2010–2019
Thothup nge Wo’en e Falflaen’
October 2019 general conference


Thothup nge Wo’en e Falflaen’

Faflaen’ nib gaa’ bay yib udakaen e thothup nib gaa’ romed.

Pi walageg, gube meybil nag gelngiy ni nge ayuweg nem ko n’en ni gabe gay ni fan e falfalen’. Boech e gidii’ e ra thamiy nike gaman, machane dariy bee’ ni ra siyeg e falflaen’ ni yibe pi’. Demtrug bee’ ni ra adag ni nge fek fa adag e falflaen’ nib n’uw nap’an.

Iraram e n’en ni Chitamangiy nu Tharmiy; Faak ni Tu’uf Rok, ni Yesus Kristus; nge fare Kan ni Thothup e ke pi’ ni gubin ko e ya’el ni fak e Chitamangiy nu Tharmiy nib fos e chiney, ni ra fos, fa ki i paer u dakean e ra fayleng ney. Binem nikan pi’ e boech e ngiyal’ ma yima yoeg e wo’en e falflaen’ ngay. Alma ni profet e ke yoeg nap’an nibe machib nag e pumo’on ni fak nike denen. Manang Alma ni denen e ri dabyog ni nge mange falflaen’ ko fak—fa ngak’ e fak e Chitamangiy nu Tharmiy.1

Ke fil ko fak ni thothup e kemus e iraram e kanawo’ ko falflaen’. Keyog nib tamilang ni n’en nib thothup e ke buch u dakean fare Bayul rok’ Yesus Kristus nike bi’ech nag daed me ma’ang’ang nag daed.2 Kemus ni dakean e mich ngak’ Yesus Kristus, ma yibe kalangan’uy, ma yibe fol ko pi m’ag ma rayog ni ngad fana’yed e falflaen’ ni ri gadaed ba adag ni nge mang ngodaed.

Meybil rog e daba’ e ngayog ni nggu ayuwegnem ngam nang fan ni falflaen’ nib rib gel e ma yib ko tin nib thothup rom ya ngayog ni ngam rrin’ e n’e nib mich u wun’um. Ma arame gura weliy e n’en ni gu manang rog ni mornga’agen e n’en ni rayog ni ngad rrin’ed ni ngad thapeged e binem e tawa’ath ni ngan thothup boech.

Fapi babyor nib thothup e be fil ngodaed ni fithik boech ban’en, ma rayog ni ngad thothup gaed fa di thothup gaed nap’an ni gadaed ra gel nag e mich rodaed ngak’ Kristus,3 dag ni gadaed be fol,4 kalngan’uy,5 miligach ni fan Ngak’,6 thapeg e pi gam’ing nib thothup, man cha’ariy e m’ag rodaed Ngak’.7 Ra ngan thapeg e tawa’ath nib thothup ma ba tu’uf ni ngan sobutan’ nigey,8 man munguy,9 man athamgil.10

Reb e n’en nike buch ni ri gu ba adag ni nggu thothup e ke yib ngog u lane Salt Lake Temple. Ku waen nga lan fare temple ni somm’on rog nikan noeg ngog boech’uw ban’en ni gube leam nag. Kuguy fapi thin ko fare nu’un nibe ga’ar: “Thothup ngak Somoel” nge “Fare Nu’un Rok’ Somoel.” Ku thamiy e falfalen’. Machane ug leam nag fa’anra ke fal’ rogog ni nggu waen nga langgin.

Nina’ nge papa’ rog e ranow ni yow m’on rog nap’an ni gu warod nga lane temple. Ni fith ngomaed ni nggu daged e recommend romaed, nge babyor nibe dag ni rayog ni nggu warod.

Galabthir rog e yow manang ba mo’on niba’ ko fare tebel ni yima fek e recommend riy. Ere miyow non boch’uw ngak’. Mug waen nga m’on ni go’gag nggu paer nga biyang nib ga’yang ni gubin ban’en riy ma ba wechwech. Mug sap ko chig ni rib tolang nga lane lang ni boed lanelang u waen. Ta’abochingiyal’, ni yib ngog nib tamilang ni ku un ngaram biyay.

Mug rung’ag boechi lamay—ni gathi lumag. Rib munguy rogon nibe non nibe ga’ar: “Daworum un bi’id ngara’. Gabe leam nag e ngiyal’ u m’on nikan gargalegem. Um moy u bang ni boed e biney. Kam thamiy ni kan ni nge yib fare Tathapeg nge sak’iy ko gin ni gabe sak’iy riy. Kam thamiy e falflaen’ ya ga ba adag ni ngam guy.”

