2010–2019
Moy, Mu Lekeg—fare Tonom nike Ayliy Wo’en Somol
October 2019 general conference
2:3

Moy, Mu Lekeg—fare Tonom nike Ayliy Wo’en Somol

Ke yib rok Mark L. Pace

Sunday School General President

Fare Somoel e ke fal’egin rogon fapi gidii’ Rok’ ko lumel rok fare mo’oniyaen’. Moy, Mu Lekeg e ir fare tonom nge fal’eg pi wo’en rok Somoel.

Kad falfalaen’ gaed ni kad bad nga ta’abang ko fare general conference ko Fare Galasia ku Yesus Kristus ni fan ko Gidii’en Got Rok’ ko Tin Tomur e Rran. Ba tawa’ath ni ngan nang e tafney nge murwel rok Somol nibe yib ko fapi michib Rok’ ko fapi profet nge pi apostle. President Russell M. Nelson e ir fare profet nibe fos rok’ Somol. Ri gadaed ba tawa’ath ko pi machib rok’ ni kan thog’thog’ nag ngak e dabay.

Michaen’ug ngay ko tin ni kan mu’ i weliy e dabay. Gube micheg rok Got, ni’ir fare Chitamangiy ni Gubinfen. Bay nib fos ma gadaed ba tu’uf rok ma matangiy daed. Tunom rok’ ko wo’en e falfalaen’ e ma pi’ e tawa’ath ko biney e yafos ni nge yog ni ngad suled Ngak’.

Ma gube micheg rok Yesus Kristus. Ni kari mus ni Yigo’ Ir fare Fak Got nib m’on. Ke faseg daed ko yam’, ma ke thapeg daed ko denen nap’an ni kad kalngaen’ gad me michaen’ daed Ngak’. Fare bayul rok’ ni darma m’ay e fan ngodad ni ra fek dad e tawa’ath ko yafos ni manemus. “Og nag e magar ngak Got ko fare tawa’ath Rok’ ni fak ni karimus” (“The Living Christ: The Testimony of the Apostles,” Liahona, May 2017, inside front cover).

Gidii’en e Galasia ko Tin Tomur e Rran u lan e fayleng e kan tawa’ath nag raed rayog ni ngar tayed fan Yesus Kristus ulan fapi Temple Rok’. Ta’areb e pi temple ney e yibe fal’eg rogon u Winnipeg, Canada. Ppin rog, Anne Marie, nge gag e kug warow nguyew e ri gin’ey ko August ko biney e duw. Fare temple e rib fel’ ya’an ni kan ngongliy rogon ma ra gel e fel’ riy nap’an nikan mu’ i toy. Machane, dabiyag ni nge fel’ e re temple ney u Winnipeg, fa dem turug yang, ni fa’anra dariy fare dayif riy nib gel.

Fare gerbeb-nibe chel’chel’ nga but’ nib tolang pulwon’ u Winnipeg e ke fal’eg e mom’aw rogon ni ngan ngongliy fare dayif ko fare temple. Ere, kan duwgily ni fare dayif ko re temple ney e ngan tay 70 e wasay riy u fithik e cemen. Pi wasay ney e 60 radan nge 12 nge mada’ ko 20 pi inche ga’ngin. Yibe pi pi’ nga fithik e buut’ nge mada’ ko ngayal’ nibe math ko malang nib al’al’, ni gonopon 50 radan nga fithik e buut’. Ko rogon ney, fapi 70 e wasay era pi’ gelngin, fare dayif ko fare temple u Winnipeg.

Gidii’en e Galasia ko Tin Tomur e Rran, gadaed ma gay e dayif nib chuch’ugur ko biney ulan e yafos rodad—dayif nib thothup nib tu’uf ko fare milekag ko biney e yafos nge wo’en ni ngad suled ko tabinaew rodaed u tharmiy. Biney e dayif e kan toy nga dakan fare malang nib al’al’ ko thiliyeg rodad ngak Somol Yesus Kristus.

“Ere chiney, gal fakag, mu tayew u wunʼmew, mu tayew u wunʼmew ni fare war ni Tabiyul rodaed, niʼir Kristus, ni fachaʼ ni Fak Got, e thingar mu ufungew e dayif romew nga dakean; ya napʼan ni fare moʼoniyanʼ e nge piiʼ e nifeng rokʼ nib gel, … ma dariy gelingin ni nge miliymew iyaen nga butʼ ko fare dodow ko gafgow ni dariy nʼumngin i napʼan, ni bachan fare malang ni kam dumow gow nga dakean, niʼir ba dayif nib miyuluy, nib dayif ni faʼanra toey e gidiiʼ e naʼun nga dakean ma dabi puth nga butʼ” (Helaman 5:12).

Gadaed ba tawa’ath, ni gadaed ba fos ko biney e ngiyal’ ni fapi profet nge apostle e be fil ngodaed mornga’agen fare Tathapag Yesus Kristus. Lek wo’en e pi mulwol roraed enra ayuweg daed nge gel nag fare dayif rodaed ngak Kristus.

