Malekag Rom Nrib Faleal’
Fare Tathapeg e be pinngem, gubin e rran, ni ngam pag e tin kam macham ngay nge tin ndabyag rom ngam un Ngak ko fare malekag ko fanow.
Ko Troll
Bake babyor ni kan yoloy nfen e bitir boech e duw kafram ni tabab e thin riy ni “Ulan buloew e par ba troll riy.”1
Byat ni mornga’gen Bilbo Baggins ba troll nin pi’ ba murwel ngak ni rib mangil—ninge malekag, u byang ndawri un bi’id ngay, nge ba tawa’ath nrib ga’ pilwon.
Kemus ni togan riy e bo’or e troll nib ga’fan ma gathi malekag e bay u wan’. Yafos roraed e kemus ni mornga’gen e par nib gapas. Yaed b’adag e abich ni nel’ yay ulan reb e rran nge yan nga malay’, sbathingaed e gidii’en e malekag, yin’ e tang, cheleg e musik, nge falfalaen’ ko yafos.
Amarrogon, nap’an nnog ngak Bilbo mornga’gen fare malekag nrib faleal’, ban’en e chub ulan gum’ircha’en. Mnangfan ni biney e malekag e dani mom. Mabgel e m’ad’ad riy. Ma bay nra buch ndabi sul.
Machane, biney e malekag e ke thamiy ulan gum’ircha’en nib gel. Ere, troll ney e digey gubin e chugum rok ma yan ko fare malekag ni ga’ngin yang “yaen nge sul biyay.”2
Birom e Malekag
Sana fan ni biney e yat e woed gadaed e bachan e woed mornga’agendaed.
Kafram, nib n’uw nap’an, kafram, u m’on nin gergel nagdaed, nap’an ndawrda nanged boech ban’en, kan piningdaed ko malekag ni woed e biney. Ke pi’ Got, ni’ir e Chitamangindaed nbay u Tharmiy. Ngan rrin’ e biney e malekag e be yip’fan ni ngad chuwgaed Rok ko gin nbay riy. Be yip’fan ni ngan nib nga fayleng ko ba malekag ndanda ninged mornga’agen nge gafgow riy.
Gadaed manang ni dani mom.
Machane gadaed manang ni gadead ra thapeg e tawa’ath ni felel’, nib mu’un e thapeg ko dowef ngay nge falfalaen’ u roy u fayleng. Gadaed ra gay rogon, min fil, min athamgil. Ma gadaed ra pere’eg e tin riyul’ ni mornga’agen Got.
Riyul’, gadaed manang ni ra i tun aydaed ko biney e kanaow. Machane kad micheg niged: ni bachan fare maligach rok Yesus Kristus, rayag ni ngaed be’ech gaed ko pi denen rodaed, be’ech nag e thothup rodaed, nge, borran riy, min fos ko yam’ magdaed t’areb ngak e gidii’ nib t’uf rodaed.
Kad filed gelngin ni gadaed ba t’uf ngak Got. Ke pi’ e yafos ngodaed ma b’adag ni ngad mon’oggaed. Ere, ke pi’ ngodaed e Tathapeg. “Ere,” yog e Chitamngiy nbay u Tharmiy, “thingar mu mel’eg nfan ngom, ya kan pi’ nfan ngom.”3
Sana bay boech mornga’agen e tin ni buchbuch u tharmiy ni karang e murus ngak pifak Got, ya bo’or e tin ni ya’al walagdaed ndabun rad e biney.4
Ko fare tawa’ath ko puf matawoy u roy u fayleng, kad nanged ni tin bay da filed e rayag i athamgiliy.5
Nge arragon, pagaen’daed ko fare micheg rok nge gelngin Got nge fare Fak nib T’uf Rok, ma aram e kid fnayed e biney e athamgil.
Kug rin’.
Ka’an nge gur.
Kad dugliyed ni ngaed darod ko biney e malekag nib felel’ ko “yaen nge sul biyay.”
Fare Pong ko Malekag
Ma woed, ni yafos u fayleng e be balyang nagdaed, fa dangay? Gadaed be pagtilin mornga’agen fare malekag rodaed, ya mom ni ngan par ni dabin rrin’ ban’en ni ngan mon’og.
