Di Pired ni Gadaed Ba Yul’yul’ ko M’ag Rodaed
Gube piningey ni ngan lem nag fapi m’ag ni kam ngongliy ngak Somoel, nge boech e gidii’, u fithik e mangil, ni gamanang ni thin rom e dabi thil.
Pi walageg, napan ni ngad ninged e biney e mo’olung, ma aygud ted u gumircha’en daed e pi mich ni kad thapeged e daba’ ni mornga’agen e tin riyul’ ko fare gospel rok Yesus Kristus. Gadaed ba tawa’ath ko ngiyal’ ney ni gadad ba’ u ta’abang ni ngad gel niged e m’ag rodaed ngak Somoel ni Yesus Kristus ni gadad e pi tapig’pig’ Rok ma ir e Tathapeg rodad.
N’en ni baga’ fan ko pi m’ag ni yibe fal’eg ni nge fol riy e be yib ko tafney rog nib alamrin. U gelngin nib ga’ fan ngom ni ngam rrin’ e n’en nikam moeg? Ni ngan pagan’ ngom? ni ngam rrin’ e n’en ni kammog ni ngam rrin’? Ni ngam athamgil ni ngam ta’ fan e m’ag rom nib thothup? Ni ngam mangil? Napan ngad ra yul’yul’ ko pi mich’eg rodad ngak Somoel nge ngak reb e gidii’, ma gadad ra yaen ko kanawo’ nib mat’aw ngad suloed ngak e Chitamangdaed nu Tharmiy ma gadaed ra thamiy e tu’ufeg Rok u lane yafas rodaed.
Tathapeg rodaed ni Yesus Kristus e cha’an ni’ir gadad be sap ngak napan ni gadad be ngo’ngoliy e pi m’ag ma gadad be fol riy. Ke yib nga fayleng nike duwgily ni nge rrin’ e tirok e Chitamangiy. Ke fil mornga’agen fare gospel u fithik e thin nge ngongol rok. Ke bayul ni fan e denen rodad nge yog ni ngad fos gad biyay. Ke tay fan gubin e tin nike micheg.
Rayog ni ngan noeg e binem ni mornga’agen daed? Mang e ra buch fa’anra gadad ra salap buch’uw, sirgig buch’uw, fa darin fol gaed ko pi micheg rodaed? Ma fa’anra gadad ra pi’ed kiru’daed ko pi m’ag rodad? Ra yib boech e gidii’ “ngak Kristus” u fithik e tamilang ko n’en ni gadad be rrin’ed? Gab yul’yul’ ko thin rom? Pi m’ag ni yibe tay fan e gathi yug boechi ban’en ni yibe rrin’; ya rogoy ni yib gachalpen Yesus Kristus.
Gubin e pin’en ni gadad ma rrin’ u lane yafos rodad ma ke ga’ar Somoel, “Mu falfalen’, ma dam rus, ya gag Somoel e gubay rom, ma gura sak’iy u to’obem.”1 Ku thamiy ni ba’ rog napan gube t’uf e ayuw rog, gapas, sap rog ni nge mangil, ma kari m’ing e tafney rog ma gub falfalaen’ niba’.
Ke ga’ar Somoel, “Gubin e gidii’ nike n’ag e denen rok me yib ngog, me pinning fithingag, me motoyil ngog, me fol ko pi motochiyel rog, e ra guy owcheg me nang ku minii’ gag.”2 Iraram e micheg Rok ni dabi thil.
Ku fil nib ga’ fan e thin rog ni dab gu thiliyeg napan ni ku gub bitir. Reb e n’en nike buch napan ni ku sak’iy ni nggog fare Scout Oath. Gadaed ni gadaed ba’ ko Boy Scout u Mariken, napan ni ra tal’, e gubin ngiyal’ ma ban’en nib ga’fan ngog nge Galasia. Gube non ngak fapi scout, ngak e ppin nge pumo’on nike un ko scout ni yaed e toygang’, ngak e nina’—ma pii’ e magaer nib ga’ ngoraed—nge ngak e pi pumo’on nike un ko Scouting, gadad be oge, “Kamagar.”
