Gay Michuwaen’um, Damu Waer ko Mich.
Bay yip fan ningad gayed rogon urngin e rran ningad chuwgaed ko fayleng ngad sapgaed nga tharmiy.
Yibi Buch Kug od mug sakiy’ ngalang mug tabab ningu biy’eg pi scripture. Kug fek e smartphone rog mug paer nga chiya’, kug lemnag baygu bing fare Gospel Library app. Kug bing e phone rog mug tabab ningu biy’eg machane Kug guy boech e notification ko text milwol nge email ni ke yib foplaen’. Kug lemnag, “Gura biy’eg fapi milwol nib papay, ngu sul ko biy’eg fapi scripture.” Machane, tomuren la’agruw e awa kug biy’eg fapi text milwol, email, news, nge post ko social media. Nap’an kug guy e ningyal, Kug papaynog ningu taermedliy ko rran. Fa binem e kakadabul Dabkug biy’eg e scripture, aram fan dabkug thapeg e tin gaa’ fan ko ya’el rog ni Guba a’dag.
Gelnginiy ko Ya’el.
Gube lemnog ni ta’ab rogmed. Keyib bo’or e tawa’th ngodad udakean e modern technology. Rayog ninge pii’ e fagar nge tabinaew, lowaen, nge new ko ban’en ulongob e fayleng. Machane, rayog ninge thang tiyaen’daed ko fatin gaa’fan: e tiyaen’daed ko tharmiy.
Gube yoeg fapi thin ko profet rodad, President Russell M. Nelson, ke yoeg: “Gadadma paer ulane fayleng ni bay bo’or e tin mom’aw nge tin cham riy’. Fare yalen ko social media nge news ni 24-awa ma yib gubin yal’. Fa’an gadad ba’adag ningad nang fan urngin e lam nge pi philosophy ko gidii’ nima cham ko fatin riyul’, thingar ningad filed urrogon ningad thapeged e thogthog.“
President Nelson ke ul’ul’ nike fil, ”U fapi rran ni bay yib, dabiyoeg ningan fas e ya’el ko bee’ fa’an dariy’ e powiy’, fanow, golnag, fa ayuw ko fare Kan Thothup.”1
Boech e duw u faram, President Boyd K. Packer ke weliy’ marunga’agen ulungiy deer, bachane ke yib bo’or e ice, kar tawufgaed u wuru’ e binaw rok nira fini maed’ ko bilig. Boech a gidii’ nib fel’, kar gayed rogon ningar thapgaed fapi deer, kar tayed boech e hay u to’obraed—gathi e gaan roraed, machane kar lemniged nira ayuweg fapi deer ningar fasgaed ko winter. Machane, bo’or e deer kar m’aed. Kar abichgaed ko hay, machane dabki duwuriy’raed nib fel’rogon, kar biligaed kar m’aed dariy’ fan abich roraed.2
Bo’or e milwol nima yib ngodad daba’ nap’an e ningyal’ ko nang fan ni woed rogon e duruwiy e hay nga deer—rayog ningad abich gaed urngin e erran, machane dabki duruwiy’daed nib fel’ rogon.
Bu’u ningad Uw e ngad dared ni fan e gaan ko ya’el rodad? Bo’or e ningayl, darma trendnog ko social media Nap’an ngad “[dared] nga somm’on“ ko e kanawo’ nib michmicheg, “marbaed ngar koeled taban fare layi wasey,“ ngad kayed fare wompngin ko fare gak’iy ko yafas.3 Bay yip fan ningad gayed rogon urngin e rran ningad chuwgaed ko fayleng ngad sapgaed nga tharmiy.
Ulane lik’ay rok, Lehi ke guy e gidii’ ni kar kayed fare wompngin machane kar chuwgaed riy’ bachan e pinning ko fare na’un nib gaa’ nib gaa’, i’ir e uf’uf ko fayleng.4 Arragon e gidii’ nib fel’ yangren ningar ilalgaed ulane e tabineaw ko Gidii’en Got ko Tin Tomur e Rran, mar ranoed nga urngin e mo’olung ko Galasia nge class, arragon rayong ningar uned gam’ing ulane temple, ngar pii’ed keru’raed mar ranoed “mar mul gaed nga wuru’ e wo’ miyaed malog [gaed].“5 Mang nima buch? Bo’or e ningyal nira buch, bachan kar rrin’ed urngin e ngongol nib t’uf ko ya’el, machane dabkar thilyeged nib polo’ ko gospel. Kar abichgaed machane dabkar duruwiy’ed.
