Dam Baen Nigeg
Napan ni gadaed ra fol ko pi motochiyel rok Got, ma gubin ngiyal’ ma ran powi’iy daed ko kanawo’ nib mangil ma dabbyog ni ngan baen nag daed.
Daba’, ma gube yoeg e thin ko gubin e gidii’, machane baga’ ni gumed e pi’in bitir—Pi’in nib achig, chi pagael, nge rugod. Ri gimed ba tu’uf rok e profet rok Somoel, i President Russell M. Nelson—ni rib gel ni non ngak bukuni gimed ko fare duw nike thimur u lane fare mo’olung nikan noeg e “Athap ko Israel ngay.“1 Baga’ ni gadaed ma runga’ag President Nelson nima pining e ra thin nem ngomed—fare “athap ko Israel,“ bitir nge chonggin e bin riyul’ e Galasia rok Yesus Kristus u dakean e fayleng.
Pi fagar rog nib bitir, gu ba adag ni nggu tabab ni nggu weliy mornga’agen l’agruwi tabinaew.
Fare 102 Dalmation
Bukun e duw kafram, mug taw nga tabinaew ko murwel mug gin’ ni kuguy e machaw nib wechwech nikan pu’og—u but, maab ko garage, nge downgin e na’un romaed nikan fal’eg ko simen nib rowrow. Ug yaliy boech fapi n’em nib chugur mug guy ni kab munur fare machaw. Ba’ e machaw nikan pu’oeg nib sar nga ban’tobgul, ere mug laek. U rom, mug pir’eg e pagal ni fakag ni laal e duw rok niba’ e bras ko machaw’ u pa’, nibe l’ol’og e kus romaed. Fare kus romaed nikan noeg e Labrador ngay e barba’ rok e kan achey ke wechwech!
“Mange gabe rrin’?“ Gu fith nga lungug ni gube gosgos.
Me tal fare pagal ni fakag, nge sap ngog, me sap ko fare kus, me sap ko fare bras u pa’ nibe lul’ e machaw riy nib wechwech, me ga’ar, “Gu ba adag ni nge boed ya’an fapi kus ko fare kachido—gamnang, bin ko fare 101 Dalmatians.“
Rib tu’uf e kus romaed rog. Ku leam nag ni rib mangil, machane fakag e ke leam nag reb ban’en nib thil.
Fare Gatuw nib Moyolyol
Bin l’agruw e yaat rog ke buch ku Uncle Grover nike labthir [uncle ko papa’ ko ppin rok] ni i paer u lan ba na’un u lane lloway, nib palog ko donguch. Kari gel e labthir rok uncle Grover. Gu leam nigew ninge mada’ nag fak mow um’on ni nge yim’. Ere, reb e misiw’, ma gamaed yan u karo nib n’uw yang iyan ko na’un rok. Gu pired nga but ma gamaed dag e pagael ni fak mow ngak. Dani n’uw napan ni kan sabathin, me fare gal pagal ni fak mow, ni sana laal nge nel’ e duw rorow, e yow ba adag ni ngar ranow nga waen ngar fafal gow.
Uncle Grover, e rung’ag e n’en ni yow be yoeg, me bugbug nga but nge tafoyin ochen ngorow. Kari gel e labthir rok ma dar ningew ko mini’ ere ri rus gow ngak. Me ga’ar ngorow, ko lungun nike labthir, “Mu sag’al gow—ya ba’ e skunk u rom.“ Lesa nge gag, e ku gin gow ko biney; ku magar nigew ni ra spray nag row e skunk! Me yan fare gal pagal nga waen ma ka gamaed ni gamaed be non.
Ta’aboch riy, napan ni ku warod nga karo ni ngan yan nga tabinaew, mug fith fare gal pagael, “Kam guyew e skunk?“ Me fulweg bagyow ni ga’ar, “Dawo’, daworug guyew e skunk, machane ku guyew ba gatuw nib tilmar niba’ e wechwech u dakean kiru!“
Facha’ ni Rib Salap L’ugun
Pi n’ey nike buch e mornga’agen e bitir nibe pir’eg machane ni mornga’agen e yafas nge tin riyul’ nike n’anggin daed kad falfalen’ gaed, machane kukur weliyew ban’en nib nib falel’.