Rogon ni weliy President Russell M. Nelson u lane general conference ko October nike thimur ni ga’ar, “N’en ni yima rrin’ u lane Galasia e ngan ayuweg gubin e gidii’ riy nge gel e mich roraed ngak Somoel ni Yesus Kristus rodaed nge fare Bayul Rok, man ayuweg raed ngad fal’eged mar fol gaed ko fapi m’ag roraed ngak Got, man gel nag raed man chiyliy raed ko tabinaew roraed” 20 Ulan e biney e fayleng nib mom’aw, biney e dabi moem. Fare mo’oniyaen’ e be alamrin nag fare cham rok ko mich rodaed nge pi tabinaew rodaed nib gel. Ra nge par e thothup rodaed, mab tu’uf “counterstrategies and proactive plans” (“Opening Remarks,” Liahona, Nov. 2018, 7; emphasis added).

Lek wo’en e mulwol rok President Nelson, Elder Quentin L. Cook ko fare Ulung ko fare Ragag nge L’agruw i Apostles nike pii’ed e biney Moy, Mu Lekeg ayuwe nfan ngak be’ nge pi tabinaew. Mulwol rok’ ab mu’un e tin ba’aray ngay:

  • “Fare machib nib be’ech ni ngan fil ulan e tabinaew ni Moy, Mu Lekeg … e kan ngongliy ni nge ayuweg gidii’en e galasia ni ngar filed fare gospel ulan e tabinaew.”

  • “Biney e Machib e nifan urngin e bee’ nge tabinaw ulan fare Galasia’ [Come, Follow Me—For Individuals and Families (2019), vi].”

  • “Fan rodaed e ngad ta’areb niged e Galasia nge tin nibe buchbuch u tabinaew nge rogon ni rayag ni nge mon’og nag e mich nge thothup min adag ni ngan sul ngak e Chitamangiy nbay u Tharmiy nge fare Somol Yesus Kristus” (“Deep and Lasting Conversion to Heavenly Father and the Lord Jesus Christ,” Liahona, Nov.). (“Deep and Lasting Conversion to Heavenly Father and the Lord Jesus Christ,” Liahona, Nov. 2018, 8–12.)

Tabab ko January ko biney e duw, Gidii’en Got ko tin Tomur e Rran e re tabab i fil fare Bin Be’ech e M’ag, nib mu’un fare Moy, Mu Lekeg nib ayuw ni nge powi’iy daed. Gubin e wiik ma bay e tin ni ngan fil riy, Moy, Mu Lekeg ayuweg daed ni ngan fil fapi thin nib thothup, yalen fare gospel, nge fapi michib rok fapi profet nge apostles. Ba ayuw nib ga’ ni fan ngodaed ni gubin.

Tomuren mureb e pul ko pin’ey ni yibe fil ni ga’angin yang u fayleng, mang e gadad be guy? Gadaed be guy ni fapi Gidii’en Got ko tin Tomur e Rran u gubin yang e be ga’ e mich roraed ma yaed be tay fan Somol Yesus Kristus. Gadaed be guy e gidii’ nge gathon e tabinaew ni yaed be fil mornga’agen e thin rok fare Tathapeg ulan fapi wik. Gadaed be guy nike mo’onog fare gospel ko fapi Sunday classes nap’an ni gadaed be fil e thin nib thothup u tabinaew ma gadad weliy e tin ni kan thog’thog’ nag ngodaed u galasia. Gadaed be guy ni be gel e falfalaen’ ko tabinaew nge rogon ni gadaed be be’eg fapi thin nib thothup.

Ri gu ba’adag ni kug mada’ nag bochi Gidii’en Got ko tin Tomur e Rran mug motoyil nge mornga’agen salapraed ko fare Moy, Mu Lekeg. Gelngin e mich roraed e ma sug nag gum’ircha’eg ko falfalaen’. Ba’aray bochi thin ni kug rung’ag ko gidii’en e Galasia:

  • Ba matam ke weliy, “Ri gu ba’adag fare Moy, Mu Lekeg ya be pi’ kanawo’en ni ngu micheg ngak pifakag ni mornga’gen fare Tathapeg.”

  • Ulan reb e tabinaew, ke ga’ar bitir, “Irraray rogon ma rayog ni ngu runga’ag e tin nibe mich’uwaen’ e galibthir rog ngay.”

  • Ba mitin e ga’ar: “Kan thog’thog’ nag ngomad rogon ni ngu ted Got u M’on. Ngayal’ [nug tafney niged] ‘ndariy’ e kan [suguy nag] ko athap, falfalaen’, gapas, nge mon’og ni dan gu ninged nrayag.”

  • L’agruw ni’ e kar guyew: “Gamow be be’eg fapi thin nib thothup nike thil rogon ko somm’on. Gadaed be fil ni bo’or ban’en ko tin ni kad filed somm’on. Somoel e ba’adag ni ngad sap gaed ko tiney nib thil rogon. Somoel e be taermadliy daed.”

  • Ba mitin e ga’ar: “Gu ba’adag ni gadaed gubin ma gadaed be fil e tiney u ta’abang. Somm’on riy, kemus ni gamaed be be’eg. Chiney, gamaed be fil kanawo’en.”

