Ul’ul’ nge Sul ko Pagaen’
Pagaen’uy ngak Somoel e be yip’ fan ni ngan pa’agaen’uy ko ngiyal’ Rok’ nib mu’un e gum’aen’ nge athamgil ngay ko fapi yiko’ ulan e yafos.
Pagal ni fak mow e m’ar ko mission rok u Africa min fek ko taflay ni bo’or talin e falay e dariy riy. Nap’an ni gamow be be’eg fare babyor rok ko tomur riy nike m’ar, kug lem nigew ni ra kirbaen’, machane danga’ ya ke yoloy, “Nap’an ni gub thig ulan fare singil ko emergency, kug thamiy e gapas. Dariy bi’id ni fani gub ul’ul’ ma gub sug ko falfalaen’ ulan e yafos rog.”
Nap’an ni gu be’eg new e ppin rog e tiney e thin, me suguy mow e falfalaen’. Ul’ul’ nag ko falfalaen’ nib alamrin. Dariy bi’id ni kug rung’ag new mornga’agen e falfalaen’ ni kan weliy ni arrogan, ma thin rok’ e rib puluw. Gamow manang ni falfalaen’ nike weliy e gathi fan ban’en nike falfalaen’ ngay machane ba falfalaen’ ko gapas nima yib nap’an ni gadaed ra sobut’ nagdad ngak’ Got ma gadad pagaen’ Ngak’ ko gubin ban’en.1 Gadaed gubin ma ke buch rodaed ulan e yafos rodaed nap’an Got e yibi pii’ e gapas ngodad ma ayuweg daed ni ngad thap gad ngak Kristus dem turug gelngin e gafgow ulan e yafos rodad.1
Lehi e fil ni fa’an dani mul Adam nge Eve “yow ra magaey u ba dodow ni dariy thibngin, ma dabiyog ni ngar falfalaen’ gow, ya dar nangew e kirbaen’; …
“Machane musap gaed, gubin ban’en ma kan rin’ u fithik’ fare gonop rok’ e cha’ ni manang gubin ban’en.
“Adam e mul ni nge sum e gidii’; ere gidii’ e bay, ni nge yog e falfalaen’ ngoraed.”2
Rran sap ngay, ma gafgow nge kirbaen’ e ma fal’egin dad ni ngaed thamiyed e falfalaen’ ni fa’an nra pa’agaen’dad ngak Somol nge fare tonom Rok ni fan ngodaed. Biney nib riyul’ e ri weliy be’ nib cheag ko ma yol ni poet u nap’an e 13th-century: “Kirbaen’ e ma fal’egin rogom ko falfalaen’. Ma wolgiy gubin ban’en ulan e na’un rom nga wan, ni nge yog ni fare falfalaen’ nib be’ech e nge yib me yan ngalan fare na’un. Ma ru’rug fare yuwan e gak’iy ulan gum’ircha’em nib magchol ram’en, ya fa tin nib be’ech, mab gulung’lung e yuwan e gak’iy ni nge tugul u tagil’ rad. Ma pug lik’ngin e gak’iy nike kireb, ni nge yog ni fa tin nib be’ech lik’ngin nbay u tangin e rayog ni nge tugul. Dem turug ko mang kirbaen’ ni bay u gum’ircha’em, bo’or ban’en nib mangil nra yon’ luwan raed.”3
President Ruseell N. Nelson ke fil, “Fatin falalaen’ nibe pii’ Somooel [ngodaed] … ma yaen nga manemus, nibe ayuwegdaed ko ‘tin kireb rodaed u gubin yal’’[Doctrine and Covenants 121:7] nira mang thothup ni fandaed.”5 Pi sikeng nge tin kirebaen’ rodad ra gay e falflaen’daed nib gaa’.6
N’en nib mangil ni mornga’agen fare gospel e gathi fare micheg ko yafos ni dariy e kirbaen’ nge gafgow riy machane ba yafos nib sug ko fan e thin nge bay fan—ba yafos ni kirbaen’ nge gafgow rodaed e rayag ni nge “ya ke m’ay u dakan e falfalaen’ roraed ngak’ Kristus.”6 Fare Tathapag e yog, “Bayi gafgow nagmed e fayleng: machane dab mu rusgad; ya kug gel ko fayleng.”7 Gospel Rok’ e ireray e mulwol ko thap. Kirbaen’ nib ta’areb ko thap ngak Yesus Kristus ni kan micheg nbay fare falfalaen’ riy nima athamgil.