Bin somm’on e n’en nike buch, ma pagael ni fak mow e ba’ e kus ni fak; machane, ke feek e pakit i machaw, niba’ e bras u pa’, nibe gay rogon ni nge riyul’ nag e n’en nike leam nag.
Bin migid, e dani nang fare gal pagael e n’en nib kireb ko skunk. Dar nangew ko mang e kar guyew, ere ri mil gow ni kar rus gow. Gali n’ey nike buch e ke buch ban’en riy ni kan oloboch riy—ni yibe leam nag ban’en nib riyul’ ko ban’en. Machane, n’en nike buch riy e ba achig.
Machane, oren e gidii’ e daba’ e ma sap ko gal ney nib kireb ni rib alamrin. Rayog ni daryog ni ngar guyed e pin’en nni rogon fa dabuy e tin’ riyul’, ma yibe gay rogon ni ngan fal’eg ban’en ni nge mangil rogon u owchen raed. Ere, bo’or ban’en nibe buch e daba’ nima chuweg daed ko tin riyul’ ban’en. Tiney e baen e ma gel ngak e pi’in ni dar na’ab ma baga’ nima buch ban’en riy nib gel, ni dani achig, nib magawon.
Satan, chitamangin e salapl’ugun, ma n’anggin daed nge marwaer tafney rodaed ko n’en ni riyul’ man baga’ nikan siyeg e tin riyul’ nib manemus fa kan thilyeg ke mang ban’en ni gadaed ba adag. “Be aw ngak e pi gidii’en Got”1 me paer ni bukun milyon e duw nibe yaliy ma be nang rogon ni nge gay rogon ni nge tawasor nag pifaak Got ni nge mich u wun’uy ni n’en nib mangil e ba kireb ma kireb e ba mangil.
Ke n’anggin keyog ni nge baen nag e gidii’ ni skunk e gatuw fa, boch’uw e machhaw, ma rayog ni ngam pilyeg e Labrador nge ngal’ ni Dalmatian!
Chiney e ngad sap gaed ko rogon nikan noeg e biney u lane babyor nib thothup, napan buch ta’ab ban’en rok fare profet rok Somoel ni Moses. “Moses e yan nga dakean ba burey ni rib tolang, … me guy Got nga owchen, me non ngak.”2 Ke fil Got ngak Moses ku ir mini’ nib manemuus. Demtrug rogon nib gidii’ Moses ma bee’ ni kuba’ e kireb rok, me fil Got ngak Moses ni “boed fare Faak nib Tu’uf Rok; ma Fakag nib Tu’uf rog … e ra mang fare Tathapeg.”3
Moses, ko biney nike guy nib ma’ang’ang, nike guy Got, ma kiki fil ban’en nib ga’fan ni mornga’agen: demtrug nib gidii’, ni ir e faak Got.
Motoyil nib fal’ rogon ko n’en nike buch ko tomuren nike buch e bin somm’on. “Ma keyibi buch ni … yib Satan nibe towasor ngak,” ni ga’ar, “Moses, fak e gidii’, mu liyoer ngog!”5 Me fulweg Moses ni fith ni ga’ar: “Gurmini’? Ya musap, gaag faak Got, nib chugur ko fare Faak nib Tu’uf Rok; ma bu’uw e birome rir, ni Nggu liyoer ngom?”6
Reb e thin riy, e ke ga’ar Moses: “Dabyog ni ngam baen nigeg, ya gu manang ko gag mini’. Kan sunmiyeg u ni boed Got Dariy e tamilang Rok rom nge rir. Ere mongfan ni nggu liyoer ngom fa gu fol ko baen rom?”
Mu fal’eg i motoyil ko rogon ni ngki fulweg Moses. I ga’ar, “Mu chuwur, o Satan; dam baen nigeg.6
Bo’or ban’en ni rayog ni ngan fil ko rogon nike non Moses ko lumel rok e mo’oniyan’. Gube yoeg ngom ni ngam fulweg ni aram rogon napan nikeb e lumel ngom. Mog ko togopluw ko ya’el rom ni nge lungum, “Chuwu! Gur e dariy e rir rom. Dam towasor nigeg fa mu baen nigeg! Ya gu manang ko gag mini’—gag e fak Got. Ma gubin ngiyal’ ma guma ning e ayuw ngak e Got rog.”