Binem e ke buch u lane Salt Lake Temple ni ta’abochingiyal’. Machane ragu leam nag ma kube pi’ e, gapas, nge bochi falflaen’.

Kug fil bo’or e ban’en binem e rran. Kemus ni fare Kan ni Thothup e ma non nib, achig luman. Rayog ni nggu runga’ag nap’an niba’ e gapas ulan gumircha’eg. Ma pi’ e falflaen’ nge pagan’ ni gube thothup iyan. Ma binem e ma pi’ e falflaen’ ni ku thamiy ko chingiyal’ nem ulan e temple rok’ Got.

Kam guy ulan e birom e yafos nge birok e gidii’ e yafos e falflaen’ nibe yib ni yibe thothup iyan. Fare wik ni kaffini thimur, ma kugu paer u to’ben e gidii’ ni rayog ni ngar m’ad nib gel e mich roraed ngak’ e Tathapeg ma yad ba falfalen’.

Bagyad e ba mo’on nib liyeg e tabinaew rok’. Ir nge ppin rok’ e yow be non nib achig luman row nap’an ni gubow e pagael ni fakag. Gumnang row nike bukun e duw. Kuguy fare Bayul rok’ Yesus Kristus nike murwel ulan e yafos roraed nge lane yafos ko chonggin e tabinaew rorow.

Kar dugliyew ningar talegnew e tafley nibe ayuweg e yafos rok’. Ba’ boechi thamtham nib munguy ni gu thamiyed nap’an ni non ngomaed. I tingi’ nap’an ni weliy mornga’agen nib falflaen’ ko fare gospel nge ma’ang’ang riy ni nge ayuweg nge tabinaew rok’ nib tu’uf rok’. I weliy mornga’agen e duw nib falflaen’ nike pigpig ulan e temple. N’en nike yoeg e re mo’on ney, ni ngan rrin’ me tay fare pagael ni fakag pa’ nga lolgen nibe pu’og fare gapgep ngay. Mug meybil. Nap’an ni gu rrin’, mug thamiy ni ra ta’aboch ma ra guy e Tathapeg rok’, ni yow ra mada’.

Ku micheg ngak’ ni ra thamiy e falflaen’, tu’ufeg, nge falflaen’ rok’ e Tathapeg. Me tingi’ nike falflaen’ nap’an ni gu chuw gow. Bin tomur e thin rok’ ngog e “Mog ngak’ Kathy nib tu’uf rog.” Kathleen, ni ppin rog, e yan bukun e duw ni i pi’ e athamgil ko tabinaew rok’ ni ngar laked fare pong rok’ e Tathapeg ni ngan nib ngak’, man fol ko pi m’ag, ya ngeyog ni ngan thapeg e falflaen’ riy.

In e awa nga m’on me yim’. In e wik nike yim’, me yib e ppin rok’ nike fek ba tawa’ath ngomow e ppin rog. Me tingi’ nap’an ni gamaed be non. Me ga’ar, “Ku leam nag ni gura kirbaen’ ni go’gag. Ma gub falflaen’. Gimew be leam nag nib mangil?”

Gomow ni gomow nag gelngin ni ba adag e pumo’on rok’ ma gomow nang rogon ni kar nangew Somoel, ke tu’uf rorow, ni kar pigpig gow ngak’, e goeg ngak’ ni falflaen’ nibe thamiy e tawa’ath nikan micheg nag ni bachane ke, pigpig nib yul’yul’, ma ke thothup boech. Thothup rok’ e ke yag nag ko binem e falflaen’.

Boech e pi’in nibe motoyil e daba’ ni ga ga’ar: “Mongfan ni Dagur thamiy e gapas nge falflaen’ ni kan micheg nag e pi’in nib yul’yul’? Ku ug athamgil u fithik e gafgow, machane dagur thamiy e falflaen’.

Mus ngak’ Joseph Smith ma ke yan u fithik e sikeng. Ke meybil nag e gapas nap’an ni ki moey u kalbus u Liberty, Missouri. Ke yul’yul’ ngak’ Somoel. Ke gel e thothup rok’. Machane dar thamiy e falflaen’.

Me fil Somoel ngak’ ni athamgil e ba tu’uf rodaed ni gadaed gubin ko boech e ngiyal’, ma sana ba n’uw nap’an, ni gadaed ba’ u fayleng. Ba’aray e mulwol rok’ Somoel ngak’ e profe rok nib yul’yul’ nike gafgow.