Mornga’agen e milekag ko fapi Jaredites ko fare nam ni kan micheg nag e rayag ni ngaed fanayed ni woed e bi rodaed e milekag u fayleng. Fare Somoel e micheg nag ngak walagen Jared nge pi gidii’en ni ra un ngoraed “nga lan ba nam [ni’r] e ba nam nib mel’eg u fithik’ gubin e pi nam u fayleng.”8 Yog ngoraed rogon ni ngar toeyed e m’uw, mi yaed rrin’ u fithik e liyor ni woed rogon ni yog Somol ngoraed. Ma, nap’an ni be mon’og fare muruwel, walagen Jared nib mo’on e yib reb e lem ngak ko mornga’agen fare muruwel rok Somoel ko fapi m’uw ni yaed be toey. Me yor:
“O Somoel, kug rin’ fare muruwel ni kam chiyliy ngog, ma kug toey fapi m’uw ni boed ni kamoeg rogon ngog.
“Ma musap, O Somoel, ma dariy e magael u langgin.”9
“Musap, O Somoel, ngam pagmaed nggu thʼaebed e giday ney nib gaaʼ nga barbaʼ u fithikʼ e lumor?”10
Bay bangiyal’ ni kam meybil ngak Got ni arragon? Nap’an nran gay rogon ni ngan fol ko fapi motochiyel nike pi’ Somol machane dar yog, darma yib ko tafney rom nib t’uf ni ngam man ko biney e yafos u fithik’ e lumor?11
Walagen Jared nib mo’on e fith ko uw rogon nrayag ni ngar pared ni yaed ba fos ulan fapi m’uw. Ma ki yor, “Ma ka gamaed ra yim’, ya dabiyog ni nggu pogofan gaed u langgin, ya kemus ni chu’uw i nifeng ni bay riy e ra m’ay.”12 Pi gafgow nbay ko yafos e ma l’gin nib mom’aw rogon ni ngan pogofan ma tafney rodaed e gadad be lem ko uw rogon ni gadaed ra thap ko reb e rran, ni ngan sul nga tafen e chitamangdaed.
Tomren nike ayuweg Somol walagen Jared nib mo’on, me aram ni weliy, “Dabiyog ni ngam th’aeb e giddy ney nib to’aer ma kemus ni fa’an Gura [falfal’eg rogom] ni fan ko pi n’ew u maday, nge nifeng nibe show iyaen, nge yulu’ ni bay yib.”14
Somol e yog ngak fapi Jaredites ni dabiyog ni ngar thimur gaed ko fargi nam ni kan micheg nag nde moy roraed. Gathi yaed e yaed be duwgliy, ma kemus rogon nrayog ni ngar thap gad nga barba’ fare day e nge pagaen’ raed Ngak’. Pinn’ey ni buch nge gafgow ni pi’ Somol ngorad e ayuweg walagen Jareb nib mo’on fare mich rok me pa’agan’ ngak Somol.
Kam guy rogon fapi meybil rok e thil ko duwer nge tin nibe m’agfaen’ ngay nge mang e mich rok nge pa’agaen’ rok:
“Ma gumnang, O Somoel, ni gur e gubin e gelingin ma bay rom, ma rayog ni ngam rinʼ banʼen ni demutrug rogon ni gabaʼadag ni fan ko gidiiʼ; …
“Musap, O Somoel, gur e rayog ni ngam rinʼ e biney. Gamaed manang ni gur e rayog rom ni ngam dag gelingim ni maʼangʼang, niʼir e ba achichig fan u waenʼ e gidiiʼ.”14
Kan yoloy mornga’agen fapi Jaradites ni kar “ranoed nga langgin fapi … barkow, mar mileage gaed u maday, ni kar paged yaed nga lani pa’ Somoel ni Got roraed.”16 Ni ngan paged yaed e be yip fan ni nge pa’agaen’ raed. Fapi Jaredites e gathi karanod ngalan fapi barkow ni bachan e yaed manang ko mang e re buch. Kar ranod ngalan ni bachan e kar nanged rogon ni nge pa’agan’ raed nga gelngin Somoel, fal’ngin, nge murunguy rok, ma aram ni paged yaed nge pi murus roraed ngak Somoel.
De’ n’uw napan e fak ko fakag i Abe nike rus ni nge yaen nga e carousel ni bay e gamanman ni ma yan nga lang nge nga but’. Me ba’adag reb ni de miith’miith’. Titaw nike non ngak nge pii’ athamgil, ere, ke pa’agan’ ngak, nike yaen udakaen. Nike yoeg ufithik e sminmin nib ga’, “dabgu thamiy e kalayuw, machane kug kalayuw. Sana boed rogon ni kar thamtham fapi Jaredites. Pa’agan’ ngak Got de thamiy e kalayuw ni bin som’on, machane e falfalaen’ ra yib.
