Liyoer Fithingan
Udakean e m’ag, gadad ba kanoeg u dakean e fithingan Yesus Kristus.
Nap’an e galabthir ni ba soen ko gargel ko fak, ni ba’ e muruwel rorow ni ngar mel’egew e fithingan ko bitir rorow. Sana, nap’an ke gargelem, fithingam ni ke pi’ ngom e fithingan ko pi tabinaw ni kakrom. Fa fithingam ni ke pi’ ngom e ba fithingan ni bo’or e galabthir kar mel’eged.
Fare profet Helaman nge ppin rok kar pi’ew fithigan ni ba’ ga’ fan ngak pi fak rorow Nephi nge Lehi. Helaman ko non ngak pi fak:
“Kug pii’ ngomew e ngachol ni fithingan e gal ni m’on i chitamangdad …ma kug rinʼ e biney ya napʼan ni nge yib ngaenʼmew fithingmew, me yog ni ngar bow ngaenʼmew; ma napʼan ni yow ra yib ngaenʼmew ma nge yib ngaenʼmew e pi muruwel rorow; …ni kanoeg, ma kun yoloey, morngaʼagrow ni yow ba mangil.
“Ere, gal fakag, gubaʼadag ni ngam rinʼew e tin nib mangil,”1
Pi fithingan ko Nephi nge Lehi ke ayuw rorow ni tay u wun’row fare muruwel nib mangil ko pi tabinaw nib kakrom nge ayuwegrow rrin’ tin nib mangil.
Pi walageg nib ppin’, dariy fan ni gadad ba paer, mang e thin ni gadad ba yoeg, fa 8 e duw rodad fa 108, ni bay e ngachol nib mangil rodad ni ta’ab e fan.
“Ya kan tawfe nag[dad] ko Kristus ni fol Kristus …ya [gadad] ba ta’ab rogon ko Kristus Yesus.”2
Ni gadad be chongin ko fare Galasia ku Yesus Kristus ni fan’ ko Gidii’en Got ko Tin Tomur e Rran, “bin somm’on e michmicheg rodad ni ngad fek fare fithingan Krustus u dakeandad, ko fare gam’ing ko tawfe.“3 U dakean biney e m’ag, kad micheg dad ni ngad tay u wun’dad Ir, fol gad pi motochiyel Rok, nge pigpig boech gidii’. Gadad ba adag ni fol biney e m’ag ni ke bi’ech nag gubin e Madnam nap’an gadad be fek fare sacrament nge ba falfalan’ bayay u fare tawa’ath “ko [ba] warow u yafos nib gapas”4
Fare ngachol ni ke pii’ ngodad nap’an ke gargeldad ni ba fan ngodad nge ta’areb nag ko tabinaw nu fayleng. Machane, nap’an kad “sumiy” gad bayay u tawfe, gadad ba nang fan gadad e mini’ ni ke gel’ nag. “E bachan e fare mʼag ni kam tayed ma arame ngan piningmed ni bitir rokʼ Kristus, …ya musap gad, …kam thap gaed ngakʼ kam chitamangyed; ya kamoeged ni pi gumʼirchaʼ romed e kethil u dakean e mich romed u fithingan; ere, kam sum gaed rokʼ”5
Ere, u dakean e m’ag, gadad ba kanoeg u dakean e fithingan Yesus Kristus. Ma, “ni dakuriy rebe fithingan ni kan piiʼ ara kureb e kanawoʼ ara banʼen nra yog ni nge thap e gidiiʼ riy, ma kari mus nu fithikʼ ngo dakean fare fithingan Kristus, ni fare Somoel ni Gubin Marayog Rokʼ.”6
Fare fithingan Yesus ni ke kanoeg umon ke gargelen. Ngak Pilung ni Benjamin, e angel ke yi’iy, “Ma bay ni pining ni Yesus Kristus, ni fare Tir ni fak Got, …ma chitinngin rokʼ e yira pining ni Mary.”7 Muruwel rok ko “t’uf ko biyul’”8 n i ke yog ngak pi bitir ku Got nap’an fare gospel u dakean e fayleng, ko fare rran ku Adam nge Eve u ngiyal’ ney, ere yad ba “nang e re ginnʼen ni ngar sap niged e manʼaegfan ko pi denen roraed ngay.”9
Bin tomur e duw, President Russell M. Nelson ke “fith nib yi’iy“ ngak pi walag nib ppin ni “sunmiy e ngiyal’ nib mangil u dakean ngad ayuweg gad kunuy e Israel.” Ke fith ni ngad bi’eg fare Babyor ku Mormon nge “nge teeng nag gubin e verse ni ba non morga’agen fare Taathapeg.” Ke fith ni ngad “non gad mornga’agen Kristus, falfalan’ en Krisuts, nge machib gad ko Kristus ngak tabinaw nge pi fagar [rodad].” Sana’ ga ba nang fan fare tawa’ath ko micheg rok ni “gur nge yad ba chuchugur nag ngak fare Taathapeg … nge bay yib e thiliyeg nge ma’ang’ang.”10
Micheg rodad ni ngad tay u wun’dad fare Taathapeg gubin ngiyal’ ni pi’ ngodad e gelngin ni ba sak’iy ko riyul’ nge matawon—ni dariy fan ni bay bo’or e gidii’ nib chuchugur fa ni kemus gur, bu’uw kemus Got ba nang mang kam rrin’. Nap’an gadad ba tay u wun’dad gubin ngiyal’ Ir nge Fithingan ni gadad ba kol, ni dariy ngiyal’ ko ta’areb nag nib kireb boech gidii’ fa pufthin nib kireb. Ko owchdad ngak fare Taathapeg, gadad ba guy dad ko gadad ba mini’ nib riyul—e bitir nib mangil ku Got.