Lane biney e mo’olung, ma ke yoeg President Russell M. Nelson, nge Elder Quentin L. Cook mornga’agen boech ban’en ni gadaed ra thiliyeg sap ko bitir ma gadaed yarmiy e tirodaed ko tin riyul’ ban’en. Ere, fare Madnom ni kaffini yaen, me President Nelson nge President M. Russell Ballard e kar weliyew mornga’agen e program nib bi’ech ni fan ko bitir nge Fal’ Yangren ko Fare Galasia rok Yesus Kristus ni fan ko Gidii’en Got ko Tim Tomur e Rran. Biney e thiliyeg u longob e faylang mornga’agen e Somoel rodaed nge Tathapeg, ni Yesus Kristus. Fare Bin Somm’on e Presidency nge Ulungi fare Ragag nge L’agruwi Apostle e ta’areb lungun raed ko biney e kanawo’ nib thil, ma gag e gube yoeg e mich rog ni Somoel e ke gagyeg nag maed riy. Gub falfalen’ ko bitir nge fal’ yangren ko fare Galasia ni ngad nanged e biney nib sar ngoraed u lane tabinaew nge galasia—ni ngar filed mornga’agen fare gospel, pig’pig’ nge n’en ni yibe rrin’, nge rogoy.
Thin ko fel’ yangren ko biney e duw, 2020, e be weliy mornga’agen e thin rok Nephi ni ngan “yan ngan rrin’.”3 Ke yoloey ni ga’ar, “Me yibi buch ni arame gag, Nephi, e gguʼar ngakʼ e chitamag: gag e bay guwaen nggu rinʼ e pinʼen ni ke motochiyel nag Somoel, ya gumnang ni Somoel e dabi piiʼ e motochiyel ngakʼ e gidiiʼ, me pag ni dabi bing woʼen ngoraed ni nge yog ni ngar muguʼuliyed e pinʼen ni ke motochiyel nag ngoraed.”4 Dem turug rogon nike n’uw napan nikan noeg e binem, ma gadad u lane Galasia e gadad be fol ko binem e daba’.
“Yan ngan rrin’” e be yoeg ngan chuw ko tin fayleng ban’en, min thapeg min fol ko tin nibe yib u tharimy, par ni yib mat’aw u fithik e athap nge mich ko tin nga m’on ban’en, pi m’ag ni yibe ngongliy ni ngan lek Yesus Kristus, ma gadad be gel nag e t’ufeg rodaed Ngak, fare Tathapeg ko fayleng.
M’ag e be yan u thilin daed nge Somoel. Gadaed chonggin e Galasia e kad ngongliyed e m’ag napan e tawfe ni ngad feked fithngan Yesus Kristus nga dakean daed, min paer ni boed Ir. Boed e fa picha’ ni kar tawfe gaed u fithik raen u Mormon, kad duwgilyed ni ngad manged e gidii’ Rok, “mab mʼagaenʼmed ngay ni ngam ayuweged gimed, ni nge yog ni ngam baʼud gaed; … mab mʼagaenʼmed ngay ni nge kirbaenʼmed ngakʼ e piʼin nibe kirbaenʼ; … mi gimed falʼeg laniyaenʼ e piʼin nib tʼuf rokʼ ni ngan falʼeg laniyaenʼ, ma ngam pired ni gimed e pi mich rokʼ Got ni gubin e ngiyalʼ ngo fithikʼ gubin banʼen, nge gubin yang ni gimed bay riy.”5 Gadad ni gadad ma pigpig ngodaed u lane Galasia e be m’ug ko m’ag rodad ni ngad tayed fan.
