Pi Ppin ni Fakay nib Tu’uf
Daf ko ngongol rodad ulan fare Young Women ni ma ayuwegmed ni ngam thapeg e mich romed u Yesus Kristus ni dabi mith.
Pi walageg, rigub falfalen’ ni gubay romed! Gadaed be guy bukun e yi’iy nibe yib ko ya’el rodaed mab gel e falfalen’ riy.
Napan ni gadaed be tabab, ma gu ba adag ni nggu dag ngomed boech e fagar rog; yaed e rugod ni yad ba’ ko n’en nib cheg, yilen, ir rok nge magawon ko tabinaew. Ra bagyad, ni boed daed ni gubin, ma kar aw gaed nga gumircha’eg.
Somm’on, mu mada’ nag Bella. Ba gel ni kemus ni go’ir e rugod u lane branch rok u Iceland.
Mada’ nag Josephine u Africa, nike dugily u wan’ ni nge bi’eg fare ke Babyor ku Mormon ni gubin e rran. Be pir’eg gelngin nge fare tawa’ath nima yib ko chi, mithmith ney nib achig u fithik e yul’yul’.
Cha’an tomur e ngam mada’ niged Ashtyn, ma rugod ni rib cheag nike yim’ ko tomuren nel’ e duw ni ki gel nag ir ko cancer. Mich rok ko fare Bayul rok Yesus Kristus e kuba’ u gumircha’eg.
Gimed gubin ni gimed e ppin ni rib mangil. Gimed ba thil, ra bagmed ma ba’ e n’en nib cheag riy nge n’en nike buch rok ni chuchgur nib ga’fan ma ba manemus rogon.
Ri gimed e ppin ni faak e Galabthir nu Tharmiy, ma dariy ban’en ni rayog ni nge palog nigem ko tu’ufeg Rorow nge tu’ufeg rok e Tathapeg rom.1 Napan ni gara chugur Ngak, mus ni gabe yan nib achichig rogon ni gabe furuy em, ma gara pir’eg e gapas ni ra paer rom ni gab yul’yul’ ni gachalpen e Tathapeg rodaed, ni Yesus Kristus.
President Russell M. Nelson, profet nib t’uf rodad, e ke yoeg ngog ni nggu weliy boech mornga’agen e n’en ni rayog ni nge ayuweg nem ngam “gel nag [rogom] nib thothup”2 me gel nag e tin nib mat’aw rom. Nggu weliy aningeg riy e re balayal’ ney.
Pi Mo’olung ko Ppin ni Rugod
Bin somm’on, n’en ni rib ga’fan ni gamaed ma rrin’ u lane Young Women e gamaed ba adag ni nggu ayuwegned gimed nge gel e mich rom ngak Yesus Kristusst3 nge gonop nib gel ni mornga’agem ni gur e ppin ni fak Got.
Re balayal’ ney, e gu ba adag ni nggu weliy mornga’agen e thin ko Young Women. Gube meybil ni gara thamiy fare Kan ni Thothup nibe micheg e pi thin ney napan ni gura yoeg e bin bi’ech e thin:
Gag e ppin ni gub tu’uf ni faak e galabthir u tharmiy,,4 niba’ rogog nib thothup nge gin ni nggu wan ngay nib manemus.5
Gag ni gachalpen Yesus Kristus,6 Gube athamgil ni nggu boed Ir.7 Gube gay e yi’iy ni fan ngog mug fol riy8 mug machib ngak boech gidii’ u dakean fithngan nib thothup.9
Gube sak’iy ni gub ta micheg rok Got ni gubin ngiyal’ nge gubin ban’en nge gubin ang.10
Napan ni gura athamgil ni nggu thapeg e falfalen’,11 guba adag fare tawa’ath ko kalangan’uy12 mug gay rogon ni ra lan reb e rran ma gube mangil boch.13 U fithik e mich,14 ma gura gel nag e tabinaew rog,15 mug ngongliy e m’ag mug fol riy,16 mug thapeg e pi gam’ing17 nge taw’ath ko temple nib thothup.18
Tiyan’um ko n’en nike thil ko “gamaed“ ko “Gag“. Pi n’ey nib riyul’ e fan ngom ni gur rom. Gur e ppin ni faak e e Galabthir nu Tharmiy. Gur e e kam ngongliy e m’ag ni gachalpen e Tathapeg rodaed ni Yesus Kristus. Gube piningem ni ngam fil mag leam nag e pi thin ney. Gu manang ni napan ni gara rrin’, ma gara thapeg e mich ko tin nib riyul’ riy. Pi n’ey nib riyul’ ni yira nang fan e ra thilyeg rogon ni gabe yan u fithik e tin momaw’ ban’en. Gara nang ko gur mini’ nge fam ma ra ayuweg nem ngam ta’areb nag e n’en ni ga ba adag ko tirok e Tathapeg.