  • Bee’ nib ppin e weliy e tin ba’aray: “Somm’on riy, bay fapi lesson rom ma bay fapi thin nib thothup nibe ayuweg. Chiney, bay fapi thin nib thothup rom ma fapi lesson e be ayuweg.”

  • Reb e ppin e ke ga’ar: “Kug thamiy nib thil nap’an ni gura rrin’ [ko bin ba’aray] ni dab gu rrin’. Kug guy nike moem ni ngan weliy mornga’agen Yesus Kristus nge tin nib mich u wun’daed ngay ngak e gidii’.”

  • Reb e titaw e ga’ar: “Guma kol nag pifakag nge pi pifakfakag ko Madnom, ngu weliy mornga’agen fare Moy, Mu Lekeg u ta’abang.”

  • Reb e ppin e ke guy: “Moy, Mu Lakeg gube thamiy ni fare Tathapeg e be michib ngog. Ni’ir ni yibe thogthog nag u tharmiy.”

  • Ba matam e ga’ar: “Nap’an ni gadaed ra yus nag fare Moy, Mu Lekeg, woed ni gadaed fapi bitir nu Isreal, ni gadaed be achay langan e mab rodaed, ni gadaed be yororiy gathon e tabinaew rodaed rok fare mo’oniyaen’.”

Pi Walageg, ri gub falfalaen’ ngay ni kug mada’ ngomed nge motoyil e athamgil ni gamed be tay ko fare Moy, Mu Lekeg nibe tawa’ath nag e yafos romed. Kammagaer ko pi athamgil rom.

Fil mornga’agen fapi thin nib thothup nib mu’un e Moy, Mu Lekeg ngay e ba kanawo’en nra gel nag e sulweg rodaed ngak Yesus Kristus nge fare gospel Rok’. Gathi kemus ni gadaed be yon’ luwan ta’areb e awa ko missa ko ta’areb e awa u tabinaew ni ngan fil fapi thin nib thothup. Fil mornga’agen fare gospel e ba murwel ni nge ul’ul’ ulan fare wiik. Woed rogon ni yog reb e ppin, “Gathi ngan achig nag fare mo’olung ko galasia ni ta’areb e awa; machane ngan ga’nag ni nel’ e rran!”

Chiney, mu tafney nag fare ta’amagaran rok fare profet rodaed, President Nelson, napan nike yog ko fare October general conference ko 2018:

“Fare mo’oniyaen’ e be alamrin nag fare cham rok ko mich rodaed nge pi tabinaew rodaed nib gel. Ra nge par e thothup rodaed, mab tu’uf fare tonom nge fal’ig pi wo’en.” (Opening Remarks,” 7).

Ma gonpo’on (29 awa nga tomur) ko re Madnom ko misiw’, me ning fare mu’ulung ko ba tawa’ath: “Nap’an ni gabe gay rogon ngam ayliy rogon e tabinaew rom ni fare gospel e bay u lukungun, … fapi lumen rok mo’oniyaen’ era achig ulan e tabinaew rom” (“Becoming Exemplary Latter-day Saints,” Liahona, Nov. 2018, 113).

Uw rogon nra gel e lumel ku mo’oniyaen’ ni ta’abingyal’ nibe achig e lumel rok ko tabinaw rom? Rayog ni ra buch, ma ke buch ulan e Galasia, ni bachan e Somoel e ke fal’egin rogon fapi gidii’ Rok’ ko lumel rok fare mo’oniyaen’. Moy, Mu Lekeg e ir fare tunom nge fal’eg pi wo’en rok Somoel. Ni woed ni fil President Nelson mornga’agen, “Fare tabinaew nib be’ech nbay u lukungun, fare machib ko Galasia e bay gelngin ko fapi tabinaew.” Machane, bay ma ba tu’uf ni ngad rrin’ed u gelngindaed; nib tu’uf ni ngad “[laked] ni ngaed thilyegned e tabinaew [rodaed] ni’r e tigil’ e mich” (“Becoming Exemplary Latter-day Saints,” 113).

Ko pin’ey, ni woed rogon ni yog President Nelson, “Gadaed gubin mab mil fan ngodaed e tin nib thothup ni ngad rin’ed” (“Opening Remarks,” 8).

Ko fare ayuw ko Moy, Mu Lekeg Somol e be fal’egin rogondad “ko pi ngiyal’ ney ni gadad bay riy” (Quentin L. Cook, “Deep and Lasting Conversion,” 10). Be ayuweg daed ni ngad fal’egin rogon fare “dayif nib miyuluy, nib dayif ni faʼanra toey e gidiiʼ e naʼun nga dakean ma dabi puth nga butʼ” (Helaman 5:12)—ba dayif ko mich nikan yuluy nag ko malang nib gel ni’ir aram fare sulweg rodaed ngak Somol Yesus Kristus.

Nge par ni athamgil rodaed ni gubin e rran ni yibe fil fapi thin nib thothup me dag ngodad ni gadad be’ech ni ngaed thapegned e pi tawa’ath ney. Gube meybil u dakean fithngan Yesus Kristus, amen.