Ma dariyfan, ya kbay ban’en riy u byang, ulan gumi’rcha’endaed, yibe mik’iy ko tin nthothup nge tin mangil ban’en. Biney e mik’iy e reb fan nima chuchgur e gidii’ ko fare gospel nge fare Galasia ku Yesus Kristus. Fare gospel nikan sulweg yarmen, e woed ba, poguran ko fare malekag ni kad fnayed ni kab kafram. Fare Tathapeg e be pinngem, gubin e rran, ni ngam pag e tin kam macham ngay nge tin ndabyag rom ngam un Ngak ko fare malekag ko fanow.
Bo’or e ta’ming ko re pi’ i kanawo’ ney. Bay e burey riy, loway, nge kanawo’ nib wi’in’in. Ma sana bay ya’an e gonow riy, trolls, nge reb e dragon fa l’agruw. Machane fa’an garam par u dakaen fare pi’ i kanawo’ mag pagaen’um ngak Got, garam pere’eg kanawo’en i yaen ko tabinaew rom u tharmiy.
Ere uw rogon ni ngam tabab?
Rib mom.
Mpi’ Gum’ircha’em ngak Got
Somm’on, ba t’uf ni ngam mel’eg ni ngam mpi’ gum’ircha’em ngak Got. Gay rogon ngam sapnag ni gubin e rran. Fil rogon ninge t’uf Rom. Mag pag ere t’ufeg nir ni nge dag rogon ngam ni ngam fil, nangfan, mag laek fapi michib Rok. Fare gospel kan sulweg yarmen ku Yesus Kristus e kan pi’ ngodaed nrayag ni ngad nanged fan ni woed rogon batir. Ndariy fan ni, fare gospel ku Yesus Kristus e bay urngin e fulweg ko duwer nib momaw’ rogon ni ngan nangfan ni demtrug gelngin i fil, ya daryag ni ngaed nangfaned urngin mornga’agen.
Fa’an nra gabe sutuntun ko re malekag ney ni bachan e gabe tafneynag ndabyag rom, tafnayem ni gathi ngan rrin’ gubin nib mat’aw t’abyay; ya mornga’gen e rrin’ ni bachan e gab’adag. Ya be yan u rogon e n’en ni kam mel’eg, gathi bachan rogon e luwaen’ rom.6
Ndariy fan ni fa’an kam mul, rayag ni ngam mel’eg ndam mtal, mag gelnag e tafney rom, mag athamgil, ngam saki’iy ngalang. Irraray e sekeng ko biney e malekag.
Got e mnang ni dan mu polo’ ni fel’ e gubin rom, ni ra tun em ko boech e ngayal’. Got ab t’uf rom ndariy fan ko gabe gafgow fa dangay.
Woed e galibthir nib t’uf rom, b’adag ni ngam gay rogon. Fanow nigey e woed ni yibe fil rogon i cheleg e piano. Woed somm’on ma n’en nrayag ni ngam cheleg e kemus ni musik ko “Chopsticks.” Machane fa’an garam ul’ul ngam gay rogon, fapi musik ni buch’uw ni gamnang rogon e ra mon’og iyan langan, fel’ langan, ma ke fel’ ko somm’on.
Chiney, biney e bay ndabi yib ko biney e yafos. N’en nike fith Got e ngad ul’ul gaed ngaed gayed rogon.
T’ufeg Boech e Gidii’
Bay ban’en ni mornga’agen e ran’ey, ni woed nike yan u rogon: kanawo’en ni kemus nrayag ni ngam mon’og ko fare malekag rom ko gospel e ngam ayuweg boech e gidii’.
Ngan ayuweg e gidii’ e ir fare kanawo’en e fanow. Mich, athap, t’ufeg, murnguy, nge pigpig e be dag ni gadaed pi gachalpen.
Demutrug ko ayuw rom e ngam ayuweg e gidii’ nib gafgow, ngam ayuweg e gidii’ nike tomal, ya fare ngonglem e ran pi’ gelngin, ma rran gelnag e thothup rom, mag yan ni kam mon’og ko somm’on.