U reb e rogon, Kug mada’nag bo’ori med e Gidii’en Got ko Tin Tomur e Rran ni gamed ba gel e lowaen’med, bay gelingmed, nge mu michaenmed nib fel’rogon. Gamed ma nang i gimed e fak nib bitir rok Got ma bay e muruwel Rok ni fanmed ningam rrin’ed. T’uf ngak Somoel u fithik “gumircha’en daed, gelngin daed, laniyaen’ daed, nge gelngidaed.”6 Rayog ningam folgaed e pi michmicheg romed, mu tabab ulane tabinaew romed. Gamedma ngongoliy e mich, mu kalgaedngaen’med ngam gayed e rayog rom urngin e rran, ningam thapeg e falflaen’ nib manemus. Gamedba taermedliy ko e rran ni bay yib nap’an ngam fil ngam pigpignog woed rogon e gachalpen nib yul’yul’ rok Kristus. Gamedba ayuweg ngam taermedliyed e fayleng ko fare bin La’agruw e Wub, mu pinninged reb e gidii’ ngak Kristus ningar thapeg e gelngin ko Bayul Rok. Gamedba pethpethnog ngak tharmiy.
Arragon, re yib e sikeng ngomed. Machane nib riyul’ ko urngin e mfen. Tiney e rran ni fanmed, thingar ningad michuwaen’daed, dad mulgaed ko mich. Gube yoeg ni Somoel ma nang fan e sikeng rodad, ma udakaen e powiy’ ko President Nelson, Irba taermedliydaed ningad gelnoged. Ya michuwaen’ug fapi fanow rok fare profet ningad puluwgaed ko galasia u tabinaew, nge ulangin fapi galasia,7 kan yarmiy ninge ayuwegdaed ningad fasgad—arragon ningad gelnog—u tiney erran ko bilig ko tin ya’el.
Puluwnag ko Tabinaew
Mange ba yip fan e tabinaew nib dayif ko galasia? Tabinaew e rayag ni nge yan u dakan e fayleng. Sana gur chongin e tabinaew ni ke chongingaed ko Galasia ko bo’or e mfen. Ra bee’ ma kemus ni go’ir e ma un ko biney e galasia u lane tabinaew rok. Sana bay e mabgol rom fa danga’, sana bay e bitir fa danga’ u tabinaew rom.
Demturug e rogom, rayong ningam fi’leg e tabinaew rom ninge mang e kenginn e gospel nge tafen ko mafil nge fas. Ni t’uf ningam thapeg e muruwel ningam ayuweg e thilyeg ngam ilagaed ko tin ya’el. Bay yib fan ningam folgaed e fanow ko President Nelson ningam “[yarmiy e tabinaew rom] ninge mang e tafen ko mich.“8
Fare to’ogor ra gay rogon ninge fil ngom ni gaan ko ya’el ni dariy’ fan, fa reb e baen, rayog ninge soen boech. Ke salap ko baen nima yarmiy e ngongol ngam rrin’ u boron. Irra gay rogon ninge pinning tiyaen’med nga reb e ba’nen ningam lemnog nib gaa’fan, machane nib riyul’, gathi gaa’fan. Irra pinningmed ningam “tam’ra ko bo’or e ban’en“ ninge yoeg ningam pii’ keru’med nga “fare’nem [nib] gaa’fan.“9
Kug falflaen’ ni fan e “labthir nib fel’,“10 ni yaedma ayuweg e tabinew ningar thapeged e gaan ko ya’el, tha’ nib t’uf, nge gosgos ko tabinaew ni fel’ rogon. Fapi fil kar pii’ed ngog nap’an kug bitir ke ayuwegnged nib fel’ rogon. Pi labthir, wenig ningam chuchuwgurnag ngak e bitir romed. Yaedba t’uf bo’or e ningyal’ rom, gathi buchuw.
