Me ulul ni ga’ar, “Gube piningem ni ngam meybil ko miti mang miligach—boed e ngiyal’ rom—ni rayog [ni] ngam rrin’ boech e murwel ko temple nge cheppin e tabinaew.”¹⁷ Napan ni gara fol ko thin rok President Nelson, ma gara pir’eg, mag kunuy, mag ta’areb ko tabinaew rom. Me, po’ e tawa’ath ngom nge tabinaew rom ni boed e lul’ nike yoeg Ezekiel. Gara pir’eg e gol nib tu’uf ninge gol.

Orson nge Parley Pratt e nang e gol nge chiyliy ko cheppin e tabinaew nge murwel ko temple ko ngiyal’ ney. Betty, tabinaew rok, nge Rod e kar nanged. Rayog rom boech. Dakean e miligach ni bayul, ma ke pi’ Yesus Kristus e pi tawa’ath ney ngak gubin e gidii’, pi’in nike yim’ nge pi’in ni kab fas. Bachane e pi tawa’ath ney, ma gadaed ra pir’eg, no boed, “daworun paer u bang ma kemus ni … Tharmiy.”¹⁸ Ere gube micheg u dakean fithngan Yesus Kristus, amen.