Machane, fare mo’oniyan’, e darma chuw nib papey ni dabi baen ninge towasor nag daed. Ri dani rrin’ ngak Moses, machane ba adag ni nge pagtilin Moses ku ir mini’.
Boech bochi bitir nibe mada’ lungun ngalang, “Me tolul Satan nibaga’ lungun, ni rurug e buut, nibe towasor, ni ga’ar: Kemus ni gag e Faak nib Tu’uf, liyoer ngog.”7
Soen ngad weliyed biyay. Kam rung’ag e n’en ni kaffini yoeg? “Kemus ni gag e Faak nib Tu’uf. Liyoer ngog!”
Dam rus; dabgu li’yem—gathi gag e skunk; kemus ni gub gatuw niba’ e wechwech nge tilmor nib ram’en dowag.”
Ma arame pining Moses Got me thapeg gelngin nib thothup. Demtrug gelngin nike domomow fare mo’oniyan’ ma ke rurur e buut, me Moses e dani motoyil. Thin rok e rib rogon ma ba riyul’. “Chuw rog, o Satan,” nibe non, “ya karimus ni iraray e Got ni gura liyoer ngak, ni Got ko rir.”8
Ma aram, me “chuw … u pow’chen Moses.”9
Tomuren nike m’ug Somoel ngak Moses me yibliy ni bachane nima fol, me ga’ar Somoel:
“Fal’ wa’atham, o Moses, ya …gara gel ni boed e n’ew nib yo’or. …
“Ma musap, guba’ rom, nge taw ko tomuren e yafas rom.”10
Moses nike siyeg fare mo’oniyan’ e ba wo’ nib achig nib tamilang ni fan ngodaed, demtrug ko gin ni gadaed bay riy u lane yafas. Ba mulwol ni rib ga’fan ni fan ngom—ni ngam nang ko mang e ngan rrin’ napan ni ra gay rogon ni nge baen nigem. Boed Moses, me gur, e kukun tawa’ath nigem ko ayuw u tharmiy.
Pi motochiyel nge tawa’ath
Urogon ni gara pir’eg e biney e ayuw u tharmiy, ni boed Moese, ma dabin baen nigem ma dam pagem ko lumel? N’en ni rib tamilang nike buch nike yoeg Somoel Rok e Ir e ke yoeg ni ga’ar: “Ere, Gag Somoel, ni gu manang e pin’en nibe buch u fayleng, e ku pining e tapigpig rog ni Joseph Smith, Jun., ma ku non ngak u tharmiy, ma ku pi’ e motochiyel ngak.”11 Thin riy nib moem rogon boech, ma rayog ni ngad yoeged ni Somoel, e manang “e tin tomur nge taw ko tin tabolngin,”13 manang e pin’en nib momaw’ u lane rran rodaed. Machane, ke pi’ e kanawo’ ngodae dni ngad siyegned e pi lumel nge sikeng, ni oren riy e ke yig ko mo’oniyan’ nge salap l’ugun rok.
Moem kanawo’en. U dakean e tapigpig Rok, me be non Got ngodaed, ni pifaak, me pi’ e pi motochiyel ngak.” Rayog ni ngad thilyeged fare thin ni ngad ga’ar gaed, “ Gag, ni Somoel, … e ku pining e tapigpig rog ni [President Russell M. Nelson], ma ku non ngak u tharmiy, ma ku pi’ e motochiyel ngak. Gathi ba riyul’ nib falel’?
Gube micheg ni riyul’ nike non Somoel ngak Joseph Smith u tharmiy, ni Somm’on nike Guy. Kiki non ngak President Nelson ko rran rodaed. Gube micheg ni Got e i non ko pi profet ni kakrom ma ke pi’ e motochiyel ngoraed ninge powi’iy pifaak ko falfalen’ u lane biney e yafas nge bin migid.