Napan ni gadad ra fek fare sacrament, ma gadad be sul bayay u dakean e re m’ag nem ni gadad be fek fithngan nga dakan daed ma kagadad duwgily boech ban’en ni ngad mangil gad riy. Tafney rodad nge mith’mith’ rodad ni gubin e rran, tin nib ga’ nge tin nib achig, e me m’ug ko micheg rodad Ngak. Thin Rok ngodad e, “Ma faʼanra gubin e ngiyalʼ ni gubay u wunʼmed ma aram e bay i paer e Kan ni Thothup rog romed.”6
Duwer rog e daba’, e gadaed ra yul’yul’ ko m’ag rodaed, fa boech ngiyal’ ma gathi riba’ e gumircha dad riy, yibe paer ni yibe ngongliy ma yibe kireb nag nib m’oem rogon? Napan ni gadaed ra ga’ar ngak bee’, “Gura pi’ e meybil ni fanam,“ma gadad be rrin? Napan ni gadaed ra ga’ar, “Ra gub ngar nggu pi’ e ayuw,” ma gadaed ma rrin’? Napan ni gadaed fal’eg rogon daed ni ngad thanged e malfith, gadaed ma rrin’? Napan ni gadad ra tingiy pa’ dad ngalang ni ngad ayuwegned bee’ ko calling rok nib be’ech, nibe yup’ fan ni gadad ra ayuw, ma gadad ma rrin’?
Reb e neap napan ni kugub bitir me paer e nina rog nga to’obeg u dakan e bet rog me weliy mornga’agen fare Motochiyel ko Dowef nib ga’fan. “Gu manang rok boech e gidii’, nike bukun e duw kafram,” ke non, “ni dakir thamiyed fare kan thothup ya darni fol ko fare Motochiyel ko Dowef.” Sap nga owcheg mug thamiy e thin rok ni aw nga gumircha’eg ni ga’ar: “Mog ngog, Ronnie, e daba’ (ke pining Ronnie ngog), ni gubin ngiyal’ ma gara fol ko fare Motochiyel ko Dowef.” Mug dugliy ngak e binem e thin, ma ku cha’ariy nike bukun e duw.
Re thin nem e ke ayuweg neg napan ni guba’ ko tafagar rog napan ni gub bitir nge taw ko ngiyal’ ni ku pilal’ ni guba’ ko murwel ni bo’or ban’en nima buch riy. Ku duwgily e tafney rog ko somm’on ni nggu fol ko pi motochiyel rok Got, ma dariy fan ni nggu sulsul riy. Ke ga’ar Somoel, “I gag, Somoel, e daguma thilyeg e thin rog napan ni gara rrin’ e n’en ni ku gog; machane napan ni dam rrin’ e n’en ni ku gog, ma dariy rom.“7 Mang e ke yoeg ko pi’in nima fol ko fare Motochiyel ko Dowef? Ni ra fel’ e dowef rodaed, ba’ gelngin daed, llowan’, gonop, nge angel ni nge matangiy dad.8
Boech e duw kafram, me Sister Rasband nge gag kug warow nga Salt Lake Temple ninge mabgol reb e ppin ni fakag mow. Napan ni gomow be un ko reb e ppin ni fakag mow ko sak’iy u waen, ya kab bitir ni nge un ko n’en nibe gam’ing ney, ma gomow weliy fan nib ga’fan ni ngan m’ag pa’ay u lane temple rok Got nib thothup. Rogon ni fil e nina’ rog nike bukun e duw kafram, e n’en ni ku gog ngak ni ga’ar, “Gomow ba’adag ni ngam mabgol u lane temple, ma gomow ba’adag ni ngam duwgily ngomow ni napan ni gara pir’eg e cha’an ni gaba adag, ma gara ta’ e re rran ni ngam m’ag gow u lane temple.” Ke duwgily e roffen nem.
Ma ka aram ma yoeg mornga’agen e thin romaed nge n’en nike duwgily e ke ayuweg ma puguran ngak ko “n’en ni th’abi ga’fan.” Ta’abuch riy me ngongliy boech e m’ag nib thothup napan ni ke le’engiy e pumo’on rok u lane temple.