Ayuweg ko Galasia
Nap’an ngad rrin’ed pin’ney, fare Galasia ra ayuwegmed. E birodad u galasia nira un e gaan ko ya’el u tabinaew. Nap’an e duw ney, kug guyed e ayuw nem ko Galasia ulan urngin e Sunday School nge Primary. Gadadra guy ta’abrogon ulan fapi Mo’olung ko Aaronic Priesthood nge Young Women. Ra tabab u January, fare babyor ko Madnom ni fan fapi mo’olung nem, u bo’or e thin ra thilyeg boech. Irra puluwgaed ko kenginn e gospel nib t’uf, machane nira yarmiy ninge un Come, Follow Me—For Individuals and Families. I’ir e thilyeg nib chigchig, machane nira yoeg e thilyeg nib gaa’ ni fan e gaan ko ya’el ngak e gidii’ nib fel’ yangren.
Mang reb e rogon ko ayuw ninge yoeg fare Galasia ngay? Nap’an e misa’ gadadma fek fare sacrament, nira ayuwegdaded ningad fi’leged e laniyaen’daed ngak Tathapeg urngin e week. Ulane Galasia ngad mukungaed’ uta’abang ko reb e gidii’ ni michaen’ ni bay ta’abrogon e michmicheg roraed ngodaed. Fapi tha’ nib t’uf rodad ngak reb e gachalpen rok Yesus Kristus ra mang e dayif ko rogon gachalpen rodad u tabinaew rodad.
Nap’an bay 14 e duw rog, e tabinaew rog kar ranoed nga reb e nam. Ere, sana gathi yan nib kireb ngomed, machane u laniyaen’ug, nap’an fare ningayl’ nem, i’ir e magothgoth. Bay yib fan ni gura mukun’gaed ko bo’or e gidii’ dagu nang. Bay yib fan ni urngin e young men u ward ranoed nga reb e school. Nge, u tafnay rog ni 14-e-duw, Kug lemnog, “Urrogon e labthir rog ra rrin’ed pin’ney ngog?” Kug thamiy e yafas rog ke kirebnag.
Machane, udakaen e Young Men activity, Kug mang e fagar ko reb e chongin ko quorum rog, ke mang e fagar rog. Arragon, fapi chongin ko bishopric nge Aaronic Priesthood advisers kar tiyaen’raed ngog. Kar uned e athletic events rog. Kar yoloeygaed e babyor Ngog urngin e rran. Kar thamgiliyed ningar non ngog nap’an Kug waen nga colleg ma nap’an Kug waen ko mission rog. Reb fagar ke yib nga airport nap’an Kug taw u tabinaew. Kug falflaen’ ko manemus ni fan fapi walageg nib fel’ nge ngongol ko t’ufeg nge ayuw roraed. Kar fi’leged owcheg nga tharmiy, nge yafas rog ke tamilang, falfalaen’, marib falfalen’.
Urrogon ningad, fapi labthir nge tiyugang’, ayuweged fapi gidii’ nib yangren ningar nanged dar ranoed yigo’ raed ko fare kanawo’ ko michmicheg? Arragon u reb e rogon, gadadma pinningraed ningar uned e mo’olung nib gaa’ nge chigchig—ko For the Dtrength of Youth mo’olung nge youth camp ma quorum fa class. Dammu lemnog e gelngin nib waer ni ra yib udakaen e sak’iygaed uta’abang ko reb e gidii’ nima gay rogon ningar gelnoged. Pi Bishop nge tiyugang’, wening nigam duruwiy’ fapi bitir nge gidii’ ni fel’ yangren ko ward romed. Yaedba t’uf bo’or e ningyal’ rom, gathi buchuw.
Fa’an gur e tiyugang’, e yoror, fa chongin e quorum, fa reb e Gidii’en Got, fa’an bay e rogon ningam ayuweg e yafas ko e bee’ ni fel’ yangren, my ayuweg ir ninge pethpeth nga tharmiy. Sana a ngongol ko ayuw rom i’ir fare ban’en ko “ayuw ko Galasia“ fare bee’ nib fel’ yangren ba t’uf.
Pi walageg, Gube micheg ni fare Somol e be fekdad ko re Galasia ney. Irba ayuweg e pi tiyugang’ rodad ningar powiy’daed nga gaan ko ya’el nib t’uf ngodaed ningad fasgaed nap’an fatin tomur erran ney. Gaan ko tin ya’el ra ayuwegdaed ningad michuwaen’daed ma dad mulgaed ko mich. U dakean fithngan Yesus Kristus, amen.