Machane biney e t’ufeg e dabyag ni ngam athapeg ni ngan pi’ pilwon ngom. Mit ney e pigpig e dabyag ni ngan og nag e sorok ngom, fa kemus t’ab be’, fa ayuw.
Tin riyul’ gachalpen Yesus Kristus ab t’uf Got rok nge Pifak ma dar ma sap ni ngan fulweg pilwon e pigpig rok. T’ufegned e gidii’ nike kirebnag e tafney rodaed, ma dubun dakandaed. Nib mu’un e gidii’ ngay nibe karang, gafgow, ma be gay rogon ni nge gafgow nagdaed.
Nap’an ni garam suguy gum’ircha’em ko fare t’ufeg rok Kristus, dakriy biyang ulan gum’ircha’em nra taw e gun’gun’, nonon, fa tamra’ ngay. Mu tay chiylen fapi motochiyel rok Got ni bachan ab t’uf rom. Nap’an ni yibe rrin’ e biney, ma gadad ra bod Kristus ma bay da guyed ir nrogon.7 Ere mang malekag e baga’ ko biney?
Weliy Salpem
Bin dilip ni ngaed gayed rogon ni ngaed rrin’ed e ngaed feked nga dakandaed fithngan Yesus Kristus ma dabda tamra’gaed ngodaed.
Da bin mithag e mich rodaed.
Da bin tharay.
Ya woed ni, ngaed weliyed mornga’agen salpdaed ngak boech e gidii’ ni woed rogon ko tin nibe buch. Irraram e n’en nima rrin’ e tafgar—yaed ma weliy mornga’agen e tin nib t’uf ngoraed. Tin ban’en nib ga’fan ngoraed ma rayag ni ngar thilyegned.
Irraram e n’em ni yima rrin’. Weliy salpem ni woed gur gidii’en Fare Galasia ku Yesus Kristus ni fan ko gidii’en Got rok’ ko Tin Tomur e Rran.
Boech e ngiyal’ ma salpem e ra minmin e gidii’ ngay. Ma boech e ngiyal’ e ra fek e lu’ nga owchraed. Ma boech ngiyal’ e rayag ni ngar pe’ed e ayuw ngak facha’ ni nge gumean’, me athamgil, me gelnag ir ulan reb e awa, ulan reb e rran ni nge chuchgur ngak Got.
Weliy salpem ngak be’, fa social media, ulan e ulung, fa demutrug u byang.
Reb e ban’en ni yog Yesus ko tomur ngak pi gachalpen e ngaranod u gubin yang ni ngar weliyed salpen Kristus nike fos ko yam’.8 Bbay e kad fanayed Pilwon e biney nib Ga’.
Ba mulwol nib felel’ ni ngaed weliyed: ni bachan Yesus Kristus, gubin e pumo’on, ppin, nge bitir e rayag ni ngar suled ko tabinaew roraed u tharmiy, u rom, mi yaed par u fithik e fla’ab nge tin mat’aw!
Ni bay boech e tin nib mangil ni ba yog.
Got e ke m’ug ngak e gidii’ ko pi rran rodaed! Bay e profet nib fas rodad.
Ngu pug oran ngom ni Got e gathi be yog ni ngam pi’ ni “chuway’” fare gospel nikan gospel nge Galasia rok Yesus Kristus.
Kemus ni dubun ni ngam mithag nga tangin ban’en.
Ma fa’an gidii’ e kar dugliyed ni fare Galasia e gathi fan ngoraed, biney e ke milfan ngoraed.
Biney e dar turguy ni kireb rom. Mu ul’ul ngam t’ufegraed. Mag ul’ul ngam piningraed bayay.
N’en nib thil u thilin e tha’ ku be’ ni gamnang nge be’ ni gabe t’ufeg e—pining!
T’ufegned magdaed tayfan gubin pifak Got, demuturug ko gin ni yaed bay riy ulan e yafos roraed, demuturug ko mang tiliw e yaed bay riy, demuturug ko tin ni yaed be mel’eg ulan e yafos roraed.
N’en ni ngaed rrin’ed, e gadaed ra ga’ar, “Moy ngam guy! Muguy rom ni yan ko fare pi’ i kanawo’ ko fanow e bay e tawa’ath riy nib tolang mab ga’.”