“Ke yoeg ni fa’anra noen’ Josef Smith nga lane loew, fa lan pa’ e gidii’ nib ta li’ e gidii’, ma kan noeg ni ngan li’ ngem’; fa’anra kan noen’ nga biyang nib to’ar; fa’anra gubin e tin tagan ma ke aw ngak’; fa’anra nifeng ni gel e ke magawon nag; fa’anra tharmiy e ke ulnguy gubin e tagan, ma gubin ban’en ma ke peth nga ta’abang ko kanawo’ nga lang, nge gubin ban’en, fa’anra mab langan e enfiyarno ngak’, ma thingari nang ni gubin e pin’ey nike buch rok’, ma bay fan ngak’.

“Fare Fak e Gidii’ e ke yib ngoraed nga but. Me fith fa’anra ba mangil Ngak’?

“Ere, mu athamgil, me paer fare priesthood rom; ya kan ta’ ni aram rogon, dabi chuw. Yi manang e rran rom, ma duw rom e dabin tha’eg nib achig; ere; dam rus ko n’en ni rayog ni nge rrin’ e gidii’ ya Got e ra paer rom nib manemus.”11

Iraram e n’en nike yoeg Somoel ngak’ Job, nike gafgow nib gel ke pag fare Bayul ke n’anggin ke thothup boech. Gadaed manang ni Job e be’ nib thothup, ko rogon nikan weliy mornga’agen: “Immoy be’ nib mo’on ni Job fithingan, ni ir par ko nam nu Uz, i par ni be liyor ngak’ Got ma ba yul’yul’ ngak’, i par ni ir be’ nib manigil ma be ayuw ni nge dabi rin’ ban’en nib kireb.”12

Ma arame m’ay e fal’ab rok Job, tabinaew rok’, nge m’ar. Kaga manang ni manang nike marwaer Job ni thothup rok’, nikeb ko gafgow, e ke pi’ e falflaen’ ngak’. Boed ni ke leam nag Job nike yib e gafgow ko thothup.

Machane Somoel e ke pi’ ta’ab machib ngak’ nike pi’ ngak’ Joseph Smith. Ke pag Job nge guy e kirbaen’ rok’ ko rogon nibe guy Got. Me ga’ar ngog:

“Mu sak’iy chiney ngalang nrogon e pumo’on; ngam fulweg, e tin nggu fith ngom.

“Um moy u uw ko ngiyal’ ni gu sunumeg e fayleng? fa’anra er feni yo’or e tin ni ga manang, me’ere mu weliy nggu rung’ag.

“Mini’ e duwgiliy ga’ngin e fayleng ni nge yan i par, mini’ e gad e fol ngay? go ga manang murung’agen e pin’ey?

“Mang e ni reg e pi dugo’ ko fayleng nga daken? mini’ e ayliy e malang u tabthingen e fayleng;

“Be puf e woch e rofen nem me tang e pi t’uf i ta’bang, ma gubin pi chon e tharmiy e ra tolul niged e felflaen’?”13

Ma rame, tomuren ni kalngan’ Jod ni yoeg ni dani mangil Got, man ayuweg Jod nge sikeng rok ni thothup rogon. Me kalngaen’.

“Ma arame me fulweg Job Somoel, me ga’ar,

“Gu manang ni gubin mrayag rom, nu gubin e tin ga ra finey mrayag rom ningam rrin’.

“Ga be fith ko di’in mu gu thag ninggu fith rogon e gonop rom, ni yugu aray rogon ndariy bochi ban’en ni gu manang? ug weliy murung’agen bogi ban’en ndri da gu nang fan ni bogi ban’en nib pag feni fel’ ni dabi taw e leam rog ngay.

“Kamog ngog, ni nggu motoyil ngom, ni ngam non: Ma ngguy rogon i fulweg, e tin ngam fith ngog.

“Ug par ni kemus ni tin ke weliy e girdi’ ngog e gu manang: ma chiney e kug guyem nga owcheg.

“Ere kug tamra’ nga urngin e tin ku gu weliy, ma kug kolngan’uy u roy u fithik’ e fiyath nge awat.”14

Tomuren nike kalngan’ Job ma ke thothup boech nib gel, ma ke fal’eg Somoel wa’athan ni rib polo’. Machane sana bin tha’abi mangil e tawa’ath ngak Job e ke gel nike yan u fithik e gafgow nge kalngaen’. Ke thapeg e falflaen’ ko pi rran ni kuba’ rok’.