Fare milekag roraed e dani mom. “Yo’or yay ni tharbiy raed e day, ni bachan e pi n’ew ni gagang’ nibe pil nga dakanrad.”17 Kan yoloy mornga’agen ni “de tal e nifeng ko thow iyaen [ngoraed] ko farengi binaw nni michmicheg.”18 Dem turug gelngin nib mom’aw rogon ni ngan nang fan, nib ga’ ni woed ulan e yafos rodad nib gel e nifeng nge mi yiko’ u maday, rayag ni nge pa’agan’ daed ni gadad manang ni Got e be thow daed ko nifeng iyaen nga tabinaew.
Ma ki ul’ul’, “Ere aray rogon nra maenʼ gaed iyaen; ma dariy ba kan u maday ni rayog ni nge bilig e mʼuw roraed, mus ko ray ma dabiyog ni nge bilig raed; ma gubin e ngiyalʼ ma bay e magael roraed, ni demutrug ko yaed bay u dakean e day u lang ara fithikʼ e day.”18 Gadad be par ko ba fayleng ni bay e kireb riy ni woed e n’ew, m’ar ko dogur nge lem, nge gubin mit e gafgow nibay nga dakan daed. Machane, u dakan fare mich ngak’ Yesus Kristus nge mel’eg ni nge pa’agan’ daed Ngak’, gadad rayog ngodad fare tamilang, ni dem turug ko u dakan e day fa u tanggin. Gadad rayog ni nge pa’agan’ dad ngak Got ni dar ma tal i pi’ dad ko farengi nam ni mich’micheg.
Nap’an nibe yon’ rad ulan fapi m’uw, fapi Jaredites “ere ra oged e soerokʼ ngakʼ Somoel; … arragon [kar] oge magaer nge soerokʼ ngakʼ Somoel ni poloʼ e rran; ma napʼan ni nepʼ, ma dar talgaed i oge soerokʼ ngakʼ Somoel.”19 Kar thamiyed e falfalaen’ ni dem turug gelngin e pi gafgow roraed. Dawor taw gad nga binaw nib micheg, machane kar falflaen’gaed ni fan fapi taw’ath nib athamgiliy ngar pagaen’gaed Ngak.21
Fapi Jaredites era man’ gaed iyaen ni dalip miri’ay nge aningeg ire gag nge aningeg i rran u maday.21 Rayag ni ngam nangfan e biney? Pagaen’uy ngak Somoel e be yip’ fan ni ngan pa’agaen’uy ko ngiyal’ Rok’ nib mu’un e gum’aen’ nge athamgil ngay ko fapi yiko’ ulan e yafos.23
Ma aram, fapi Jaredites “mar madab gaed nga dappʼelʼay ko fare binaw nni michmicheg. Ma napʼan nra tayed ayraed nga dakean dappʼelʼay ko fare binaw nni michmicheg mar siroʼ gaed nga dakean e buutʼ, mar sobutʼ niged yaed u mit Somoel, me mapʼ luʼraed ko falfalaenʼ u pʼoewchen Somoel ni bachan e pi murnguy rokʼ ngoraed nib sumunguy.”22
Fa’an gadaed ba yul’yul’ i tay chiylen e pi m’ag rodaed, rayog rodaed ni ra boran riy ma gadad ra taw nga tabinaw u fithik e gapas ma gadaed ra garbug nga mit Somoel ngaed oged e magar ngak ma gadaed be yor ni bachan e murnguy rok ulan e yafos rodad, nib mu’un fare kirbaen’ nike yib tagil’ ko falfalaen’.23
Gube micheg ni nap’an ni gadaed ra ul’ul’ me pa’agan’ daed ngak Yesus Kristus nge tin ni fan e yafos rodaed, ra yib i guy daed, ma munguy nag gum’ircha’dad, me l’agin daed ni ra “pii’ e gapas nga laniyaen’daed.”24
Gube micheg ni Yesus e ir Kristus. {I’ir e tabolngin ko urngin e falflaen’.27 Ke pii’ wo’en ngoraed ni nge yog ni ngar mugu’uliyed.28 I’ir fare tamilang, fare yafos, nge athap ko fayleng.26 Dabi pag e pi’in ni yaedra yib ngom ni ngar m’aed.27 U dakean fithngan Yesus Kristus, amen.