Gapas nge kanawo’ e ra gara nang napan ni gara fol rok Yesus Kristus.
Pi Mo’olung ko Ppin ni Rugod
Bin l’agruw e ma buch u lane class ko Young Women. Elder Neal A. Maxwell e ke ga’ar, “Ere baga’ ni n’en nib tu’uf ko gidii’ e nge ayuweg ir ko tin nima buch u lane yafas u fithik e chugum rok.”19 Class rodaed e ngari mange gin ni gadaed be mil ngay ko tin tomal ban’en, gin’en niba’ e tu’ufeg riy. Ra ngan ta’areb, ma ngan gel nigey, man gel nag e tu’ufeg ko Rugod, ma ngad fal’eged boech ban’en ni fan ko class.
Ufithik 100 e duw nike thimur, ni yima fu’od e rugod u buut nge gaman dalip e class. Tabab nib papey, ma gadaed yoeg ko toygang’ ko rugod nge bishop ni ngan meybil nag ni ra reb e rugod man leam nag e n’en nib tu’uf rok man yarmiy raed u but ko yangar nibe yan ko rogon fare ward. Ba’aray boech e wo’ ko rogon.
-
Fa’anra dani yo’or e rugod, ma rayog ni ta’areb e class rom ni gubin e gidii’ ni yiba’ u ta’abang.
-
Sana ba’ bo’or e rugod ni 12 e duw roraed ma boch’uw e pi’in nib ilal boech. Gara dugliy ni ngeyog l’agruw e class ngom: Rugod ni 12 e duw rok nge rugod ni 13-18
-
Fa fa’anra ba’ e ward rom nib ga’ niba’ 60 e ppin riy, ma ba’ nel’ e class, nib thilthil e yangar nima yan ngay, nikan fal’eg rogon ni gubin e duw.
Machane calss rom e kan yarmiy, ma gimed e ri gimed ba ga’fan ni ngam ta’areb gaed. Mange tamilang ngak e pi’in nib liyeg nem. Mang e tu’ufeg ni gabe athapeg ni gara thapeg rok boech e gidii’. Lane meybil u gumircha’em, mag paer ni ngam ayuw mag mangil. Napan ni gara rrin’, me sug e yafas rom ko tu’ufeg. Ra mangil boech e tafney rom ngak e gidii’ mag tabab i guy e tin mangil roraed.
Fithngan Class ko Rugod
Bin dalip, biney e class nikan yarmiy, ma gubin e class ma ngan ta’ fithngan ni “Young Women.”20 Dabkin ted e ”Beehive”, ”Mia Maid”, nge ”Laurel.”
Strengthen Class Presidencies
Bin tomur e ngan weliy nib ga’fan e pi presidency ko class. Demtrug rogon nikan yarmiy e class ko Young Women, ma gubin e class ma ba’ e presidency riy!21 Kan ta’ ni pi rugod e ngar gagyeg gaed napan ni kiyad ba bitir.
Fan ko e presidency ko clas ke gelnag nge nanged nib moem. Muruwel’ ko thapeg ta’ e ban’en nib ga’fan, ni fan ko pigpig, muruwel’ ko missionary, yib nge misa bayay, nge muruwel’ ko temple nge tabinaw.22 Aarogon, iraray e rogon ni ngad kunuyraed Israel23—Ngongol nib fel’ rogon nifan urngin e ppin ni rogod ko chongin ku fare Somoel youth battalion.