Nap’an gadad ba tay u wun’dad fare m’ag rodad ni ba chigchig nag e tin ko fayleng, ni gel’ nagdad, nge pi e ayuw u ngiyal’ nib momaw.
Nap’an gadad ba mul u dakean e kanawo nib m’ag, ke mus ni ngad tay u wun’dad Fithingan nge t’uf Rok ngodad. “Ya ir gubin e gelingin, nge gubin e gonop, nge gubin e nangaenʼ; ma gubin banʼen ma rayog rokʼ, ma ir Beeʼ nib sug ko murnguy, …ngakʼ e piʼin ni yaedra kalngaenʼ me michaenʼraed nga fithingan.”11 Ere, dariy e lingaan ni tha’bi fel’ ko fare Fithingan ko Yesus ngak, u fithik’ e mʼingaenʼ nge kalngaenʼ, ni ba sap gad ni “rrin’ e tin nib mangil nge fel’ nag.”12
President Nelson ke machib: “E rran ni ke yan nap’an rayog ni ga ba Christian nib moecha’. Fare taliiw rom ni kemus mornga’agen ni kam man nga galasia u Madnam. E ba mornga’agen ni ga ba e gachalpen nib riyul’ ko Madnam nga Sabado. Dariy ban’en ko gachalpen ko fare Somoel Yesus Kristus ’boech ngiyal’’.”13
Adag rodad ni ngad fek dad u dakean dad fare fithingan ku Kristus ni gathi e thin. Ni gathi e micheg nib achigchig. Ni gathi tin ni thingar dad rrin’ed fa babyor ko ngachol ni gadad ba kol. Ni gathi pi thin ni gadad ba tay u dakean e ruuliy fa tay u dakean e rungrung. Fithingan ni ke “tay,”14 ni ke yeloy u dakean gum’irch’dad, nge “gagyel falʼngin u oewch[dad]”15
Fare biyul ko fare Taathapeg thingar dad tay u wun’dad, gubin ngiyal’, u dakean tafney radad, tin ni ngad rrin’ed, nge mada’ gad boech gidii’. Ni kemus Ir ba tay u wun’ fithingandad, machane ir ba tay u wun’ dad gubin ngiyal’. Tathapeg e ke fil:
“Ya rayog ni baʼ ppin ni nge pagtilin e bitir ni kuma unum e thuth, ma dabi runguy e bitir rokʼ ni diyen nag? Arragon, gomanga yaedra pagtilin, me gag e dab gu pagtilmed, O gidiiʼ ku Israel.
“Musap gaed, kug yoloey fithingmed nga lan paʼag.”16
President George Albert Smith ke fil, “Liyoer ngak fare fithingan ni kam kol, bachane borran ni bay e muruwel nib mangil ni ngam yog …ngak fare Chitamangem nu tharmiy …mang ni kam rrin’ ko ngachol [pin’ey].”17
Ni ta’ab rogon fare fithingan ko Nephi nge Lehi, rayog ni ba yog nge yeloy mornga’agen dad ni gadad ba gachalpen nib riyul’ ko fare Somoel Yesus Kristus? Gadad ba liyoer fare fithingan Yesus Kristus ni kad feked u dakeandad? Gadad ba la’agruw “e tapigpig nge tam’ag”18 ko t’uf Rok nge gelngin nib biyul’ Rok?
Ke fini buch, kug motoyil ko fare Babyor ku Mormon. U guruy bin tomur ko 2 Nephi, Kug rung’ag Nephi ba yog ban’en ni da gu bi’eg ni ta’ab rogon umon. U dakean e chepin rok, ke fil nge machib nag ko fare “Tabiyul’,” fare “Facha’ nu Thothup ku Israel,” fare “Saaf ku Got,” nge fare “Messiah.” Bachane nap’an ke ning e chepin rok, kug rung’ag ir ba yog pin’ey e thin: “Guma falfalaenʼ ko tamilang; guma falfalaenʼ ko tin riyulʼ; guma falfalaenʼ ku Yesus, ya ke bayuliy e yaʼel rog.”19 Nap’an kug rung’ag pi thin ney, gum’ircha’eg e ba falfalan’ nge thingar ngu motoyil bayay nge bayay. Gu ba nang fan nge fulweg ko biney e verse ni ta’ab rogon gu ba nang fan nge fulweg e fithingag.
Fare Someol ke yog, “Arragon, ke falanʼug ko pi gidiiʼ ney ni ke mʼagaenʼraed ngay ni ngar feked fithingag nga dakeanraed; ya fithingag e yira piningraed u dakean; ma yaed e gidiiʼ rog.”20
Ni gadad ba chongin ko fare Galasia ku Yesus Kristus ni fan ko Gidii’en Got ko Tin Tomur e Rran, ma gadad ra “[fek u dakeandad] u fithik e falfalan’ fare fithingan ku Kristus”21 u dakean ngad liyoer gad Fithingan nib t’uf nge muruwel nib mangil’. Gu ba mechig ni Ir ba “fare Saaf ku Got, arragon, fare fak ku Chitamangiy nib Manemus.”22 U dakean fithngan bitir Rok nib thothup, Yesus Kristus, amen.