President Nelson ke fil : “Gadad … ra sug ko gelingin fare Tathapeg u lane yafos rodad napan ni gadad ra ngongoliy e pi m’ag ma gadad fol riy nib fel’ rogon. Pi m’ag rodad e ma ta’ dad Rok me pi’ gelngin daed.”9
Napan ni gadaed ra fol ko n’en ni kad duwgilyed ngodad ma boed ni gadad be fol rok Somoel. Tafneyem ko thin rok Somoel: “Yu ngiyal’ ni um rin’ed e pin’ey ni fan ngak bagiyad e pi cha’ney nth’abi sobut’ u fithik’ e picha’ ni pi walageg ney e kam rin’ed ngog.”10
Puguran gad i rrin’ e pin’en ni kanoeg u lane babyor nib thothup. Ammon nge pifak Mosiah ulan fare Babiyor ku Mormon kar micheged ni ngar “machib fare thin ko Got.”11 Napan ni koel e salthaw ko Lamanite i Ammon min fek nga p’owchen i Lamoni ni Pilung ko Lamanite. Me ga’ar ngak fare pilung, “Bay gumang tapigpig rom.”12 Napan i yib e gidii’ ni kireb ni ngan iring e saaf rok fare pilung, me tha’eb Ammon pa’ rad nge mul. Ke gin’ fare pilung, me motoyil ko thin rok Ammon ni mornga’agen fare gospel me thil.
Ruth, u lan Bin Kakrom e M’ag, e ga’ar ngak e nina’ ko pumo’on rok, “Demturug e gin’en ni ga ra yan ngay, ma gu ra un ngom.”13 Dani thilyeg e thin rok. Fare Samaritan nib mangil u lan fare yaat u lane Bin Bi’ech e Ma’g, e ga’ar ngak facha’ niba’ e na’un rok fa’anra ayuweg facha’ nike mad’ad’, “Bay gu fulweg ngom e salpiy ni kam n’ag nga puluwon.”14 Zoram, u lan fare ke Babyor ku Mormon, e yoeg ni ra un ngak Nephi nge walagen. Yoloey Nephi ni ga’ar, “Napʼan ni ke michmich Zoram ngomaed, me mʼay e murus romaed ni bachan.”15
Mang ke buch ko pi michmich nib kakrom “ni ke micheg ngak e chitingin” nike weliy ulan fare pi scriptures ere ”fapi gum’ircha’en e gidii’ ra chel nga chitingin rodad”?15 Ulan e yafos umon e yafos ura’ kad mel’ig e tonom Rok Got, kad fal’ig e michmiched ni ngad ayuwegdad ni ma kunuy Israel u yafos ney nge migid e yafos. “Kad manged ngak Somoel,“nike weliy bukun e duw ke ga’ar Elder John A. Widtsoe. “Fare tunom ni yibe rrin’ e gathi i go’ e murwel rok e Chitamangiy, nge murwel rok fare Tathapeg, machane ku muruwel rodad boch.”17
“[Fare] ulnguy e n’en th’abi ga’fan nibe buch u dakean e fayleng e daba’,”18nike yoeg President Nelson napan nibe chuur u dakean e fayleng. “Napan ni gadaed ra weliy mornga’agen e ulnguy, ma baga’ ni gadaed be weliy mornga’agen e n’en nib ga’fan ko n’en nib riyul’: gubin pifaak e Chitamangdaed nu Tharmiy, pi’in ni kab fas nge pi’in nike yim’, e ba tu’uf ni ngar rung’aged mornga’agen fare gospel rok Yesus Kristus nikan fulweg.”17
Gag ni Apostle rok Somoel ni Yesus Kristus, e gube museg e thin rog ko micheg. Sommon, gube piningey: ni ngan lem nag fapi m’ag ni kam ngongliy ngak Somoel, nge boech e gidii’, u fithik e mangil, ni gamanang ni thin rom e dabi thil. Bin l’agruw, e gube micheg nag ngomed, ni napan ni gimed ra rrin’ e biney, ma ra fal’eg Somoel e thin rom nge murwel rom napan ni gara athamgil ni ngam fal’eg rogon e yafas rom, tabinaew rom, nge Fare Galasia rok Yesus Kristus ni Fan Gidii’en Got Rok ko Tin Tomur e Rran. Ra paer ngom, o pi walageg, ma rayog rom, u fithik e pa’agan’, ni ngam sap ko ngiyal’ ni kan “thap nga tharmiy, ni ginem e gara paer riy rokʼ Got u fithikʼ e falfalaenʼ ni dariy nʼumngin i napʼan … ya fare Somoel ni Got e ke yoeg.”20
Pin’ney e gube micheg u dakean fithngan Yesus Kristus, amen.