Be ulul Got nibe pi’ e motochiyel ngak e profet rodaed e daba’. Wo’ e ba’—tabinaew e somm’on, Galasia ni ba’ nibe fol ko gospel; nike thil e machib u tabinaew ko kemsus ni machib; temple ni be thil rogon e n’en ni yibe rrin’ riy nge gam’ing; nge bin bi’ech e Program ko Bitir ko 2020. Gube falfalen’ ko mangil nge tu’ufeg rok e Chitamangiy nu Tharmiy nge Faak, ni Yesus Kristus, nike fulweg fare Galasia rok fare Tathapeg nga fayleng biyay ma ke pining e profet ko rran rodaed. Fare gospel rok Yesus Kristus nikan fulweg e baga’ nib momaw’ nge ngiyal’ riy nib sug ko falfalen’
Denen e Dariy Bingyalʼ ni Bay e Falfalaenʼ Riy.
Pi motochiyel ningan fol riy nikan pi’ ko profet rodaed e kiy ni gathi kemus ni ngan siyeg e salapl’ugun rok e mo’oniyan’ machane nggki pi’ e falfalen’ nib machalbog. Biney nib thothup e ba moem; mat’aw, fa fol ko fapi motochiyel, me pi’ e tawa’ath, me pi’ e tawa’ath e, falfalen’, nga lane yafas rodaed.
Machane, rogon nike gay rogon fare mo’oniyan’ ninge baen nag Moses, e be gay rogon ni nge baen nigem. Gubin ngiyal’ ma ma baen ko ban’en ni gathi ir. Gubin ngiyal’ ma ma mithag ko ir mini’. Ma yoeg ni ran fol ma ra kireb nag e yafas rom ma ra chuweg e falfalen’ rom.
Rayog ni ngam leam nag boech e baen rok? Boed, nima baen ni chingaw’ e dariy ban’en nib kireb riy machane ra pi’ e falfalen’. Ma tay daed nga fithik e tin tagan ban’en ni rayog niba’ ko social media, ni yibe yoeg ya’an ney nge rogon e yafas. Ere, ma na’nggin daed ngad guyed ban’en u online ni ra kireb fa amith nag daed, ni boed e pornography, kakring boech e gidii’, nge baen nima pi’ e marwaer ko tafney rodaed nge murus nga lane gumircha’en daed nge tafney rodaed. Ma kathkath nib munguy nibe ga’ar, “Kemus ni ngam lakeg, ma ri gara falfalen’.”
Fapi thin nike yoloey ba profet nikab kakrom ko fare ke Babyor ku Mormon e baga’ nib fan ko rran rodaed: “Denen e dariy bingyalʼ ni bay e falfalaenʼ riy.”13 Aygun poeyed e baen rok Satan nib fal’ rogon. Aygun gel gaed ngay ma gadaed gu’ e baen rok nge murwel rok e cha’an nima gay rogon ni nge kireb nag e ya’el rodaed me chuweg daed ko falfalen’ nge rir rodaed.
Pi walageg, ngarin ulul gaed ngad yul’yul’ gaed, ya kemus rogon ni rayog ni ngan nang e n’en nib riyul’ man rung’ag luman Somoel u dakean e pi tapigpig Rok. “Ya fare Kan ni Thothup e mayoeg e tin riyulʼ ma darmabaen. … Pinnʼey e kan dag ngodaed nib tamilang, ni fan ko thap ko ya’el rodaed. … Ya Got e kiki weliy e pinnʼey ngakʼ e pi profet ni kakrom”14 Gadaed Gidii’en Got ni Gubinfen, athap ku Israel! Kad mo’owaer gaed? “Ngad mul gaed fa ngad siyeged e cham? Danga’! … Ngad fol gaed rok Got, u fithik e ya’el, gumircha’ey, nge pa’ey, ma ngad pired ni gadaed ba yul’yul’.”15
Gube micheg mornga’agen fa En ni Thothup u Israel—ni ir Yesus Kristus. Gube micheg mornga’agen e tu’ufeg Rok, riyul’, nge falfalen’ nike yag nag u dakean e miligach Rok nib manemus mab thothup. Napan ni gadaed ra fol ko pi motochiyel Rok, ma gubin ngiyal’ ma rani powi’iy daed ma dabiyog ni ngan baen nag daed. U dakean fithngan e Tathapeg rodaed nib thothup, ni Yesus Kristus nib thothup, amen.