Gamaed be pining e gidii’ ni “ngar bad ngar pe’ed e ayuw, ngayag ni ngan fal’eg e fayleng nge par nib mangil.”
Magdaed ga’ar, “Moy ngam par. Gamaed e pi walagem ni pumo’on nge ppin. Dan gu polo’ gaed Pagaen’ maed ngak Got ma gamaed gay rogon ni ngu fol gaed ko pi motochiyel Rok.
“Mu’un ngomaed, ma garam ayuwegmaed ngu mon’og gaed. Ma, ko biney, e garam mon’og riy. Daraed ko biney e malekag u t’abang.”
Wi’in e ngu tabab?
Nap’an ni thamiy Bilbo Baggins fare thamtham ulan gum’ircha’en, ke dugliy u waen’ ni nge mol nib fel’ rogon ko re nap’ nem, ma abich nrib fel’ rogon ko re kadbul nem, me tabab ko fare malekag.
Ma nap’an ni od Bilbo, ke guy ni rib wagay lan e nu’un rok, ma ke chugur ni nge pagtalin fare malekag rok.
Me yib fare fagar rok Gandalf me ga’ar, “Mangiyal’ e garam un?”9 Nra nge un ko pi tafagar rok ney, Bilbo ab t’uf ni nge dugliy ko mang e bt’uf ni nge rrin’.
Ma arram, ni fare troll e mil u mit e mbab rok i yaen ko fare malekag ni pagtalin fare arwach rok, sog rok, nge handkerchif rok. Ma ki pag fare ggan rok nde mu’nag.
Rayag ni kbay ban’en ko biney ni fan ngodaed.
Fa’an gur nge gag e kad thamiyew nib t’uf ni ngaed unew ko biney e malekag ko yafos magdow weliy salpen fare t’ufeg rok e Chitamangiy nbay u Tharmiy nike ngongliy ni fan ngodaed kafram, gube micheg ngom, dbay e rran ni ngan leak e bitir rok Got nge fare Tathapeg ko fare pi’ i kanawo’en e pigpig nge fanow.
Gadaed ra par ko biney e yafos magdaed son nag gubin ban’en ni nge buch ni rib mangil. Irraray e ngiyal’ ni ngan gay Got, michib ngak e gidii’, min weliy salpey ngak e gidii’.
Mpag e arwach rom, sog rom, nge fare handkerchif, nge nu’un rom nib wagay.10
Ngak e pi gidii’ ni kar tabab gaed ko fare pi’ i kanawo’, mu athamgil, murunguy, nge gelngin nrayag rom, ngam ul’ul!
Ngak e pi gidii’ ni kar chuwgaed ko fare pi’ i kanawo’, wenig mu suled, mu’un ngomaed biyay, gel nagmaed.
Ma, pi gidii’ ndawra tabab gaed, mang e gabe son nag? Fa’an nra gaba’dag ni ngam guy fal’ngin e biney e malekag nib thothup, ere mu tabab ko birom e malekag! Mnon ngak e pi missionaries. Mnon ngak e pi Gidii’en e Galasia. Mnon ngoraed ko mornga’agen e re murwel ney nib felel’.11
Ke taw ko ngayal’ ni ngan tabab!
Mbaed, Mukun Ngodaed!
Fa’anra gabe thamiy ni fare yafos rom ab t’uf boech ban’en ngay, ban’en nib tolang, gelnag e tabinaew, chuchgur ngak Got, mbaed mukun ngodaed.
Fa’an garam gay e gidii’ nibe gay rogon ni ngar mon’og gaed, ayuweg e gidii’ nibe gafgow, min fal’eg e biney e fayleng ni nge mon’og, mbaed mukun ngodaed!
Moy ngam guy ere murwel ney nib felel’, nrib ma’ang’ang, mab malekag nib mangil.
Mag pere’eg rom.
Garam pere’eg e tin nib ga’fan.
Gara pir’eg Got.
Ma gara pir’eg e bin th’abi felel’ e malekag ulan e yafos rom.
Ko pinn’ey ni gube micheg u dakaen fithing fare Tathapeg Yesus Kristus, amen.