Gamed manang, gubin e gidii’ u Galasia, ma ke pining Somoel e presidency ni nge gagyeg nag e gidii’ Rok. Pi rugod, mang ko presidency ko class e ra mang e bin somm’on e kanawo’ rom ni ngam un ko biney e murwel. Pi toygang’ nib pilal’, mu ta’ ni pi presidency ko class e nge ga’fan ma aram mag ayuweg raed, ngam fil ban’en ngoraed ma gabe gagyeg nag raed ya ngeyog ni ngar cheag gaed.24 Demtrug rogon ni ku un mang e toygang’ fa danga’ ko presidency ko class, mu tabab ko gin ni yaed ba’ riy mag ayuweg raed ni ngar cheag gaed me pagan’ raed ni ra fal’ wa’athan raed ni yaed e toygang’. Paer nib chugur ngoraed, machane dam rrin’ e murwel roraed. Fare Kan Nthothup e ra gagyeg nimen napan ni gabe gagyeg nag raed.
Ra ngan dag rogon nib ga’fan e murwel ko galabthir nge toygang’ nib sensey, ma nggog ngom reb e yaat. Chloe e kan pining ni nge mang e class president. Priesthood rok e pi’ e athamgil ngak ni nge ni ning e ayuw ngak Somoel ninge yoeg ngak e ngochol ni fan ko presidency rok. I meybil Chloe me thapeg ko mini’ e nge mang e counselor rok nib papey. Napan ni ulul nibe leam ma be meybil ko mini’ e nge mang e secratary, me ulul fare Kan Nthothup nibe feek e tafney rok ko bochi rugod nike gin’ ngay—bee’ ni gathi rima yib nga galasia fa tin ni yima rrin’.
Dar fal’ u waen, ere me yan Chloe nge non ngak e nina’ rok, ni yoeg ngak ni reb rogon ni rayog ni ngad thapeged e yi’iy e n’en nibe sulsul ko tafney rodaed. Fithik e pagan’, me thamiy Chloe ni nge leam nag e re rugod ney. I yoeg fare bishop, me fana’ fare rugod. Napan nikan yibliy, ma chi secretary ney e ga’ar, “Gamnang, dagu ma leam nag ni ba’ bang ni gub fal’ ngay, fa ba tu’uf e ayuw rog u bang. Danug thamiy ni guba’. Machane re calling ney, ma ku thamiy niba’ fag nge gin’en ni fan ngog nike ta’ e Chitamangiy nu Tharmiy. Napan ni chuw Chloe nge nina’ rok ko mo’olung, me chel Chloe ko nina’ rok me ga’ar, u fithik e lu’ u owchen, “Ba riyul’ e yi’iy! Ma buch e yi’iy!“
Pi presidency ko class, ke piningem Got ma ke pagan’ ngom ni ngan gagyeg nag e ppin ni faak. En Somoel ba’adagmed. … Ke mel’egem.”25 Kan tem nga orel rok bee’ niba’ e mat’won ko priesthood; biney e be yoeg ni napan ni gara rrin’ e murwel rom, ma gabe murwel ko fare priesthood. Bay e murwel nib mangil ni ngam rin’. Mu na’ab mag fol ko fare Kan ni Thothup. Napan ni gara rrin’, ma rayog ni ngam pigpig u fithik e pagan’, ya gathi go’gur ni gabe pigpig!
Pi presidency ko class, ba tu’uf e gonop romed roadaed, lumam, nge gelngim ko bin bi’ech e ward youth council nike yoeg Elder Quentin L. Cook e daba’. Gur e bang nib ga’fan ni ngan nang e tin nib tu’uf ko pi walagem.26
Pi n’ey ko class nge toygang e ra tabab napan nike fal’ rogon e pi ward nge branch rodaed machane ra buch ko January 1, 2020.
Pi walageg, gube mcicheg ni pin’ney ni ku gog e daba’ e ke yib rok Somoel. Napan ni gadaed ra gay rogon ni ngad rrin’ed e pin’ney, ma aygun dabin pagtilined fadaed: ni ngad gel niged gadaed ngad laked Yesus Kristus ma gadaed ayuweg boech e gidii’ nge yib Ngak. Gube micheg ni iraray e Galasia Rok. Gub falfalen’ ni ke pag daed ni ngad manged bang ko murwel rok nib thothup.
Gube meybil ni re Kan Nthothup nike gagyeg nag e pin’ney e ra gagyeg nag med napan ni gara athamgil ko kanawo’ nib mat’aw. Gube micheg u dakean fithngan Yesus Kristus, amen.