Thothup nib gel e dabi yib ni kemus ni yibe ning. Ra yib ni yibe rrin’ e n’en nib tu’uf ni nge thilyeg Got daed riy.

President Russell M. Nelson e ke pi’ e n’en ngog ni boech nib thin nib mangil ko rogon ni ngan yan ko wo’ nib mangil ngan taw ko n’en nib thothup. Ke yup pa’ ko kanawo’ ni ryib mangl.

“Mu nang gelngiy nima yib ni yibe kalngan’uy ni gubin e rran—ni yibe gay rogon ni ngan mangil boch’uw nge boch’uw ni gubin e rran.

“Nap’an ni gadaed ra kalngaen’, ma kad mel’eged ni ngan thil gaed! Gadaed ma pag fare Tathapeg ni nge thilyeg daed ngad mangil gaed. Gadaed ma mel’eg ni ngad gel gaed ni thothup man thapeg e falflaen’—falflaen’ ko bayul Rok’. Nap’an ni gadaed ra kalngan’, ma gadaed be mel’eg ni ngad boeded boech Yesus Kristus!”

I ulul President Nelson ni be pi’ e biney e athamgil ko murwel rodaed ni ngan thothup boch: “Somoel e dar leam nag ni ngarin ma’ang’ang gaed e chi ngiyal’ ney. … Ma gathi be leam nag ni ngarin ma’ang’ang gaed ko chingiyal’ ney. Kalangan’uy ni gubin e ngiyall’ e kanawo’ iyan ko ma’ang’ang.”15

President Dallin H. Oaks, ko fare conference ni kaffini m’ay, maki ayuwegneg kuguy nib tamilang rogon ni ngad thothup gaed nge rogon ni rayog ni ngad dared ngay. Ke ga’ar: “Urogon ni rayog ngad thapeged e thothup? Urogon ni nrayog ni nge paer e thothup rodaed ko gin ni nge paer ma ke paer fare Kan ni Thothup rodaed? Urogon ni rayog ni ngad sap gaed ko re fayleng ney nib mangil e sap rodaed?”16

Ke tabab President Oaks ko mich ngak’ Yesus Kristus ni ir e Tathapeg rodaed. Binem e ma powi’iy daed ngad n’aged fan e kireb ni gubin e rran ma gadaed leam nag ni yibe fol ko pi motochiyel Rok’. Binem e mich ngak’ Yesus Kristus e ma yib nap’an ni gadaed ma fil e thin Rok’ ni gubin e rran.

Fare tang nikanoeg e “More Holiness Give Me” ngay e be yoeg ni ngan meybil ni nggam thothup. Cha’an nibe non e yoeg ni thothup ni gadaed be gay e tawa’ath nike yib rok’ Got, ko yungiyal’, nap’an ni kad rirn’ed gubin ni rayog rodaed. Mu tafneyem ko bin tomur e thin:

Ma’ang’ang nikan pi’ ngog,

Gelngin ni ngan gel ngay,

Pithigyed ko tin alit u fayleng,

Yi ba adag ni ngan yan nga tabinaew.

Keyog ni ngan paer u tharmiy,

Ni ra falflaen’ug,

Nike fal’ boech wa’athag ma kan thothup—

Ere, mu boed, e Tathapeg.17

Demtrug ko mang e magawon rodaed, demtrug ko gin ni gadaed ba’ riy ko fare kanawo’ nib mat’aw, ma aygi buch e meybil rodaed ni ngan thothup. Gu manang ni ran fulweg taban e meybil rodaed, ma ra gel e falflaen’ rodaed. Rayog ni nge yib nib sag’al, machane ra yib. Ke yib e binem e michan’ ngog rok’ e Chitamangiy nu Tharmiy nbi sug ko tu’ufeg nge Fak nib Tu’uf Rok’, ni Yesus Kristus.

Gube micheg ni Joseph Smith e ba profet rok’ Got, i President Russell M. Nelson e profet rodaed e daba’. Got ni Chitamangiy e ba fos ma gadaed ba tu’uf Rok’. Ba adag ni ngad suloed nga tabinaew ni gadaed e tabinaew rodaed. Be pining daed e Tathapeg rodaed ni ngad laked ko kanawo’ rodaed ngaram. Kar fal’egew e kanawo’ riy. U dakean fithngan Yesus Kristus nib thothup, amen.

Print